Kifer bann vrai chrétien pa servi la croix kan zot adore Bondié?

ZORDI ena dimoune par million ki adore ek respecté la croix. Enn encyclopedie (The Encyclopædia Britannica) appel la croix “principal symbole la religion chrétien.” Mais, bann vrai chrétien pa servi la croix kan zot adore Bondié. Kifer?

Enn raison important c’est parski Jésus Christ pa finn mort lor enn la-croix. Mot grec ki en general servi pou traduire “la croix” li stauros. Sa vedir “enn poteau droite.” Guette seki The Companion Bible dire: “[Stauros] jamais vedir deux boute di-bois, enn ki droite ek enn en travers . . . Pena nanyin dan langage grec ki servi dan Nouveau Testament ki faire pensé ki ti ena deux boute di-bois.”

Dan plusieurs text, bann ecrivain la Bible servi enn lot mot pou koz lor sa kitsoz ki ti servi pou faire touye Jésus-la. Zot servi mot grec xulon. (Actes 5:30; 10:39; 13:29; Galates 3:13; 1 Pierre 2:24) Sa mot-la vedir “enn boute di-bois” ou-soit “enn poteau, ou-soit mem enn pié.”

Livre Das Kreuz und die Kreuzigung (La croix et la crucifixion), par Hermann Fulda expliké kifer ti servi enn simple poteau di-bois pou faire touye dimoune. Li dire: “Pa touletan ki ti ena bann pié dan l’endroit kot ti faire touye bann dimoune en public. Alors, ti fonce enn poteau dan la terre. Ti attache, ou-soit ti couloute la main bann bandit lor la, lé-bras la-haut, ek bien souvent, ti attache ek ti couloute zot li-pied aussi.”

Mais, preuve pli sur sorti dan Parole Bondié. L’apotre Paul dire: “Christ finn acheté nou ek finn libere nou ar malediction la Loi, kan li-mem finn vinn enn malediction dan nou place, parski finn ecrire: ‘Kikenn ki pendi lor enn poteau, [“lor enn di-bois,” dapré la Bible de Chouraqui, la Bible de Darby, la Bible à la Colombe ek la Traduction Œcuménique de la Bible] li maudit.’” (Galates 3:13) Ici, Paul cite Deutéronome 21:22, 23, ki pé koz lor enn poteau, pa enn la-croix. Sa moyen pou faire touye enn dimoune-la ti consideré couma “enn malediction.” Alors, li pa bon ki bann chrétien ena bann zimage kot Jésus coulouté lor enn la-croix dan zot lakaz.

Pena nanyin ki faire nou croire ki pendant premier 300 an apré la mort Jésus, bann chrétien ti servi la croix kan zot ti adore Bondié. Mais, dan quatrieme siecle, l’empereur païen Constantin ti vinn enn soi-disant chrétien ek li, li’nn encourage tou dimoune pou servi la croix couma symbole sa religion-la. Ti kapav ena plusieurs raison ki ti pousse Constantin pou faire sa, mais en tou cas, la croix pena nanyin pou faire avek Jésus Christ. La croix li ena enn l’origine païen. Enn encyclopedie catholique (New Catholic Encyclopedia) dire: “Nou trouve la croix dan bann culture avant lepok Jésus ek aussi dan bann culture ki pa chrétien.” Plusieurs livre finn associé la croix avek bann religion ki ti adore la nature ek aussi avek bann païen ki ti faire bann kitsoz immoral dan zot religion.

Mais, kifer finn encourage dimoune pou servi sa symbol païen-la? Kitfois, finn faire sa pou ki bann païen accepté pli facilement religion “chrétien.” Mais, la Bible condamne tou dimoune ki adore n’importe ki symbol païen. (2 Corinthiens 6:14-18) La Bible condamne aussi tou bann forme idolatrie. (Exode 20:4, 5; 1 Corinthiens 10:14) En tant ki chrétien nou ena bann bon raison pou pa servi la croix kan nou adore Bondié.a