Res Lwin ar Nwarte—Kontign Res dan Lalimier

1-2. (a) Dan ki sitiasion Pol ti ete kan li ti ekrir bann Efezien? (b) Ki kestion nou pou reponn dan sa lartik-la?

KAN Pol ti prizonie dan enn lakaz dan lavil Rom, li ti anvi ankouraz so bann frer ek ser. Selman, li pa ti kapav al get zot. Alor, li ti ekrir zot bann let. Enn parmi sa bann let-la, se let ki li ti ekrir bann Efezien ver lane 60 ouswa 61 Nou Lepok.—Efe. 1:1; 4:1.

² Anviron di-z-an avan, Pol ti pas inpe letan dan lavil Efez. Li ti prese ek li ti ansegn bon nouvel laba. (Zist. 19:1, 8-10; 20:20, 21) Li ti telman kontan so bann frer ek ser ki li ti anvi ed zot pou zot res fidel ar Zeova. Sa bann Kretien-la ti ena lesperans pou al dan lesiel. Alor, kifer lapot Pol ti koz lor “nwarte” ek “lalimier” ar zot? Ek ki leson tou bann Kretien kapav aprann ar bann konsey ki Pol ti donn bann Efezien? Dan sa lartik-la, nou pou reponn sa bann kestion-la.

ZOT SORTI DAN NWARTE POU VINN DAN LALIMIER

 3. Ki lexpresion Pol ti servi dan let ki li ti ekrir bann Efezien?

³ Dan so let, Pol ti dir bann Efezien: “Avan, zot ti dan nwarte, me aster-la zot dan lalimier.” (Efe. 5:8) Pol ti servi bann lexpresion “nwarte” ek “lalimier” pou explike ki kantite bann Efezien ti sanze. Anou gete kifer Pol ti dir bann Efezien ki “avan, zot ti dan nwarte.”

 4. Ki kalite lavil Efez ti ete?

⁴ Zot ti dan nwarte parski zot ti dan fos relizion. Avan ki zot vinn dan laverite, bann Kretien lavil Efez ti krwar dan bann siperstision ek bann fos lansegnman. Dan lavil Efez, ti ena tanp Artemis. Sa lepok-la, bann dimounn ti konsider sa tanp-la kouma enn parmi bann pli zoli batiman ki bann dimounn inn aranze. Bann dimounn ti al dan sa tanp-la pou ador bann zidol. Bann artizan ki ti pe fer sa bann zidol-la ek ki ti pe vann zot, ti pe fer boukou kas gras-a sa. (Zist. 19:23-27) Anplis, dan Efez, boukou dimounn ti pe osi fer mazik.—Zist. 19:19.

 5. Kouma bann Efezien ti ete “lor plan moral”?

⁵ Zot ti dan nwarte parski zot ti bien imoral. Bann dimounn dan Efez ti bien imoral ek zot pa ti ena okenn laont pou bann kitsoz ki zot ti fer. Zot bann pies teat ek zot bann fet relizie ti met boukou laksan lor sex. (Efe. 5:3) Boukou Efezien ti “insansib lor plan moral.” Sa lexpresion-la vedir ki zot konsians ti nepli repros zot ditou. (Efe. 4:17-19) Avan ki bann Kretien lavil Efez ti konn bann prinsip Zeova, zot pa ti kas latet ar Zeova ek zot konsians pa ti fatig zot kan zot ti fer bann move kitsoz. Se akoz sa ki Pol ti dir zot ki “zot lespri [ti] dan nwarte ek zot [ti] separe ar lavi ki sorti kot Bondie.”

 6. Kifer Pol ti dir bann Efezien ki “aster-la zot dan lalimier”?

⁶ Selman, sertin Efezien ti reisi sorti dan sa nwarte-la. Akoz sa, Pol ti dir zot ki “aster-la zot dan lalimier an rapor avek Lesegner.” (Efe. 5:8) Sa bann Efezien-la ti sanze ek zot ti koumans viv an-akor avek Parol Bondie, ki ti parey kouma enn lalimier ki ti pe gid zot. (Ps. 119:105) Zot ti rezet bann fos lansegnman ek limoralite. Zot ti osi fer zot maximum pou “imit Bondie,” pou ador Li, ek pou fer Li plezir.—Efe. 5:1.

 7. Kifer nou parey kouma bann Kretien dan Efez?

⁷ Nou osi, avan ki nou konn laverite, nou ti dan nwarte lor plan spiritiel ek moral. Sertin parmi nou ti pe fer bann fet ki Zeova pa kontan, ek lezot kitfwa ti ena enn lavi imoral. Selman, kan nou’nn aprann seki Zeova kontan ek seki Li deteste, nou’nn fer bann sanzman dan nou lavi. Nou’nn koumans viv an-akor avek so bann prinsip, ek gras-a sa, nou pe gagn boukou bienfe. (Iza. 48:17) Me mem si nou’nn reisi fer bann sanzman, li pa touletan fasil pou res lwin ar nwarte ek pou “kontign mars kouma bann zanfan lalimier.” Alor, kouma nou kapav fer sa?

Avek permision the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

REZET NWARTE

 8. Dapre Efezien 5:3-5, ki kitsoz bann Kretien dan Efez ti bizin rezete?

⁸ Lir Efezien 5:3-5. Pou ki bann Kretien dan Efez res lwin ar limoralite, zot ti bizin rezet tou bann kitsoz ki Zeova pa kontan, kouma par exanp enn kondwit imoral ek bann parol ki vilger. Pol ti rapel bann Efezien ki zot ti bizin rezet sa bann kitsoz-la pou ki zot kapav gagn enn “leritaz dan Rwayom Lekris ek Bondie.”

 9. Kifer nou bizin rezet ninport ki kitsoz ki kapav fer nou tom dan piez limoralite sexiel?

⁹ Nou osi, nou bizin kontign fer zefor pou pa fer “bann travay initil ki fer dan nwarte.” (Efe. 5:11) Kifer? Parski kan enn kikenn kontign get, ekout, ouswa koz lor bann kitsoz imoral, li ena plis sans pou fer seki pa bon. (Zen. 3:6; Zak 1:14, 15) Par exanp, dan enn pei, boukou frer ek ser ti “fer kamarad” ar bann lezot Temwin lor enn rezo sosial. O-koumansman, zot ti pe koz lor bann kitsoz spiritiel. Me tigit-tigit, zot ti koumans koz lor bann kitsoz ki pa ti fer Zeova plezir, ek laplipar zot bann konversasion ti lor sex. Avek letan, boukou parmi sa bann frer ek ser la ti tom dan piez limoralite sexiel.

10. Ki kitsoz Satan anvi fer nou krwar? (Efezien 5:6)

¹⁰ Satan ek so lemond anvi anbet nou ek fer nou krwar ki Zeova pe priv nou bann bon kitsoz. Par exanp, zot rod fer nou krwar ki li pa move si nou ena enn lavi imoral. (2 Pier 2:19) Sa pa etonn nou ki Satan azir koumsa, parski se enn parmi bann taktik ki li pe servi depi bien lontan pou met bann dimounn dan lerer. Ek lerla, bann dimounn nepli kapav fer diferans ant seki bon ek seki pa bon. (Iza. 5:20; 2 Kor. 4:4) Se pou sa rezon-la ki bann fim, bann program televizion, ek bann sit Internet ankouraz bann dimounn pou fer bann kitsoz ki Zeova pa kontan. Satan anvi fer nou krwar ki pena nanye demal pou fer sa bann move kitsoz-la. Okontrer, li anvi ki nou krwar ki se zis bann lamizman ek ki sa pa pou fer nou okenn ditor.—Lir Efezien 5:6.

11. Servi lexanp Angela pou montre ki konsey ki trouv dan Efezien 5:7 li bien inportan. (Get zimaz osi.)

¹¹ Satan anvi ki nou frekant bann dimounn ki pou ena enn move linflians lor nou. Lerla, sa pou pli difisil pou nou swiv bann prinsip Zeova. Akoz sa, Pol ti ankouraz bann Efezien pou “pa asosie zot ar” bann dimounn ki fer seki move devan lizie Bondie. (Efe. 5:7) Azordi, nou bizin fer plis atansion ki bann Kretien dan Efez. Kifer? Parski azordi, nou pa zis pas letan ar bann dimounn ki nou zwenn fasafas, me nou osi pas letan ar bann dimounn lor bann rezo sosial. Angela,a enn ser ki res Lazi, explike kouma bann rezo sosial zot bien danzere. Li dir: “San ki nou rann nou kont, bann rezo sosial kapav sanz nou fason panse. Tigit-tigit, mo ti fer ‘kamarad’ ar bann dimounn ki pa kontan Zeova. Alafin, mo ti koumans panse ki li normal pou fer bann kitsoz ki pa fer Zeova plezir.” Erezman, gras-a led bann ansien, Angela inn reisi fer bann sanzman ki bizin. Angela dir: “Aster-la, mo pas plis letan pou fer bann kitsoz spiritiel ek mwins letan lor bann rezo sosial.”

12. Ki kitsoz kapav ed nou pou kontign swiv bann prinsip Zeova?

¹² Dan lemond azordi, bann dimounn panse ki li normal ki zot ena enn kondwit imoral. Me nou kone ki sa li fos! Akoz sa, nou bizin kontign fer zefor pou rezet sa fason panse la. (Efe. 4:19, 20) Nou kapav demann nou-mem: ‘Eski mo fer zefor pou pa frekant plis ki bizin bann koleg travay, bann kamarad lekol, ek bann dimounn ki pena okenn respe pou bann prinsip Zeova? Eski avek kouraz mo kontign swiv bann prinsip Zeova, mem si akoz sa bann dimounn panse ki mo enn ti lespri?’ Dan 2 Timote 2:20-22, Pol ankouraz nou pou bien swazir nou bann kamarad mem dan lasanble. Kifer li ti dir sa? Parski kitfwa sertin parmi zot pa pou ed nou pou res fidel ar Zeova.

“MARS KOUMA BANN ZANFAN LALIMIER”

13. Ki nou bizin fer pou nou “kontign mars kouma bann zanfan lalimier”? (Efezien 5:7-9)

¹³ Pol ti ankouraz bann Efezien pou pa zis rezet nwarte, me osi pou “kontign mars kouma bann zanfan lalimier.” (Lir Efezien 5:7-9.) Ki li ti pe rod dir? Li ti pe rod dir ki nou bizin konport nou kouma bann vre Kretien 24 lor 24. Pou nou reisi fer sa, nou bizin lir ek etidie Labib ek nou bann piblikasion. Nou bizin osi swiv bann lansegnman ek lexanp Zezi, parski Zezi li “lalimier lemond.”—Zan 8:12; Prov. 6:23.

14. Kouma lespri sin kapav ed nou?

¹⁴ Pou nou kontign konport nou “kouma bann zanfan lalimier,” nou bizin osi led lespri sin Bondie. Kifer? Parski li pa fasil pou res fidel ar Zeova dan sa lemond imoral la. (1 Tes. 4:3-5, 7, 8) Lespri sin Bondie kapav ed nou pou rezet fason panse sa move lemond-la. Li kapav osi ed nou pou kontign fer seki bon.—Efe. 5:9.

15. Ki nou bizin fer pou ki nou gagn lespri sin? (Efezien 5:19, 20)

¹⁵ Pou nou gagn lespri sin, nou bizin priye Zeova. Zezi ti dir ki Zeova “donn lespri sin bann ki demann li.” (Lik 11:13) Enn lot fason osi ki nou gagn lespri sin, se kan nou loue Zeova ansam ar nou bann frer ek ser dan renion. (Lir Efezien 5:19, 20.) Lespri sin pou ed nou pou viv dan enn fason ki pou fer Bondie plezir.

16. Ki nou bizin fer pou ki nou pran bann bon desizion? (Efezien 5:10, 17)

¹⁶ Kan nou ena bann desizion inportan pou pran, nou bizin “konpran ki volonte Zeova ete,” ek apre sa, nou bizin azir an-akor ar so volonte. (Lir Efezien 5:10, 17.) Par exanp, kan nou pe fer fas ar enn sitiasion difisil, nou bizin konn fason panse Zeova lor la. Pou nou konn fason panse Zeova, nou bizin rod bann prinsip Labib ki pou itil dan sa sitiasion-la. Ek kan nou’nn trouv sa bann prinsip-la, nou bizin met zot an pratik. Lerla, sa pou ed nou pou pran bann bon desizion.

17. Ki savedir ‘servi nou letan dan meyer fason posib’? (Efezien 5:15, 16) (Get zimaz osi.)

¹⁷ Pol ti osi konsey bann Efezien pou servi bien zot letan. (Lir Efezien 5:15, 16.) Satan, “sa kikenn ki move la,” anvi ki nou telman okipe ar bann kitsoz sa lemond-la, ki nou nepli ena letan pou servi Zeova. (1 Zan 5:19) Par exanp, si enn Kretien fer bann kitsoz materyel, so letid, ouswa so karyer pas avan so servis pou Zeova, sa montre ki li’nn les li inflianse par fason panse sa lemond-la. Mem si pena nanye demal ar sa bann kitsoz-la, fode zame ki zot pas an premie dan nou lavi. Pou nou mars “kouma bann zanfan lalimier,” nou bizin “servi [nou] letan dan meyer fason posib,” setadir ki nou bizin res konsantre lor seki pli inportan.

18. Ki Donald ti fer pou ki li kapav servi pli bien so letan?

¹⁸ Reflesi kouma to kapav fer plis pou Zeova. Se seki Donald, enn frer ki res Sid-Afrik, ti fer. Li dir: “Mo ti reflesi lor mo sitiasion, ek mo ti sipliy Zeova pou ed mwa pou fer plis dan predikasion. Mo ti osi priye Li pou mo gagn enn travay ki pou fer mwa ena plis letan pou prese. Gras-a Zeova, mo’nn reisi gagn sa travay-la, ek sa finn permet mwa ek mo madam pou servi Li aplintan.”

19. Kouma nou kapav kontign mars “kouma bann zanfan lalimier”?

¹⁹ Let ki Pol ti ekrir bann Efezien ti ed zot pou res fidel ar Zeova. Ek bann konsey ki ena ladan kapav ed nou osi. Kouma nou’nn trouve dan sa lartik-la, let lapot Pol kapav ed nou pou swazir bien nou bann divertisman ek nou bann kamarad. Li motiv nou pou etidie Labib regilierman, pou ki nou kapav kontign swiv bann prinsip Zeova. Ek li montre nou kouma lespri sin kapav ed nou pou devlop bann zoli kalite. Kan nou met an pratik bann konsey lapot Pol, sa kapav ed nou pou pran bann bon desizion, ki an-akor ar fason panse Zeova. Ek si nou kontign fer tou sa bann kitsoz-la, nou pou res lwin ar nwarte ek nou pou kontign res dan lalimier!