Parent, protege ou l’heritage ki ena enn grand valeur

“La sagesse donne enn protection . . . [Li] garde en vie bann ki ena li.”—Ecclésiaste 7:12.

 1. Kifer bann parent bizin considere zot zenfant couma bann cadeau?

KAN enn zenfant vinn lor la terre, li kapav ressemblé so parent lor plan physik, ek souvent li ena aussi mem caractere ki zot. La Bible appel bann zenfant “enn l’heritage Jéhovah.” (Psaume 127:3) Etant donné ki Jéhovah Li-mem ki vrai Createur la vie, Li pé confié bann parent enn kitsoz ki en realité, pou Li. (Psaume 36:9) Parent, couma eski ou considere sa cadeau ki ena enn grand valeur ki Jéhovah finn donne ou-la?

 2. Couma Manoah ti reagir kan li ti aprann ki li pou vinn papa?

² Li bon ki bann parent montré zot l’appreciation ek zot reconnaissance kan zot gagne enn cadeau coumsa. Plus ki 3000 an de cela, enn Israélite ki ti appel Manoah ti ena sa l’attitude-la kan enn ange ti dire so femme ki li pou gagne enn zenfant. Kan Manoah ti tann sa bon nouvel-la, li ti faire sa la-priere-la: “Pardon Jéhovah. To serviteur, ki to finn fek envoyé-la, s’il-te-plait, faire li ré-vinn guette nou, pou li donne nou bann instruction, pou nou koné ki bizin faire concernant sa zenfant ki pou né-la.” (Juges 13:8) Parent, ki ou kapav aprann ar l’exemple Manoah?

Kifer nou bizin l’aide Bondié zordi

 3. Kifer bann parent bizin rod l’aide Bondié pou elevé zot zenfant, surtout dan nou lepok?

³ Zordi plus ki avant, bann parent bizin l’aide Jéhovah pou elevé zot zenfant. Kifer? Parski finn tire Satan ek so bann ange dan le ciel ek finn jette zot lor la terre. La Bible dire: “Malheur pou la terre ek pou la mer, parski Satan finn desann vers zot, ek li ena enn grand colere parski li koné ki li ena enn tigit lé-temps mem.” (Révélation 12:7-9, 12) Satan pareil “couma enn lion ki pé crié, li pé rod kikenn pou li devoré.” (1 Pierre 5:8) En general, bann lion attak bann zanimo ki pli faible ek ki pa kapav defann zot-mem, souvent bann ki jeune. Li sage alors ki bann parent chrétien rod direction Jéhovah pou zot kapav protege zot zenfant. Ki quantité zeffort ou pé faire pou protege ou zenfant?

 4. (a) Couma bann parent pou reagir si zot koné ki ena enn lion en liberté dan zot l’endroit? (b) Ki bann zenfant bizin pou protege zot?

⁴ Si ou koné ki ena enn lion en liberté dan ou l’endroit, surement premier kitsoz ou pou faire c’est pou protege ou bann zenfant. Satan li couma enn rapace. Li rod faire bann serviteur Bondié faire peché, pou ki coumsa, zot nepli gagne So faveur. (Job 2:1-7; 1 Jean 5:19) Bann zenfant, zot aussi zot pa kapav defann zot-mem ek li facile pou attak zot. Pou zot pa tombe dan bann piege Satan, bann zenfant bizin aprann pou konn Jéhovah ek pou obeir Li. Li bien important ki zot gagne enn connaissance ki basé lor la Bible. Jésus ti dire: “Sa-mem ki vedir la vie eternel: aprann konn toi, sel vrai Bondié ek celui ki to finn envoyé, Jésus Christ.” (Jean 17:3) En plus, bann zenfant bizin la sagesse, setadir, capacité pou comprend ek pou applik seki zot aprann. Parski “la sagesse garde en vie bann ki ena li,” ou parent, ou bizin grave la verité dan leker ou bann zenfant. (Ecclésiaste 7:12) Couma ou kapav faire sa?

 5. (a) Couma kapav mette la sagesse dan leker enn zenfant? (b) Couma livre Proverbes montré valeur ki la sagesse ena?

⁵ Ou kapav, ek ou bizin lire la Bible avek ou zenfant. Mais, si ou envie faire zot content Jéhovah ek obeir Li, ou pou bizin faire plus ki sa—zot pou bizin comprend seki ou pé lire. Anou prend enn l’exemple. Ou kapav dire enn zenfant guette bien deux coté chemin, avant li traversé. Pourtant, ena zenfant ki pa obeir. Kifer? Parski kitfois, bann parent pa finn assez explik zot zenfant ki kapav arrivé si enn l’auto tape ar zot. Si zot ti faire sa dan enn fason ki zenfant-la bien comprend sa danger-la, sa ti pou evite enn “betise” ki kapav faire enn accident arrivé. Sa demann lé-temps ek beaucoup patience pou mette la sagesse dan leker enn zenfant. Mais, la sagesse ena enn grand valeur! La Bible dire: “So bann chemin, c’est bann chemin bien agreable, ek lor tou so bann chemin, ena la paix. Li enn pié ki donne la vie bann ki attrape li, ek bann ki tini li ferme, pou appel zot heureux.”—Proverbes 3:13-18; 22:15.

Enn fason enseigné ki donne la sagesse

 6. (a) Souvent, kifer bann zenfant faire seki pa bon? (b) Ki la-guerre pé deroulé?

⁶ Souvent, bann jeune faire seki pa bon, pa parski pa finn montré zot seki bon, mais parski bann kitsoz ki finn montré zot, pa finn touche zot leker—sa pa finn rente endan zot-mem. Satan pé laguerre pou kapav control leker bann jeune. So plan c’est pou expose zot ar bann mauvais l’influence ki ena dan le monde. Li pé aussi essaye exploite zot l’imperfection pou faire zot faire bann mauvais kitsoz. (Genèse 8:21; Psaume 51:5) Bann parent bizin rann zot kont ki Satan vrai-mem pé laguerre pou control leker zot zenfant.

 7. Kifer li pa assez pou dire enn zenfant ki bon ou-soit ki pa bon?

⁷ Normalement, bann parent dire enn zenfant seki bon ek seki mauvais. Zot pensé ki lerla, zot finn enseigne li enn principe moral. Li possible ki zot dire zenfant-la ki li pa bon koz menti, kokin, ou-soit gagne bann relation sexuel en dehors mariage. Seulement, seki bizin pousse enn zenfant pou obeir, c’est pa zis parski so parent finn dire li faire sa; li bizin plus ki sa. C’est plutot bann la-loi Jéhovah ki bizin motive li. Zenfant-la bizin aprann ki kan li obeir bann commandement Jéhovah, li pé agir avek sagesse.—Proverbes 6:16-19; Hébreux 13:4.

 8. Ki qualité l’enseignement kapav aide enn zenfant pou agir avek sagesse?

⁸ Ena beaucoup kitsoz ki kapav aide enn zenfant pou accepté ki ena enn Createur ki bien sage—par exemple l’univers, ki bien compliké, grand varieté bann kitsoz ki ena lor la terre, ek changement bann saison. (Romains 1:20; Hébreux 3:4) En plus, montré zenfant-la ki Bondié content li, ek ki par moyen sacrifice So Garson, Li finn faire l’arrangement pou donne li la vie eternel. Faire li comprend ki li kapav faire Bondié plaisir kan li obeir So bann la-loi. Lerla, surement zenfant-la pou envie servi Jéhovah, malgré tou seki Satan pé faire pou empeche li.—Proverbes 22:6; 27:11; Jean 3:16.

 9. (a) Couma bann parent kapav enseigne enn zenfant dan enn fason ki pou protege so la-vie? (b) Ki l’ordre, bann papa inn gagné, ek ki sa impliké?

⁹ Sa demann bann parent lé-temps, l’attention, ek enn bon l’organisation pou donne zot zenfant enn l’enseignement ki pou protege li, ek ki pou pousse li pou faire seki bon. Li necessaire ki bann parent accepté direction Bondié. La Bible dire: “Zot, bann papa, . . . contigne elevé [zot zenfant] dan discipline ek dan bann l’avertissement Jéhovah.” (Éphésiens 6:4) Ki sa vedir? En grec, mot “avertissement” vedir “mette bann pensée dan.” Donk, bann papa surtout, zot encouragé pou mette bann pensée Jéhovah dan l’esprit ek leker zot zenfant. Si zot faire sa, sa pou vrai-mem enn grand protection pou sa bann jeune-la! Si bann zenfant ena bann pensée Bondié gravé dan zot l’esprit, setadir si zot ena mem fason pensée ki Bondié, sa pou protege zot si zot tenté pou faire seki pa bon.

Enn desir ki motivé par l’amour

10. Ki kitsoz ki important ou koné, pou ou kapav enseigne ou zenfant dan enn bon fason?

¹⁰ Seulement, pou ou kapav elevé ou zenfant couma bizin, ou bizin laisse l’amour motive ou. Li important ki ena enn bon communication entre ou ek ou zenfant. Essaye koné ki pé passé dan so la-vie, ek ki so l’opinion lor different kitsoz. Mette li a l’aise ek avek tact encourage li pou dire seki li pensée. Parfois, li kapav arrivé ki li dire ou bann kitsoz ki choque ou. Faire attention pou pa montré li ki ou finn choqué. Au contraire, ecoute li avek attention.

11. Couma enn parent kapav mette bann pensée Bondié dan l’esprit so zenfant?

¹¹ C’est vrai, kitfois ou finn lire avek ou zenfant dan la Bible, bann la-loi Bondié ki condamne l’immoralité sexuel, ek surement ou finn mem lire sa plusieurs fois. (1 Corinthiens 6:18; Éphésiens 5:5) Sa finn zis faire zot aprann ki Jéhovah content ek ki Li pa content. Seulement, mette pensée Jéhovah dan l’esprit enn zenfant demann plus ki sa. Bizin aide bann zenfant pou zot comprend valeur ki bann la-loi Jéhovah ena. Bizin convaink zot ki bann la-loi Jéhovah, zot droite ek bon, ki li enn bon kitsoz pou obeir sa bann la-loi-la, ek ki c’est enn fason pou zot montré zot l’amour. C’est zis si ou servi la Bible pou raisonne avek ou bann zenfant pou ki zot accepté fason pensé Bondié, ki ou pou kapav dire ki ou finn mette So bann pensée dan zot l’esprit.

12. Couma enn parent kapav aide so zenfant pou ena enn bon point de vue lor relation sexuel?

¹² Kan ou koz lor sexe avek ou zenfant, ou kapav demande li: “Eski to pensé ki si enn dimoune obeir la loi Jéhovah, ek li pa gagne relation sexuel avant mariage, sa pou empeche li vive heureux?” Encourage ou zenfant pou explik so reponse. Ré-examine l’arrangement extraordinaire ki Bondié finn faire pou bann dimoune gagne zenfant, ek apré sa, demande li: “Eski to pensé ki Bondié, ki content nou, pou donne bann la-loi pou prive nou ek faire nou malheureux? Ou-soit eski to pensé ki Li finn donne bann la-loi pou faire nou vive heureux ek pou protege nou?” (Psaume 119:1, 2; Isaïe 48:17) Rod koné ki ou zenfant pensé lor sa sujet-la. Apré sa, ou kapav donne li bann l’exemple pou montré couma l’immoralité sexuel finn faire beaucoup dimoune souffert ek konn bann malheur. (2 Samuel 13:1-33) Si ou raisonne avek ou zenfant pou li comprend ek pou li accepté fason ki Bondié pensé, ou finn deja faire beaucoup pou mette pensée Bondié dan so leker. Seulement, ena enn lot kitsoz ki ou kapav faire.

13. Ki enn zenfant bizin comprend, pou ki sa pousse li pou obeir Jéhovah?

¹³ Li pou sage ki ou pa zis enseigne ou zenfant ki consequence ena kan nou desobeir bann la-loi Jéhovah. Li bon ki ou explik li aussi ki la fason ki nou amenn nou la-vie, sa ena enn l’effet lor Jéhovah. Montré li dan la Bible ki nou kapav faire Jéhovah chagrin kan nou pa faire seki Li demandé. (Psaume 78:41) Ou kapav demande ou zenfant: “Kifer jamais to pa pou envie faire Jéhovah chagrin?” ek explik li ki “Satan, l’ennemi Bondié, finn pretann ki nou servi Jéhovah par l’interet ek pa parski nou content Li.” Apré sa, explik li couma kan Job ti reste fidel, sa ti faire Jéhovah bien content, ek sa finn permette li dementi seki Satan finn dire. (Job 1:9-11; 27:5) Ou zenfant bizin comprend ki par so conduite, li kapav faire Jéhovah plaisir ou-soit chagrin. (Proverbes 27:11) Ou kapav servi livre Écoute le grand Enseignanta pou enseigne ou zenfant lor sa sujet-la ek lor beaucoup lezot sujet important encore.

Bann bon resultat

14, 15. (a) Ki bann leson dan livre Enseignant, finn touche bann zenfant? (b) Ki bon resultat ou finn gagné kan ou finn servi sa livre-la?

¹⁴ Enn grand-pere ki reste en Croatie, ek ki habitué lire livre Enseignant avek so ti-zenfant ki ena sept an, raconté ki ti arrivé enn fois. Ti-garson-la ti dire li: “Mo mama ti dire moi faire enn kitsoz, mais mo pa ti envie faire li. Apré, mo ti rappel chapitre ki koz lor ‘L’obeissance protege toi,’ (chapitre 7), lerla mo ti retourné, mo ti dire mo mama ki mo pou obeir li.” Lor chapitre ‘Kifer fodé pa nou koz menti’ (chapitre 22), enn couple ki reste Floride, en Amérique, ti dire: “[Dan sa chapitre-la] ena bann question ki pousse bann zenfant pou dire seki ena dan zot leker, ek faire zot admette bann erreur ki sinon, zot pa ti pou admette.”

¹⁵ Dan livre Enseignant, ena plus ki 230 zimage, ek ena enn note a-coté chaque zimage ou-soit group zimage. Enn mama ki bien reconnaissant parski li ti gagne sa livre-la, dire: “Souvent, mo garson contigne guette enn zimage ek li pa’lé ki mo tourne page-la. Sa bann zimage-la, zot pa zis joli, mais par zot-mem, zot enseigne bann leson, ou si zot pa faire sa, zot pousse bann zenfant pou pose question. Kan mo garson ti guette zimage kot ena enn zenfant ki pé guette television dan noir, li ti demande moi: ‘Mami, ki sa ti-garson-la pé faire?’ Fason ki li ti demande sa, montré ki li ti koné ki sa ti-garson-la ti pé faire enn kitsoz ki pa bon.” Note ki ena a-coté zimage-la dire: ‘Kisannla ki trouve tou seki nou faire?’

Enn l’education important pou nou lepok

16. Ki kitsoz bien important bizin enseigne bann zenfant dan nou lepok, ek kifer?

¹⁶ Bann zenfant bizin koné ki bon ek ki pa bon dan fason ki zot servi zot bann l’organe sexuel. Seulement, li pa toujours facile pou koz lor la sexualité. Enn journaliste dire, ki dan lepok ki li finn grandi, bann dimoune ti considere couma mal-elevé pou dire bann mot ki ena enn rapport avek bann l’organe sexuel. Concernant l’education so bann zenfant, li ti ecrire: “Mo pou bizin arrete honté.” Oui, kan bann parent honté pou koz lor sexe avek zot zenfant, sa pa protege zenfant-la. Bann dimoune ki abuse bann zenfant lor plan sexuel, profite l’ignorance sa bann zenfant-la. Livre Écoute le grand Enseignant koz lor sa sujet-la avek respé ek dignité. Koz lor sexe avek bann zenfant, sa pa tire zot l’innocence. Mais parkont, si nou pa faire sa, c’est lerla ki zot kapav perdi zot l’innocence.

17. Couma livre Enseignant finn aide bann parent pou enseigne zot zenfant lor sexe?

¹⁷ Kan enn zenfant lire chapitre 10, dan livre Enseignant, li aprann ki bann mauvais ange ti vinn lor la terre ek ti gagne zenfant avek bann femme. Ensuite, livre-la pose li sa question-la: ‘Ki to koné lor relation sexuel?’ Livre-la donne enn reponse simple ek respectable. Plitar, chapitre 32 expliké couma kapav protege bann zenfant kont bann pedophile. Nou finn gagne beaucoup lettre ki dire ki quantité sa l’enseignement-la important. Enn mama ti ecrire: “Semaine dernier, mo garson Javan ti ena rendez-vous avek so pediatre. Apré sa, pediatre-la finn demann nou si nou finn discute avek Javan lor seki bon ek seki pa bon dan fason ki li servi so bann organe sexuel. Li ti bien impressioné ki nou finn servi sa nouveau livre-la pou faire sa.”

18. Couma livre Enseignant koz lor salué pavillon enn pays?

¹⁸ Enn lot chapitre raconte nou seki la Bible dire lor trois jeune Hébreux ki ti appel Shadrak, Méshak et Abed-Négo. Zot ti refuse pou prosterne devant enn statue ki ti represente gouvernement Babylone. (Daniel 3:1-30) Li possible ki certain pa trouvé ki adore enn statue ek salué enn pavillon, li coumadir mem zaffaire, couma livre Enseignant montré nou. Seulement, guette seki enn ecrivain ki appel Edward Gaffney ti dire dan enn interview ki li ti faire dan magazine U.S. Catholic. Li ti dire ki premier jour so tifi ti rente lekol primaire, tifi-la ti raconte li ki li finn aprann “enn nouveau la-priere dan lekol.” Li ti demann so tifi pou repete la-priere-la. Gaffney ti dire: “Li ti mette so la-main lor so leker, ek avek fierté li ti commence dire: ‘Mo faire serment ki mo pou fidel ar pavillon [mo pays] . . . ’” Gaffney ajouté: “Enn coup, sa finn faire moi comprend enn kitsoz. Bann Témoins de Jéhovah ti ena raison. Nou bann lekol forme bann zenfant depuis bien jeune, pou developpe enn sentiment religieux national, setadir enn fidelité sans limite pou zot pays.”

Sa vaut la peine

19. Ki recompense bann parent gagné kan zot enseigne zot zenfant?

¹⁹ Oui, li vaut la peine ou faire zeffort pou enseigne ou bann zenfant. Enn mama, ki ti reste Kansas, en Amérique, ti bien touché ek li ti mem pleuré kan li ti gagne lettre so garson. Garson-la ti ecrire li: “Mo ena la-chance ki mo finn gagne enn l’education ki finn aide moi pou vinn stable lor plan affectif, ek pou vinn enn dimoune equilibré. Toi ek Papa, zot vrai-mem merite felicitation.” (Proverbes 31:28) Livre Écoute le grand Enseignant kapav aide encore beaucoup parent pou donne enn l’enseignement ki pou protege zot l’heritage ki ena enn grand valeur.

20. Ki bann parent bizin toujours rappel, ek ki l’effet sa bizin ena lor zot?

²⁰ Nou bann zenfant merite tou lé-temps, l’attention ek zeffort ki nou kapav donne zot. Zot reste jeune zis pou enn ti moment mem. Profite chaque l’occasion ki ou gagné pou passe lé-temps avek zot ek pou aide zot. Jamais ou pa pou regrette sa. Sa pou faire zot content ou. Rappel toujours ki ou bann zenfant, zot enn cadeau ki Bondié finn donne ou. Oui, zot enn l’heritage ki ena enn grand valeur! (Psaume 127:3-5) Alors, considere zot couma enn grand l’heritage ki ou finn gagné, coumadir ou pou bizin rann compte Bondié lor fason ki ou elevé zot, parski avredir, ou pou bizin rann Li enn compte.

[Note]

Couma ou pou reponn?

• Kifer bann parent bizin protege zot zenfant, surtout dan nou lepok?

• Ki qualité l’enseignement donne la sagesse?

• Cite certain kitsoz ki li bien important ou koz avek ou zenfant zordi.

• Couma livre Enseignant finn aide bann parent pou enseigne zot zenfant?

[Zimage, page 25]

Parent, ki ou kapav aprann ar l’exemple Manoah?

[Zimage, page 26]

Jeune, ki ou kapav aprann ar l’exemple sa trois garson Hébreux-la?

[Zimage, page 27]

Bann zimage ek bann note a-coté dan livre “Enseignant,” zot enn grand l’aide pou bann parent

[Zimage, page 27]

Ki mensonge Ananias pé dire Pierre?

[Zimage, page 27]

Kisannla ki trouve tou seki nou faire?