Jéhovah rassemblé so famille

‘Mo suppliye zot pou garde l’unité dan l’esprit.’​—ÉPH. 4:1, 3.

COUMA OU POU EXPLIKÉ?

Ki l’objectif l’administration ki Bondié inn etabli ena?

Couma eski nou “garde l’unité dan l’esprit”?

Ki pou aide nou pou “vinn bon sakenn envers so prochain”?

1, 2. Ki projet Jéhovah ena pou la terre ek pou bann dimoune?

FAMILLE. Ki sa mot-la faire ou pensé? Eski sa faire ou pense l’amour ek la joie? Travail ensam pou realise enn mem l’objectif? Enn place kot ena la paix kot ou kapav grandi, aprann ek partage bann l’idée? Surement, ou pense sa bann kitsoz-la si ou forme partie dan enn famille kot ena l’amour. C’est Jéhovah Li-mem ki’nn crée la famille. (Éph. 3:14, 15) Li ti ena projet pou faire tou so bann creature dan le ciel ek lor la terre senti-zot en securité, ena confiance sakenn en so camarade ek ena enn vrai l’unité entre zot.

² Apré ki Adam ek Ève ti faire peché, bann dimoune ti nepli faire partie dan famille universel Bondié, mais sa pa’nn change projet Jéhovah. Li pou faire sur ki kan la terre pou vinn enn paradis, li pou rempli avek bann descendant Adam ek Ève. (Gen. 1:28; Is. 45:18) Li’nn prend tou bann disposition pou realise sa projet-la. Nou trouve certain parmi sa bann disposition-la dan livre Éphésiens. Sa livre-la koz lor l’unité. Anou examine deux-trois verset ek guetté couma nou kapav coopere avek projet ki Jéhovah ena pou uni so creation.

ENN ADMINISTRATION EK TRAVAIL KI LI FAIRE

 3. Ki été l’administration Bondié ki mentionné dan Éphésiens 1:10, ek kan so premier l’etape ti commencé?

³ Moïse ti dire bann Israélite: “Jéhovah nou Bondié Li enn sel Jéhovah.” (Deut. 6:4) Bann action Jéhovah zot en accord avek so projet. Alors, “a la fin bann le temps fixé,” Bondié inn mette en place “enn administration”​—setadir, enn disposition pou faire tou so bann creature intelligent vive dan l’unité. (Lire Éphésiens 1:8-10.) Sa administration-la pou realise so l’objectif en deux l’etape. Premier l’etape, Bondié prepare congregation bann chretien oint pou vive dan le ciel kot zot pou contigne travail enba l’autorité Jésus Christ, zot Chef spirituel. Sa l’etape-la ti commencé la Pentecôte l’an 33 nou lepok kan Jéhovah ti commence rassemblé bann ki pou dirigé ensam avek Christ dan le ciel. (Actes 2:1-4) Lor base sacrifice Jésus, Bondié declare sa bann chretien oint-la, juste ek digne pou gagne la vie, alors zot reconette sans hesité ki zot finn adopté couma “bann zenfant Bondié.”​—Rom. 3:23, 24; 5:1; 8:15-17.

4, 5. Ki deuxieme l’etape sa l’administration-la?

⁴ Deuxieme l’etape, Bondié prepare bann ki pou vive dan Paradis lor la terre kan Royaume messianik pou gouverné. La ‘grande foule’ pou premier groupe dimoune ki pou vive dan Paradis. (Rév. 7:9, 13-17; 21:1-5) Pendant Regne mille an, plusieurs milliard dimoune ki pou ressuscité, pou vinn zwenn zot. (Rév. 20:12, 13) Maziné couma resurrection pou donne nou encore plus l’occasion pou montré nou l’unité! Ek a la fin mille an, “bann kitsoz ki lor la terre” pou bizin passe par enn l’epreuve final. Bondié pou adopté tou bann ki pou reste fidele, couma so “bann zenfant” lor la terre.​—Rom. 8:21; Rév. 20:7, 8.

⁵ Zordi, Jéhovah pé prepare bann chretien oint pou vive dan le ciel ek lezot brebis pou vive dan Paradis lor la terre. Mais personnellement, couma nou pé coopere avek l’administration Bondié?

“GARDE L’UNITÉ DAN L’ESPRIT”

 6. Couma la Bible montré ki bann chretien bizin rassemblé entre zot?

⁶ La Bible dire ki bann chretien bizin rassemblé-zot ensam. (1 Cor. 14:23; Héb. 10:24, 25) Sa implik plus ki zis passe inpé le temps ensam dan mem l’endroit, pareil couma bann dimoune faire kan zot al bazar ou-soit kan zot al dan enn stade. Enn vrai l’unité implik plus ki sa. Nou pou reussi ena sa l’unité-la si nou applik bann l’enseignement Jéhovah ek laisse l’esprit saint Bondié influence nou.

 7. Ki sa vedir “garde l’unité dan l’esprit”?

⁷ Jéhovah inn declare bann chretien oint juste en tant ki so bann garson ek lezot brebis juste en tant ki so bann camarade parski zot ena la foi dan sacrifice Jésus. Mais kan-mem, tant ki nou pou vive dan sa systeme-la, pou ena bann desaccord entre bann chretien. (Rom. 5:9; Jacq. 2:23) Sinon, la Bible pa ti pou bizin conseil nou pou contigne “supporte sakenn nou camarade.” Ki nou bizin faire pou nou ena l’unité entre nou? Nou bizin manifesté enn “l’humilité ek enn douceur complet.” En plus, Paul encourage nou pou faire bann grand zeffort pou “garde l’unité dan l’esprit, dan la paix ki soude [nou] ensam.” (Lire Éphésiens 4:1-3.) Enn fason ki nou applik sa conseil-la, c’est kan nou laisse l’esprit saint influence nou ek laisse li produire so fruit en nou. Sa fruit-la permette nou reglé bann probleme ki nou gagné avek lezot ek faire nou vive dan l’unité, alors ki bann pratik ki la chair produire, touletan crée division.

 8. Couma seki la chair produire crée division?

⁸ Anou guetté couma “seki la chair produire” crée division. (Lire Galates 5:19-21.) Fornication separe enn dimoune ki pé pratik sa peché-la ar Jéhovah ek congregation, ek l’adultere kapav separe bann zenfant ar zot parent dan enn fason bien cruel ek bann conjoint innocent ar zot conjoint. L’impureté affecté l’unité ki enn dimoune ena avek Bondié ek avek bann dimoune ki content li. Enn dimoune ki’nn deja essaye colle deux kitsoz ensam koné ki sa bann kitsoz-la bizin prop pou ki la colle-la prend. Li pareil pou enn dimoune ki envie ena l’unité avek Bondié ek so peuple, li bizin pur lor plan moral ek physik. Enn dimoune ki ena enn conduite devergondé montré ki li pena okenn respé pou bann la loi Bondié ki juste. Bann lezot pratik ki la chair produire zot aussi zot separe bann dimoune entre zot ek ar Bondié. Sa qualité conduite-la pa en accord avek personnalité Jéhovah.

 9. Couma nou kapav examine-nou-mem pou guetté si nou pé “faire bann grand zeffort pou garde l’unité dan l’esprit”?

⁹ Alors, sakenn parmi nou bizin pose-li sa bann question-la: ‘Ki quantité zeffort mo pé faire pou “garde l’unité dan l’esprit, dan la paix ki soude [nou] ensam”? Couma eski mo reagir kan mo gagne probleme avek enn dimoune? Eski mo dire sa mo bann camarade pou gagne zot dan mo coté? Eski mo attann ki bann ancien reglé sa probleme-la pou moi, au lieu ki mo al koz avek sa dimoune-la mo-mem ek faire la paix avek li? Si mo koné ki enn kikenn ena enn kitsoz kont moi, eski mo evite li pou ki nou pa bizin koz lor sa probleme-la?’ Si mo agir coumsa, eski sa pou montré ki mo pé coopere avek projet ki Jéhovah ena pou rassemblé tou kitsoz dan Christ?

10, 11. (a) Kifer li bien important ki nou vive en paix avek nou bann frere? (b) Ki nou kapav faire pou favorise la paix ek benediction Jéhovah?

¹⁰ Jésus ti dire: “Alors, si to pé amenn to don devant l’autel ek ki la to rappel ki to frere ena kitsoz kont toi, laisse to don la, devant l’autel, ek allé; d’abord al faire la paix avek to frere, ek apré, kan to’nn retourné, offert to don. Tombe enn l’arrangement vite.” (Mat. 5:23-25) Jacques ti ecrire: “La grain fruit la justice li semé dan la paix pou bann ki faire la paix.” (Jacq. 3:17, 18) Alors, si nou pa faire la paix, nou pa pou kapav contigne ena enn conduite juste.

¹¹ Par exemple, dan certain pays kot finn ena la guerre, bann planteur pa kapav servi 35 pour cent la terre a cause bann mine ki’nn enterré dan la terre. Kan enn mine explosé, bann fermier abandonne zot la terre, alors, nepli ena travail dan bann village, ek nepli ena mangé dan bann la ville. Li pareil pou nou aussi, si nou ena bann defaut ki empeche nou vive en paix avek nou bann frere ek soeur, nou pou gagne difficulté pou grandi lor plan spirituel. Mais kan nou pa tardé pou pardonne lezot ek kan nou faire zeffort pou mette zot l’interet en premier, sa favorise la paix ek benediction Jéhovah.

12. Couma bann ancien kapav aide nou pou garde l’unité?

¹² En plus, “bann zom [ki] couma bann don” kapav aide congregation pou garde l’unité. Zot aide nou pou “vinn enn sel dan la foi.” (Éph. 4:8, 13) Kan bann ancien travail ensam avek nou dan service sacré ek donne nou bann conseil approprié ki basé lor la Bible, zot aide nou pou faire bann progré pou mette nouveau personnalité lor nou. (Éph. 4:22-24) Eski ou considere zot conseil couma enn moyen ki Jéhovah pé servi pou prepare ou pou vive dan le monde nouveau ki pou dirigé par so Garson? Ancien, kan ou donne bann conseil pou essaye redresse lezot, eski ou ena sa l’objectif-la?​—Gal. 6:1.

“VINN BON SAKENN ENVERS SO PROCHAIN”

13. Ki ti pou arrivé si nou pa ti suive conseil ki trouve dan Éphésiens 4:25-32?

¹³ Éphésiens 4:25-29 mentionne bann kitsoz precis ki nou bizin rejeté. Par exemple: fodé pa nou koz menti, en colere ou-soit paresse, fodé pa ki nou dire bann parole pourri, au contraire nou bizin dire bann parole ki bon ek ki batir lezot. Si enn dimoune pa suive sa conseil-la, li pou faire la peine l’esprit saint Bondié, parski l’esprit saint c’est enn la force ki favorise l’unité. (Éph. 4:30) Pou ki ena la paix ek l’unité, li important aussi ki nou applik seki Paul ti ecrire apré: “Pa vinn amer envers lezot, arrete faire la rage, en colere, criyé, dire bann parole pou insulté lezot, ek arrete faire tou seki mauvais. Mais vinn bon sakenn envers so prochain, ena enn grand compassion, sakenn bizin pardonne so prochain avek tou so leker pareil couma Bondié aussi finn pardonne zot avek tou so leker par Christ.”​—Éph. 4:31, 32.

14. (a) Ki Paul ti pé rod dire par “vinn bon”? (b) Ki pou aide nou pou vinn bon?

¹⁴ Kan Paul ti dire “vinn bon” sa vedir ki kitfois nou pa finn touletan montré-nou bon ek ki nou bizin ameliore-nou. Alors, li bien important ki nou aprann pou mette sentiment lezot avant nou prop sentiment! (Phil. 2:4) Li possible ki nou envie dire enn kitsoz ki pa gentil zis pou faire lezot riyé ou-soit ki pou faire nou parette malin. Mais eski nou pou montré-nou bon si nou dire sa? Si nou reflechi lor la avant, sa pou aide nou pou “vinn bon” envers lezot.

APRANN POU ENA L’AMOUR EK RESPÉ DAN LA FAMILLE

15. Dapré Éphésiens 5:28 couma bann mari bizin imite Christ?

¹⁵ La Bible compare bann relation ki Christ ena avek la congregation ar bann relation ki ena entre enn mari ek so femme. Sa aide enn mari pou comprend ki li bizin guide so femme, content li ek prend li soin ek sa aide enn femme pou manifesté soumission dan so mariage. (Éph. 5:22-33) Kan Paul ti ecrire: “C’est dan sa fason-la ki bann mari bizin content zot femme pareil couma zot prop lekor,” lor ki “fason” li ti pé kozé? (Éph. 5:28) Bann parole ki Paul ti dire avant, ti attire l’attention lor fason ki “Christ aussi finn content la congregation ek finn donne so la vie pou sauve li, . . . purifié li avek enn bain de l’eau par moyen la parole.” Oui, pou ki enn mari travail en accord avek projet ki Jéhovah ena pou rassemblé tou kitsoz encore enn fois dan Christ, li bizin prend soin so famille lor plan spirituel.

16. Ki resultat bann parent pou gagné si zot rempli responsabilité ki Jéhovah inn donne zot?

¹⁶ Li bon ki bann parent pa blié ki zot pé rempli enn responsabilité ki Jéhovah inn donne zot. Malheureusement, dan le monde zordi, beaucoup pena “okenn affection naturel.” (2 Tim. 3:1, 3) Beaucoup papa sauve zot responsabilité​—sa faire zot zenfant bien triste ek faire zot di-tort. Mais Paul ti donne bann papa chretien sa conseil-la: “Pa enerve zot zenfant, mais contigne elevé zot dan discipline ek dan bann l’avertissement Jéhovah.” (Éph. 6:4) Eski c’est pa dan la famille ki pou premier fois bann zenfant aprann ki sa vedir l’amour ek respé pou l’autorité? Bann parent ki finn reussi enseigne zot zenfant sa bann kitsoz-la, finn travail en accord avek l’administration Jéhovah. Bann parent bizin faire zot zenfant senti ki ena l’amour dan la famille. Alors, bann parent bizin controle zot colere ek pa criye avek zot bann zenfant ou-soit dire bann kitsoz ki pou blesse zot. Dan sa fason-la, zot enseigne zot zenfant couma pou montré l’amour ek couma pou respecté l’autorité. Sa pou prepare sa bann zenfant-la pou la vie dan le monde nouveau.

17. Ki nou bizin pou nou kapav resisté kont Satan?

¹⁷ Nou bizin reconette ki Satan le Diable, sa kikenn ki premier fois ti troublé la paix ki ti existé dan l’univers, pou faire tou seki li kapav pou empeche nou faire volonté Bondié. Pena doute ki projet Satan pé realisé kan bann divorce pé augmenté, kan bann dimoune choisir pou vive ensam sans marié ek kan pé tolere bann mariage entre homosexuel. Nou pa imite conduite ek l’attitude ki en vogue dan le monde moderne. C’est Jésus Christ ki nou modele. (Éph. 4:17-21) Alors, nou bizin suive conseil pou ‘mette lor nou l’equipement la guerre ki complet, ki Bondié donné’ pou nou kapav resisté kont Satan ek so bann demon.​—Lire Éphésiens 6:10-13.

“CONTIGNE MARCHE DAN L’AMOUR”

18. Ki kitsoz ki bien important pou ena l’unité parmi bann chretien?

¹⁸ Pou nou kapav ena l’unité, nou bizin ena l’amour. Avek enn leker ki rempli ar l’amour pou nou “sel Seigneur,” pou nou “sel Bondié” ek pou sakenn parmi nou, nou bien decidé “pou garde l’unité dan l’esprit, dan la paix ki soude [nou] ensam.” (Éph. 4:3-6) Jésus ti prié concernant sa l’amour-la: “Mo faire enn demande, pa zis pou sa bannla mais aussi pou bann ki ena la foi en moi par zot parole; pou ki zot tou kapav vinn enn sel, pareil couma toi, Papa, to uni avek moi ek moi mo uni avek toi, pou ki zot aussi zot uni avek nou . . . Mo’nn faire zot konn to nom ek mo pou faire konn sa, pou ki l’amour ki to finn ena pou moi, kapav dan zot, ek pou ki moi mo uni avek zot.”​—Jean 17:20, 21, 26.

19. Ki ou bien decidé pou faire?

¹⁹ Si ena enn kitsoz dan nou personnalité ki difficile pou changé, nou bizin laisse l’amour pousse nou pou prié pareil couma sa psalmiste-la: “Faire mo leker vinn entier pou toi, pou mo ena la crainte pou to nom.” (Ps. 86:11) Nou bizin bien decidé pou resisté kont bann zeffort ki Satan faire pou eloigne nou ar Jéhovah, nou Papa ki content nou, ek ar nou bann frere ek soeur. Anou faire bann grand zeffort pou “vinn bann dimoune ki imite Bondié couma bann zenfant ki Li bien content, ek contigne marche dan l’amour”​—dan nou famille, dan nou ministere, ek dan congregation.​—Éph. 5:1, 2.

[Zimage page 29]

Li laisse so don devant l’autel, li al faire la paix avek so frere

[Zimage page 31]

Parent, enseigne ou bann zenfant couma pou ena respé envers lezot