Etidie Labib an Profonder

1-2. Dan ki fason nou kapav lir ek etidie Labib? Donn enn lexanp.

FER koumadir to anvi aste enn lakaz. Ki kitsoz to pou anvi trouve avan ki to pran to desizion? Eski li ase ki to trouv zis enn foto devantir lakaz-la? Non. Sirman to pou anvi al get lakaz-la. To pou anvi al chek so lakour, rant andan pou chek sak lasam, ek osi sak parti lakaz-la. Kitfwa to pou mem anvi get so plan, pou kone kouma inn aranz lakaz-la. Li kler ki to pou anvi chek tou ti detay konsernan sa lakaz-la avan ki to aste li!

² Nou bizin fer parey kan nou lir ek etidie Labib. Enn ekrivin dir ki Labib li parey kouma “enn gran batiman ki bien ot, ek ki so fondasion profon dan later.” Alor, ki nou bizin fer pou nou konn bien tou seki ena dan Labib. Si nou lir li zis lao-lao, nou pou aprann zis “bann kitsoz debaz konsernan mesaz sakre ki sorti kot Bondie.” (Ebre 5:12) Parkont, si nou examinn li parey kouma nou ti pou examinn sa lakaz ki nou ti pou aste la, nou pou konpran li pli bien. Enn parmi bann meyer fason pou etidie Labib, se kan nou reflesi kouma tou bann lansegnman ki ena dan Labib, zot ena enn lien ar zot kamarad. Nou bizin fer zefor pou konpran sa bann lansegnman-la, ek osi fer zefor pou konpran kifer nou krwar sa bann lansegnman-la.

 3. Ki kitsoz lapot Pol ti ankouraz bann Kretien pou fer, ek kifer? (Efezien 3:​14-19)

³ Si nou anvi konpran tou seki ena dan Labib, nou bizin etidie li an profonder. Lapot Pol ti ankouraz bann Kretien pou pran letan pou etidie Parol Bondie, pou zot kapav “konpran bien larzer, longer, oter ek profonder” bann verite Biblik. Lerla, zot ti pou kapav “bien anrasine ek bien etabli” dan zot lafwa. (Lir Efezien 3:​14-19.) Nou osi nou bizin fer parey. Alor, anou gete kouma nou kapav etidie Labib pou ki nou konpran li pli bien.

 4. Ki nou kapav fer pou vinn pli pros ar Zeova? Donn bann lexanp.

⁴ Nou bann Kretien, akoz sa fode pa nou kontant nou zis ar bann kitsoz debaz ki ena dan Labib. Avek led lespri sin Zeova, nou anvi aprann “mem bann kitsoz profon ki konsern Bondie.” (1 Kor. 2:​9, 10) Dan to letid personel, eski to kapav etidie plis an profonder, pou ki to kapav vinn pli pros ar Zeova? Par exanp, to kapav etidie kouma Zeova inn montre lamour anver so bann serviter dan lepase, ek kouma sa montre ki Li kontan nou osi. To kapav etidie bann dispozision ki Zeova ti pran pou ki bann Izraelit ador Li, ek kouma bann Kretien swiv bann dispozision koumsa azordi. Ouswa to kapav etidie plis an profonder bann profesi ki Zezi ti realize kan li ti lor later.

 5. Ki size to ti pou kontan etidie dan to letid personel?

⁵ Inn demann sertin frer ek ser ki kitsoz zot ti pou kontan etidie an profonder. Nou kapav trouv sertin parmi zot bann repons dan lankadre “Bann Size pou Nou Letid Personel.” Bann size koumsa pou pli interesan pou etidie, si to servi l’Index des publications des Témoins de Jéhovah ouswa Liv Resers pou Bann Temwin Zeova. Kan to etidie Labib an profonder, sa pou ranforsi to lafwa ek sa pou ed twa pou “trouv konesans Bondie.” (Prov. 2:​4, 5) Aster-la, anou get sertin lansegnman profon ki ena dan Labib ek ki nou kapav etidie.

 6. (a) Ki diferans ena ant enn plan ek enn proze? (b) Kifer nou kapav dir ki proze Zeova konsernan later ek bann imin li “eternel”? (Efezien 3:11)

⁶ Anou gete seki Labib dir lor proze Bondie. Pou koumanse, ena enn gran diferans ant enn plan ek enn proze. Enn plan se enn kitsoz ki presi, se koumadir enn sime presi ki nou bizin pran pou ariv enn destinasion. Selman, si ena enn obstak lor sime-la, nou pa pou reisi ariv nou destinasion. Parkont, enn proze se destinasion-la limem. Nou kone kotsa nou anvi ale. Selman, nou kapav pran diferan sime pou ariv laba, ek si ena enn obstak lor nou sime, nou kapav pran enn lot sime. Dan Labib, Zeova inn fer nou konn so “proze eternel” tigit par tigit. (Efe. 3:11) Proze Zeova pou realize parski Li kapav “fer tou kitsoz realiz so proze,” ek tou seki Zeova fer, li dire pou touletan. (Prov. 16:4) Me ki proze Zeova ena, ek ki bann sanzman Li’nn bizin fer pou realiz so proze?

 7. Apre rebelion Adan ek Ev, ki Zeova inn fer pou ki so proze realize? (Matie 25:34)

⁷ Zeova ti dir Adan ek Ev ki proze Li ena pou zot. Zot ti bizin “gagn zanfan, vinn boukou, ranpli later ek ena kontrol lor li, ek ena kontrol lor . . . tou kreatir vivan” ki lor later. (Zen. 1:28) Kan Adan ek Ev ti rebel kont Zeova, bann imin ti vinn inparfe. Selman, sa pa ti aret proze Zeova. Li’nn trouv enn lot mwayin pou realiz so proze. Li’nn etabli enn Rwayom dan lesiel ki pou realiz proze ki Li ti ena o-koumansman pou bann dimounn ek pou later. (Lir Matie 25:34.) Dan moman ki Li’nn swazir, Zeova inn avoy so Garson lor later pou ansegn bann dimounn lor sa Rwayom-la ek pou donn so lavi kouma enn ranson, pou delivre nou ar pese ek lamor. Apre sa, Zeova inn resisit Zezi dan lesiel, ek azordi Zezi Lerwa dan Rwayom Bondie. Me ena lezot kitsoz ankor ki nou kapav aprann lor proze Bondie.

 8. (a) Ki mesaz prinsipal ena dan Labib? (b) Dapre Efezien 1:​8-11, ki lobzektif proze Zeova? (Get zimaz lor kouvertir.)

⁸ Mesaz prinsipal ki ena dan Labib se: Zeova so nom pou sanktifie kan Li pou realiz so proze konsernan later gras-a so Rwayom ki dirize par Zezi Kris. Proze Zeova zame pa pou sanze. Li’nn promet ki tou seki Li’nn dir pou realize. (Iza. 46:​10, 11; Ebre 6:​17, 18) Dan moman ki Zeova inn swazir, later pou vinn enn paradi, ek dan sa paradi-la pou ena bann desandan Adan ek Ev ki parfe ek ki pou “viv ere pou touletan.” (Ps. 22:​26, NW) Me Zeova so proze pa aret la! Lobzektif so proze se ki tou so bann kreatir intelizan dan lesiel ek lor later viv ansam dan linite. Lerla, tou so bann kreatir vivan pou obeir Li ek aksepte Li kouma zot Dirizan. (Lir Efezien 1:​8-11.) Eski sa pa inpresionn twa kan to reflesi lor fason extraordiner ki Zeova realiz so proze?

 9. Ziska ki levennman dan lavenir, Labib koze?

⁹ Anou reflesi lor profesi ki Zeova ti anonse dan zardin Eden ek ki trouv dan Zenez 3:15.b Dan sa profesi-la, Zeova koz lor bann kitsoz ki ti pou ede pou realiz so proze. Sa bann kitsoz-la ti pou arive plizir milye lane apre. Par exanp, Zeova ti dir Abraam ki, apre plizir zenerasion, enn parmi so bann desandan ti pou vinn Lekris. (Zen. 22:​15-18) Apre sa, lane 33 Nou Lepok, Zezi so talon ti blese, parey kouma profesi-la ti predir. (Zist. 3:​13-15) Dernie kitsoz ki arive dan sa profesi-la, se ki latet Satan pou kraze, ek sa pou arive dan plis ki mil an. (Rev. 20:​7-10) Labib koz osi lor bann kitsoz ki pou arive, kan laenn ki ena ant lemond Satan ek lorganizasion Zeova, pou ariv so maximum.

10. (a) Ki bann levennman pou arive biento? (b) Kouma nou kapav prepar nou leker ek nou lespri? (Get not.)

¹⁰ Mazinn bann kitsoz extraordiner ki pou arive dan lavenir. Pou koumanse, bann nasion lor later pou kriye “lape ek sekirite!” (1 Tes. 5:​2, 3) Lerla, gran soufrans pou koumanse kan bann nasion pou atak tou bann fos relizion. (Rev. 17:16) Apre sa, kitfwa nou pou trouv dan enn fason extraordiner “Garson limanite pe vini lor bann niaz dan lesiel avek lotorite ek enn gran laglwar.” (Mat. 24:30) Zezi pou ziz bann dimounn, ek li pou separ bann kabri ek bann mouton. (Mat. 25:​31-33, 46) Dan sa moman-la, Satan pa pou res lebra krwaze! Li pou telman ena laenn pou bann serviter Bondie, ki li pou fer bann pep zwenn ansam pou atak bann serviter Zeova. Labib apel sa group ki’nn zwenn ansam la, Gog ki sorti pei Magog. (Eze. 38:​2, 10, 11) Pou ariv enn moman kot bann Kretien ki ena lesperans pou al dan lesiel, me ki ankor lor later, pou al zwenn Zezi ek so larme dan lesiel pou al fer lager Armagedon, dernie levennman ki form parti gran soufrans.c (Mat. 24:31; Rev. 16:​14, 16) Apre sa, Regn Mil An Zezi Kris pou koumanse.—Rev. 20:6.

11. Kan to mazinn lavi eternel, ki sa inplike pou twa? (Get zimaz osi.)

¹¹ Aster-la, anou reflesi lor seki pou arive apre Regn Mil An Zezi Kris. Labib dir ki nou Kreater inn “met leternite dan [nou] leker.” (Ekle. 3:11) Reflesi lor seki sa inplike pou twa ek pou to lamitie ar Zeova. Liv Approchez-vous de Jéhovah paz 318 ek 319, donn nou enn lide seki sa pou inplike. Li dir: “Apre ki nou’nn viv bann santenn, bann milye, bann milyon, mem bann milyar lane, nou pou konn Zeova pli bien ki nou konn Li azordi. Selman, nou pou ena santiman ki nou ankor kapav aprann boukou kitsoz extraordiner lor Li. . . . Lavi eternel pou enn kitsoz extraordiner, ek nou lavi dan Paradi pou extra zoli. Pli gran benediksion ki nou pou ena, se ki nou pou kapav kontign vinn pli pros ar Zeova.” Aster-la, anou get bann lezot lansegnman Labib ki nou kapav etidie.

12. Kouma nou kapav reflesi lor seki ena dan lesiel? Donn enn lexanp.

¹² Labib koz inpe lor seki ena “lao dan lesiel.” (Iza. 33:5) Li koz lor bann kitsoz extraordiner konsernan Zeova ek parti so lorganizasion ki dan lesiel. (Iza. 6:​1-4; Dan. 7:​9, 10; Rev. 4:​1-6) Par exanp, li koz lor bann kitsoz inpresionan ki Ezekiel inn trouve kan “lesiel inn ouver ek [li’nn] koumans trouv bann vizion Bondie.”—Eze. 1:1.

13. Ki to resanti kan to mazinn responsabilite ki Zezi ena dan lesiel? (Ebre 4:​14-16)

¹³ Reflesi osi lor responsabilite ki Zezi ena dan lesiel: Li nou Lerwa ek nou Gran Pret ki ena boukou konpasion. Gras-a li, nou kapav vinn devan “tronn bonte extraordiner” Bondie, setadir nou kapav priye Zeova ek demann Li so led ek so mizerikord “dan ler ki bizin.” (Lir Ebre 4:​14-16.) Fode zame enn zour pase san ki nou reflesi lor seki Zeova ek Zezi inn fer pou nou, ek lor seki zot pe fer pou nou dan lesiel. Zot lamour pou nou bizin ranpli nou leker ar rekonesans ek motiv nou pou kontign res bien aktif dan nou servis.—2 Kor. 5:​14, 15.

14. Sit enn parmi bann pli bon fason ki nou kapav montre nou rekonesans anver Zeova ek Zezi. (Get zimaz osi.)

¹⁴ Enn parmi bann pli bon fason ki nou kapav montre nou rekonesans anver Zeova ek Zezi, se kan nou fer nou maximum pou ed lezot pou vinn bann Temwin Zeova ek bann disip Zezi. (Mat. 28:​19, 20) Se samem ki lapot Pol ti fer, parski li ti ena enn gran rekonesans pou Zeova ek Zezi. Li ti kone ki Zeova anvi “ki tou sort kalite dimounn gagn lavi sov ek gagn enn konesans exakt lor laverite.” (1 Tim. 2:​3, 4) Akoz sa, li ti fer so maximum pou ed bann dimounn dan predikasion, pou ki li kapav “par tou mwayin posib . . . sov sertin parmi zot.”—1 Kor. 9:​22, 23.

15. Dapre Psom 1:​2, ki kitsoz pou rann nou ere?

¹⁵ Ekrivin premie Psom dir ki enn dimounn ki ere, li “gagn plezir dan lalwa LESEGNER, e lanwit-lizour li medit lor so lansegnman.” (Ps. 1:​1-3) Konsernan sa bann verse-la, Joseph Rotherham, enn tradikter Labib, dir ki sa dimounn-la “telman kontan bann instriksion Bondie, ki li pou rod li, li pou etidie li, ek li pou pas boukou letan pou reflesi lor la.” Li dir osi ki “si enn zour pase ek ki sa dimounn-la pa’nn reisi lir so Labib, se koumadir li’nn perdi enn zour dan so lavi.” To pou apresie to letid Labib si to etidie sak detay ek to gete kouma sakenn ena enn lien ar zot kamarad. Se vremem enn plezir pou “konpran bien larzer, longer, oter ek profonder” Parol Bondie!

16. Ki nou pou examine dan prosin lartik?

¹⁶ Bann lansegnman ki ena dan Labib, zot pa sa kantite difisil-la pou konpran. Dan prosin lartik, nou pou get enn lansegnman Labib ki bien profon: gran tanp spiritiel Zeova. Pol inn dekrir sa tanp-la dan let ki li’nn ekrir bann Kretien Ebre. Nou vremem anvi ki to apresie sa lansegnman bien profon la!