C’est Jéhovah ki nou berger

“C’est Jéhovah ki mo Berger. Mo pa pou mank nanyin.”—PSAUME 23:1.

 1-3. Kifer li pa etonnant ki David ti compare Jéhovah ar enn berger?

SI OU bizin expliké couma Jéhovah prend soin so peuple, ki ou pou dire? Ki l’exemple ou pou servi pou explik sa tendresse avek ki Jéhovah traite so bann serviteur fidel-la? Dan enn psaume ki le roi David ti ecrire inn gagne plus ki 3,000 an, li ti servi enn joli l’exemple pou koz lor Jéhovah, enn l’exemple ki ti ena enn rapport avek travail ki David ti faire avant.

² Kan David ti jeune, li ti enn berger, alors, li ti bien koné couma occupe bann mouton. Li ti bien koné ki, si pa prend compte bann mouton, zot kapav perdi, ek bann voleur kapav kokin zot ou-soit bann zanimo sauvage kapav attak zot. (1 Samuel 17:34-36) Si zot pena enn bon berger ki prend zot compte, kitfois zot pa pou trouve bann la-plaine kot kapav al mangé. Surement David ti ena bann bon souvenir lor bann longue moment ki li’nn passé pou dirige bann mouton, pou protege zot ek pou amenn zot mangé.

³ Li pa etonnant ki David ti pense travail enn berger kan li ti inspiré pou koz lor fason ki Jéhovah prend soin So peuple. Psaume 23, ki David ti ecrire, commence avek sa bann parole-la: “C’est Jéhovah ki mo Berger. Mo pa pou mank nanyin.” Anou examiné kifer li ti ena raison pou dire sa. Apré, a travers Psaume 23, nou pou trouvé ki Jéhovah prend soin so bann serviteur pareil couma enn berger prend soin so bann mouton.—1 Pierre 2:25.

Enn comparaison approprié

4, 5. Ki la Bible dire lor bann mouton?

⁴ Dan la Bible, Jéhovah ena beaucoup titre, mais titre “Berger,” montré tendresse Jéhovah plus ki tou. (Psaume 80:1) Pou nou comprend pli bien kifer la Bible appel Jéhovah enn Berger, li pou bon ki nou konn deux kitsoz: premierement, ki qualité zanimo bann mouton été, ek deuxiemement, ki travail enn berger faire, ek ki bann qualité enn bon berger ena.

⁵ Souvent, la Bible montré ki bann mouton, c’est bann zanimo ki content gagne l’affection zot berger (2 Samuel 12:3), zot pa agressif (Isaïe 53:7), ek zot pa kapav defann zot-mem. (Mika 5:8) Enn ecrivain ki finn elevé bann mouton pendant plusieurs l’année, ti faire sa remark-la: “Bann mouton pa kapav ‘debrouille-zot tousel,’ couma certain kapav pensé. Plus ki n’importe ki zanimo, zot bizin enn grand l’attention ek enn grand soin.” Pou zot kapav contigne vive, sa bann zanimo-la bizin enn berger ki prend zot bien compte.—Ézékiel 34:5.

 6. Couma enn dictionnaire lor la Bible explik la journée enn berger dan le passé?

⁶ Couma la journée enn berger ti passé dan lepok longtemps? Enn dictionnaire lor la Bible donne sa l’explication-la: “Bonne-heure gramatin, li ti faire so troupeau sorti dan parc, li ti marche devant zot ek li ti dirige zot dan enn l’endroit kot zot ti kapav mangé. Là, li ti veille zot tout la journée, li ti faire attention ki okenn mouton pa perdi, ek si jamais enn parmi finn eloigné ar troupeau sans ki li’nn rann-li compte, li ti al rod li partout ziska ki li ti trouve li ek li ti ré-amenn li dan troupeau. . . . A soir, li ti retourne bann mouton-la dan zot parc, ek a mesure ki zot ti passe par la porte, li ti compte zot avek so baton, pou faire sur ki okenn pa manké. . . . Souvent, li ti bizin veille zot pendant la nuit, pangar bann zanimo sauvage vinn attak zot, ou-soit bann voleur rentré trankil ek kokin zot.”a

 7. Kifer dan certaine situation, enn berger ti bizin manifesté encore plus patience ek tendresse?

⁷ Dan certaine situation bann berger ti bizin manifesté encore plus patience ek tendresse avek zot mouton, surtout avek bann femelle ki ti pré pou mette bas, ek avek bann jeune. (Genèse 33:13) Enn livre ki koz lor la Bible dire: “Souvent, bann femelle mette bas bien loin, lor enn la-pente montagne. Berger-la veille lor mama-la pendant sa moment difficile-la, ek li prend so ti mouton ki’nn fek né ek amenn li dan parc mouton. Bann premier jour, kitfois li pou sarié li dan so lé-bras, ou-soit dan pli so manteau, ziska ki li kapav marché.” (Isaïe 40:10, 11) Oui, li clair ki enn bon berger ti bizin bien fort ek li ti bizin ena aussi enn grand tendresse.

 8. Pou ki raison David ti ena confiance en Jéhovah?

⁸ “C’est Jéhovah ki mo Berger”—eski sa pa vrai-mem decrire bien nou Papa ki dan le ciel? Kan nou pou examine Psaume 23, nou pou trouvé couma Bondié prend nou soin avek mem la-force ek tendresse ki enn berger. Dan verset 1, David ti dire ki li ena confiance ki Bondié pou prend tou bann disposition pou ki So bann mouton pa “mank nanyin.” Dan bann verset suivant, David mentionne trois raison kifer li ti ena sa confiance-la: Jéhovah dirige, protege ek nourri so bann mouton, setadir so bann serviteur. Anou examine sa bann raison-la, enn par enn.

“Li dirige moi”

 9. Ki situation David ti decrire, ek couma bann mouton pou vinn dan enn place trankil coumsa?

⁹ Premierement, Jéhovah dirige so peuple. David ecrire: “Li faire moi allonge dan bann la-plaine kot ena beaucoup l’herbe; Li dirige moi dan bann place kot ena bien de l’eau ek kot kapav reposé. Li redonne moi la force. Li dirige moi lor bann chemin la justice, a cause so nom.” (Psaume 23:2, 3) Par sa bann parole-la, David decrire enn troupeau ki pé repose en paix, ek kot ena l’herbe ek de l’eau en abondance—enn situation kot bann brebis ena tou seki zot bizin, ek zot en securité. En hébreu, mot “la-plaine” ki servi dan sa verset-la kapav vedir “enn l’endroit trankil.” Surement bann mouton par zot-mem pa ti pou trouve enn place trankil pou reposé dan la paix. C’est zot berger ki bizin dirige zot dan enn “l’endroit trankil” coumsa.

10. Couma Bondié montré ki Li ena confiance en nou?

¹⁰ Couma Jéhovah dirige nou zordi? Enn fason ki Li faire sa, c’est par so l’exemple. So Parole encourage nou pou “imite Bondié.” (Éphésiens 5:1) Dan contexte ki sa bann parole-la finn ecrire, li mentionne compassion, pardon ek l’amour. (Éphésiens 4:32; 5:2) Oui, Jéhovah donne nou pli bon l’exemple kan Li-mem Li manifesté sa bann bon qualité-la. Eski Li montré-Li deraisonnable kan Li demann nou imite Li? Non. Avredir sa conseil-la, c’est enn preuve ki Li faire nou confiance. Couma? Nou finn crée dan ressemblance Bondié, setadir ki nou finn crée avek bann qualité moral, ek capacité pou ena enn spiritualité. (Genèse 1:26) Sa vedir ki Jéhovah koné ki, malgré nou l’imperfection, nou ena possibilité pou developpe mem qualité ki Li. Mazinn enn coup—nou Bondié ena confiance ki nou kapav faire pareil couma Li. Si nou suive so l’exemple, Li pou dirige nou, coumadir dan enn ‘l’endroit trankil.’ Au milieu sa lé-monde violent-la, nou pou “reste en securité,” ek nou pou ena la paix parski nou koné ki nou ena faveur Bondié.—Psaume 4:8; 29:11.

11. Kan Jéhovah dirige so peuple, ki kitsoz Li prend en consideration, ek couma nou trouve sa dan seki Li demann nou?

¹¹ Jéhovah manifesté tendresse ek patience kan Li dirige nou. Enn berger prend compte limite so bann mouton, alors, li dirige zot ‘dapré vitesse ki sa bann zanimo-la kapav marché.’ (Genèse 33:14) Jéhovah aussi dirige so peuple, “dapré vitesse” ki zot kapav marché. Li prend compte nou capacité ek nou situation. Oui, Li adapté-Li ar nou, ek jamais Li pa demann plus ki seki nou kapav donné. Seki Li demandé, c’est ki nou servi Li avek tou nou nâme. (Colossiens 3:23) Mais, ki arrivé si l’age inn commence rentré, ek ou pa kapav faire seki ou ti pé faire avant? Ou-soit, si ou ena enn maladie grave ki limite ou? C’est dan sa bann situation-la ki nou apprecié l’encouragement pou servi avek tou nou nâme. Pena deux dimoune ki pareil. Servi avek tou ou nâme vedir servi avek tou la-force ek l’energie ki ou kapav, dan service Jéhovah. Malgré bann faiblesse ki kapav limite nou, Jéhovah ena enn grand l’estime pou seki nou faire dan so service, kan nou faire sa avek tou nou nâme.—Marc 12:29, 30.

12. Ki l’exemple dan la Loi mosaïk montré ki Jéhovah dirige so peuple ‘dapré vitesse ki zot kapav marché’?

¹² Pou nou trouvé ki Jéhovah dirige so peuple ‘dapré vitesse ki zot kapav marché,’ anou examine seki la Loi mosaïk dire lor certain sacrifice ki enn dimoune ti bizin offert kan li ti faire peché. Jéhovah ti demann bann bon sacrifice ki bann Israélite ti offert avek enn leker sincere. Mais en mem temps, sa bann sacrifice-la ti depann lor possibilité chaque dimoune. La Loi ti dire: “Si li pa kapav amenn enn mouton, alors li bizin amenn . . . deux tourterelle ou-soit deux jeune pigeon.” Mais si li pa ti kapav amenn deux pigeon? Lerla, li ti kapav amenn “la farine gréo.” (Lévitique 5:7, 11) Sa montré ki Bondié pa ti demann plus ki seki enn kikenn ti kapav donné. Bondié pa finn changé, ek sa encourage nou kan nou koné ki Li pa demann plus ki seki nou kapav donné; au contraire, Li accepté avek plaisir seki nou ena possibilité pou donne Li. (Malaki 3:6) Nou vrai-mem content pou laisse-nou dirigé par enn Berger ki comprend nou coumsa!

“Mo pa peur nanyin, parski to avek moi”

13. Dan Psaume 23:4, couma David ti koz avek Jéhovah dan enn fason pli intime, ek kifer sa pa etonne nou?

¹³ David donne enn deuxieme raison kifer li ti ena confiance en Jéhovah: parski Jéhovah protege So peuple. Nou lire: “Mem si mo marche dan enn vallée kot faire bien noir, mo pa peur nanyin, parski to avek moi; to baguette ek to baton, c’est sa ki console moi.” (Psaume 23:4) Là, David koz avek Jéhovah dan enn fason pli intime; li dire Jéhovah ‘toi.’ Sa pa etonne nou, parski David pé koz lor fason ki Bondié finn aide li pou endure bann l’epreuve. Souvent, David finn retrouve-li dan bann “vallée,” ou-soit bann situation kot so la-vie ti en danger. Mais li pa ti laisse la peur domine li, parski li ti senti ki Bondié ti avek li, Li ti ena toujours So “baguette” ek So “baton” pré pou aide li. David ti senti-li reconforté parski li ti toujours conscient ki Bondié ti là pou protege li, ek sa ti faire li vinn pli proche avek Jéhovah.b

14. Ki l’assurance eski la Bible donne nou concernant protection Jéhovah, mais ki sa pa vedir?

¹⁴ Couma Jéhovah protege so peuple zordi? La Bible donne nou l’assurance ki jamais okenn opposant—ni demon, ni dimoune—pou kapav reussi elimine so peuple lor la terre. Jamais Jéhovah pou permette sa. (Isaïe 54:17; 2 Pierre 2:9) Seulement, sa pa vedir ki nou Berger pou protege nou kont tou bann malheur. Nou gagne mem problem ki tou dimoune gagné, ek en plus, nou gagne l’opposition ki tou bann vrai chrétien gagné. (2 Timothée 3:12; Jacques 1:2) Ena bann moment kot kitfois nou aussi coumadir nou pé “marche dan enn vallée kot faire bien noir.” Par exemple, li kapav arrivé ki a cause persecution ou-soit enn maladie, nou la-vie menacé. Ou-soit, c’est la vie enn kikenn ki nou bien content ki menacé, kitfois mem arrivé li mort. Dan sa bann moment bien noir dan nou la-vie-la, nou Berger avek nou, ek Li pou protege nou. Couma?

15, 16. (a) Dan ki fason Jéhovah aide nou pou faire face ar bann problem ki nou gagné? (b) Raconte enn l’experience ki montré couma Jéhovah aide nou kan nou passe par bann moment difficile.

¹⁵ Jéhovah pa promette nou ki Li pou faire mirak pou protege nou.c Mais enn kitsoz nou kapav sur: Jéhovah pou aide nou pou surmonte n’importe ki problem ki nou kapav gagné. Li kapav donne nou la sagesse pou faire face ar “tout sorte qualité l’epreuve.” (Jacques 1:2-5) Enn berger servi so baguette ou so baton, pa zis pou pousse bann zanimo ki attak so troupeau, mais aussi pou guide so bann mouton dan bon direction. Jéhovah kapav servi enn frere ou enn soeur pou “pousse” nou pou applik enn conseil biblik, ek sa kapav ameliore nou situation. En plus, Jéhovah kapav donne nou la force pou endure nou problem. (Philippiens 4:13) Par so l’esprit saint, Li kapav donne nou la “puissance ki plus ki seki normal.” (2 Corinthiens 4:7) L’esprit saint Bondié kapav aide nou pou endure n’importe ki l’epreuve ki Satan kapav mette devant nou. (1 Corinthiens 10:13) Eski sa pa encourage nou kan nou koné ki Jéhovah toujours pré pou aide nou?

¹⁶ Oui, nou kapav retrouve-nou dan enn situation ki couma enn vallée kot faire bien noir, mais nou pa obligé marche ladan tousel. Nou Berger avek nou, Li aide nou par bann fason ki kitfois au commencement nou pa bien comprend. Prend l’exemple seki ti arrive enn ancien. Docteur ti’nn trouve enn tumeur maligne dan so cerveau. Guette ki li ti dire: “Mo bizin reconette ki au commencement, mo ti demann-moi si Jéhovah ti en colere avek moi, ou-soit mem, si Li content moi. Mais mo ti bien decidé pou pa eloigne-moi ar Li. Au contraire, mo ti faire Li koné ki mo ti ressenti. Ek Jéhovah ti aide moi, souvent Li ti encourage moi a travers mo bann frere ek soeur spirituel. Beaucoup ki ti’nn faire face zot-mem ar enn maladie grave, ti donne moi bann conseil ki ti aide moi. Zot bann commentaire bien realiste ek equilibré ti rappel moi ki pa mo tousel ki ti pé passe par enn situation pareil. Mo ti gagne bann l’aide bien pratik, ek aussi bann proposition pou aide moi, ek sa finn bien touche moi. Tousala ti redonne moi l’assurance ki Jéhovah pa ti en colere avek moi. Bien-sur, mo pou bizin contigne combatte mo maladie, ek mo pa koné couma sa pou fini. Mais mo sur ki Jéhovah, Li avek moi, ek ki Li pou contigne aide moi dan sa l’epreuve-la.”

“To dresse enn la-table devant moi”

17. Couma David decrire Jéhovah dan Psaume 23:5, ek kifer sa l’exemple-la pa en contradiction avek l’exemple enn berger?

¹⁷ Asterla, David cite enn troisieme raison pou kifer li ena confiance dan so Berger: Jéhovah nourri So peuple, ek Li faire sa en abondance. David ecrire: “To dresse enn la-table devant moi, en face bann ki kont moi. To finn mette de l’huile lor mo la-tête; mo coupe bien rempli.” (Psaume 23:5) Dan sa verset-la, David decrire so Berger couma enn kikenn ki genereux kan Li recevoir so bann invité, ki donne mangé-boire en abondance. Sa deux l’exemple-la—enn berger ki prend compte ek enn kikenn genereux—pa contradictoire. Apré tou, enn bon berger bizin koné kot-sa li pou trouve bann la-plaine kot ena beaucoup l’herbe ek assez de l’eau, pou ki so troupeau pa “mank nanyin.”—Psaume 23:1, 2.

18. Couma nou koné ki Jéhovah, Li enn kikenn ki bien genereux?

¹⁸ Eski nou Berger Li aussi Li genereux kan Li recevoir bann invité? Oui, bien-sur! Reflechi lor qualité, quantité ek varieté mangé spirituel ki nou gagné dan nou lepok. Par l’esclave fidel et avisé, Jéhovah donne nou bann publication ki bien aide nou, bann reunion ek bann l’assemblée ki bien instruire nou—tousala donne nou tou seki nou bizin lor plan spirituel. (Matthieu 24:45-47) En tou cas, nou pa mank mangé lor plan spirituel. “L’esclave fidel et avisé” finn produire plusieurs million la-Bible ek bann publication ki aide nou pou comprend la Bible, ek zordi sa bann publication-la, zot disponible dan 413 langue. Jéhovah finn donne enn grand varieté mangé lor plan spirituel—depuis “di-lait,” setadir bann l’enseignement biblik de base, ziska “nourriture solid,” setadir bann l’enseignement biblik pli profond. (Hébreux 5:11-14) C’est pou sa ki, kan nou ena problem, ou-soit kan nou ena bann decision pou prend, la plupart du temps, nou kapav gagne exactement seki nou bizin. Kot nou pou été sans sa qualité mangé spirituel-la? Nou Berger Li vrai-mem enn kikenn ki bien genereux!—Isaïe 25:6; 65:13.

“Mo envie reste dan lakaz Jéhovah”

19, 20. (a) Dan Psaume 23:6, ki confiance David ti exprimé, ek couma nou kapav ena mem confiance? (b) Ki nou pou examiné dan prochain lartik?

¹⁹ Apré ki David ti reflechi lor fason ki so Berger agir, oui, Li ki donne tou kitsoz, a la fin li dire: “Oui, la bonté ek l’amour fidel pou suive moi toulé-jour dan mo la-vie; ek mo envie reste dan lakaz Jéhovah bien longtemps.” (Psaume 23:6) David koz avek enn leker rempli ar reconnaissance ek la foi—reconnaissance kan li mazinn le passé, ek la foi kan li guette l’avenir. David, sa ancien berger-la senti-li en securité, li koné ki tant ki li reste proche ar so grand Berger ki dan le ciel, coumadir li pé reste dan So lakaz, Jéhovah pou toujours prend li soin.

²⁰ Nou vrai-mem bien reconnaissant pou bann parole ki trouve dan Psaume 23! David pa ti pou kapav trouve bann pli joli parole ki sa pou decrire fason ki Jéhovah dirige, protege ek nourri So peuple. Bann phrase bien touchant ki David ti servi, finn gardé dan la Bible pou donne nou l’assurance ki nou aussi nou kapav considere Jéhovah couma nou Berger. Oui, tant ki nou reste proche ar Jéhovah, Li pou prend nou soin couma enn bon Berger pou “bien longtemps,” oui, mem pou l’eternité. Seulement, parski nou couma so bann mouton, nou ena responsabilité pou marche avek nou grand Berger, Jéhovah. Dan prochain lartik, nou pou trouvé seki sa impliké.

[Note]

Eski ou rappel?

• Kifer li approprié ki David compare Jéhovah ar enn berger?

• Couma Jéhovah montré ki Li comprend nou kan Li dirige nou?

• Dan ki fason Jéhovah aide nou pou endure bann l’epreuve?

• Couma Jéhovah montré ki Li genereux kan Li recevoir bann invité?

[Zimage, page 24]

Jéhovah conduire so peuple, pareil couma enn berger en Israël