LESON 09
Lapriyer Kapav Fer Ou Vinn Pli Pros Ar Bondie
Eski inn deza arive ki ou pa kone ki pou fer dan enn sitiasion? Eski ou bizin led pou regle sertin problem? Eski ou bizin ki rekonfort ou? Eski ou ti pou kontan vinn pli pros ar Zeova? Lapriyer kapav ed ou dan tou sa bann sitiasion-la. Me kitfwa ou pe demann ou: Dan ki fason mo bizin priye? Eski Bondie ekout tou bann lapriyer? Ki ou bizin fer pou ki Bondie ekout ou bann lapriyer? Anou reponn sa bann kestion-la.
1. Kisannla nou bizin priye, ek pou ki kitsoz nou kapav priye?
Zezi ti ansegn nou ki nou bizin priye zis nou Papa ki dan lesiel, setadir Zeova. Zezi limem ti priye Zeova. Li ti dir: “Gete kouma zot bizin priye: ‘Nou Papa lao dan lesiel . . .’” (Matie 6:9) Kan nou priye Zeova, nou fer nou lamitie avek Li vinn pli for.
Kan nou priye nou kapav demann Li ninport ki kitsoz tanki li an-akor avek so volonte. Si nou fer sa Zeova pou reponn nou bann lapriyer. Labib dir “tou seki nou demande, [Bondie] pou akord nou dapre so volonte.” (1 Zan 5:14) Zezi ti dir nou pou ki kitsoz nou kapav priye. (Lir Matie 6:9-13.) Nou kapav priye konsernan nou bann problem, me nou bizin pa bliye remersie Bondie pou bann kitsoz ki Li’nn fer pou nou, ek demann Li pou ed lezot.
2. Kouma nou bizin priye?
Labib ankouraz nou pou dir Bondie ‘seki ena lor nou leker.’ (Psom 62:8) Alor nou bann lapriyer bizin sinser. Nou kapav priye for ouswa dan nou leker, nou kapav osi priye ninport ki ler ek ninport kotsa nou ete. Me eski nou bizin met nou dan enn pozision spesial kan nou priye? Zeova pa demann nou pou azenou, asize, ouswa res debout kan nou priye. Seki pli inportan se ki nou priye Li avek respe.
3. Kouma Bondie reponn nou bann lapriyer?
Li fer sa dan diferan fason. Zeova finn donn nou so Parol, Labib, kot nou kapav gagn repons pou nou bann kestion. Dapre Psom 19:7 (NW), parol Bondie kapav “fer enn dimounn ki pena lexperyans gagn lasazes.” (Lir Zak 1:5.) Li kapav donn nou lape lespri kan nou pas par bann problem. Ek Li kapav osi servi so bann serviter pou ed nou.
ANOU GET INPE PLIS
Nou pou gete kouma nou kapav fer bann lapriyer ki fer Bondie plezir, ek kouma lapriyer kapav fer nou dibien.
4. Bann lapriyer ki Bondie aksepte
Ki kitsoz pou fer ki Bondie pou aksepte nou lapriyer ouswa non? Zwe VIDEO-la.
Zeova anvi ki nou priye Li. Lir Psom 65:2, NW, ek apre sa, get sa kestion-la ansam:
Eski ou panse ki Bondie anvi ekout ou bann lapriyer? Kifer ou pans koumsa?
Pou ki Bondie ekout nou bann lapriyer, nou bizin viv dapre so bann prinsip. Lir Mishe 3:4 ek 1 Pier 3:12, ek apre sa, get sa kestion-la ansam:
Ki nou bizin fer pou ki Bondie ekout nou bann lapriyer?
Pandan enn lager, toulede parti priye pou gagn laviktwar. Eski ou panse ki Bondie pou reponn sa bann kalite lapriyer-la?
5. Nou bizin dir Zeova seki ena dan nou leker
Sertin dimounn finn aprann ki zot bizin touletan resit bann mem lapriyer. Me eski se koumsa ki Bondie anvi ki nou priye Li? Lir Matie 6:7, ek apre sa, get sa kestion-la ansam:
Kouma nou kapav evit repet bann mem kitsoz dan nou bann lapriyer?
Sak zour, pans lor enn kitsoz pozitif ki’nn ariv ou ek apre sa, remersie Zeova pou sa. Si ou fer sa sak zour pandan enn semenn, alafin lasemenn ou pou’nn priye Zeova pou set diferan kitsoz.
Enn bon papa anvi ki so zanfan dir li seki ena lor so leker. Zeova osi anvi ki nou priye Li avek tou nou leker
6. Lapriyer se kado ki Bondie inn donn nou
Kouma lapriyer kapav donn nou lafors dan bann bon ek bann move moman? Zwe VIDEO-la.
Labib promet nou ki lapriyer kapav ed nou pou gagn lape lespri. Lir Filipien 4:6, 7, ek apre sa, get sa bann kestion-la ansam:
Lapriyer pa touletan regle nou bann problem, me kouma li kapav ed nou?
Pou ki kitsoz ou ti pou kontan priye?
Eski ou ti kone?
“Amenn” vedir “ki sa realize” ouswa “wi, mo dakor.” Labib montre ki depi bien lontan bann serviter Bondie ti pe dir “amenn” alafin enn lapriyer.—1 Kronik 16:36.
7. Rezerv letan pou priye
Parfwa nou telman okipe ki nou bliye priye. Ki linportans lapriyer ti ena pou Zezi? Lir Matie 14:23 ek Mark 1:35, ek apre sa, get sa bann kestion-la ansam:
Ki Zezi ti fer pou trouv letan pou priye?
Kan eski ou kapav trouv letan pou priye?
SERTIN DIMOUNN DIR: “Lapriyer se zis enn kitsoz ki fer nou santi nou bien.”
Me ou, ki ou panse?
SEKI NOU’NN APRANN
Bann lapriyer sinser fer nou vinn pli pros ar Bondie, donn nou lape lespri, ek donn nou lafors ki nou bizin pou fer plezir Zeova.
Eski Ou Rapel?
Kisannla nou bizin priye?
Kouma nou bizin priye?
Kouma lapriyer ed nou?
DEKOUVER
Trouv repons pou bann kestion ki boukou dimounn poz zot konsernan lapriyer.
“Sept kitsoz ou bizin koné lor la priere” (Latour Degard, 1e Novam 2010)
Aprann kifer li inportan ki nou priye ek kouma nou kapav amelior nou bann lapriyer.
Labib montre nou kisannla nou bizin priye.
Sa video-la montre nou ki nou kapav priye ninport kotsa ek ninport ki ler.