Jéhovah​—“Bondié ki donne la paix”

“Mo prié ki Bondié ki donne la paix avek zot tou.”​—ROM. 15:33.

1, 2. Ki situation difficile nou kapav lire dan Genèse chapitre 32 ek 33, ek ki resultat sa ti amené?

SA L’ENDROIT-LA ti pré ar Penouël, ki pa ti trop loin ar vallée Yabboq, ki trouve l’est la riviere Jourdain. Deux frere ti pré pou joinde la-bas. Ésaü finn tann dire ki so frere jumeau, Jacob, pé retourne lakaz. Mem si 20 an finn passé depuis ki Ésaü finn vann so droit premier-né ar li, Jacob ti peur pangar so frere encore ena la haine pou li ek rod touye li. Avek 400 zom, Ésaü ti al joinde Jacob. Jacob ti peur Ésaü, alors li ti envoye bann zanimo pou li. Chaque fois, li ti envoye plus zanimo pou Ésaü. En tou, li ti envoye 550 zanimo. Avek chaque groupe zanimo, bann serviteur Jacob ti dire Ésaü ki c’est enn cadeau ki so frere finn envoyé.

² Finalement, deux frere-la ti joinde! Jacob ti prend courage pou al joinde Ésaü. A mesure ki li ti marché, li ti prosterné​—pa enn fois mais sept fois. Jacob ti’nn fini faire seki pli important pou calmé so frere. Li ti’nn prié Jéhovah pou delivré li dan la main Ésaü. Eski Jéhovah ti reponn so la priere? Oui. La Bible dire: “Ésaü ti galopé pou vinn joinde li, li ti maye li, ti tombe dan so lé-bras, ti embrasse li.”​—Gen. 32:11-20; 33:1-4.

 3. Ki nou aprann ar recit lor Jacob ek Ésaü?

³ Sa recit lor Ésaü ek Jacob-la montré ki nou bizin faire tou seki nou kapav pou reglé bann probleme ki nou kapav gagné avek lezot. Si nou pa faire sa, sa pou menace la paix ki ena dan congregation. Jacob ti rod faire la paix avek Ésaü, mais pa parski li ti faire enn kitsoz de mal kont so frere ek ki li ti bizin demann li excuse. Non, c’est Ésaü ki ti meprise so droit premier-né ek ti vann sa avek Jacob pou enn bol lentille. (Gen. 25:31-34; Héb. 12:16) Pourtant, fason ki Jacob ti approche Ésaü montré ziska ki point nou bizin disposé pou faire zeffort pou garde la paix avek nou bann frere ek soeur. Sa montré aussi ki vrai Bondié reponn nou la priere kan nou demann Li so l’aide pou faire la paix. Dan la Bible, ena beaucoup lezot l’exemple ki montré nou ki nou bizin vinn bann dimoune ki faire la paix avek lezot.

Pli bon l’exemple ki nou kapav suive

 4. Ki disposition Bondié inn prend pou sauve bann dimoune ar peché ek la mort?

⁴ Pli grand l’exemple enn kikenn ki faire la paix c’est Jéhovah​—“Bondié ki donne la paix.” (Rom. 15:33) Mazinn tou seki Jéhovah inn faire pou ki nou kapav ena bann bon relation avek Li. En tant ki bann descendant Adam ek Ève, nou faire peché, alors nou merite “salaire ki peché payé.” (Rom. 6:23) Mais Jéhovah finn tellement content nou, ki Li’nn prend bann disposition pou sauve nou. Li’nn faire Jésus, so Garson ki Li bien content, sorti dan le ciel ek né couma enn dimoune parfait lor la terre. Ek Jésus ti accepté pou faire sa. Li ti laisse bann l’ennemi Bondié touye li. (Jean 10:17, 18) Vrai Bondié ti ressuscite Jésus, ek plitar, Jésus ti presente so Papa, valeur so sacrifice. Sa sacrifice-la ti pou enn ranson ki ti pou sauve bann dimoune ki faire peché ar enn la mort eternel si zot repenti.​—Lire Hébreux 9:14, 24.

5, 6. Couma sacrifice Jésus aide bann dimoune pou ena bann bon relation avek Bondié?

⁵ A cause peché, bann dimoune nepli ena bann bon relation avek Bondié. Couma sacrifice Jésus aide zot? Isaïe 53:5 dire: “Punition ki ti pou faire nou gagne la paix, ti lor li, ek a cause so bann blessure, finn ena enn guerison pou nou.” Au lieu ki Bondié considere bann dimoune ki obeir Li couma so bann l’ennemi, asterla, zot kapav ena bann bon relation avek Li. “Par [Jésus], nou liberé par la ranson grace a so di-sang, oui, nou gagne pardon pou nou bann peché.”​—Éph. 1:7.

⁶ La Bible dire: “Bondié inn trouve bon ki tou so bann qualité reste en [Christ].” C’est parski Bondié servi Jésus Christ pou realise so projet. Ki projet Jéhovah ena? C’est “pou reconcilié encore enn fois tou lezot kitsoz avek Li-mem kan Li faire la paix grace a di-sang ki [Jésus Christ inn] versé.” “Tou lezot kitsoz” ki Bondié permette pou ena bann bon relation avek Li c’est “bann kitsoz dan le ciel” ek “bann kitsoz lor la terre.” Ki été sa bann kitsoz-la?​—Lire Colossiens 1:19, 20.

 7. Ki été “bann kitsoz dan le ciel” ek “bann kitsoz lor la terre” ki gagne bann bon relation avek Bondié?

⁷ Grace a la ranson, bann chretien oint, ki Bondié ’finn declare juste’ en tant ki so bann garson, kapav “profite la paix avek Bondié.” (Lire Romains 5:1.) La Bible appel zot “bann kitsoz dan le ciel” parski zot ena l’esperance pou al vive dan le ciel. Zot “pou regne couma bann le roi ki dirige la terre” ek zot pou servi couma bann pretre pou Bondié. (Rév. 5:10) De lot coté, “bann kitsoz lor la terre” represente bann dimoune ki’nn repenti ar zot peché ek ki pou vive pou touletan lor la terre.​—Ps. 37:29.

 8. Couma l’exemple Jéhovah kapav aide ou kan ena bann probleme dan congregation?

⁸ Paul ti montré so grand reconnaissance pou sa disposition ki Jéhovah inn prend-la. Li ti ecrire bann chretien oint dan la ville Éphèse: “Bondié, ki ena beaucoup misericorde, . . . inn donne nou la vie ensam avek Christ, mem kan nou ti’nn mort dan nou bann faute​—c’est par faveur ki personne pa merité ki zot finn sauvé.” (Éph. 2:4, 5) Ki nou ena l’esperance pou al vive dan le ciel, ou-soit l’esperance pou vive lor la terre, nou vrai-mem bien reconnaissant envers Bondié pou so misericorde ek so faveur ki personne pa merité. Nou leker rempli ar reconnaissance kan nou trouve seki Jéhovah inn disposé pou faire pou permette bann dimoune ena la paix avek Li. Si nou reflechi lor l’exemple Bondié kan nou faire face ar bann situation ki menace la paix ek l’unité dan congregation, eski sa pa pou pousse nou pou faire la paix nou aussi?

Aprann ar l’exemple Abraham ek Isaac

9, 10. Couma Abraham ti montré ki li ti enn kikenn ki favorise la paix avek lezot?

⁹ Concernant Abraham, la Bible dire: “’Abraham ti mette so la foi en Jéhovah, ek Bondié ti mette sa lor so compte couma la justice,’ ek ti appel li ’camarade Jéhovah.’” (Jacq. 2:23) Abraham ti montré so la foi en Jéhovah kan li ti favorise la paix avek lezot. Par exemple, a mesure ki tou bann zanimo Abraham ti pé augmenté, ti commence ena bann probleme entre so bann gardien troupeau ek bann gardien troupeau so neveu Lot. (Gen. 12:5; 13:7) Sel solution pou reglé sa probleme-la, c’est ki Abraham ek Lot separé. Couma Abraham ti faire face ar sa probleme delicat-la? Li pa ti pensé ki, parski li ti pli agé ek li ti ena bann relation special avek Bondié, ki li ti kapav dire so neveu ki li ti bizin faire. Au contraire, Abraham ti montré ki li ti vrai-mem enn dimoune ki ti favorise la paix.

¹⁰ Abraham ti dire so neveu: “S’il te plait, pa laisse okenn la guerre contigné entre moi ek toi ek entre mo bann gardien troupeau ek to bann gardien troupeau, parski nou frere.” Li ti ajouté: “Eski tou sa pays-la pa devant toi? S’il te plait, separe toi avek moi. Si to al a gauche, alors mo pou al a droite; mais si to al a droite, alors mo pou al a gauche.” Lot ti choisir pli bon region, kot ti ena pli beaucoup l’herbe, mais Abraham pa ti garde li dan so leker. (Gen. 13:8-11) Plitar, kan bann l’ennemi ti faire Lot vinn zot prisonnier, Abraham pa ti hesité pou al sauve so neveu.​—Gen. 14:14-16.

11. Couma Abraham ti favorise la paix avek bann Philistin, ki ti reste dan mem pays ki li?

¹¹ Mazinn aussi couma Abraham ti faire tou seki li ti kapav pou favorise la paix avek bann Philistin, ki ti reste dan mem pays, dan Canaan. Bann Philistin “ti prend par la force” enn puit de l’eau ki bann serviteur Abraham ti fouillé dan Béer-Shéba. Abraham ti’nn deja sauve so neveu dan la main quatre le roi. Couma enn zom coumsa ti pou reagir asterla dan sa situation-la? Au lieu ki li ti laguerre pou ré-gagne so puit, Abraham ti choisir pou reste trankil lor sa sujet-la. Avek le temps, le roi bann Philistin ti vinn visite Abraham pou faire enn l’alliance la paix avek li. C’est selman apré ki li ti demann Abraham pou faire serment ki li ti pou reste toujours bon envers so bann descendant, ki Abraham ti koz lor so puit ki bann serviteur sa le roi-la ti’nn kokin. Kan le roi bann Philistin ti tann sa, li ti bien etonné ek li ti rann Abraham so puit. Concernant Abraham, li ti contigne vive en paix couma enn etranger dan sa pays-la.​—Gen. 21:22-31, 34.

12, 13. (a) Couma Isaac ti suive l’exemple so papa? (b) Couma Jéhovah ti beni bann zeffort ki Isaac ti faire pou favorise la paix?

¹² Isaac, garson Abraham, ti suive l’exemple so papa kan li aussi li ti favorise la paix avek lezot. Li ti montré sa par fason ki li ti agir avek bann Philistin. A cause enn famine, Isaac ti prend tou so famille ek tou seki ti reste kot li, li ti quitte Béer-Lahaï-Roï, enn desert dan Négueb. Li ti al dan direction nord, dan Guérar, enn territoire ki ti pli productif dan pays bann Philistin. La, Jéhovah ti beni Isaac ek ti faire li gagne enn grand recolte ek ti augmente so bann zanimo. Bann Philistin ti commence jaloux li. Zot pa ti envie ki Isaac prosperé pareil couma so papa, alors zot ti bouche bann puit ki bann serviteur Abraham ti fouillé dan sa l’endroit-la. Finalement, le roi bann Philistin ti dire Isaac: “Sorti dan nou l’endroit allé.” Isaac ti enn kikenn ki ti favorise la paix, alors li ti allé.​—Gen. 24:62; 26:1, 12-17.

¹³ Apré ki Isaac ti bouge so bann la tente ek ti al pli loin, so bann berger ti fouille enn lot puit. Bann berger Philistin ti pretann ki sa de l’eau-la ti pou zot. Pareil couma so papa, Isaac pa ti laguerre a cause enn puit. Au contraire, li ti dire so bann serviteur pou fouille enn lot puit. Bann Philistin ti ré-dire ki sa puit-la aussi ti pou zot. Pou preserve la paix, Isaac ti ré-bouge so bann la tente ek li ti al dan enn lot l’endroit. La-bas, so bann serviteur ti fouille enn puit ki Isaac ti appel Rehoboth. Avek le temps, li ti al dan enn region pli productif dan Béer-Shéba, ek la-bas Jéhovah ti beni li ek ti dire li: “Pa peur, parski mo avek toi, ek mo pou beni toi ek mo pou multiplié to descendance a cause Abraham mo serviteur.”​—Gen. 26:17-25.

14. Couma Isaac ti montré ki li ti enn kikenn ki favorise la paix kan le roi bann Philistin ti vinn faire enn l’alliance la paix avek li?

¹⁴ Pena doute ki Isaac ti kapav laguerre pou droit ki li ti ena pou servi sa bann puit ki so bann serviteur ti’nn fouillé-la. Mais kan-mem, pou garde la paix, Isaac ti’nn decidé pou demenagé plusieurs fois au lieu ki li ti laguerre. Le roi bann Philistin ek so bann officié ti vinn visite li dan Béer-Shéba ek ti vinn faire enn l’alliance la paix avek li. Zot ti dire li: “Nou finn bien trouvé ki Jéhovah avek toi.” Sa fois-la aussi Isaac ti montré ki li ti enn kikenn ki favorise la paix. La Bible dire: “Li ti faire enn fête pou zot ek zot ti mangé ek boire. Lendemain gramatin, zot ti leve boner ek zot ti faire bann serment sakenn ar so camarade. Apré sa, Isaac ti faire zot allé ek zot ti sorti kot li en paix.”​—Gen. 26:26-31.

Aprann ar l’exemple Joseph

15. Kifer bann frere Joseph pa ti kapav koz avek li dan enn fason pou favorise la paix?

¹⁵ Jacob, garson Isaac, ti vinn enn kikenn ki “personne pa ti kapav faire okenn reproche.” (Gen. 25:27) Couma nou ti trouvé au commencement, Jacob ti rod faire la paix avek so frere, Ésaü. Pena doute ki Jacob ti aprann ar bon l’exemple Isaac, so papa, ki ti favorise la paix. Ki nou kapav dire lor bann garson Jacob? Parmi so douze garson, Jacob ti pli content Joseph. Joseph ti obeir so papa ek ti respecté li. Li ti vrai-mem prend compte bann kitsoz ki ti pou so papa, ek Jacob ti kapav faire li confiance. (Gen. 37:2, 14) Mais, bann grand frere Joseph ti tellement jaloux li ki zot pa ti kapav koz avek li dan enn fason pou favorise la paix. Zot ti tellement ena la haine pou Joseph ki zot ti vann li couma enn esclave. Apré sa, zot ti embete zot papa ek ti faire li croire ki enn zanimo sauvage ti’nn touye Joseph.​—Gen. 37:4, 28, 31-33.

16, 17. Par fason ki Joseph ti traite so bann frere, couma li ti montré ki li ti content la paix?

¹⁶ Jéhovah ti avek Joseph. Avek le temps, Joseph ti vinn premier ministre l’Égypte​—apré Pharaon, li-mem ti pli important dan l’Égypte. Kan bann frere Joseph ti vinn l’Égypte a cause enn grand la famine, zot pa ti mem reconette li dan so bann linge égyptien. (Gen. 42:5-7) Li ti pou bien facile pou Joseph tire vengeance ek faire so bann frere payé pou di-tort ki zot ti faire li ek so papa! Mais au lieu ki li ti rod tire vengeance, Joseph ti essaye faire la paix avek zot. Kan so bann frere ti’nn vrai-mem repenti, Joseph ti faire zot reconette li, ek li ti dire zot: “Pa bizin zot dan la peine ek pa en colere kont zot-mem parski zot finn vann moi pou vinn ici; parski c’est pou sauve bann la vie ki Bondié finn envoye moi avant zot.” Lerla, li ti embrasse tou so bann frere ek ti plore avek zot.​—Gen. 45:1, 5, 15.

¹⁷ Apré la mort zot papa, Jacob, bann frere Joseph ti pensé ki kitfois Joseph ti pou tire vengeance kont zot. Kan zot ti koz sa avek Joseph, li “ti commence ploré” ek li ti reponn zot: “Pa bizin zot peur. Mo-mem mo pou contigne donne zot ek zot bann ti-zenfant, mangé.” Joseph, ki ti content la paix, “ti console zot ek ti koz ar zot dan enn fason pou rassure zot.”​—Gen. 50:15-21.

Bann l’exemple ki “finn ecrire pou nou l’instruction”

18, 19. (a) Ki ou finn aprann ar l’exemple bann dimoune ki favorise la paix ki nou finn examiné dan sa lartik-la? (b) Ki nou pou examiné dan prochain lartik?

¹⁸ Paul ti ecrire: “Tou bann kitsoz ki finn ecrire longtemps finn ecrire pou nou l’instruction, pou ki par nou l’endurance ek par consolation ki nou gagné dan bann l’Ecriture, nou ena enn l’esperance.” (Rom. 15:4) Ki nou finn aprann kan nou finn examine nou pli grand l’exemple, Jéhovah, ek aussi bann recit biblik ki koz lor l’exemple Abraham, Isaac, Jacob ek Joseph?

¹⁹ Kan nou reflechi lor tou seki Jéhovah inn faire pou retabli bann bon relation entre Li ek bann dimoune imparfait, eski sa pa pousse nou pou faire tou seki nou kapav pou poursuive la paix avek lezot? L’exemple Abraham, Isaac, Jacob ek Joseph montré ki bann parent kapav ena enn bon l’influence lor zot zenfant. En plus, sa bann recit-la montré aussi ki Jéhovah beni zeffort bann dimoune ki essaye faire la paix. Li pa etonnant ki Paul ti koz lor Jéhovah couma “Bondié ki donne la paix”! (Lire Romains 15:33; 16:20.) Dan prochain lartik, nou pou guetté kifer Paul ti mette l’accent lor l’importance pou nou poursuive la paix ek couma nou kapav vinn bann dimoune ki favorise la paix.

Ki ou finn aprann?

• Dan ki fason Jacob ti essaye favorise la paix kan li ti pré pou joinde Ésaü?

• Ki l’effet sa ena lor ou kan ou reflechi lor seki Jéhovah inn faire pou ki bann dimoune ena la paix avek Li?

• Ki ou finn aprann ar l’exemple bann dimoune ki ti favorise la paix, couma Abraham, Isaac, Jacob, ek Joseph?

[Zimage page 19]

Ki kitsoz pli important Jacob ti faire pou retabli la paix avek Ésaü?