Kontign Prepar Twa pou Zour Zeova

 1. Ki nou bizin fer si nou anvi travers “zour Zeova” vivan?

DAN Labib, “zour Zeova” se moman kot Zeova detrir so bann lennmi ek Li sov so pep. Dan lepase, Zeova ti detrir plizir nasion. (Iza. 13:1, 6; Eze. 13:5; Sof. 1:8) Dan nou lepok, “zour Zeova” pou koumanse kan bann dirizan politik pou detrir Gran Babilonn ek sa pou fini ar lager Armagedon. Pou nou reisi travers sa zour-la vivan, nou bizin prepar nou depi aster-la mem. Zezi inn ansegn nou ki nou “bizin pare” pou “gran soufrans” (gran detres) savedir ki nou bizin kontign prepar nou pou sa zour-la.​—Mat. 24:21; Lik 12:40.

 2. Ki nou kapav aprann dan premie let ki Pol ti ekrir bann Tesalonisien?

² Dan premie let ki li ti ekrir bann Tesalonisien, lapot Pol ti servi plizir lexanp pou ed bann Kretien pou zot prepar zot pou zour Zeova. Pol ti kone ki zour Zeova pa ti pou vinn deswit. (2 Tes. 2:1-3) Kanmem sa, li ti ankouraz so bann frer ek ser pou prepar zot pou sa zour-la, koumadir zour-la ti pou vini dime. Nou osi nou kapav swiv konsey lapot Pol. Anou gete seki Pol ti dir konsernan: (1) kouma zour Zeova pou arive, (2) kisann-la pa pou sape pou sa zour-la, ek (3) kouma nou kapav prepar nou pou sa zour-la.

 3. Dan ki fason zour Zeova pou arive kouma enn voler dan lanwit? (Get zimaz osi.)

³ “Kouma enn voler dan lanwit.” (1 Tes. 5:2) Se premie lexanp ki Pol servi pou dekrir kouma zour Zeova pou arive. Bann voler souvan pase dan lanwit kan personn pa atann zot, ek zot azir vit-vit. Zour Zeova osi pou arive kan personn pa pou atann. Kitfwa mem bann vre Kretien pou etone ar vites ki sa bann levennman-la pou arive. Selman, zis bann move ki pou detrir sa zour-la.

 4. Kifer nou kapav konpar zour Zeova ar “bann douler lakousman enn fam ansint”?

⁴ “Kouma bann douler lakousman enn fam ansint.” (1 Tes. 5:3) Kan enn madam ansint, li pa kone ki ler exakteman li pou akouse. Selman, li sir ki li pou akouse. Ek kan li pe al akouse, sa pou pas bien vit, personn pa pou kapav aret sa, ek li pou gagn boukou douler. Dan mem fason, nou pa konn ni zour ni ler, ki zour Zeova pou koumanse. Selman, nou kone ki zour Zeova pou vini, ki destriksion bann move pou pas bien vit, ek ki personn pa pou kapav aret sa.

 5. Kifer nou kapav konpar gran soufrans ar moman kot soley leve ek koumans fer kler?

⁵ Soley leve ek koumans fer kler. Dan trwaziem lexanp ki Pol servi, ankor enn fwa li koz lor bann voler ki pe kokin aswar. Me sa’nn fwa-la, Pol konpar zour Zeova ar moman kot soley leve ek koumans fer kler. (1 Tes. 5:4) Kan bann voler vinn kokin aswar, zot kapav telman okipe ki zot pa trouv letan pase. Lerla, kouma koumans fer kler, zot bat dan abriti parski bann dimounn kapav dekouver zot. Kan gran soufrans pou arive, pou dekouver bann dimounn ki’nn azir kouma bann voler, setadir bann ki’nn kontign fer an sekre bann kitsoz ki Zeova deteste. Nou prepar nou pou zour Zeova kan nou rezet bann konportman ki pa fer Zeova plezir ek kan nou kontign swiv ‘laverite, lazistis, ek bonte.’ (Efe. 5:8-12) Aster-la, anou get de lexanp ki Pol servi pou explike kisann-la pa pou sape pou zour Zeova.

 6. Kifer nou kapav dir ki laplipar bann dimounn pe dormi? (1 Tesalonisien 5:6, 7)

⁶ “Bann ki dormi.” (Lir 1 Tesalonisien 5:6, 7.) Pol konpar bann dimounn ki pa pou sape pou zour Zeova ar bann dimounn ki pe dormi. Sa bann dimounn-la pa pe pran kont seki pe arive otour zot. Zot pa konpran bann levennman inportan ki pe arive dan lemond, ek akoz sa, zot pa kapav prepar zot pou fer fas ar sa. Azordi, laplipar bann dimounn pe dormi lor plan spiritiel. (Rom. 11:8) Zot pa krwar dan bann prev ki montre ki nou pe viv dan “bann dernie zour” ek ki gran soufrans pe koste. Kan ena bann gran sanzman dan lemond, sertin interese ar mesaz Rwayom Bondie. Selman, boukou parmi zot pa res eveye lor plan spiritiel. Se koumadir zot re-al dormi. Mem si sertin parmi zot krwar ki zour zizman pe koste, zot panse ki sa pa pou ariv aster-la. (2 Pier 3:3, 4) Me sak zour ki pase, li pe vinn deplizanpli inportan ki nou res eveye lor plan spiritiel.

 7. Kifer nou kapav konpar bann ki pa pou sape pou zour Zeova ar bann soular?

⁷ “Bann ki bwar pou soule.” Lapot Pol ti osi konpar bann ki pa pou sape pou zour Zeova ar bann soular. Kan enn dimounn sou, li tarde pou azir ek li pran bann move desizion. Dan mem fason, bann move dimounn pa pe reazir ar bann lavertisman ki Zeova pe done. Zot swazir enn sime ki pou amenn zot ver lamor. Parkont, Labib ankouraz bann Kretien pou gard zot bon sans. (1 Tes. 5:6) Enn Biblis dir ki enn kikenn ki gard so bon sans, “li res kalm ek li pa panike. So lespri kler ek li reflesi bien pou ki li kapav pran bann bon desizion.” Kifer nou bizin gard nou lespri kler ek res kalm? Nou bizin fer sa pou ki nou pa inplik nou dan bann zafer politik ek bann problem sosial sa lemond-la. Plis zour Zeova pe koste, plis bann dimounn pou met presion lor nou pou ki nou inplik nou dan sa de domenn-la. Kan sa pou arive, fode pa nou trakase, parski lespri sin Zeova pou ed nou pou nou gard nou lespri kler, pou nou res kalm, ek pou nou pran bann bon desizion.​—Lik 12:11, 12.

 8. Kouma 1 Tesalonisien 5:8 dekrir bann kalite ki pou ed nou pou res lor nou gard? (Get zimaz osi.)

⁸ “Met . . . zile proteksion lor nou ek . . . elmet.” Pol konpar nou ar bann solda ki lor zot gard ek ki abiye pou lager. (Lir 1 Tesalonisien 5:8.) Kan ena enn lager, enn solda bizin pare pou lager ninport ki moman. Li parey pou nou osi. Nou prepar nou pou zour Zeova kan nou met lafwa ek lamour kouma enn zile proteksion lor nou, ek kan nou met lesperans kouma enn elmet lor nou latet. Sa bann kalite-la bien itil pou nou.

 9. Kouma nou lafwa protez nou?

⁹ Parey kouma zile proteksion protez leker enn solda, lafwa ek lamour protez nou leker sinbolik. Sa bann kalite-la pou ed nou pou kontign servi Zeova ek pou kontign swiv Lekris. Gras-a lafwa, nou sir ki Zeova pou rekonpans tou bann ki rod Li ar tou zot leker. (Ebre 11:6) Lafwa pou motiv nou osi pou res fidel ar nou Sef Zezi, mem si nou gagn bann difikilte. Nou bizin ogmant nou lafwa pou nou kapav fer fas ar bann difikilte. Nou kapav fer sa kan nou reflesi lor lexanp bann fidel serviter Zeova dan nou lepok, ki pe res fidel anver Li malgre persekision ek bann difikilte ekonomik. Ek nou kapav osi evit tom dan piez materyalis kan nou swiv lexanp bann serviter Zeova ki’nn sinplifie zot lavi pou zot fer plis pou Rwayom Bondie.b

10. Kouma lamour pou Bondie ek pou nou prosin ed nou pou andire?

¹⁰ Lamour osi bien inportan pou ki nou res lor nou gard. (Mat. 22:37-39) Lamour pou Bondie ed nou pou andire dan predikasion, mem si nou kapav gagn bann persekision akoz sa. (2 Tim. 1:7, 8) Akoz nou kontan nou prosin, nou kontign prese ek nou kontign fer nou teritwar afon, mem si sa vedir ki nou bizin pres par let ouswa par telefonn. Nou touletan gard lespwar ki bann dimounn dan nou teritwar kapav sanze. Ki kone, kitfwa enn zour zot pou koumans servi Zeova!​—Eze. 18:27, 28.

11. Kouma lamour pou nou bann frer ek ser ed nou? (1 Tesalonisien 5:11)

¹¹ Nou kontan nou bann frer ek ser osi. Nou montre ki nou kontan zot kan nou ‘ankouraz sakenn nou kamarad ek fortifie sakenn nou kamarad.’ (Lir 1 Tesalonisien 5:11.) Parey kouma bann solda ki pe lager kot-a-kot, nou ankouraz sakenn nou kamarad. Biensir, dan enn lager, li kapav arive ki enn solda bles so kamarad. Selman, zame li pa pou fer sa par expre. Dan mem fason, nou osi zame nou pa pou bles nou bann frer ek ser par expre, ek zame nou pa pou rann zot lemal pou lemal. (1 Tes. 5:13, 15) Nou montre lamour osi kan nou respekte bann frer ki ena bann responsabilite dan lasanble. (1 Tes. 5:12) Kan Pol ti ekrir so let, lasanble Tesalonik ti forme depi mwins ki enn an. Bann frer ki ti ena bann responsabilite dan lasanble, kitfwa pa ti ena boukou lexperyans, ek kitfwa zot ti fer bann erer. Kanmem sa, zot bann frer ek ser ti respekte zot. Plis nou pe koste ar gran soufrans, plis nou bizin ena konfians dan bann ansien nou lasanble. Dan sa lepok difisil ki nou pe viv la, li kapav arive ki nou nepli ena kontak ar bann frer ki dan Betel ouswa ki dan biro mondial. Akoz sa, li bien inportan ki depi aster-la mem, nou aprann kontan ek respekte bann ansien nou lasanble. Pa bliye ki Zeova pe servi Zezi pou gid sa bann zom fidel la. Alor, ninport ki arive, fode pa nou res konsantre lor defo sa bann frer-la ek nou bizin gard nou bon sans.

12. Kouma nou lesperans protez nou bann panse?

¹² Parey kouma enn elmet protez latet enn solda, nou lesperans protez nou bann panse. Kan nou lesperans bien for, nou kone ki tou bann kitsoz ki lemond kapav donn nou, zot pena okenn valer. (Fil. 3:8) Nou lesperans ed nou pou res kalm. Anou gete kouma lesperans ti ed Wallace ek Laurinda, enn koup ki pe servi dan Lafrik. Dan lespas trwa semenn, Laurinda so mama ek Wallace so papa ti mor. Akoz pandemi COVID-19, zot pa ti kapav al get zot fami. Wallace dir: “Lesperans rezireksion ed mwa pou trouv zot dan leta ki zot pou ete kan zot pou resisite dan lemond nouvo, pa dan leta ki zot ti ete kan zot ti mor. Lesperans rezireksion ed mwa pou res kalm, sirtou kan mo bien tris.”

13. Ki nou bizin fer pou ki nou gagn lespri sin?

¹³ “Pa tengn dife lespri sin.” (1 Tes. 5:19) Pol konpar lespri sin ar enn dife ki brile dan nou. Kan nou ena lespri sin Bondie, nou ena enn gran dezir pou fer seki bon. Anplis, lespri sin donn nou lafors ki nou bizin pou nou kapav servi Zeova. (Rom. 12:11) Ki nou bizin fer pou ki nou gagn lespri sin? Nou bizin priye Zeova, etidie so Parol Labib, ek swiv bann instriksion ki nou gagne ar so lorganizasion, ki dirize par lespri sin. Kan nou fer sa bann kitsoz-la, sa pou ed nou pou devlop “frwi lespri sin.”​—Gal. 5:22, 23.

14. Si nou anvi kontign gagn lespri sin Bondie, ki kitsoz fode pa nou fer? (Get zimaz osi.)

¹⁴ Apre ki Bondie donn nou so lespri sin, nou bizin fer bien atansion ki nou “pa tengn dife lespri sin.” Zeova donn so lespri sin zis bann dimounn ki fer zefor pou ena enn bon fason panse ek enn bon kondwit. Parkont, si nou kontign pans lor bann move kitsoz ek ki nou fer sa bann kitsoz-la, Zeova pa pou donn nou so lespri sin. (1 Tes. 4:7, 8) Pou ki nou kontign gagn lespri sin Zeova, nou bizin osi “pa mepriz bann profesi.” (1 Tes. 5:20) Dan sa verse-la, “bann profesi” se bann mesaz ki Zeova inn fer nou kone gras-a so lespri sin, parmi ena mesaz konsernan zour Zeova ek osi mesaz konsernan lepok difisil ki nou pe viv. Fode pa nou panse ki zour Zeova, ouswa Armagedon, pa pou arive tanki nou vivan. Okontrer, nou bizin montre ki nou pe atann sa zour-la arive. Nou fer sa kan toulezour nou kontign res bien okipe dan ‘bann aksion ki montre ki nou atase ar Bondie,’ ek kan nou kontign ena enn bon kondwit.​—2 Pier 3:11, 12.

15. Ki nou bizin fer pou nou pa les nou inflianse par bann foste ki bann demon pe fane? (1 Tesalonisien 5:21)

¹⁵ Biento, bann lennmi Bondie pou kriye “lape ek sekirite!” (1 Tes. 5:3) Bann demon pou fann bann foste partou lor later, ek boukou dimounn pou krwar zot. (Rev. 16:13, 14) Parkont, si nou “verifie [ouswa teste] tou kitsoz,” zot pa pou kapav anbet nou. (Lir 1 Tesalonisien 5:21.) Mo Grek ki’nn servi pou “verifie” dekrir fason ki bann dimounn ti teste bann metal ki ena valer, kouma lor ek larzan, pou fer sir ki zot vremem ena valer. Alor, nou bizin teste, ouswa verifie, seki nou tande ouswa seki nou lir, pou fer sir ki sa bann linformasion-la zot laverite. Pol ti ankouraz bann Tesalonisien pou verifie tou kitsoz, ek li bien inportan ki nou osi nou fer sa amezir ki gran soufrans pe koste. Olie ki nou krwar seki lezot dir, nou bizin konpar seki nou lir ek seki nou tande ar seki Labib ek lorganizasion Zeova dir. Kan nou fer sa, nou pa pou les nou inflianse par bann foste ki bann demon pe fane.​—Prov. 14:15; 1 Tim. 4:1.

16. Ki lesperans nou ena, ek ki sa motiv nou pou fer?

¹⁶ Nou kone ki pep Zeova pou reisi travers gran soufrans. Me ki nou kapav dir lor nou personelman? Nou pa kone ki kapav arive demin. (Zak 4:14) Selman, mem si nou reisi travers gran soufrans, ouswa mem si nou mor avan, nou kone ki si nou res fidel ar Zeova, Li pou rekonpans nou ek Li pou donn nou lavi eternel. Bann Kretien ki ena lesperans pou al dan lesiel pou dan lesiel ar Zezi, ek bann lezot mouton pou dan Paradi lor later. Alor, anou kontign res konsantre lor nou zoli lesperans, ek anou kontign prepar nou pou “zour Zeova”!