Congregation bizin vinn fort

“Congregation . . . ti konn enn period la paix ek ti pé vinn fort.”—ACTES 9:31.

 1. Ki question nou kapav posé en rapport avek “congregation Bondié”?

JOUR la Pentecôte l’an 33 n.l., Jéhovah ti accepté enn group disciple Christ couma enn nouveau nation, “l’Israël Bondié.” (Galates 6:16) Sa bann chrétien oint-la ti vinn aussi seki la Bible appel “congregation Bondié.” (1 Corinthiens 11:22) Ki sa ti impliké? Couma “congregation Bondié” ti pou organisé? Couma li ti pou fonctionné, mem si so bann membre ti pou reste n’importe ki coté lor la terre? Ek couma sa concerne nou la-vie ek nou bonheur?

2, 3. Couma Jésus ti montré ki congregation chrétien ti pou bien organisé?

² Couma nou ti trouvé dan lartik avant, Jésus ti annoncé ki sa congregation bann chrétien oint-la ti pou existé. Li ti dire l’apotre Pierre: “Lor sa roche-la [Jésus Christ] mo pou construire mo congregation, ek bann la-porte l’hadès pa pou ena pouvoir lor li.” (Matthieu 16:18) En plus, kan Jésus ti encore avek so bann zapotre, li ti donne zot bann l’instruction couma sa congregation ki ti pré pou formé-la, ti pou fonctionné ek couma li ti pou organisé.

³ Par so parole ek so action, Jésus ti enseigné ki certain dan congregation ti pou prend la tête pou servi lezot dan zot group. Jésus Christ ti dire: “Zot koné ki bann ki consideré couma chef dan bann nation, pé faire dominere ar zot ek bann ki grand parmi bann nation, pé servi zot pouvoir pou domine lor zot. Sa pa passe coumsa parmi zot; mais n’importe kisannla ki envie vinn grand parmi zot, bizin vinn zot serviteur, ek n’importe kisannla ki envie premier parmi zot, bizin vinn l’esclave zot tou.” (Marc 10:42-44) Li clair ki c’est pa zis enn tigit dimoune ki trouve inpé partout-partout, sakenn dan so coin ek kot pena okenn l’organisation, ki ti pou forme “congregation Bondié.” Au contraire, li ti pou enn l’organisation bien en ordre kot so bann membre ti pou travail ek communik sakenn ar so camarade.

4, 5. Couma nou koné ki congregation ti pou bizin gagne enn l’enseignement spirituel?

⁴ Sa Kikenn ki ti pou Chef dan ‘congregation Bondié-la,’ ti montré ki so bann zapotre ek lezot dimoune ki ti pou aprann so bann l’enseignement, ti pou ena bann responsabilité bien precis envers bann lezot membre congregation. Ki zot ti pou faire? Enn parmi bann grand responsabilité ki zot ti pou ena c’est pou donne enn l’enseignement spirituel bann ki dan congregation. Kan Jésus ti ressuscité, nou rappel ki li ti dire Pierre devant certain zapotre: “Simon, garson Jean, eski to content moi?” Pierre ti reponn li: “Oui, Seigneur, to koné ki mo ena l’affection pou toi.” Jésus ti dire li: “Nourri mo bann ti-mouton. . . . Prend soin mo bann ti brebis. . . . Nourri mo bann ti brebis.” (Jean 21:15-17) Oui, c’est vrai-mem enn grand responsabilité!

⁵ Par seki Jésus ti dire, nou trouvé ki bann dimoune ki pé rassemblé dan congregation, zot pareil couma bann brebis dan enn parc. Sa bann brebis-la, setadir bann zom, bann femme ek bann zenfant ki forme partie dan congregation chrétien, ti pou bizin gagne enn l’enseignement spirituel, ek ti pou bizin traite zot dan enn bon fason. En plus, parski Jésus ti donne l’ordre tou so bann disciple pou enseigne lezot dimoune ek pou faire bann lezot disciple, n’importe kisannla ki ti pou vinn enn brebis ti pou bizin gagne enn formation pou obeir sa l’ordre-la.—Matthieu 28:19, 20.

 6. Ki bann disposition ti prend dan “congregation Bondié” ki ti’nn fek formé?

⁶ Enn fois ki “congregation Bondié” ti formé, so bann membre ti rassemblé regulierement pou gagne enn l’enseignement ek pou encourage sakenn so camarade. La Bible dire: “Zot ti passe zot lé-temps pou ecoute l’enseignement bann zapotre, ek pou rassemblé avek lezot, pou mangé ensam ek pou faire la priere.” (Actes 2:42, 46, 47) Enn lot detail important ki nou trouvé dan la Bible, c’est ki ti’nn choisir bann zom qualifié pou occupe certain kitsoz pratik. Pa ti’nn choisir zot parski zot ti ena enn grand l’education, ni parski zot ti ena bann capacité technik, mais parski zot ti bann zom ki ti “rempli ar l’esprit saint ek sagesse.” Enn parmi sa bann zom-la ti Étienne, ek la Bible montré bien ki li ti “enn zom ki ti ena beaucoup la-foi ek ki ti rempli ar l’esprit saint.” Grace a l’arrangement ki Bondié ti’nn prend pou organise bann congregation, “parole Bondié ti pé contigne progressé, ek quantité disciple ti pé contigne augmenté dan Jérusalem.”—Actes 6:1-7.

Bann zom ki Bondié ti servi

7, 8. (a) Parmi bann chrétien premier siecle, ki role bann zapotre ek bann ancien ki ti dan Jérusalem ti ena? (b) Kan bann congregation ti konn decision college central, ki resultat sa ti ena?

⁷ Nou comprend ki bann zapotre ti prend la tête pou dirige bann congregation dan premier siecle. Mais zot pa ti tousel pou faire sa. Enn fois, Paul ek bann frere ki ti accompagne li ti retourne Antioche ki ti trouve en Syrie. Actes 14:27 dire: “Kan zot ti arrivé ek zot ti rassemblé congregation, zot ti commence raconte tou seki Bondié ti faire par zot moyen.” Pendant ki zot ti encore avek sa congregation-la, certain ti demandé si bann non-Juif ki ti’nn vinn croyant ti bizin faire-zot circonci. Pou reglé sa question-la, bann frere ti envoye Paul ek Barnabas “vers bann zapotre ek bann ancien ki ti Jérusalem,” ki ti servi en tant ki enn college central.—Actes 15:1-3.

⁸ Jacques, enn ancien ek demi-frere Jésus mais ki pa ti enn zapotre, ti dirige sa reunion-la kan “bann zapotre ek bann ancien ti rassemblé pou examine sa question-la.” (Actes 15:6) Apré ki zot ti bien examine sa question-la ek avek l’aide l’esprit saint, zot ti prend enn decision ki ti en accord avek Parole Bondié. Zot ti ecrire bann lettre pou faire bann congregation konn zot decision. (Actes 15:22-32) Kan bann chrétien ti aprann ki decision ti’nn prend, zot ti accepté li ek zot ti mette li en pratik. Ki resultat sa ti ena? Sa ti fortifié bann frere ek soeur ek sa ti encourage zot. La Bible dire: “Alors vrai-mem, bann congregation ti pé contigne vinn fort dan la foi ek zot ti pé augmenté jour apré jour.”—Actes 16:5.

 9. Dapré la Bible, ki responsabilité bann zom ki rempli bann condition kapav gagné?

⁹ Mais couma eski normalement bann congregation local ti pé fonctionné? Prend par exemple, bann congregation ki ti lor l’île Crète. Mem si beaucoup dimoune ki ti vive la-bas ti ena enn mauvais reputation, certain ti change zot la-vie ek ti vinn bann vrai chrétien. (Tite 1:10-12; 2:2, 3) Bann chrétien lor sa l’île-la ti reste dan different la-ville, ek zot tou ti bien loin ar college central ki ti trouve Jérusalem. Mais sa pa ti enn gros problem, parski ti ena “bann ancien” ki ti’nn etabli dan chaque congregation dan Crète, pareil couma dan bann congregation dan lezot l’endroit. Sa bann zom-la ti rempli bann condition ki nou trouvé dan la Bible. Zot ti’nn etabli couma ancien, ou-soit surveillant, ki ti kapav “encourage lezot par l’enseignement ki en accord avek la verité ek . . . reprend bann dimoune ki [ti] dire le contraire.” (Tite 1:5-9; 1 Timothée 3:1-7) Ti ena lezot frere ki ti rempli bann condition biblik pou servi couma bann assistant ministeriel dan bann congregation.—1 Timothée 3:8-10, 12, 13.

10. Dapré Matthieu 18:15-17, couma bann serviteur Bondié ti pou reglé bann problem grave entre zot?

¹⁰ Jésus ti montré ki enn disposition coumsa ti pou existé. Dan Matthieu 18:15-17, li ti dire ki parfois kapav ena bann problem entre deux serviteur Bondié, enn ladan faire enn certain peché kont so camarade. Sa dimoune ki’nn offensé-la ti bizin al koz ar lot-la ek “al devoile so faute” zis entre zot deux. Si sa demarche-la pa ti reglé zot problem, ti kapav demann l’aide ar enn ou-soit deux lezot dimoune ki ti konn sa problem-la. Mais ki ti arrivé si zot pa ti reussi reglé problem-la? Jésus ti dire: “Si li pa ecoute bannla, faire congregation koné. Ek si li pa ecoute congregation aussi, alors to bizin considere li couma enn dimoune non-Juif ek couma enn fonctionnaire ki ramasse taxe.” Dan lepok ki Jésus ti dire sa, bann Juif ti encore forme “congregation Bondié,” alors, so bann parole ti applik ar zot en premier.a Mais, enn fois ki congregation chrétien ti’nn formé, seki Jésus ti dire ti pou applik dan sa congregation-la. Sa montré nou ki bann serviteur Bondié ti pou organisé en tant ki congregation pou fortifié ek pou guide chaque chrétien.

11. Ki role bann ancien joué pou reglé bann problem?

¹¹ Bann ancien, ou-soit bann surveillant, ti pou represente chaque congregation kan ti ena pou traite bann problem, pou reglé zot ek pou traite bann peché. Sa li en accord avek condition ki bann ancien bizin rempli ek ki mentionné dan Tite 1:9. Li vrai ki bann ancien dan bann congregation ti imparfait, pareil couma Tite. Pourtant, Paul ti envoye Tite dan bann congregation pou “reglé bann kitsoz ki pa ti pé marche bien.” (Tite 1:4, 5) Zordi, bann frere ki recommandé pou vinn ancien bizin inn prouve zot la-foi ek inn montré ki zot bien devoué pou congregation. Zot bizin inn faire sa pendant enn bon period lé-temps. Lerla, lezot dan congregation pou ena raison pou faire confiance bann zom ki Jéhovah inn etabli pou dirige zot.

12. Ki responsabilité bann ancien ena envers la congregation?

¹² Paul ti dire bann ancien dan congregation Éphèse: “Veille bien lor zot-mem ek lor tou troupeau Bondié, parski l’esprit saint finn etabli zot couma bann surveillant parmi sa troupeau-la pou ki zot prend soin congregation Bondié ki Li’nn acheté avek di-sang so prop Garson.” (Actes 20:28) Li vrai ki zordi aussi bann ancien dan bann congregation inn etabli pou “prend soin congregation Bondié.” Zot bizin faire sa avek amour, pa couma bann ki domine lor congregation. (1 Pierre 5:2, 3) Bann ancien bizin faire tou seki zot kapav pou fortifié ek pou aide zot “tou [dan] troupeau Bondié.”

Reste attaché ar congregation

13. Parfois, ki kapav arrivé dan congregation, ek kifer?

¹³ Bann ancien ek tou dimoune dan congregation zot imparfait. Alors, de temps en temps ena bann problem ki arrivé, pareil couma sa ti arrivé dan premier siecle kan certain zapotre ti encore vivant. (Philippiens 4:2, 3) Kitfois nou ena l’impression ki enn ancien ou-soit enn lot dimoune inn koz brite ar nou, li pa’nn koz bien, ou-soit li’nn dire enn kitsoz ki pa completement vrai. Ou-soit kitfois nou pensé ki enn kitsoz ki pa en accord avek la Bible pé deroulé, mais ki bann ancien parette pa pé faire nanyin pou corrige sa, mem si zot koné seki pé passé. Bien-sur, li possible ki bann ancien finn reglé problem-la ou-soit pé reglé li en accord avek la Bible ek avek bann renseignement ki nou, nou pa koné. Mais mem si enn situation ki pa en accord avek la Bible pé arrivé dan congregation, reflechi lor la: pendant enn temps, ti ena enn peché grave ki ti existé dan congregation Corinthe. Jéhovah ti interessé ar sa congregation-la. Avek le temps, Li ti faire en sorte ki traite sa peché-la couma bizin ek dan enn fason ferme. (1 Corinthiens 5:1, 5, 9-11) Nou kapav demann nou-mem: ‘Si mo ti dan congregation Corinthe dan sa lepok-la, couma mo ti pou reagir entre-temps?’

14, 15. Kifer certain ti arrete suive Jésus, ek ki leson nou kapav tiré?

¹⁴ Anou prend enn lot kitsoz ki kapav arrivé dan congregation. Supposé ki enn kikenn trouve enn l’enseignement ki basé lor la Bible difficile pou comprend ek pou accepté. Kitfois li finn faire bann recherche dan la Bible ek dan bann publication ki nou gagné dan congregation ek li finn al rod l’aide ar bann chrétien mur, ek mem ar bann ancien. Mais mem sa, li trouve sa difficile pou comprend ek pou accepté sa l’enseignement-la. Ki li kapav faire? Ti arrive enn kitsoz coumsa apepré enn an avant la mort Jésus. Li ti dire ki li-mem “di-pain ki donne la vie” ek pou enn kikenn gagne la vie eternel, li bizin ‘mange la chair Fils de l’homme ek boire so di-sang.’ Sa ti choque certain parmi so bann disciple. Au lieu ki zot ti rod enn explication ou-soit attann avek la foi, beaucoup disciple “ti nepli oulé marche avek [Jésus].” (Jean 6:35, 41-66) Encore enn fois, si nou ti la-bas, ki nou ti pou faire?

¹⁵ Dan nou lepok, certain finn arrete frequente congregation, ek zot pensé ki zot kapav servi Bondié par zot-mem. Kitfois zot dire ki certain finn offense zot, zot pensé ki pa finn corrige certain kitsoz ki pa bon, ou-soit zot pa kapav accepté certain l’enseignement. Eski zot ena raison pou agir coumsa? Mem si li vrai ki chaque chrétien bizin ena bann relation personnel avek Jéhovah, nou pa kapav nié ki Bondié pé servi enn congregation mondial couma Li ti faire dan lepok bann zapotre. En plus, Jéhovah ti servi ek ti beni bann congregation local ki ti ena dan premier siecle. Li ti faire l’arrangement pou ki bann ancien ek bann assistant ministeriel ki rempli bann condition biblik aide bann congregation. Zordi aussi li pareil.

16. Si enn dimoune tenté pou quitte congregation, lor ki kitsoz li bizin reflechi avant?

¹⁶ Si enn chrétien pensé ki li kapav compte zis lor so bann relation avek Bondié, li pé rejette enn disposition ki Bondié inn prend—congregation mondial ek bann congregation local, toulé-deux. Kitfois sa dimoune-la pé adore Bondié li tousel ou-soit zis avek dé-trois lezot chrétien, mais kot l’arrangement ki Bondié inn faire concernant bann ancien ek bann assistant ministeriel? Remarké ki, kan Paul ti ecrire congregation Colosses ek ki li ti donne l’instruction pou lire sa lettre-la dan bann congregation dan Laodicée aussi, li ti koz lor l’importance pou bien “enraciné ek fortifié en [Christ].” C’est bann ki ti dan congregation, pa bann dimoune ki ti’nn separe-zot ar congregation, ki ti pou profite sa lettre-la.—Colossiens 2:6, 7; 4:16.

Colonne ek support pou la verité

17. Ki 1 Timothée 3:15 montré concernant la congregation?

¹⁷ Dan premier lettre ki Paul ti ecrire Timothée, enn ancien, li ti mentionne bann condition ki bann ancien ek bann assistant ministeriel bizin rempli. Zis apré sa, Paul ti koz lor “congregation Bondié vivant,” ek li ti dire ki c’est “enn colonne ek enn support pou la verité.” (1 Timothée 3:15) Congregation bann chrétien oint en entier ti vrai-mem enn colonne coumsa dan premier siecle. Pena okenn doute ki c’est surtout a travers so congregation ki chaque chrétien ti pou kapav gagne sa verité-la. C’est là kot tou bann chrétien ti pou kapav gagne l’enseignement lor la verité ek tann lezot defann li, ek kot zot ti pou kapav fortifié zot-mem.

18. Kifer bann reunion ki ena dan congregation zot bien important?

¹⁸ Zordi aussi, congregation mondial li lakaz Bondié, “enn colonne ek enn support pou la verité.” Enn parmi bann fason principal pou nou fortifié nou relation avek Bondié ek pou prepare-nou pou faire so volonté, c’est kan nou assisté reunion dan nou congregation regulierement ek nou participé. Kan Paul ti ecrire congregation Corinthe, li ti mette l’accent lor seki ti dire dan reunion. Li ti ecrire ki li ti pou content ki l’enseignement ki donné dan zot reunion bien clair ek ki bann dimoune ki là zot comprend pou ki zot kapav “fortifié.” (1 Corinthiens 14:12, 17-19) Zordi aussi nou kapav fortifié nou-mem si nou reconette ki c’est Jéhovah ki finn prend disposition ki bann congregation existé ek ki Li pé soutenir sa disposition-la.

19. Kifer ou senti ki ou ena enn devoir envers ou congregation?

¹⁹ Oui, si nou envie vinn fort en tant ki chrétien, nou place, li dan congregation. Depuis longtemps congregation li enn protection kont bann fausse l’enseignement, ek Bondié pé servi li pou ki la bonne nouvelle lor so Royaume messianik preché partout lor la terre. Pena okenn doute ki Bondié finn faire beaucoup kitsoz a travers congregation chrétien.—Éphésiens 3:9, 10.

[Note]

Eski ou rappel?

• Kifer nou bizin attann ki Bondié servi bann congregation lor la terre?

• Ki bann ancien faire pou la congregation, mem si zot imparfait?

• Couma ou congregation faire ou vinn pli fort?

[Zimage, page 15]

Bann zapotre ek bann ancien dan Jérusalem ti servi couma enn college central

[Zimage, page 16]

Bann ancien ek bann assistant ministeriel gagne l’enseignement pou ki zot kapav rempli zot responsabilité envers la congregation