“Mo Kontan Li Kouma Mo Garson, e Li Fidel dan Lesegner”

TIMOTE pe fer bann gran pa ek li bien deside. Sak pa pe elwagn li tigit-tigit ar so lakaz ek li pe konsantre lor seki pe atann li devan. Timote pe swiv so bann konpagnon amezir ki zot pe travers bann karo ki Timote bien kone. Tigit-tigit zot pe elwagne ar lavil List ki trouv lor enn ti kolinn dan enn vale. Ena enn sourir lor figir Timote kan li mazinn so mama ek so granmer. Mem si zot pe kasiet zot larm, avek boukou fierte zot pe get li ale. Eski li bizin vire ek fer zot salam enn dernie fwa?

Detanzantan lapot Pol vire pou get Timote ek riy ar li pou ankouraz li. Li kone ki Timote ankor timid ek ki li bizin sirmont sa, me li kontan pou trouv lantouziasm sa zenn garson-la. Timote bien zenn, kitfwa li ena ant 19 ek 25 an, ek li ena enn gran respe ek boukou lafeksion pou Pol. Asterla Timote pe swiv sa zom aktif ek fidel la dan enn vwayaz ki pou amenn li bien lwin ar so lakaz. Zot pou marse, zot pou al par bato, ek lor zot semin zot pou zwenn enn kantite danze. Timote pa vremem kone si li pou retrouv so lakaz ankor.

Ki ti pous sa zenn garson-la pou ena sa lobzektif-la? Ki rekonpans li pou gagne ki pou montre ki so bann sakrifis vo lapenn? Ek kouma lafwa Timote kapav inflians nou?

Anou retourn de-trwa-z-an avan. Li paret ki List ti lavil natal Timote. List ti enn ti lavil bien trankil kot lapli ti pe tonbe souvan. Kitfwa bann abitan ti konpran Grek me zot ti pe touzour koz zot langaz, Likaonien. Enn zour ti ena enn gran deboulman dan sa lavil-la. De misioner Kretien, lapot Pol ek Barnabas, so konpagnon vwayaz, ti sorti Ikoniom ti vini. Ikoniom ti enn gran lavil ki ti trouv pre ar List. Kan li ti pe prese an piblik, Pol ti trouv enn misie andikape ki ti montre ki li ena enn vre lafwa. Pol ti fer mirak ek ti geri sa misie-la.​—Zistwar Bann Apot 14:5-10.

Boukou dimounn dan List ti krwar dan bann fos zistwar kot swadizan dan lepase bann bondie ti pran form dimounn ek ti vinn vizit sa rezion-la. Akoz samem zot ti krwar ki Pol ti Ermes ek Barnabas ti Zeis. Sa de Kretien ki ti ena limilite la pa ti pe kapav anpes bannla fer bann sakrifis pou zot.​—Zistwar Bann Apot 14:11-18.

Me pou sertin dan List, sa ti enn sitiasion reel ek extraordiner. Zot pa ti panse ki Pol ek Barnabas ti bann fos bondie. Par exanp ti ena Enis, enn fam Zwif ki ti marye avek enn Grek ki pa ti servi Zeova.a Ti ena osi so mama, Lois ek toulede ti bien kontan pou ekout Pol ek Barnabas. Anfin, sa nouvel ki sak Zwif fidel ti anvi tande la inn arive​—Lemesi inn vini ek inn akonpli boukou profesi ki ti ekrir lor li dan bann Lekritir!

Mazine kouma vizit Pol ti ena enn lefe lor Timote. Timote “depi [so] lanfans” finn aprann pou kontan bann Lekritir Ebraik. (2 Timote 3:15) Parey kouma so mama ek so granmer, li ti trouve ki Pol ek Barnabas ti koz laverite lor Lemesi. Ek mazinn sa misie andikape ki Pol ti geri la. Kitfwa depi tipti, Timote ti trouv sa misie-la enn ta fwa lor semin dan List. Asterla, Timote pe trouv sa misie-la marse pou premie fwa! Sa pa etonn nou ki Enis ek Lois ti vinn Kretien, ek Timote ti fer parey apre. Zordi bann gran paran ek bann paran kapav aprann boukou ar Lois ek Enis. Eski ou’si ou kapav ena enn bon linflians lor bann zenn?

Sertin ki ti vinn Kretien dan List sirman ti bien kontan pou aprann lesperans ki bann disip Kris ti ena. Me zot ti osi aprann ki antan ki disip Kris sa ti pou kout zot kitsoz. Bann Zwif fanatik ki pa ti kontan laverite, ti sorti Ikoniom ek Antios ek ti vinn dan List pou mont latet bann abitan kont Pol ek Barnabas. Enn tipe apre, enn lafoul bien violan ti vinn deryer Pol ek ti avoy li kout ros. Li ti gagn kout ros plizir fwa ek li ti tom anba. Sa lafoul-la ti trenn li an deor lavil ek ti les li laba pou ki li mor.​—Zistwar Bann Apot 14:19.

Me, bann disip dan List ti al rod Pol, ek zot ti antour li. Sirman zot ti bien soulaze kan zot inn trouv li bouze, leve ek apre avek kouraz retourn dan List! So landemin, li ek Barnabas ti kit List pou al Derbe pou kontign zot predikasion. Apre ki zot ti fer bann disip laba osi, avek kouraz zot ti retourn List mem si sa ti bien danzere. Kifer? Labib dir ki “zot ti fortifie ek ankouraz bann disip pou res ferm dan lafwa.” Pol ek Barnabas ti ansegn sa bann Kretien-la ki zot landirans pa dan vid kan zot pans lesperans ki zot pou gagne dan lavenir. Mazinn zenn Timote, lizie gran ouver, pe ekout Pol ek Barnabas dir: “Nou bizin pas par boukou difikilte pou nou kapav rant dan Rwayom Bondie.”​—Zistwar Bann Apot 14:20-22.

Timote ti trouve ki Pol ti viv an-akor avek sa bann parol-la. Avek kouraz Pol ti andir bann difikilte pou li kapav partaz bon nouvel ar lezot. Alor, Timote ti kone ki si li swiv lexanp Pol, bann abitan List, kitfwa mem so papa, ti pou opoz ar li. Me Timote pa ti pou les okenn presion anpes li servi Bondie. Zordi ena boukou zenn parey kouma Timote. Avek sazes, zot swazir bann kamarad ki ena enn lafwa solid, ki pou ankouraz zot ek fortifie zot. Ek zot pa les okenn lopozision anpes zot servi vre Bondie!

Kouma ti mansione avan, kitfwa Pol ti fer so prosin vizit de-trwa-z-an apre. Mazinn lazwa ki ti ena dan lakaz Timote kan Pol ti vini, sann fwa la avek Silas. Sa ti sirman enn moman zwaye pou Pol osi. Li ti’nn plant bann lagrin laverite dan List ek asterla avek so prop lizie li ti pe trouve ki rezilta sa finn ena. Ti ena Lois ek so tifi, Enis, ki asterla inn vinn bann Kretienn. Zot ena enn “lafwa sinser” ki Pol admire. (2 Timote 1:5) Ek ki nou kapav dir lor Timote?

Pol finn aprann ki sa zenn garson-la inn bien progrese depi so dernie vizit. Pa zis dan List ki ‘bann frer ti koz an bien lor’ Timote, me osi dan Ikoniom ki trouv 32 kilomet dan nor-es. (Zistwar Bann Apot 16:2) Kouma li’nn gagn sa bon repitasion-la?

Dan bann ‘Lekritir sakre’ ki so mama ek so granmer finn ansegn li ‘depi so lanfans’ ena bann konsey bien pratik pou bann zenn. (2 Timote 3:15) Par exanp, li ti gagn sa konsey-la: “Rapel to Gran Kreater pandan to zenes.” (Ekleziast 12:1) Sa bann parol-la ti ena enn pli gran sinifikasion kan Timote ti vinn Kretien. Pou li, meyer fason pou rapel so Gran Kreater, se partaz bon nouvel lor Garson Bondie, Kris. Tigit-tigit Timote inn aprann pou sirmont so timidite ek li ti nepli per pou partaz bon nouvel lor Zezi Kris.

Bann zom ki ti responsab dan bann kongregasion ti remark progre ki Timote ti fer. Pena dout ki zot ti inpresione kan zot ti trouve kouma sa zenn garson-la ti pe fortifie ek ankouraz lezot otour li. Me seki pli inportan, Zeova ti remark Timote. Bondie ti inspir sertin Kretien pou dir bann profesi konsernan servis ki Timote ti pou fer plitar dan bann kongregasion. Kan Pol ti vizit kongregasion List, li ti trouve ki Timote pou enn konpagnon bien itil pou so bann prosin vwayaz misioner. Bann frer dan List ti dakor. Zot ti poz zot lame lor sa zenn garson-la, enn aksion ki montre ki zot ti donn li enn responsabilite spesial pou servi Zeova.​—1 Timote 1:18; 4:14.

Nou kapav mazine kouma Timote ti etone ar gran konfians ki bannla ti fer li ek responsabilite ki li ti gagne. Li ti panse ki li pa merit sa, me li ti pre pou ale.b Me, kouma Timote so papa ti reazir kan li ti kone ki so garson pou al fer enn nouvo karyer antan ki misioner? Li posib ki li ti anvi so garson fer lezot kitsoz dan lavenir. Me ki Timote so mama ek so granmer ti panse? Eski zot ti fier? Eski zot ti trakase pou sekirite zot garson? Li normal ki zot ti ena sa bann santiman-la.

Seki nou sir, Timote ti ale. Parey kouma nou’nn trouve dan koumansman sa lartik-la, sa gramatin-la li’nn koumans so lavi antan ki misioner ansam avek lapot Pol. Amezir ki li pe kit List deryer, sak son ti ros ouswa lapousier anba so sandalet, ek sak son lerb lor ki li pe marse, rapel li ki li pe al ver enn lot destinasion ek li pe elwagne ar so lakaz. Apre enn long zourne lamars, sa trwa zom-la inn ariv Ikoniom. Laba, Timote ti trouve kouma Pol ek Silas ti pe donn bann dernie instriksion Komite Santral ki ti trouv Zerizalem ek kouma zot ti pe fer tou pou fortifie lafwa bann krwayan dan Ikoniom. (Zistwar Bann Apot 16:4, 5) Me sa ti zis enn koumansman.

Apre ki zot ti vizit bann kongregasion dan Galasi, sa bann misioner-la ti kit bann semin Romin ki bien gran ek ki bien pave. Zot ti mars plizir santenn kilomet atraver Frizi dan bann laplenn ki dan oter. Zot ti pran direksion lenor ek apre zot ti al dan lwes. Par aksion lespri sin, zot ti pran direksion Troas, zot ti mont dan enn bato ek zot ti al Masedwann. (Zistwar Bann Apot 16:6-12) Pandan sa vwayaz-la, Pol ti trouve kouma Timote ti itil. Akoz sa, li ti kapav les Timote dan Bere ansam avek Silas. (Zistwar Bann Apot 17:14) Li ti mem avoy sa zenn garson-la tousel Tesalonik. Laba Timote ti swiv lexanp sa bann misioner-la, ek li ti ed bann Kretien fidel pou ena plis lafwa.​—1 Tesalonisien 3:1-3.

Plitar Pol ti ekrir konsernan Timote: “Mo pena personn isi kouma li, pou pran swin zot bienet.” (Filipien 2:20) Timote pa ti gagn sa repitasion-la koumsa mem. Me li ti travay dir, li ti fer so servis avek imilite, ek avek fidelite li ti andir bann difikilte. Eski li pa enn bon lexanp pou bann zenn zordi? Pa bliye zenn, se twa ki fer to repitasion. Si to enn zenn, to ena posibilite pou fer twa enn bon repitasion kan to met Zeova an premie dan to lavi ek kan to servi lezot avek bonte ek respe.

Pandan apepre 14 an, Timote ti pas boukou letan travay avek lapot Pol, so gran kamarad. Ansam avek Pol zot ti fer fas ar boukou danze me osi zot ti konn bann moman zwaye. (2 Korintien 11:24-27) Ti ena enn moman kot Timote ti mem dan prizon akoz so lafwa. (Ebre 13:23) Li ti ena mem lamour profon ek sinser ki Pol ti ena pou so bann frer ek ser Kretien. Li ti vremem trakase pou zot. Akoz sa Pol ti ekrir Timote: “Mo rapel to larm.” (2 Timote 1:4) Parey kouma Pol, li paret ki Timote ti aprann pou ‘partaz lapenn bann ki dan lapenn.’ Li ti met limem dan zot plas pou ki li kapav ankouraz ek rekonfort zot pli bien. (Romin 12:15) Nou’si nou kapav aprann pou fer parey!

Pena dout ki avek letan, Timote ti vinn enn bon sirveyan Kretien. Pol pa ti zis donn li responsabilite pou fortifie ek ankouraz bann kongregasion. Timote ti osi gagn responsabilite pou nomm bann zom kalifie kouma ansien ek asistan ministeryel dan bann kongregasion.​—1 Timote 5:22.

Pol ti vremem kontan Timote. Li ti donn li bann konsey bien itil parey kouma enn papa. Li ti ankouraz Timote pou kontign devlop bann kalite pou progrese dan so minister. (1 Timote 4:15, 16) Li ti osi ankouraz Timote pou pa les so laz ouswa mem so natir timid anpes li pran bann desizion ferm kan bizin. (1 Timote 1:3; 4:6, 7, 11, 12) Pol ti mem konsey li kouma pou tret so maladi. Li posib ki souvan Timote ti gagn bann douler lestoma.​—1 Timote 5:23.

Pol ti kone ki li pre pou mor ek ki biento pou exekit li. Li ti avoy Timote enn dernie let. Li ti ekrir avek boukou santiman: “Fer enn demars vinn zwenn mwa.” (2 Timote 4:9) Pol ti extra kontan Timote. Li ti dir: “Mo kontan li kouma mo garson, e li fidel dan Lesegner.” (1 Korintien 4:17) Sa pa etonn nou ki li ti anvi so kamarad avek li amezir ki so lamor pe koste! Sakenn parmi nou bizin demann noumem: ‘Eski lezot trouv mwa kouma enn kikenn ar ki zot kapav gagn rekonfor kan zot dan difikilte?’

Eski Timote ti reisi zwenn Pol atan? Nou pa kone. Me seki nou sir, li’nn touletan fer tou seki li kapav pou rekonfort ek ankouraz Pol ek lezot. Li’nn viv an-akor avek sinifikasion so nom, ki vedir: “Enn Kikenn Ki Onor Bondie.” Timote ti ena enn gran lafwa. Li’nn donn nou enn bon lexanp pou imite, ki nou zenn ouswa vie.