• Kouma Labib Kapav Ed Ou?
    Viv Ere pou Touletan!—Dekouver Seki Labib Dir
    • Leson 1. Enn Labib ki ouver.

      LESON 01

      Kouma Labib Kapav Ed Ou?

      Nou tou nou ena bann kestion lor lavi, soufrans, lamor, ek lavenir. Nou osi gagn traka pou bann kitsoz ki konsern nou lavi toulezour. Par exanp, nou gagn traka kouma nou kapav gagn ase kas pou viv, ouswa kouma nou kapav ena enn lavi fami ki ere. Boukou dimounn inn trouve ki Labib finn ed zot. Li’nn ed zot pou gagn bann repons pou bann kestion inportan ki zot poz zotmem, ek osi bann konsey pratik pou zot lavi toulezour. Eski ou panse ki Labib kapav ed bann dimounn azordi?

      1. Ki bann kestion Labib reponn?

      Labib reponn sa bann kestion bien inportan la: Kouma lavi finn koumanse? Kifer nou lor later? Kifer bann dimounn soufer? Ki arive kan enn dimounn mor? Si tou dimounn anvi ki ena lape, kifer ena sa kantite lager-la? Ki pou ariv later dan lavenir? Se normal ki nou poz noumem sa bann kestion-la ek se seki bann milyon dimounn finn fer. Ek bann repons ki zot finn gagne dan Labib finn rasir zot.

      2. Kouma Labib kapav ed nou dan nou lavi toulezour?

      Labib donn nou bann bon konsey. Par exanp, li ed bann fami pou ki zot kapav vremem ere. Li montre nou seki nou kapav fer kan nou strese, ek kouma nou kapav aprann pou kontan nou travay. Amezir ki nou get sa liv-la ansam, ou pou aprann seki Labib dir lor sa bann size-la ek bann lezot size ankor. Lerla, kitfwa ou pou dakor pou dir ki “tou Lekritir [tou seki ena dan Labib] . . . li itil.”​—2 Timote 3:16, NW.

      Sa liv-la pa ranplas Labib. Okontrer, li ankouraz ou pou examinn Labib par oumem. Alor, nou ankouraz ou pou lir bann verse ki’nn mansione dan sa bann leson-la, ek pou konpar sa bann verse-la avek seki ou pe aprann.

      ANOU GET INPE PLIS

      Nou pou gete kouma Labib finn ed bann dimounn, kouma ou kapav apresie ou lektir Labib, ek kifer li bon ki enn kikenn ed ou pou konpran Labib.

      3. Labib kapav gid nou

      Labib, li kouma enn lalimier ki bien for. Labib kapav ed nou pou pran bann bon desizion ek ed nou pou kone seki pou arive dan lavenir.

      Lir Psom 119:105, ek apre sa, get sa bann kestion-la ansam:

      • Ki ekrivin sa psom-la ti panse lor Labib?

      • Ki ou panse lor Labib?

      Enn misie pe marse aswar kot enn lak ek li pe ekler so semin ar enn tors.

      4. Labib kapav reponn nou bann kestion

      Enn madam ti ena boukou kestion ki ti pe fatig li depi bien lontan ek se dan Labib ki li’nn gagn repons pou so bann kestion. Zwe VIDEO-la, ek apre sa, get sa bann kestion-la ansam:

      VIDEO: Zame Pa Perdi Lespwar! (1:48)

      • Dan sa video-la, ki bann kestion sa madam-la ti ena?

      • Kouma enn letid Labib finn ed li?

      Labib ankouraz nou pou poz bann kestion. Lir Matie 7:7, ek apre sa, get sa kestion-la ansam:

      • Ki bann kestion ki ou ena ek ki ou ti pou kontan gagn zot repons dan Labib?

      5. Kouma ou kapav apresie ou lektir Labib?

      Boukou dimounn apresie zot lektir Labib ek gagn bann bienfe gras-a sa. Zwe VIDEO-la, ek apre sa, get sa bann kestion-la ansam:

      VIDEO: Lir Labib (2:05)

      • Dapre sa video-la, eski bann zenn kontan lir?

      • Kifer zot kontan lir Labib?

      Bann lansegnman ki ena dan Labib kapav rekonfort nou ek donn nou enn lespwar. Lir Romin 15:4, ek apre sa, get sa kestion-la ansam:

      • Eski ou anvi konn plis lor lespwar ek rekonfor ki Labib done?

      6. Lezot kapav ed ou pou konpran Labib

      Bann dimounn ki kontan lir Labib finn remarke ki sa finn bien ed zot kan zot inn gagn bann konversasion lor Labib avek lezot. Lir Zistwar Bann Apot 8:26-31, ek apre sa, get sa kestion-la ansam:

      Zimaz: 1. Filip pe explik enn Etiopien bann Lekritir. 2. Enn Temwin Zeova pe etidie Labib avek enn mama ek so de zanfan.

      Enn Etiopien ti bizin led pou konpran seki li ti pe lir. Boukou dimounn finn trouve ki sa finn bien ed zot kan zot finn ena bann konversasion lor Labib ar lezot

      SERTIN DIMOUNN DIR: “To pe perdi to letan kan to etidie Labib.”

      • Ki ou panse lor la, ek kifer ou pans koumsa?

      SEKI NOU’NN APRANN

      Labib donn bann bon konsey pou nou lavi toulezour, li reponn bann kestion bien inportan, li rekonfort nou ek li donn nou enn lespwar.

      Eski Ou Rapel?

      • Ki konsey nou kapav gagne dan Labib?

      • Sit sertin kestion ki Labib reponn.

      • Ki ou ti pou kontan aprann dan Labib?

      Mo Lobzektif

      DEKOUVER

      Gete kouma bann konsey ki ena dan Labib zot itil pou nou azordi.

      “Bann Lansegnman Labib​—Enn Sazes Eternel” (Latour Degard No. 1 2018)

      Gete kouma Labib finn ed enn misie ki ti pe lit kont bann panse negatif depi so lanfans.

      Kouma Mo Nouvo Lavi Finn Koumanse? (2:53)

      Get bann konsey pratik ki Labib donn bann fami.

      “12 Pwin ki Finn Ed Bann Fami pou Ere” (Leve! No. 2 2018)

      Labib montre kisannla ki diriz lemond.

      Kifer Li Bon Etidie Labib?​—Long Version (3:14)

  • Labib se Mesaz ki Bondie Finn Fer Ekrir pou Nou
    Viv Ere pou Touletan!—Dekouver Seki Labib Dir

    • 1. Si se bann zom ki’nn ekrir Labib, kifer nou dir ki se Parol Bondie?

      Anviron 40 diferan zom finn ekrir bann liv ki ena dan Labib. Premie liv finn ekrir inn gagn anviron 3,500 an ek dernie liv finn ekrir inn gagn anviron 1,900 an. Bann ekrivin Labib ti bien diferan. Par exanp, sertin ti bann berze, bann peser, ek bann lerwa. Me kanmem sa, okenn parti Labib pa kontredir enn lot parti Labib. Kouma eski sa li posib? Parski se Bondie ki’nn fer ekrir Labib. (Lir 1 Tesalonisien 2:13.) Bann dimounn ki’nn ekrir Labib pa’nn ekrir seki zot, zot ti panse. Okontrer, zot finn proklam mesaz Bondie anba linflians lespri sin.a (2 Pier 1:21) Bondie finn servi so lespri sin pou fer sa bann zom-la ekrir so bann panse.​—2 Timote 3:16, NW.