‘To Bizin Landirans’

APRE ki Anitaa ti pran batem, so misie ti extra opoze. Anita rakonte: “Li ti anpes mwa al renion ek ti mem defann mwa pronons nom Bondie. Zis tann nom Zeova ti fer li bwi.”

Enn lot kitsoz ki ti bien difisil pou Anita, se ansegn so bann zanfan lor Zeova. Li dir: “Dan mo prop lakaz mo ti gagn linterdiksion pou ador Zeova. Mo ti etidie avek mo bann zanfan an kasiet ek mo pa ti gagn drwa amenn zot renion.”

Parey kouma lexperyans Anita montre, lopozision ki enn Kretien gagne ar so fami kapav teste so lintegrite. Ena lezot sitiasion difisil ankor, kouma par exanp enn maladi kronik, lamor enn zanfan ouswa enn konzwin, ouswa enn manb to fami inn kit Zeova. Alor, ki kapav ed enn Kretien pou res fidel ar Zeova?

Lapot Pol ti dir: “Zot bizin landirans.” (Ebre 10:36) Me ki kapav ed twa pou andire?

Kan to pe pas par bann difikilte, rapel ki to kapav demann Zeova lafors ki to bizin pou andire. To kapav fer Li konfians. Anou get lexanp Ana. Enn sel kout enn Lindi apremidi, li’nn gagn enn move nouvel. So misie inn mor. Zot ti ena 30 an maryaz. Ana dir: “Li’nn al travay ek zame li’nn retourn lakaz. Li ti ena 52 an.”

Kouma Ana inn fer fas ar sa leprev-la? Li’nn bizin koumans travay. Sa inn ed li parski sa travay-la ti demann preske tou so konsantrasion. Me, sa pa ti fer so sagrin disparet. Sagrin-la ti touzour la. Ana dir: “Mo ti devid mo leker ar Zeova ek mo ti sipliy Li pou ed mwa fer fas ar mo sitiasion bien difisil.” Eski Zeova ti ekout so lapriyer? Pou Ana, pa ti ena okenn dout lor la. Li rakonte: “Lape ki zis Bondie kapav done ti soulaz mwa ek ti permet mwa gard mo latet lor mo zepol. Mo pena okenn dout ki Zeova pou resisit mo misie.”​—Fil. 4:6, 7.

Bondie “ki ekout lapriyer” inn promet pou donn so bann serviter tou seki zot bizin pou res fidel ar Li. (Ps. 65:2) Eski sa promes-la pa fortifie to lafwa? Eski sa pa montre twa ki to’si to kapav andire?

Enn lot fason ki Zeova kapav ed twa pou andire, se par mwayin to bann frer ek ser dan kongregasion. Par exanp, kan kongregasion Tesalonik ti pe pas par enn gran persekision, Pol ti demann sa bann Kretien-la pou ‘kontign ankouraz zot ant zotmem ek fortifie zot bien, parey kouma zot ti deza pe fer.’ (1 Tes. 2:14; 5:11) Zot inn res fidel ar Zeova parski zot inn res pros ant zot ek zot finn ankouraz sakenn zot kamarad. Lexanp sa bann Kretien Tesalonik la montre ki kitsoz kapav ed twa pou andire.

Kan nou devlop bann bon lamitie dan kongregasion ek ankouraz sakenn nou kamarad, sa permet nou “progres ansam dan lafwa.” (Rom. 14:19) Sa li bien inportan, sirtou dan bann moman difisil. Pol limem ti pas par boukou difikilte ek Zeova ti donn li lafors pou andire. Bien souvan, Bondie ti servi so bann konpagnon pou ankouraz li. Par exanp, kan Pol ti avoy so salitasion bann frer ek ser kongregasion Kolos, li ti dir: “Zot mo konsolasion.” (Kol. 4:10, 11) Zot lafeksion pou Pol ti pous zot pou ankouraz li ek fortifie li dan bann moman kot li ti bizin sa. Parey kouma Pol, sirman to’si to’nn deza gagn lankourazman ek soutien ki bizin avek bann manb to kongregasion.

Zeova servi osi bann ansien dan kongregasion pou ed twa andire. Sa bann frer-la ena boukou lexperyans. Zot kouma “enn plas kot kapav al kasiet kont divan, enn refiz kont siklonn, parey kouma bann ti larivier dan enn landrwa kot pena delo, parey kouma lonbraz enn gro ros lor enn later bien sek.” (Iza. 32:2) Eski sa pa vremem rekonfort twa kan to kone ki ena bann frer koumsa ki dispoze pou ed twa? Kan to pas par bann difikilte, eski to rod led bann ansien? Zot lankourazman ek zot soutien kapav ed twa pou andire.

Biensir, bann ansien pa fer mirak. Zot bann imin inparfe “parey kouma [nou].” (Zist. 14:15) Selman, kan to al get bann ansien ek zot priye pou twa, sa kapav fer twa boukou dibien. (Zak 5:14, 15) Par exanp, pandan boukou lane enn frer ki res Italie ti bizin siport enn maladi ki apel dystrophie musculaire (ki fer bann misk so lekor aret fonksione). Pli ale so maladi ti anpire. Me li dir: “Se lamour ek lafeksion bann frer ki souvan inn vizit mwa ki’nn ed mwa andire.” Alor kan to pe pas dan bann moman difisil, demann led bann ansien. Se enn dispozision ki Zeova inn pran pou ed twa.

Bann bon labitid spiritiel kapav ed twa pou andire. Anou get lexanp John ki ti gagn enn kanser ase rar kan li ti ena 39 an. Li dir: “Mo ti trouv sa kouma enn linzistis, mo ti tro zenn.” Sa lepok-la, John so garson ti ena 3 an. Li dir: “Mo madam pa ti ena zis mo ti garson pou okipe, li ti bizin okip mo’si. Anplis li ti ed mwa kan mo ti bizin al dan mo bann randevou medikal.” Bann simioterapi ti fer John extra fatige ek ti fer li gagn bann vomisman. Lorla, so papa ti tom bien malad ek ti ariv dan dernie staz so maladi. Li osi li ti bizin so fami pou okip li.

Kouma eski John ek so fami ti reisi fer fas ar sa sitiasion difisil la? John rakonte: “Mem si mo ti fatige, mo ti fer tou pou ki mo fami gard bann bon labitid spiritiel. Nou ti asiste tou bann renion, sorti predikasion toule semenn, ek fer nou ladorasion an fami regilierman mem kan sa ti difisil.” John inn trouve ki pou andir ninport ki difikilte, li bien inportan pou gard bann bon relasion avek Zeova. Ki konsey John donn bann ki pe pas par bann leprev? Li dir: “Amezir letan pase, sa sok ki to’nn gagne koumansman-la pou koumans diminie. Lerla lamour Zeova ek lafors ki Li donn twa pou ranplas bann panse negatif. Zeova kapav fer twa vinn for parey kouma Li’nn fer pou mwa.”

Pena dout ki gras-a soutien Bondie, nou kapav andir bann sitiasion difisil ki nou pe gagne asterla ek ki nou kapav gagne dan lavenir. Alor, anou kontign priye Zeova avek konfians, devlop bann bon lamitie dan kongregasion, rod led bann ansien, ek gard bann bon labitid spiritiel. Si nou fer tousala, nou pou azir an-akor avek bann parol Pol: “Zot bizin landirans.”