“TRANSFERE POU KI LI PA TROUV LAMOR”

Kouma Enok inn mor? Dan enn sertin sans, so lamor ti pli etranz ki so lavi. Zenez dir dan enn fason sinp: “Enok ti kontign mars avek vre Bondie. Apre li’nn aret existe, parski Bondie ti pran li.” (Zenez 5:24) Dan ki sans Bondie ti pran Enok? Plitar lapot Pol ti explike: “Par lafwa, Enok ti transfere pou ki li pa trouv lamor, ek personn pa ti trouv li okenn plas, parski Bondie ti’nn transfer li; ek avan so transfer, li ti gagn temwaniaz ki li ti fer Bondie plezir.” (Ebre 11:5, NW.) Ki Pol ti pe rod dir par lexpresion “transfere pou ki li pa trouv lamor”? Sertin tradiksion Labib dir ki Bondie ti amenn Enok dan lesiel. Me sa li inposib. Labib montre ki Zezi Kris ti premie dimounn ki ti resisite pou al dan lesiel.​—Zan 3:13.

Me alor, dan ki sans Bondie ti “transfer” Enok pou ki li “pa trouv lamor”? Li paret ki Zeova ti fer Enok gagn enn lamor trankil, koumsa li pa’nn mor dan enn fason kriel dan lame so bann lennmi. Me avan, Enok ti gagn “temwaniaz ki li ti fer Bondie plezir.” Kouma? Zis avan li mor, sirman Bondie ti fer Enok gagn enn vizion, kot kitfwa li’nn trouv later vinn enn paradi. Avek sa sign bien kler la, Enok ti kone ki li’nn gagn faver Bondie ek li ti andormi dan lamor. Kan Pol ti ekrir lor Enok ek lor lezot zom ek fam fidel, li ti dir: “Zot tou finn mor dan lafwa.” (Ebre 11:13) Apre sa, kitfwa so bann lennmi ti rod so lekor, me “personn pa ti trouv li okenn plas.” Kitfwa parski Zeova ti’nn fer li disparet, pou ki personn pa ador li ouswa servi so lekor pou favoriz fos relizion.b

Avek sa rezonnman Biblik la dan nou lespri, anou esey fer vizion kouma Enok kitfwa inn mor. Mazinn sa senn-la, me rapel ki se zis enn posibilite. Enok pe galoupe pou sap so lavi. Li telman fatige ki li nepli ena lesouf. So bann lennmi deryer li, zot pe bwi ar koler akoz so mesaz zizman. Enok trouv enn plas pou kasiet ek li repoz li pou enn ti moman. Me li kone ki bannla pre pou ratrap li. Enn lamor bien violan pe atann li devan. Letan li pe repoze, li priye so Bondie. Apre sa, li resanti enn gran lape. Enok fer enn vizion telman kler ki koumadir vre-vre li dan sa vizion-la, ek li al bien lwin.

Mazine li trouv enn peizaz devan li, enn lemond ki bien diferan ar lemond kot li pe viv. Sa plas-la zoli parey kouma zardin Edenn, me selman pena bann seribin ki pe veye pou anpes bann dimounn rantre. Partou ena bann misie ek bann madam ki an bonn sante ek zot bien fit kouma bann zenes. Zot pe viv dan lape. Pena okenn ti tras laenn ek persekision relizie ar ki Enok ti pe bizin fer fas. Sa moman-la, Enok santi lamour Zeova ek so faver. Li santi osi ki Zeova pe rasir li. Pou li, pena dout, sa plas-la inn fer pou li ek se lamem ki li pou reste. Amezir li santi li plis anpe, Enok ferm so lizie ek rant dan enn profon somey kot li pa reve.

Ek ziska zordi​—li pe dormi dan lamor, bien proteze dan memwar Zeova, ki pena limit! Ek kouma Zezi ti promet apre, zour pou vini kot tou bann ki dan memwar Bondie pou tann lavwa Kris ek pou sorti dan tom. Kan zot pou ouver zot lizie zot pou trouv enn nouvo lemond kot ena lape.​—Zan 5:28, 29.