Eski To Pe Atann “Sa Lavil Avek enn Fondasion Solid La”?

 1. Ki sakrifis boukou finn fer, ek kifer?

AZORDI, boukou serviter Zeova pe fer bann sakrifis. Ena bann frer ek ser ki’nn swazir pou res selibater. Sertin koup marye finn swazir pou pa gagn zanfan. Ek boukou fami finn desid pou ena enn lavi sinp. Sa bann Kretien-la finn pran sa bann desizion-la pou enn rezon bien inportan: Zot anvi fer zot maximum pou servi Zeova. Zot ere ek zot ena konfians ki Zeova pou donn zot tou seki zot bizin. Eski Zeova pou desevwar zot? Non! Kifer nou kapav sir? Parski dan lepase, Zeova ti donn so bann serviter tou seki zot bizin. Par exanp, Li ti beni Abraam, “papa tou dimoun ki krwar dan Bondie.”​—Rom. 4:11.

 2. (a) Dapre Ebre 11:8-10, 16, kifer Abraam ti dispoze pou kit lavil Our? (b) Ki nou pou examine dan sa lartik-la?

² Abraam ti dispoze pou kit lavi konfortab ki li ti ena dan lavil Our. Kifer? Parski li ti pe atann “sa lavil avek enn fondasion solid la.” (Lir Ebre 11:8-10, 16.) Ki sa ‘lavil-la’ sa? Ki bann difikilte Abraam ti gagne pandan ki li ti pe atann ki konstrir sa lavil-la? Ek kouma nou kapav imit Abraam ek osi bann Kretien dan nou lepok ki swiv so lexanp?

 3. Ki lavil Abraam ti pe atann?

³ Sa lavil ki Abraam ti pe atann la, se Rwayom Bondie. Se Zezi Kris ek bann 144,000, bann Kretien ki ena lesperans pou al dan lesiel, ki form parti dan sa Rwayom-la. Pol ti dekrir sa Rwayom-la kouma ‘lavil Bondie vivan, Zerizalem ki dan lesiel.’ (Ebre 12:22; Rev. 5:8-10; 14:1) Zezi ti dir so bann disip priye pou ki sa Rwayom-la vini ek fer volonte Bondie lor later parey kouma dan lesiel.​—Mat. 6:10, NW.

 4. Dapre Zenez 17:1, 2, 6, ki Abraam ti kone konsernan sa lavil, ouswa Rwayom, ki Bondie ti promet la?

⁴ Eski Abraam ti kone kouma Rwayom Bondie ti pou organize? Non. Pandan plizir siek, bann detay konsernan sa Rwayom-la ti enn “sekre ki sin.” (Efe. 1:8-10, NW; Kol. 1:26, 27, NW) Me Abraam ti kone ki sertin parmi so bann desandan ti pou vinn lerwa, parski Zeova ti promet li sa. (Lir Zenez 17:1, 2, 6.b) Abraam ti ena enn lafwa telman for dan bann promes Bondie ki se koumadir, li ti kapav trouv Lemesi, setadir sa kikenn ki Bondie inn swazir la. Limem ki ti pou lerwa dan Rwayom Bondie. Akoz sa, Zezi ti kapav dir bann Zwif dan so lepok: “Zot papa Abraam ti dan lazwa kan li ti kone ki li pou trouv mo zour. Li finn trouv li, li finn kontan.” (Zan 8:56) Li kler ki Abraam ti kone ki sertin parmi so bann desandan ti pou form parti enn Rwayom ki ti pou etabli par Zeova. Li ti dispoze pou atann ki Zeova realiz sa promes-la.

 5. Kouma nou kone ki Abraam ti pe atann lavil ki Bondie ti pou etabli?

⁵ Kouma Abraam ti montre ki li ti pe atann lavil, ouswa Rwayom, ki Bondie ti pou etabli? Premierman, Abraam pa ti vinn sitwayen okenn rwayom ki lor later. Li ti sanz-sanz landrwa ek li pa ti res dan enn landrwa fix. Anplis, li pa ti soutenir okenn lerwa imin. Deziemman, Abraam pa ti esey etabli so prop Rwayom. Li ti kontign obeir Zeova ek li ti atann ki Zeova realiz So promes. Kan li ti fer sa, Abraam ti montre ki li ti ena enn lafwa extraordiner an Zeova. Asterla, anou get sertin difikilte ki Abraam ti gagne ek anou gete ki nou kapav aprann ar so lexanp.

 6. Kouma lavil Our ti ete?

⁶ Abraam ti kit lavil Our, ki ti enn lavil bien proteze ek agreab pou viv. Bann dimounn ki ti res laba ti ena enn bon ledikasion ek zot ti ris. Sa lavil-la ti proteze par enn gran miray, ek dan trwa kote, li ti antoure ar bann kanal bien gran ek bien fon ki ti ranpli ar delo. Bann abitan Our ti konn ekrir ek konte. Ek li paret ki boukou dimounn ti pe fer biznes dan sa lavil-la, parski bann arkeolog inn dekouver boukou dokiman komersial laba. Bann lakaz ti an brik, zot miray ti lis, ek ti penn kouler blan. Sertin lakaz ti ena 13 ouswa 14 lasam, ek zot lakour ti an pave.

 7. Kifer Abraam ti bizin ena konfians ki Zeova ti pou protez li ek so fami?

⁷ Abraam ti bizin ena konfians ki Zeova ti pou protez li ek so fami. Kifer? Pa bliye ki Abraam ek Sara ti kit zot lakaz, ki ti konfortab ek an sekirite dan lavil Our, pou al viv anba bann latant dan lakanpagn Kanaan. Abraam ek so fami ti nepli proteze par bann gran miray ek bann kanal bien gran ek bien fon. Asterla, zot pa ti ena okenn proteksion ek bann lennmi ti kapav atak zot fasilman.

 8. Enn zour, ki ti ariv Abraam?

⁸ Abraam ti fer volonte Zeova, me enn zour li pa ti ena ase manze pou nouri so fami. Ti ena enn gran lafaminn dan landrwa kot Zeova ti avoy li. Sa sitiasion-la ti telman dir ki Abraam ti desid pou al res Lezip pandan enn tan avek so fami. Selman, kan li ti dan Lezip, Faraon, ki ti pe diriz sa pei-la, ti pran so madam. Mazine ki kantite Abraam ti trakase pandan sa moman-la! Zeova ti bizin konvink Faraon pou retourn Sara ar Abraam.​—Zen. 12:10-19.

 9. Ki bann problem Abraam ti ena dan so fami?

⁹ Lavi fami Abraam ti bien difisil. Sara, so madam ki li ti bien kontan, pa ti kapav gagn zanfan. Pandan plizir lane, zot ti bien tris akoz sa sitiasion-la. Finalman, Sara ti dir Abraam pran so servant Agar ek gagn zanfan avek li. Me kan Agar ti ansint Ismael, li ti koumans mepriz Sara. Sa sitiasion-la ti telman difisil ki Sara ti fer Agar ale.​—Zen. 16:1-6.

10. Kouma seki ti ariv Ismael ek Izaak ti teste konfians ki Abraam ti ena an Zeova?

¹⁰ Finalman, Sara ti tom ansint ek li ti gagn enn garson. Abraam ti apel li Izaak. Abraam ti kontan so de garson, Ismael ek Izaak. Me Ismael ti tret Izaak dan enn move fason. Akoz sa, Zeova ti dir Abraam fer Ismael ek Agar ale. (Zen. 21:9-14) Plizir lane apre, Zeova ti demann Abraam pou ofer Izaak an sakrifis. (Zen. 22: 1, 2; Ebre 11:17-19) Dan sa de sitiasion-la, Abraam ti bizin ena konfians ki Zeova ti pou realiz So bann promes konsernan so de garson.

11. Kifer Abraam ti bizin ena pasians ek atann ki Zeova azir?

¹¹ Pandan tou sa letan-la, Abraam ti bizin aprann pou ena pasians ek atann ki Zeova azir. Kitfwa li ti ena plis ki 70 an kan li ek so fami ti kit lavil Our. (Zen. 11:31–12:4) Pandan anviron san-t-an, li ti viv anba bann latant ek li ti res dan diferan landrwa dan Kanaan. Abraam ti mor kan li ti ena 175 an. (Zen. 25:7) Me li pa ti trouv Zeova realiz So promes konsernan pei ki Li ti pou donn so desandan. Ek li pa ti viv ase lontan pou trouv lavil, setadir Rwayom Bondie, etabli. Kanmem sa, Labib dir ki Abraam ti mor “vie ek satisfe.” (Zen. 25:8) Mem si Abraam ti bizin andir boukou difikilte, so lafwa ti res for ek li ti dispoze pou atann ki Zeova azir. Kifer Abraam ti reisi andire? Parski toutlong so lavi, Zeova ti protez li ek ti konsider li kouma so kamarad.​—Zen. 15:1; Iza. 41:8; Zak 2:22, 23.

12. Ki nou pe atann, ek ki nou pou examine?

¹² Parey kouma Abraam, nou pe atann sa lavil avek enn fondasion solid la. Selman, nou pa pe atann ki konstrir li. Kifer? Parski Rwayom Bondie inn fini etabli an 1914 ek li deza pe dirize dan lesiel. (Rev. 12:7-10) Parkont, nou pe atann ki li dirize lor later antie. Pandan ki nou pe atann sa arive, kitfwa nou pe bizin fer fas ar boukou sitiasion difisil, parey kouma Abraam ek Sara. Dan nou lepok, boukou serviter Zeova pe reisi imit lexanp Abraam. Bann biografi ki ena dan Latour Degard montre ki, parey kouma Abraam ek Sara, boukou serviter Zeova finn ena lafwa ek pasians. Anou get sertin parmi sa bann lexanp-la, ek anou gete ki nou kapav aprann ar zot.

13. Ki leson to aprann ar lexanp Frer Walden?

¹³ To bizin dispoze pou fer bann sakrifis. Si nou anvi met Rwayom Bondie an premie dan nou lavi, nou bizin imit Abraam ki ti dispoze pou fer bann sakrifis pou fer Bondie plezir. (Mat. 6:33; Mark 10:28-30) Anou get lexanp frer Bill Walden.c An 1942, kan Bill ti koumans etidie avek bann Temwin Zeova, li ti pre pou gagn so diplom arsitek dan enn liniversite dan Lamerik. Bill so profeser ti fini rod enn plas travay pou li, me Bill ti refize. Li ti anvi fer plis pou Bondie, olie ki li aksepte enn travay ki pey extra bien. Inpe apre sa, gouvernman ti demann Bill pou rant dan larme, me avek respe li ti refize. Akoz sa, li ti bizin pey $10,000 lamann ek li ti kondane pou fer sink an prizon. Li ti libere apre trwa-z-an. Plitar, li ti invite pou fer lekol Galaad ek li ti servi kouma misioner dan Lafrik. Apre sa, Bill ti marye ar Eva, ek zot ti servi ansam dan Lafrik, kot zot ti bizin fer boukou sakrifis. Apre plizir lane, zot ti retourn Letazini pou okip Bill so mama. Alafin so biografi, Bill dir: “Mo bien kontan ek mo rekonesan pou privilez ki mo’nn gagne pou servi Zeova pandan plis ki 70 an. Souvan mo remersie Zeova parski Li’nn ed mwa pou fer enn karyer dan so servis.” Eski twa osi to kapav fer enn karyer dan servis aplintan?

14-15. Ki leson to aprann ar lexanp Frer ek Ser Apostolidis?

¹⁴ Pa panse ki to pa pou gagn okenn problem. Lexanp Abraam montre nou ki mem bann ki servi Zeova toutlong zot lavi pou gagn bann problem. (Zak 1:2; 1 Pier 5:9) Se seki ti ariv Frer Aristotelis Apostolidis.d Li ti pran batem an 1946 dan Lagres ek an 1952 li ti fianse ar enn ser ki apel Eleni, ki ti ena bann mem lobzektif ki li. Malerezman, Eleni ti tom malad ek li ti gagn enn timer dan so servo. Bann dokter ti reisi tir timer-la, me de-trwa lane apre zot maryaz, so timer ti re-aparet. Bann dokter ti re-oper li, me Eleni ti paralize an parti, ek li ti nepli kapav koz bien. Malgre so maladi ek persekision gouvernman, Eleni ti kontign prese.

¹⁵ Pandan 30 an, Aristotelis ti okip so madam. Pandan sa letan-la, li ti servi kouma ansien, li ti ede dan bann komite lasanble, ek li ti ede pou konstrir enn Lasal Lasanble. An 1987, kan Eleni ti pe prese, enn gro laport ti ferm lor so ledo ek li ti bien blese. Li ti res dan koma pandan trwa-z-an, ek apre li’nn mor. Aristotelis explike kouma tou sa bann sitiasion-la ti bien afekte li. Li dir: “Pandan tou sa bann lane-la, mo’nn gagn boukou difikilte. Ena sertin ki mo pa ti pe atann ek ki’nn vinn enn kout koumsa. Alor, mo ti bizin bien determine pou andire ek pou pa les nanye dekouraz mwa. Zeova finn touletan donn mwa lafors pou sirmont tou sa bann problem-la.” (Ps. 94:18, 19) Zeova bien kontan so bann serviter ki fer tou seki zot kapav pou servi Li malgre zot bann problem!

16. Ki bon konsey Frer Knorr ti donn so madam?

¹⁶ Res konsantre lor lavenir. Abraam ti res konsantre lor bann rekonpans ki Zeova ti pou donn li ek sa ti ed li pou andir so bann problem. Ser Audrey Hyde ti res konsantre lor so lesperans, mem si so premie mari, Nathan Knorr, ti mor ar enn kanser, ek so deziem mari, Glenn Hyde, ti gagn Alzheimer.e De-trwa semenn avan so lamor, Frer Knorr ti dir Audrey enn kitsoz ki ti ed li pou kontign andire avek lazwa. Frer Knorr ti dir: “Apre lamor, nou lesperans li sir, ek zame nou pa pou soufer ankor.” Li ti osi dir Audrey: “Res konsantre lor lavenir, to rekonpans pe atann twa. . . . Kontign res bien okipe ek fer to maximum pou ed lezot. Sa pou ed twa pou res zwaye.” Se vremem enn bon konsey pou fer nou maximum pou ed lezot ek pou trouv “lazwa dan lesperans”!​—Rom. 12:12.

17. (a) Kifer nou ena bann bon rezon pou res konsantre lor lavenir? (b) Dapre Mishe 7:7, ki nou bizin fer pou gagn bann benediksion dan lavenir?

¹⁷ Azordi, nou ena boukou rezon pou res konsantre lor lavenir. Bann kitsoz ki pe arive dan lemond montre dan enn fason bien kler ki nou pe viv dan dernie parti bann dernie zour. Biento, nou nepli pou bizin atann ki Rwayom Bondie diriz later antie. Enn parmi bann kitsoz ki pou rann nou ere se rezireksion bann dimounn ki nou kontan. Sa lepok-la, Zeova pou rekonpans Abraam pou so lafwa ek so pasians kan Li pou resisit li ek so fami lor later. Eski to pou la pou akeyir zot? Wi, to pou la, si parey kouma Abraam, to dispoze pou fer bann sakrifis pou Rwayom Bondie, to gard to lafwa for malgre bann problem, ek to aprann pou ena pasians ek atann ki Zeova azir.​—Lir Mishe 7:7.f