Fer To Lafwa dan Seki To Pe Atann Vinn Pli For

1, 2. (a) Ki diferans ena ant nou lespwar ek lespwar ki boukou dimounn ena? (b) Ki nou pou examine dan sa lartik-la?

ZEOVA finn donn nou bann lespwar extraordiner. Li’nn promet ki Li pou fer so nom vinn sin devan tou dimounn ek ki Li pou fer so volonte realize dan lesiel ek lor later. (Matie 6:9, 10) Se bann kitsoz pli inportan ki nou pe atann pou realize dan lavenir. Zeova finn promet osi ki Li pou rekonpans nou ek donn nou lavi pou touletan, swa dan lesiel, swa lor later. Se vremem extraordiner, pa vre! (Zan 10:16; 2 Pier 3:13) Ek nou inpasian pou trouve osi kouma Zeova pou kontign gid ek soutenir so bann serviter dan bann dernie zour.

² Labib dir ki lafwa se “lasirans dan bann kitsoz ki [nou] pe atann.” Savedir ki bann dimounn ki ena lafwa zot vremem sir ki bann promes Zeova pou realize. (Ebre 11:1) Dan enn lot kote, boukou dimounn zordi atann ek gard lespwar pou bann kitsoz ki zot pa sir pou arive. Par exanp, enn kikenn kapav ena lespwar pou gagn lotri, me li pena okenn garanti ki li pou gagn sa. Dan sa lartik-la, nou pou trouve ki nou kapav fer pou ki nou lafwa dan bann promes Bondie vinn pli for. Nou pou trouve osi kouma enn lafwa for kapav ed nou azordi.

 3. Kifer nou ena lafwa ki bann promes Bondie pou realize?

³ Personn parmi nou pa’nn ne ar lafwa. Pou gagn lafwa, nou bizin les lespri sin Bondie diriz nou leker. (Galat 5:22) Lespri sin kapav ed nou pou aprann konn Zeova. Kan nou konpran ki Li Tou-Pwisan ek ki Li ena sazes, nou sir ki Li ena kapasite pou fer tou seki Li promet. Zeova Limem koz lor so bann promes koumadir zot inn fini realize. Li dir: “Zot finn akonpli!” (Lir Revelasion 21:3-6, NW.) Nou kone ki Zeova touletan fer seki Li promet. Limem “Bondie fidel.” Se akoz sa ki nou krwar tou seki Li dir nou konsernan lavenir.​—Deteronom 7:9.

 4. Dan ki kitsoz bann serviter Bondie ti ena lafwa?

⁴ Dan Ebre sapit 11, nou trouv nom 16 zom ek fam ki finn ena enn gran lafwa dan bann promes Zeova. Sa sapit-la mansionn osi boukou lezot serviter Zeova ki, “akoz zot lafwa,” zot ti fer Li plezir. (Ebre 11:39) Zot tou ti pe atann “desandans” ki Zeova ti promet. Zot ti kone ki sa ‘desandans-la’ ti pou detrir tou bann lennmi Bondie ek fer later revinn enn paradi. (Zenez 3:15) Ek sa bann serviter Bondie la ti ena lafwa ki Zeova ti pou resisit zot. Biensir, zot pa ti atann pou gagn rezireksion dan lesiel, parski Zezi pa ti ankor rann sa posib. (Galat 3:16) Okontrer, zot ti pe atann pou viv pou touletan lor later dan enn zoli paradi.​—Psom 37:11; Izai 26:19; Osea 13:14.

5, 6. Ki kitsoz Abraam ek so fami ti pe atann? Kouma zot ti gard zot lafwa for? (Get zimaz dan koumansman lartik.)

⁵ Konsernan sa bann fidel serviter Zeova la, Ebre 11:13 dir: “Zot tou finn mor dan lafwa san ki zot finn resevwar bann promes Bondie, me zot finn kontan parski zot finn trouv li delwin.” Zot ti pe atann lemond nouvo ek zot ti imazinn zotmem pe viv ladan. Enn parmi sa bann serviter-la se Abraam. Zezi ti dir ki Abraam “ti dan lazwa kan li ti kone ki li pou trouv” sa lepok-la. (Zan 8:56) Sara, Izaak, Zakob, ek boukou lezot ankor ti pe atann lepok kot Rwayom Bondie, “ki Bondie limem arsitek e konstrikter,” pou regne lor later antie.​—Ebre 11:8-11.

⁶ Kouma eski Abraam ek so fami ti gard zot lafwa for? Zot ti kontign aprann konn plis lor Zeova. Parfwa Zeova ti koz avek zot atraver bann anz, bann vizion ouswa bann rev. Sirman zot ti osi aprann plis ar lezot fidel serviter ki ti aze, ouswa dan bann kitsoz ki ti ekrir. Abraam ek so fami zame pa ti bliye bann promes Bondie, ek zot ti kontan medit lor la. Gras-a tousala, zot pa ti ena okenn dout ki Zeova ti pou tini tou so bann promes. Alor, zot finn res fidel ar Zeova mem kan zot ti gagn bann difikilte ek persekision.

 7. Ki Zeova finn donn nou pou fer nou lafwa vinn pli for, ek ki nou bizin fer?

⁷ Ki kitsoz pou ed nou gard nou lafwa for? Zeova finn donn nou Labib pou fer nou konn so bann promes pou lavenir. Dan Labib, Li montre nou seki nou bizin fer pou nou ere. Se akoz sa ki li bon nou lir Labib toulezour ek swiv bann instriksion ki ena ladan. (Psom 1:1-3; lir Zistwar Bann Apot 17:11.) Zeova donn nou osi “manze dan ler ki bizin” gras-a so “lesklav fidel ek saz.” (Matie 24:45, NW.) Parey kouma pep Bondie dan lepase, regilierman nou bizin lir bann promes Bondie ek medit bien lor la. Sa pou ed nou pou res fidel ar Bondie ek pou kontign atann lepok kot so Rwayom pou diriz later antie.

 8. Kouma lapriyer kapav fer nou lafwa vinn pli for?

⁸ Ki kitsoz ankor ti ed pep Zeova dan lepase pou gard zot lafwa for? Zot ti priye Zeova pou gagn so led, ek kan zot ti trouve ki Li ti reponn zot lapriyer, zot lafwa ti vinn pli for. (Neemia 1:4, 11; Psom 34:4, 15, 17; Daniel 9:19-21) Dan mem fason, kan nou trouve ki Zeova ekout nou lapriyer ek ki Li donn nou exakteman seki nou bizin dan ler ki bizin, nou lafwa an Li vinn pli for. (Lir 1 Zan 5:14, 15.) Nou bizin osi “kontign demann” Zeova so lespri sin pou ki nou kapav ena plis lafwa.​—Lik 11:9, 13, NW.

 9. Pou ki kitsoz nou bizin priye?

⁹ Kan nou priye Zeova, fode pa nou zis demann Li bann kitsoz ki nou bizin. Nou bizin osi remersie Li ek loue Li toulezour. Apre tou, Li’nn fer boukou kitsoz extraordiner pou nou, pa vre! (Psom 40:5) Bann serviter Zeova priye osi pou zot bann frer ek ser dan lemond antie. Par exanp, nou “mazinn bann ki dan prizon.” Nou priye osi pou “bann ansien” dan kongregasion. Kan nou trouve kouma Zeova reponn nou lapriyer, nou lafwa an Li vinn pli for, ek nou vinn pli pros ar Li.​—Ebre 13:3, 7.

10. Ki kitsoz ti ed boukou serviter Bondie pou gagn kouraz ek pou res fidel?

¹⁰ Dan Ebre sapit 11, lapot Pol ti dir: “Bann fam finn regagn zot bann fami ki ti mor, par enn rezireksion, me ena lezot zom ki finn tortire parski zot pa finn aksepte liberte par ninport ki ranson, pou ki zot kapav gagn enn pli bon rezireksion.” (Ebre 11:35, NW.) Boukou finn andir bann leprev ek finn res fidel ar Bondie parski zot finn ena enn gran lafwa dan rezireksion ki Bondie finn promet. Zot ti kone ki dan lavenir, Zeova ti pou resisit zot pou viv pou touletan lor later. Reflesi lor lexanp Nabot ek Zekaria. Bann dimounn ti lapid zot parski zot ti obeir Bondie. (1 Lerwa 21:3, 15; 2 Kronik 24:20, 21) Bann dimounn ti zet Daniel dan enn lakav kot ti ena bann lion ki ti pe mor-de-fin ek ti zet so bann kamarad dan enn four dife. Sa bann zom-la ti prefer mor, me res fidel anver Zeova. Zot ti ena enn gran lafwa ki Zeova ti pou donn zot so lespri sin ek ed zot pou andir sa bann soufrans-la.​—Daniel 3:16-18, 20, 28; 6:13, 16, 21-23; Ebre 11:33, 34.

11. Ki leprev sertin profet ti andire akoz zot lafwa?

¹¹ Bann dimounn ti boufonn bann profet, kouma par exanp Mikaya ek Zeremi, ouswa ti met zot dan prizon. Lezot profet, kouma par exanp Eliya, ti sove ti al “dan bann dezer, bann montagn bann kavern ek bann lakav.” Zot tou ti andir bann leprev ek ti res fidel ar Bondie parski zot ti ena “lasirans dan bann kitsoz ki [zot ti] pe atann.”​—Ebre 11:1, 36-38; 1 Lerwa 18:13; 22:24-27; Zeremi 20:1, 2; 28:10, 11; 32:2.

12. Ki pli bon lexanp nou kapav imite? Ki kitsoz ti ed Zezi pou andir bann leprev?

¹² Zezi Kris ti andir pli gran leprev ki ena ek li ti res fidel ar Zeova. Ki kitsoz ti ed li pou andire? Pol ti dir: “Akoz lazwa ki ti pe atann li, li finn andir enn poto soufrans, san pran kont laont, ek li finn asiz dan kote drwat tronn Bondie.” (Ebre 12:2, NW.) Apre, Pol ti ankouraz bann Kretien pou “reflesi bien” lor lexanp Zezi. (Lir Ebre 12:3, NW.) Parey kouma Zezi, boukou Kretien dan premie siek finn mor parski zot ti res fidel ar Zeova. Enn parmi sa bann Kretien-la ti apel Antipas. (Revelasion 2:13) Sa bann Kretien-la inn fini gagn zot rekonpans. Parkont, bann lezot serviter Bondie ki’nn viv avan lepok Zezi ti pe atann pou viv pou touletan lor later. (Ebre 11:35) Enn tipe apre ki Zezi finn vinn Lerwa an 1914, bann Kretien ki ti ena lesperans pou al dan lesiel, me ki ti’nn mor, finn resisite pou gagn lavi imortel. Biento, zot pou regn lor limanite ansam avek Zezi.​—Revelasion 20:4.

13, 14. Ki bann leprev Rudolf Graichen finn andire, ek ki finn ed li pou res fidel ar Bondie?

¹³ Dan nou lepok, plizir milyon serviter Bondie pe swiv lexanp Zezi. Zot medit lor bann promes Bondie ek sa ed zot pou res fidel ar Li dan bann leprev. Se seki Rudolf Graichen finn fer. Rudolf inn ne an 1925 dan l’Allemagne. Kan li ti zenn, so bann paran ti met foto bann senn Biblik dan zot lakaz. Rudolf ti dir: “Enn parmi bann foto ki ti ena ti montre enn loulou ek enn ti mouton, enn ti garson ek enn leopar, enn ti toro ek enn lion. Zot tou ti anpe, ek ti garson-la ti pe gid zot.” (Izai 11:6-9) Sa ti ed Rudolf pou bien reflesi lor paradi ki pou ena lor later ek sa finn fer so lafwa dan paradi vinn pli for. Sa finn ed li pou res fidel ar Zeova mem si pandan boukou lane li ti gagn bann gran persekision par Gestapo dan lepok Nazi, ek plitar par Stasi, setadir bann lapolis dan l’Allemagne de l’Est.

¹⁴ Rudolf finn andir boukou lezot leprev. So mama ti mor ar typhus dan kan konsantrasion Ravensbrück. So papa ti sign enn dokiman pou dir ki li nepli enn Temwin Zeova. Malgre tousala, Rudolf finn gard so lafwa bien for. Kan li ti sorti dan prizon, li ti servi kouma sirveyan sirkonskripsion. Apre, li ti gagn linvitasion pou al lekol Guiléad. Apre lekol, li’nn al servi dan Chili touzour kouma sirveyan sirkonskripsion. Laba, li’nn marye avek enn ser misioner ki apel Patsy. Me malerezman, apre enn an, zot tifi ki ti ankor enn tibaba inn mor. Enn tipe apre sa, Patsy osi inn mor. Li ti ena zis 43 an. Malgre tou sa bann leprev-la, Rudolf finn kontign servi Zeova. Mem kan li’nn vinn vie, ek ki so lasante nepli bon, li’nn servi kouma pionie permanan, ek ansien. Nou kapav lir so biografi dan Latour Degard 1^e Out 1997 an Franse, paz 20-25.^[1] (Get not alafin lartik.)

15. Sit lexanp bann frer ek ser ki zordi pe servi Zeova dan lazwa malgre bann persekision.

¹⁵ Zordi, boukou parmi nou bann frer ek ser pe servi Zeova dan lazwa malgre bann gran persekision. Plizir santenn parmi zot dan prizon dan l’Érythrée, Singapour ek Corée du Sud parski zot refiz “servi lepe.” (Matie 26:52) Par exanp, Isaac, Negede, ek Paulos dan enn prizon dan l’Érythrée depi plis ki 20 an! Laba, zot ankor pe pas par boukou soufrans. Ek pandan tou sa bann lane-la, zot pa finn kapav pran swin zot paran, ni marye. Me selman, zot res fidel ar Zeova, ek zot gard zot lafwa for. Mem bann gardien prizon respekte zot asterla. Ena enn foto sa bann frer-la lor sit jw.org. Zot pe riye lor sa foto-la malgre zot soufrans.

16. Ki kitsoz to kapav fer gras-a enn lafwa for?

¹⁶ Laplipar bann serviter Zeova pa finn al dan prizon ouswa pa finn gagn bann move tretman parey kouma nou bann frer ki nou’nn fek mansione. Me boukou soufer akoz lamizer, katastrof natirel, ouswa akoz lager dan zot pei. Lezot finn swiv lexanp Abraam, Izaak, Zakob, ek Moiz. Mem si zot ti kapav vinn ris ouswa seleb, zot finn konsantre zot lor zot servis pou Zeova. Ki ed nou bann frer pou kontign servi Zeova dan lazwa? Se zot lamour pou Li ek osi lafwa solid ki zot ena dan so bann promes. Zot kone ki Zeova pou rekonpans so bann serviter fidel kan Li pou donn zot lavi pou touletan dan lemond nouvo, kot pa pou ena okenn linzistis.​—Lir Psom 37:5, 7, 9, 29, NW.

17. Ki to bizin fer pou gard to lafwa for, ek ki nou pou examine dan prosin lartik?

¹⁷ Dan sa lartik-la, nou finn trouve ki lafwa se nou “lasirans dan bann kitsoz ki [nou] pe atann.” Pou nou ena sa kalite lafwa-la, nou bizin priye Zeova ek kontign medit lor so bann promes. Lerla, nou pou kapav andir ninport ki leprev. Dan prosin lartik, nou pou gete ki savedir ena lafwa.