Pa guette “bann kitsoz ki derriere”

“Enn dimoune ki trace enn sillon dan la terre ek ki guette bann kitsoz ki derriere li, li pa finn faire pou gagne royaume Bondié.”​—LUC 9:62.

COUMA OU POU REPONN?

Kifer nou bizin “rappel seki ti arrive femme Lot”?

Ki trois kitsoz ki fodé pa nou contigne pensée?

Couma nou kapav avance ensam avek l’organisation Jéhovah?

 1. Ki l’avertissement Jésus ti donné, ek ki question nou kapav posé?

“RAPPEL seki ti arrive femme Lot.” (Luc 17:32) C’est enn l’avertissement ki Jésus Christ ti donné ena apepré 2,000 an ek zordi, sa ena encore plus l’importance ki avant. Mais ki Jésus ti pé rod dire kan li ti donne sa l’avertissement-la? Bann Juif ki ti pé ecoute li pa ti bizin lezot l’explication. Zot ti koné ki ti arrive femme Lot. Pendant ki li ti pé sauvé pou quitte Sodome avek so famille, li ti desobeir Jéhovah kan li ti guette derriere li ek lerla li ti vinn enn colonne di-sel.​—Lire Genèse 19:17, 26.

 2. Kifer femme Lot kitfois ti guette derriere, ek ki ti arrive li parski li ti desobeir?

² Mais kifer femme Lot ti guette derriere? Eski li ti curieux ek li ti envie koné ki pé arrivé? Eski li ti guette derriere parski li pa ti croire ou-soit li ti mank la foi? Ou-soit eski li ti pé regrette tou seki li ti’nn laissé dan Sodome? (Luc 17:31) N’importe ki raison li ti ena pou guette derriere, li ti perdi so la vie a cause so desobeissance. Reflechi lor la. Li ti mort mem jour ki bann mauvais dimoune ki ti reste dan Sodome ek Gomorrhe. Li pa etonnant ki Jésus ti dire: “Rappel seki ti arrive femme Lot”!

 3. Couma Jésus ti montré ki fodé pa nou guette derriere dan enn sens symbolik?

³ Nou aussi nou pé vive dan enn lepok kot li bien important ki nou pa guette derriere dan enn sens symbolik. Jésus ti mette l’accent lor sa point-la kan li ti reponn enn missié ki ti demann li si li kapav retourne dan so famille pou al dire zot aurevoir avant li vinn enn disciple. Jésus ti dire li: “Enn dimoune ki trace enn sillon dan la terre ek ki guette bann kitsoz ki derriere li, li pa finn faire pou gagne royaume Bondié.” (Luc 9:62) Eski Jésus ti dur ou-soit li pa ti raisonnable kan li ti reponn dan sa fason-la? Non, parski li ti koné ki sa missié-la ti pé zis rod enn pretexte pou pa prend responsabilité pou vinn so disciple. Jésus ti compare enn dimoune ki pa prend responsabilité pou servi Bondié couma enn kikenn ki pé guette “bann kitsoz ki derriere.” Si enn planteur pé trace bann sillon ek li guette derriere pou enn ti moment, eski sa pa pou ena enn mauvais l’effet lor so travail? Ou-soit si li pose so zouti, li arrete travail pou guette derriere, eski sa pa pou detourne so l’attention ar so travail? Pena okenn doute lor la.

 4. Lor ki kitsoz nou bizin garde nou lizié fixé?

⁴ Au lieu ki nou mazinn seki ti arrivé dan le passé, nou bizin garde nou lizié fixé lor seki pou arrivé dan l’avenir. Remarké couma Proverbes 4:25 montré sa bien: “Concernant to lizié, zot bizin guette droite devant, oui, to lizié ki brillé bizin guette droite devant toi.”

 5. Pou ki raison fodé pa nou guette bann kitsoz ki nou finn laissé derriere nou?

⁵ Nou ena enn bon raison pou pa guette bann kitsoz ki nou finn laissé derriere nou. Kifer? Nou pé vive “bann dernier jour.” (2 Tim. 3:1) Bientot, c’est pa zis deux la ville ki Bondié pou detruire, mais sa systeme kot nou pé vive-la, net. Ki pou aide nou pou evite tombe dan mem situation ki femme Lot? D’abord, nou bizin koné ki certain kitsoz ki nou’nn laissé derriere ki nou kapav tenté pou guetté. (2 Cor. 2:11) Alors, anou examine trois parmi sa bann kitsoz-la ek guetté ki nou kapav faire pou nou pa fixé nou l’attention lor zot.

ENN LEPOK KI NOU PENSÉ TI PLI BON

 6. Kifer nou pa kapav touletan faire confiance nou memoire?

⁶ Nou kapav faire erreur pou pensé ki la vie ti pli bon dan le passé. Mais nou pa kapav touletan faire nou memoire confiance. Sans ki nou realisé, nou kapav commence pensé ki bann probleme ki nou ti gagné dan le passé pa ti vrai-mem grave ek ki nou ti beaucoup pli heureux longtemps. Nou kapav pensé ki nou la vie ti beaucoup pli bon ar seki li ti été en realité. Si nou faire sa erreur-la, nou pou ré-amenn la vie ki nou ti pé amené avant. Mais la Bible donne nou sa l’avertissement-la: “Pa dire: ‘Kifer lepok longtemps ti pli bon ki asterla?’ parski li pa sage ki to demann sa.” (Eccl. 7:10, New English Translation) Kifer li dangereux ki nou ena sa fason pensé-la?

7-9. (a) Ki ti arrive bann Israélite dan l’Égypte? (b) Ki bann raison bann Israélite ti ena pou zot heureux? (c) Kifer bann Israélite ti commence plaigné ek critiké?

⁷ Remarké seki ti arrive bann Israélite dan lepok Moïse. Mem si au commencement bann Israélite ti consideré couma bann invité en Égypte, apré la mort Joseph, bann Égyptien “ti etabli bann chef travail forcé lor [bann Israélite] pou faire dominere ar zot kan zot ti pé sarié zot fardeau.” (Ex. 1:11) Finalement, Pharaon ti donne l’ordre pou touye tou bann garson ki ti fek né parmi bann Israélite pou ki peuple Bondié pa vinn beaucoup. (Ex. 1:15, 16, 22) C’est a cause sa ki Jéhovah ti dire Moïse: “Oui, mo finn trouvé couma mo peuple pé passe misere en Égypte, ek mo finn tann zot criyé a cause bann ki pé force zot pou travail, parski mo konn bien bann douleur ki zot pé supporté.”​—Ex. 3:7.

⁸ Eski ou kapav mazinn la joie ki bann Israélite ti ressenti kan zot ti quitte l’Égypte, kot zot ti bann esclave, pou vinn enn peuple libre? Zot ti trouve dan enn fason extraordinaire puissance Jéhovah kan Li ti envoye dix plaie lor Pharaon ek lor so peuple. (Lire Exode 6:1, 6, 7.) En realité, bann Égyptien pa ti zis laisse bann Israélite allé, mais zot ti suppliye bannla pou quitte zot pays. Bann Égyptien ti donne bann Israélite tellement enn grand quantité l’or ek l’argent ki la Bible dire ki peuple Bondié “ti prend tou seki bann Égyptien ti ena.” (Ex. 12:33-36) Plitar, bann Israélite ti content kan zot ti trouve Jéhovah detruire Pharaon ek so l’armée dan la mer Rouge. (Ex. 14:30, 31) Zot la foi ti supposé vinn pli fort apré ki zot ti temoin sa bann l’evenement extraordinaire-la!

⁹ Mais li incroyable ki zis enn tigit le temps apré ki Jéhovah ti faire bann mirak pou delivré zot, sa bann mem Israélite-la ti commence plaigné ek critiké. Pou ki raison? A cause mangé! Zot pa ti satisfait ar seki Jéhovah ti donne zot ek zot ti plaigné: “Ah! Nou rappel poisson ki nou ti pé mangé dan l’Égypte, ek cocom, melon d’eau, poireau, ek zoignon, ek l’ail. Mais asterla nou nâme finn sec. Nou lizié pa trouve nanyin, a part sa la manne-la.” (Nomb. 11:5, 6) Oui, zot l’attitude ti’nn changé​—tellement zot l’attitude ti’nn changé, ki zot ti mem envie retourne dan pays kot zot ti esclave! (Nomb. 14:2-4) Bann Israélite ti guette bann kitsoz ki ti derriere zot ek zot ti perdi faveur Jéhovah.​—Nomb. 11:10.

10. Ki leson nou kapav tiré ar seki ti arrive bann Israélite?

¹⁰ Ki leson nou kapav tiré zordi ar sa l’evenement-la? Kan nou gagne bann probleme ek bann difficulté, fodé pa nou fixé nou l’esprit lor seki ti parette pli bon dan le passé​—kitfois-mem lor la vie ki nou ti pé amené avant nou ti konn la verité. Li pa mauvais ki nou tire leson ar bann l’experience ki nou finn faire dan le passé ou-soit ki nou reflechi lor bann bon souvenir ki nou finn gagné. Selman, nou bizin reste equilibré ek trouve bann kitsoz couma zot ti été vrai-mem. Sinon, nou riské regrette la vie ki nou ena zordi ek sa pou faire nou envie ré-amenn la vie ki nou ti ena avant.​—Lire 2 Pierre 2:20-22.

BANN SACRIFICE KI OU FINN FAIRE DAN LE PASSÉ

11. Couma certain considere bann sacrifice ki zot finn faire dan le passé?

¹¹ Li triste pou dire, mais kan certain pense lor bann sacrifice ki zot finn faire dan le passé, zot pensé ki zot finn rate bann l’occasion pou faire kitsoz dan zot la vie. Kitfois ou ti ena possibilité pou faire bann grand l’etude, gagne enn grand position dan la societé, ou-soit gagne enn securité lor plan financier, mais ou finn choisir pou pa galope derriere sa bann kitsoz-la. Beaucoup nou bann frere ek soeur ti ena enn travail kot zot ti gagne enn bon la paye. Kitfois zot ti pé travail dan domaine commercial, divertissement, education, ou-soit sport, mais zot inn laisse tousala derriere zot. Asterla le temps finn passé, ek la fin pankor vini. Eski touletan ou pense seki ou la vie ti kapav été si ou pa ti faire sa bann sacrifice-la?

12. Ki sentiment Paul ti ena concernant bann kitsoz ki li ti’nn laisse derriere li?

¹² L’apotre Paul ti abandonne beaucoup kitsoz pou vinn enn disciple Christ. (Phil. 3:4-6) Ki ti so sentiment concernant bann kitsoz ki li ti’nn laissé derriere? Li dire nou: “Bann kitsoz ki ti bann l’avantage pou moi, mo finn considere zot couma enn perte a cause Christ.” Kifer? Li ajouté: “Oui vrai-mem, mo considere tou kitsoz couma enn perte parski connaissance lor Christ Jésus, mo Seigneur, ena enn grand valeur. A cause li, mo finn accepté perdi tou kitsoz ek mo considere tousala couma enn tas saleté, pou mo kapav gagne Christ.”a (Phil. 3:7, 8) Pareil couma enn dimoune ki jette bann saleté plitar pa pou regrette seki li’nn jetté, Paul aussi pa ti regretté ki li ti’nn laisse derriere li bann privilege ki li ti pou kapav gagné dan le monde. Li ti nepli considere zot couma bann kitsoz ki ena valeur.

13, 14. Couma nou kapav suive l’exemple Paul?

¹³ Si nou trouvé ki nou pé trop pense bann soi-disant l’occasion ki nou finn raté dan le passé, ki kitsoz kapav aide nou? Suive l’exemple ki Paul inn laissé. Couma? Medite lor valeur bann kitsoz ki ou ena asterla. Ou ena bann relation ki ena enn grand valeur avek Jéhovah ek Li konn ou couma enn dimoune fidele. (Héb. 6:10) Ki l’avantage materiel le monde kapav offert ki ena mem valeur ki bann benediction spirituel ki nou pé profité asterla ek ki nou pou profité dan l’avenir?​—Lire Marc 10:28-30.

¹⁴ Apré sa, Paul mentionne enn kitsoz ki pou aide nou pou contigne servi Jéhovah avek fidelité. Li dire ki li ti “blié bann kitsoz ki par derriere ek [li ti] mette tou [so] la force pou avance vers bann kitsoz ki devant.” (Phil. 3:13) Remarké ki Paul montré deux kitsoz ki nou bizin faire ek toulé-deux necessaire. Premierement, nou bizin blié bann kitsoz ki nou finn laissé derriere. Nou pa pou gaspille nou l’energie ek nou le temps ki ena enn grand valeur pou tracasse-nou plus ki bizin lor sa bann kitsoz-la. Deuxiemement, pareil couma enn coureur ki pré pou arrive dan bite, nou bizin mette tou nou la force pou avancé ek contigne fixé nou l’esprit lor l’avenir.

15. Ki bienfait nou gagné kan nou medite lor l’exemple bann fidele serviteur Bondié?

¹⁵ Kan nou medite lor l’exemple bann fidele serviteur Bondié​—ki li dan le passé ou-soit dan nou lepok​—sa kapav plus motive nou pou contigne avancé au lieu ki nou guette bann kitsoz ki derriere. Par exemple, si Abraham ek Sara ti contigne mazinn la ville Our, “zot ti pou gagne l’occasion retourné.” (Héb. 11:13-15) Mais zot pa ti retourne la-bas. Moïse ti quitte beaucoup plus en Égypte ki n’importe ki lezot Israélite ti faire plitar. Pourtant, pena okenn place dan la Bible ki dire ki li ti pé envie ré-gagne seki li ti abandonné. Au contraire, enn recit la Bible dire ki “li ti considere deshonneur en tant ki Christ couma enn richesse ki pli grand ki bann tresor l’Égypte; parski li ti garde so lizié fixé lor recompense ki ti ena devant li.”​—Héb. 11:26.

BANN MAUVAIS L’EXPERIENCE KI NOU FINN FAIRE DAN LE PASSÉ

16. Couma bann l’experience ki nou finn faire kapav affecté nou?

¹⁶ Li vrai ki pa tou l’experience ki nou’nn faire dan le passé ki positif. Kitfois nou la tête encore fatigué ar bann peché ou-soit ar bann erreur ki nou’nn faire dan le passé. (Ps. 51:3) Li possible ki nou encore en colere ou-soit triste a cause bann conseil bien ferme ki nou finn gagné. (Héb. 12:11) Bann l’injustice envers nou​—ki zot vrai ou-soit c’est zis enn l’impression ki nou ena​—kapav domine nou pensée. (Ps. 55:2) Ki nou kapav faire pou pa laisse sa bann l’experience-la faire nou arrete nou l’esprit lor bann kitsoz ki nou finn laisse derriere? Anou guette trois l’exemple.

17. (a) Kifer Paul ti decrire li-mem couma “enn dimoune ki pli tipti ki seki pli tipti parmi bann saint”? (b) Ki ti aide Paul pou pa laisse bann pensée negatif domine li?

¹⁷ Bann erreur ki nou finn faire dan le passé. L’apotre Paul decrire li-mem couma “enn dimoune ki pli tipti ki seki pli tipti parmi bann saint.” (Éph. 3:8) Kifer li ti senti-li coumsa? Li dire: “A cause mo finn persecute congregation Bondié.” (1 Cor. 15:9) Eski ou kapav maziné couma Paul ti senti-li kan li ti joinde certain ki li ti persecuté avant? Mais, au lieu ki li ti laisse sa bann pensée negatif-la domine li, li ti fixé so l’attention lor faveur ki li pa ti merité ki Bondié ti manifesté envers li. (1 Tim. 1:12-16) Sa ti faire li ena enn grand reconnaissance ki ti motive li dan so ministere. Enn parmi bann kitsoz ki Paul ti bien decidé pou blié, c’est bann peché ki li ti faire dan le passé. Si nou aussi nou fixé nou l’esprit lor misericorde ki Jéhovah inn manifesté envers nou, nou pa pou perdi nou le temps pou contigne pense bann l’experience ki nou’nn faire dan le passé ki nou pa pou kapav changé, ek laisse sa accablé nou. Nou pou plutot servi nou la force pou faire travail ki Jéhovah inn donne nou.

18. (a) Ki kapav arrivé si nou ena bann pensée negatif lor enn conseil ki nou finn gagné? (b) Couma nou kapav suive seki Salomon ti dire lor l’importance pou accepté bann conseil?

¹⁸ Enn conseil bien ferme. Ki pou arrivé si nou senti-nou amer kan nou ré-pense enn conseil ki nou ti gagné? Sa pa pou zis faire nou di-tort mais sa kapav aussi demoralise nou​—faire nou “decouragé.” (Héb. 12:5) Li possible ki desuite nou finn “meprise” sa conseil-la kan nou finn rejette li. Ou-soit, nou finn “decouragé” parski, apré ki nou finn accepté conseil-la, nou finn arrete suive li. Mais n’importe couma nou finn reagir, nou pa finn tire profit ar conseil-la ek nou pa finn laisse li forme nou. Li ti pou pli bon ki nou suive seki Salomon ti dire: “Trap la discipline; pa largue li. Preserve li, parski sa-mem to la vie.” (Prov. 4:13) Pareil couma enn chauffeur ki obeir bann panneau ki ena lor la route, anou accepté conseil ki nou gagné, applik li ek contigne avancé.​—Prov. 4:26, 27; lire Hébreux 12:12, 13.

19. Couma nou kapav imite la foi ki Habaqouq ek Jérémie ti ena?

¹⁹ Bann l’injustice ou-soit seki kapav parette bann l’injustice. Parfois nou kapav ena mem sentiment ki prophete Habaqouq ki ti suppliye Jéhovah pou faire la justice. Li pa ti comprend kifer Jéhovah ti permette certain kitsoz injuste arrivé. (Hab. 1:2, 3) Li bien important ki nou imite la foi sa prophete-la, ki ti dire: “Pourtant moi, mo pou ena enn grand la joie en Jéhovah Li-mem; mo pou joyeux en mo Bondié ki pou delivré moi.” (Hab. 3:18) Pareil couma prophete Jérémie, si nou “contigne attann” avek enn grand confiance en Jéhovah, Bondié la justice, nou kapav sur ki tou kitsoz pou rente dan l’ordre dan ler ki bizin.​—Lam. 3:19-24.

20. Couma nou kapav montré ki nou “rappel seki ti arrive femme Lot”?

²⁰ Nou pé vive enn lepok ki jamais finn existé dan l’Histoire. Bann l’evenement extraordinaire pé arrivé asterla ek ena lezot ki pé attann nou dan l’avenir. Alors, nou tou nou bizin avance ensam avek l’organisation Jéhovah. Anou suive conseil ki la Bible donné pou guette devant ek pou pa guette bann kitsoz ki nou’nn laissé derriere. Lerla nou pou montré ki nou vrai-mem “rappel seki ti arrive femme Lot”!

[Note]