Pa Les Zot “Trouble Vit dan Zot Bon Zizman”!

1, 2. Kifer ena boukou dimounn ki anbet lezot zordi, ek kouma zot fer sa? (Get zimaz dan koumansman lartik.)

DAN lemond zordi, ena boukou foser, eskro, ek manter. Sa pa etonn nou. Labib dir ki Satan Lediab bien konn anbet dimounn, ek ki limem sef sa lemond-la. (1 Tim. 2:14; 1 Jean 5:19) Amezir ki lafin sa move lemond-la pe koste, Satan plis ankoler parski li res zis “enn tigit letan mem.” (Rév. 12:12) Alor, nou kapav atann ki bann dimounn ki les Satan inflians zot, pou vinn pli malonet, sirtou anver bann serviter Jéhovah.

² Parfwa dan bann media, nou tann bann fos linformasion lor bann serviter Jéhovah ek lor zot krwayans. Bann dimounn servi lagazet, bann dokimanter dan televizion, ek Internet pou fann bann rimer lor zot. Akoz sa, sertin dimounn trouble ek zot krwar sa bann foste-la, mem si zot pena okenn prev.

 3. Ki kapav ed nou pou pa les dimounn anbet nou?

³ Pou defann nou kont bann manigans ki Satan servi pou dekouraz nou, nou bien rekonesan ki nou ena Parol Bondie ki “itil . . . pou met bann kitsoz an-ord.” (2 Tim. 3:16) Dapre bann let ki lapot Paul ti ekrir, nou aprann ki dan premie siek, bann dimounn ti anbet sertin Kretien dan kongregasion Thessalonique par bann foste. Li ti konsey bann Kretien pou “pa les zot trouble vit dan zot bon zizman.” (2 Thess. 2:1, 2) Ki leson nou kapav tire ar konsey ki Paul ti done, ek kouma nou kapav aplik sa ar nou sitiasion?

 4. Kouma Paul ti averti bann Kretien Thessalonique konsernan “zour Jéhovah”? Kouma dan nou lepok, nou gagn bann lavertisman?

⁴ Dan premie let ki Paul ti ekrir kongregasion Thessalonique, li ti averti zot ki “zour Jéhovah” pe vini. Li pa ti anvi ki so bann frer dan nwarte ek ki zot pa pre pou sa zour-la. Okontrer, li ti dir zot ki antan ki “bann garson lalimier,” zot ti bizin ‘res lor zot gard ek gard zot bon sans.’ (Lir 1 Thessaloniciens 5:1-6.) Zordi, nou pe atann destriksion Gran Babylone, lanpir mondial fos relizion. Se avek sa levennman-la ki gran zour Jéhovah pou koumanse. Nou bien rekonesan ki nou konpran pli bien fason ki proze Jéhovah pou realize. Ek osi, atraver kongregasion, nou gagn regilierman bann rapel dan bon moman ki ed nou pou gard nou bon sans. Si nou pran kont sa bann rapel ki nou gagne souvan-la, sa kapav fortifie nou determinasion pou donn Bondie enn ‘servis sakre avek nou kapasite pou rezone.’​—Rom. 12:1.

5, 6. (a) Ki Paul ti ekrir dan so deziem let pou bann Kretien Thessalonique? (b) Ki Bondie pou fer biento par lintermedier Jésus, ek ki nou bizin demann noumem?

⁵ Zis apre ki Paul ti avoy so premie let bann Kretien Thessalonique, li ti avoy zot enn deziem let. Dan sa let-la, Paul ti atir latansion lor zizman ki Segner Jésus pou fer lor “bann ki pa konn Bondie ek lor bann ki pa obeir bonn nouvel.” (2 Thess. 1:6-8) Dan sapit 2 dan so let, li ti dir ki sertin dan kongregasion ti telman “boulverse” konsernan zour Jéhovah ki zot ti krwar ki li ti pre pou vini. (Lir 2 Thessaloniciens 2:1, 2.) Sa bann Kretien premie siek la ti ena enn konesans limite lor fason ki Jéhovah ti pou realiz so proze. Se seki Paul ti rekonet plitar kan li ti koz lor bann profesi: “Nou konn zis enn parti, ek nou profetiz zis enn parti; me kan seki konple pou arive, sa parti inkonple-la pou aboli.” (1 Cor. 13:9, 10) Bondie ti inspir Paul, lapot Pierre ek bann lezot frer dan sa lepok-la ki ti ena lesperans pou al dan lesiel, pou ekrir bann lavertisman. Seki zot ti ekrir ti kapav ed tou bann Kretien pou res fidel.

⁶ Pou koriz fason panse sertin dan kongregasion, Bondie ti inspir Paul pou ekrir bann Kretien. Paul ti explike ki ti pou ena enn gran lapostazi ek osi “enn zom ki rebel kont lalwa,” avan zour Jéhovah.a Apre sa, dan ler ki Bondie inn fixe, Segner Jésus, ti pou “kraz net” tou bann ki finn les zot anbete. Paul ti explike pou ki rezon ti pou ena sa zizman-la lor zot; se parski “zot pa ti aksepte lamour laverite.” (2 Thess. 2:3, 8-10) Li bon ki nou osi nou demann noumem: ‘Ki kantite mo kontan laverite? Eski mo res a-zour avek lansegnman ki ena dan sa peryodik-la ek bann lezot piblikasion ki pep Bondie gagne ek ki baze lor Labib?’

7, 8. (a) Ki sertin danze ti menas bann premie Kretien? (b) Ki kapav reprezant sirtou enn danze pou tou vre Kretien zordi?

⁷ Selman, pa zis lansegnman bann aposta ki ti pou enn danze pou bann Kretien. Paul ti ekrir Timothée ki “lamour pou larzan li enn rasinn tou sort kalite move kitsoz.” Paul ti dir osi ki “parski zot finn galoup deryer sa lamour-la, sertin finn perdi lafwa ek zot finn pik zotmem partou ar boukou douler.” (1 Tim. 6:10) “Seki laser prodir” ti pou osi enn danze pou bann Kretien.​—Gal. 5:19-21.

⁸ Paul ti osi met angard bann Kretien Thessalonique kont bann zom ki plitar li ti apel “bann fos zapot.” Parmi zot, ti ena bann zom ki ti ‘deform laverite ek ki ti fer bann disip swiv zot.’ (2 Cor. 11:4, 13; Actes 20:30) Jésus ti felisit bann Kretien dan kongregasion Éphèse parski zot pa ti kapav “siport bann move dimounn.” Sa bann Kretien-la ‘ti teste’ bann dimounn ki ti bann fos zapot ek bann manter. (Rév. 2:2) Dan deziem let ki li ekrir bann Kretien Thessalonique, Paul ti donn sa konsey-la: “Asterla nou pe donn zot lord frer, o nom nou Segner Jésus Christ, pou elwagn zot ar tou frer ki pe mars dan enn fason dezordone ek pa dapre tradision ki zot finn gagne ar nou.” Apre, li ti koz sirtou lor bann Kretien ki pa ti “anvi travay.” (2 Thess. 3:6, 10) Alor, si bann Kretien fidel ti bizin evit sa bann Kretien pares ek ki pa ti anvi travay la, zot ti bizin fer ankor plis atansion ar bann ki ti koumans vinn aposta! Wi, dan sa lepok-la, li ti bien danzere ki bann Kretien frekant sa kalite dimounn-la ek ti bizin evit zot​—ek dan nou lepok osi li parey.​—Prov. 13:20.

 9. Ar ki kalite dimounn nou bizin fer atansion, ek kifer?

⁹ Gran detres pre pou koumanse ek lafin sa move lemond-la osi bien pre. Alor, bann lavertisman ki Bondie ti fer Paul ekrir dan premie siek ena enn pli gran linportans pou nou zordi. Jéhovah inn manifeste so faver anver nou ek Li’nn donn nou lesperans pou viv pou touletan dan lesiel ouswa lor later. Pena dout ki nou pa anvi ‘mank sa lobzektif-la.’ (2 Cor. 6:1) Si enn dimounn ki pe asiste renion esey fer nou partisip dan bann diskision lor bann size ki Labib pa explike, ouswa li kritik bann ansien ek lezot Kretien, nou bizin fer atansion ar enn dimounn koumsa.​—2 Thess. 3:13-15.

10. Ki tradision Paul ti konsey bann Kretien dan Thessalonique pou swiv?

¹⁰ Paul ti konsey so bann frer dan Thessalonique pou “tini ferm” ek pou res atase ar seki zot ti aprann. (Lir 2 Thessaloniciens 2:15.) Ki ete sa bann tradision ki ti’nn ansegn zot-la? Paul pa ti pe fer referans ar lansegnman bann fos relizion koumadir zot ti inspire par Bondie. Okontrer, li ti pe koz lor bann lansegnman ki li ek lezot frer ti gagne ar Jésus ek osi seki Bondie ti inspir bann zapot pou ekrir. Laplipar seki zot inn ekrir form parti dan Labib. Paul ti felisit so bann frer dan kongregasion Corinthe parski li ti ekrir ki “dan tou kitsoz zot pa bliye [li], ek ki zot pe tini ferm bann tradision ki [li] ti transmet zot.” (1 Cor. 11:2) Se Bondie ki ti donn sa bann lansegnman-la, alor, bann Kretien ti kapav ena konfians ladan.

11. Sit de fason kouma enn kikenn kapav elwagne ar Jéhovah.

¹¹ Kan Paul ti ekrir bann Kretien Ebre, li ti atir zot latansion lor de fason ki enn Kretien ti kapav perdi lafwa ek so fidelite anver Jéhovah. (Lir Hébreux 2:1; 3:12.) Li ti koz lor enn kikenn ki ‘elwagn’ li ek lor enn kikenn ki “detourn” li ar Jéhovah. Li posib ki nou pa remarke kan enn bato pe elwagne ar later tigit par tigit. Me avek letan, bato-la kapav ariv bien lwin. Parkont, enn misie kapav osi deside par limem pou elwagn so bato ar later. Toulede lexanp montre sitiasion enn kikenn ki’nn elwagne ar Jéhovah ek ki’nn perdi konfians dan laverite.

12. Ki bann kitsoz kapav fer ditor nou spiritialite zordi?

¹² Li posib ki sertin Kretien dan Thessalonique ti dan sa sitiasion-la. Ki nou kapav dir zordi? Ena boukou aktivite ki kapav fer nou perdi letan. Reflesi lor kantite letan ki enn kikenn pase lor bann rezo sosial, pou lir ek reponn bann mesaz elektronik, pou konsakre ar so pastan, ouswa pou res touletan a-zour avek bann levennman sportif. Ninport lekel parmi sa bann aktivite-la kapav distrer enn Kretien ek diminie so zel. Ki kapav arive lerla? Kitfwa li kapav aret fer bann lapriyer sinser. Li kapav osi aret etidie Labib, asiste renion, ek sorti predikasion. Ki nou kapav fer pou nou pa les nou trouble vit dan nou bon zizman?

13. Parey kouma Labib ti anonse, ki latitid boukou dimounn ena, ek kouma nou kapav protez nou lafwa?

¹³ Nou bizin touletan rapel ki nou pe viv dan lepok lafin. Si nou frekant bann dimounn ki refiz pou rekonet ki nou pe viv dan “bann dernie zour,” sa kapav bien danzere. Konsernan sa lepok-la, lapot Pierre ti ekrir: “Pou ena bann moker avek zot mokri, ki pou azir dapre zot prop dezir ek ki pou dir: ‘Kot sa prezans ki li ti promet-la? Wi, depi lamor nou bann anset, tou kitsoz pe kontigne parey kouma zot ti ete depi koumansman kreasion.’” (2 Pierre 3:3, 4) Si nou lir Labib toulezour ek nou etidie li regilierman, sa pou ed nou pou rapel ki nou pe viv dan “bann dernie zour.” Lapostazi ki Labib ti anonse inn koumanse depi bien lontan, ek li ankor pe kontigne zordi. “Sa zom ki rebel kont lalwa[-la]” ankor touzour existe, ek li pe kontign opoz li ar bann serviter Bondie. Se akoz sa ki fode zame nou bliye ki zour Jéhovah bien pre.​—Tseph. 1:7.

14. Kouma sa protez nou kan nou res okipe dan servis Bondie?

¹⁴ Enn fason inportan pou nou res lor nou gard ek pou pa les nou trouble dan nou bon zizman, se kan regilierman nou pres bonn nouvel. Jésus Christ, Sef kongregasion, ti donn lord so bann disip pou fer bann lezot disip parmi bann dimounn dan tou bann nasion, ek pou ansegn zot pou swiv tou bann kitsoz ki li ti ansegne. Sa konsey-la ti pou protez so bann disip. (Mat. 28:19, 20) Pou obeir sa lord-la, nou bizin zele dan predikasion. Eski ou panse ki ou bann frer dan Thessalonique ti pou satisfe si zot ti al prese ek ansegne zis parski zot ti bizin fer sa? Rapel seki Paul ti dir zot: “Pa tengn dife lespri sin. Pa mepriz parol bann profesi.” (1 Thess. 5:19, 20) Bann profesi ki nou etidie ek ki nou partaze avek lezot dimounn, zot vremem extraordiner!

15. Ki bann kitsoz inportan nou kapav fer pandan nou ladorasion an fami?

¹⁵ Nou tou nou anvi ed nou fami pou devlop zot kapasite pou pres bonn nouvel. Pou fer sa, boukou frer ek ser konsakre enn parti zot ladorasion an fami pou fer bann seans dexersis an fami. Kitfwa zot kapav prepar zot pou fer bann nouvel vizit. Ki zot pou dir kan zot revizit bann dimounn? Ki zot pou dir pou fer enn dimounn anvi aprann plis? Kan eski li pli bon pou fer sa bann vizit-la? Boukou fami osi konsakre enn parti zot ladorasion an fami pou prepar bann renion. Eski ou kapav prepar ou plis pou partisip dan bann renion? Si ou partisipe dan renion, sa pou fortifie ou lafwa ek lerla ou pa pou trouble dan ou bon zizman. (Ps. 35:18) Wi, ou ladorasion an fami pou protez ou kont tandans pou devinn bann kitsoz ki Labib pa explike ek pou anpes nou gagn bann dout.

16. Ki pous bann Kretien ki ena lesperans pou viv dan lesiel pou kontign gard zot bon zizman?

¹⁶ Pandan plizir lane, Jéhovah inn beni so pep ek inn fer zot konpran pli bien bann profesi Biblik. Kan nou reflesi lor la, sa fer nou ena konfians ki ena enn gran rekonpans ki pe atann nou devan. Bann Kretien ki ena lesperans pou al dan lesiel pe atann pou al zwenn Christ. Sa lesperans-la pous zot pou gard zot bon zizman! Seki Paul ti ekrir bann Kretien Thessalonique aplik ar zot: “Nou oblize remersie Bondie touletan pou zot, bann frer ki Jéhovah bien kontan, parski Bondie finn swazir zot . . . kan Li finn fer zot vinn sin avek lespri ek par zot lafwa dan laverite.”​—2 Thess. 2:13.

17. Ki lankourazman ou trouve dan 2 Thessaloniciens 3:1-5?

¹⁷ Bann Kretien ki ena lesperans pou viv touletan lor later bizin zot osi fer tou seki zot kapav pou gard zot bon zizman. Si ou ena sa lesperans-la, kontign pran kont lankourazman ki Paul ti donn bann Kretien dan kongregasion Thessalonique. (Lir 2 Thessaloniciens 3:1-5.) Sakenn parmi nou bizin apresie sa bann parol bien ankourazan la. Wi, bann let ki Paul ti ekrir bann Kretien Thessalonique met nou angard pou nou pa rod devinn bann kitsoz ki pa explike dan Labib ek krwar dan bann lide ki kitfwa pa an-akor avek bann prinsip Biblik. Alor, parski lafin bien pre, bann Kretien zordi vremem apresie sa bann lavertisman-la.