“Demann Bondié seki zot bizin”

“Dan tou kitsoz, par la priere ek supplication avek bann remerciement, demann Bondié seki zot bizin.”—Philippiens 4:6.

 1. Avek kisannla nou ena privilege pou kozé, ek kifer c’est enn kitsoz extraordinaire?

Si ou essaye prend enn rendez-vous avek dirigeant ou pays, ki reponse ou pou gagné? Kitfois so bureau pou envoye ou enn reponse bien gentil, mais li preské sur ki ou pa pou kapav koz avek sa dirigeant-la personnellement. Mais, li bien different avek pli grand dirigeant l’univers, Bondié Jéhovah. Nou kapav koz ar Li n’importe ki place nou été ek n’importe ki l’heure nou envie. Li toujours ecoute bann la-priere ki Li kapav accepté. (Proverbes 15:29) Sa li enn kitsoz extraordinaire! Nou bien reconnaissant pou sa privilege-la. Eski sa pa bizin pousse nou pou prié sa kikenn ‘ki ecoute la priere-la’ regulierement?—Psaume 65:2.

 2. Ki kitsoz necessaire pou ki Bondié accepté nou la-priere?

² Mais, certain kapav demandé: ‘Ki qualité la priere Bondié accepté?’ La Bible explik enn kitsoz ki necessaire pou ki Bondié accepté nou la-priere. Li dire: “Sans la foi li impossible pou faire Li plaisir, parski enn dimoune ki approche ar Bondié, bizin croire ki Li existé, ek ki Li vinn celui ki recompense bann ki rod Li vrai-mem.” (Hébreux 11:6) Oui, couma nou ti expliké dan lartik avant, pou nou approche ar Bondié, li bien important ki nou ena la foi. Bondié disposé pou accepté la priere bann dimoune ki approche ar Li, mais zot bizin faire sa avek la foi ek zot bizin ena enn bon conduite, zot bizin sincere ek ena enn bon l’attitude.

 3. (a) Couma nou trouvé dan la priere bann serviteur fidel dan le passé, ki kitsoz nou kapav dire dan nou la-priere? (b) Ki different qualité la-priere nou kapav faire?

³ L’apotre Paul ti donne sa l’encouragement-la bann chrétien dan so lepok: “Pa tracassé pou okenn kitsoz, mais dan tou kitsoz, par la priere ek supplication avek bann remerciement, demann Bondié seki zot bizin.” (Philippiens 4:6, 7) Dan la Bible, ena beaucoup l’exemple bann dimoune ki’nn prié Bondié concernant bann kitsoz ki ti tracasse zot. Parmi ena Hanna, Éliya, Hizqiya ek Daniel. (1 Samuel 2:1-10; 1 Rois 18:36, 37; 2 Rois 19:15-19; Daniel 9:3-21) Nou bizin suive zot l’exemple. Remarké aussi ki dapré Paul, ena plusieurs qualité la-priere ki nou kapav faire. Paul ti mentionne bann remerciement setadir bann la-priere pou dire Bondié ki nou apprecié tou seki Li faire pou nou. Dan sa bann la-priere-la, nou kapav aussi loué Bondié. Bann supplication c’est kan nou supplie Jéhovah avek humilité ek sincerité. Ek nou kapav aussi faire Li bann demann pou bann kitsoz bien precis. (Luc 11:2, 3) Nou Papa ki dan le ciel bien content kan nou prié Li dan sa bann different fason-la.

 4. Mem si Jéhovah koné ki nou bizin, kifer li important ki nou demann Li sa bann kitsoz-la?

⁴ Certain kapav demandé: ‘Eski Jéhovah pa deja konn tou seki nou bizin?’ Oui, Li koné. (Matthieu 6:8, 32) Alors, kifer eski malgré sa, Li envie ki nou prié Li ek demann Li sa bann kitsoz-la? Anou prend enn l’exemple: Kitfois proprietaire enn magasin envie donne enn cadeau certain so bann client. Mais, pou zot kapav gagne sa cadeau-la, sa bann client-la pou bizin vinn kot sa proprietaire-la ek demann li sa cadeau-la. Bann ki pa faire okenn zeffort pou vini, montré ki zot pa vrai-mem apprecié sa l’offre-la. Li pareil aussi pou nou. Si nou pa demann Jéhovah seki nou bizin, sa pou montré ki nou pa apprecié seki Li donné. Jésus ti dire: “Demandé ek zot pou gagné.” (Jean 16:24) Kan nou faire sa, nou montré ki nou compte lor Bondié.

Couma nou bizin prié Bondié?

 5. Kifer nou bizin prié au nom Jésus?

⁵ Jéhovah pa finn etabli enn quantité la-loi severe lor fason ki nou bizin prié Li. Mais, nou bizin aprann seki la Bible dire lor fason ki nou bizin prié Bondié. Par exemple, Jésus ti dire so bann disciple: “Si zot demann mo Papa n’importe ki kitsoz, Li pou donne zot sa lor mo nom.” (Jean 16:23) Sa vedir ki nou bizin prié au nom Jésus, ek reconette ki Jésus li sel moyen par ki Bondié pou beni tou dimoune lor la terre.

 6. Kan nou prié, ki position nou bizin prend?

⁶ Ki position nou bizin prend kan nou prié? La Bible pa dire ki nou bizin prend enn position special pou ki Bondié ecoute nou la-priere. (1 Rois 8:22; Nehémia 8:6; Marc 11:25; Luc 22:41) Seki important, c’est prié Bondié avek sincerité ek ena enn bon l’attitude.—Yoël 2:12, 13.

 7. (a) Ki mot “amen” vedir? (b) Couma nou kapav servi sa l’expression-la dan bann la-priere?

⁷ Kifer nou dire “Amen” a la fin enn la-priere? La Bible montré ki souvent c’est enn bon fason pou nou termine nou la-priere, surtout kan nou prié en publik. (Psaume 72:19; 89:52) Mot hébreu ʼamén vedir: “surement.” Dapré Cyclopedia McClintock ek Strong, signification mot “Amen” a la fin nou la-priere, c’est “pou confirme bann parole ki finn dire dan nou la-priere ek demandé ki zot realisé.” Alors, kan enn kikenn dire “Amen” avek sincerité apré so la-priere, li montré ki seki li’nn dire important pou li. Kan enn chrétien represente la congregation par la priere ek li termine par sa l’expression-la, bann ki ecoute li kapav aussi dire “Amen,” soit dan zot leker, ou-soit fort, pou montré ki zot vrai-mem d’accord avek seki li’nn dire dan la priere.—1 Corinthiens 14:16.

 8. Couma certain parmi nou la-priere kapav ressemblé la priere Jacob ek Abraham, ek ki sa pou montré lor nou?

⁸ Ena bann l’occasion kot Bondié laisse nou montré ki quantité seki nou pé demann Li, li important pou nou. Kitfois lerla, nou bizin faire pareil couma Jacob, ki ti lutté enn la-nuit avek enn ange pou li gagne enn benediction. (Genèse 32:24-26) Ou-soit kitfois ena bann situation kot nou bizin vinn couma Abraham. Plusieurs fois ti supplie Jéhovah pou Lot ek pou n’importe ki dimoune droite ki ti kapav trouve dan la ville Sodome. (Genèse 18:22-33) Nou aussi, nou kapav prié Jéhovah pou bann kitsoz ki bien important pou nou. Nou kapav supplie Li pou agir parski Li ena la justice, l’amour fidel ek misericorde.

Ki nou kapav demandé dan nou la-priere?

 9. Pou ki kitsoz nou bizin prié en premier?

⁹ Rappel seki Paul ti dire: “Dan tou kitsoz, . . . demann Bondié seki zot bizin.” (Philippiens 4:6) Sa vedir ki, dan nou bann la-priere personnel, nou kapav koz lor bann kitsoz ki concerne preské tou domaine dan nou la-vie. Seulement, nou bizin prié en premier pou bann l’interet Jéhovah. Daniel ti donne nou enn bon l’exemple lor la. Kan Jéhovah ti puni nation Israël a cause zot peché, Daniel ti supplie Jéhovah pou montré so misericorde. Li ti dire: “A cause to-mem, pa tardé, ah mo Bondié, parski to nom finn associé ar to la-ville ek to peuple.” (Daniel 9:15-19) Eski nou la-priere montré ki sanctification nom Jéhovah ek realisation so volonté c’est sa ki pli important pou nou?

10. Couma nou koné ki nou kapav prié pou bann kitsoz personnel?

¹⁰ Mais, nou kapav aussi demann Jéhovah bann kitsoz personnel kan nou prié Li. Par exemple, pareil couma enn psalmiste, nou kapav prié pou comprend plus en profondeur bann kitsoz spirituel. Li ti faire sa la-priere-la: “Faire moi comprend, pou ki mo kapav obeir to la-loi ek pou ki mo kapav garde li avek tou mo leker.” (Psaume 119:33, 34; Colossiens 1:9, 10) Jésus ti “faire bann supplication ek bann demann ar Celui ki ti kapav sap li dan la mort.” (Hébreux 5:7) Kan li ti faire sa, li ti montré ki li bon ki nou rod la force kan nou pé passe par bann l’epreuve. Kan li ti donne so bann disciple enn model la priere, li ti koz aussi lor bann kitsoz personnel, par exemple li ti koz lor pardon ek lor mangé ki nou bizin toulé-jour.

11. Couma la priere kapav aide nou pou pa tombe dan bann tentation?

¹¹ Dan sa la-priere model-la, Jésus ti faire sa demann-la aussi: “Pa mette nou devant tentation, mais delivré nou ar sa kikenn ki mauvais-la.” (Matthieu 6:9-13) Plitar li ti donne sa conseil-la: “Contigne veillé ek prié touletan, pou ki zot pa tenté.” (Matthieu 26:41) Li bien important ki nou prié kan nou devant bann tentation. Kan nou dan travail ou-soit dan lekol, li possible ki nou tenté pou desobeir bann principe biblik. Bann dimoune ki pa bann Témoins de Jéhovah kapav invite nou pou participe avek zot dan bann kitsoz lor ki bann chrétien ena bann doute. Kitfois zot pou demann nou pou faire enn kitsoz ki contraire ar bann principe biblik. Dan sa bann situation-la, li bon ki nou suive conseil Jésus pou prié Jéhovah—avant ki nou gagne enn tentation ek kan nou devant sa tentation-la—nou demann Li pou aide nou pou ki nou pa tombe ladan.

12. Ki bann kitsoz ki tracasse nou kapav pousse nou pou prié, ek ki nou kapav attann ar Jéhovah?

¹² Zordi, bann serviteur Bondié gagne beaucoup pression ek tracas dan zot la-vie. Beaucoup affecté surtout par la maladie ek stress. La violence ki ena autour nou faire nou stressé. A cause bann problem economik, li difficile pou gagne seki nou bizin dan nou la-vie. Mais, sa encourage nou pou koné ki Jéhovah ecoute la priere so bann serviteur ki koz sa bann problem-la ar Li! Psaume 102:17 dire lor Jéhovah: “Oui, Li pou ecoute la priere bann dimoune ki’nn perdi tou, ek Li pa pou meprise zot la-priere.”

13. (a) Pou ki kitsoz personnel li bon nou prié? (b) Donne enn l’exemple.

¹³ En realité, nou kapav prié pou n’importe ki kitsoz ki touche nou service pou Jéhovah ou-soit nou relation avek Li. (1 Jean 5:14) Si ou bizin prend enn decision lor mariage, lor travail, ou-soit si ou envie faire plus dan ou ministere, pa hesité pou koz sa dan ou la-priere ek demann Jéhovah so direction. Par exemple, enn jeune madame dan Philippines ti envie faire service a plein temps. Mais, li pa ti ena enn travail. Li raconté: “Enn samedi, mo’nn prié Jéhovah surtout lor service pionnier. Plitar sa mem jour-la, kan mo ti dan predication, mo ti offert enn livre enn jeune tifi. Sans ki mo ti attann, li ti dire moi: ‘Ou bizin al dan mo lekol boner lundi gramatin.’ Mo ti demann li kifer, ek li ti explik moi ki ena enn place travail libre dan so lekol, ek bannla pé rod enn dimoune pli vite ki possible. Mo’nn allé, ek dé-suite bannla inn prend moi. Tousala ti arrivé bien vite.” Beaucoup Témoin dan le monde entier finn faire bann l’experience pareil. Alors, pa hesité pou prié Bondié ek demann Li bann kitsoz ki ou ena dan ou leker!

Ki nou pou faire si nou’nn faire enn peché?

14, 15. (a) Kifer fodé pa enn dimoune hesité pou prié Bondié mem si li finn faire enn peché? (b) Apart bann la-priere personnel, ki pou aide enn dimoune ki finn faire peché pou retabli lor plan spirituel?

¹⁴ Couma la priere kapav aide enn kikenn ki finn faire peché? Certain ki finn faire peché hesité pou faire la priere parski zot honté. Mais sa c’est pa enn bon kitsoz. Anou prend enn l’exemple: Bann pilote avion koné ki si zot perdi, zot pou kapav contacté la tour control pou gagne l’aide. Mais ki pou arrivé si enn pilote hesité pou contacté la tour control parski li honté a cause li’nn perdi? Sa kapav bien dangereux pou li! Li pareil aussi pou sa dimoune ki finn faire enn peché-la. Si li honté pou prié Jéhovah, li pou kapav souffert encore plus. Fodé pa ki la honte a cause enn peché empeche enn kikenn prié Jéhovah. En realité, Bondié invite bann ki finn faire enn peché grave pou prié Li. Prophete Isaïe ti encourage bann dimoune ki ti faire peché dan so lepok pou prié Jéhovah, “parski Li pardonne enn quantité fois.” (Isaïe 55:6, 7) Mais bien-sur avant ki enn kikenn al rod “calmé” Jéhovah, li pou bizin humilié li-mem, arrete faire peché ek repenti avek tou so leker.—Psaume 119:58; Daniel 9:13.

¹⁵ Kan enn kikenn finn faire enn peché, li bien important ki li prié Jéhovah pou enn lot raison. Guette ki disciple Jacques ti dire lor enn kikenn ki bizin l’aide spirituel: “Li bizin appel bann ancien dan congregation, ek zot bizin prié pou li, . . . ek Jéhovah pou releve li.” (Jacques 5:14, 15) Oui, enn dimoune pou bizin personnellement confesse so peché ar Jéhovah dan la priere, mais li kapav aussi demann bann ancien pou prié pou li. Sa pou aide li pou retabli so bann relation avek Jéhovah.

Reponse nou la-priere

16, 17. (a) Couma Jéhovah reponn bann la-priere? (b) Ki l’exemple montré ki ena enn rapport entre la priere ek la predication?

¹⁶ Couma Bondié reponn bann la-priere? Parfois, Li reponn certain la-priere bien vite ek dan enn fason bien clair. (2 Rois 20:1-6) Mais parfois sa prend le temps, ek li pa trop facile pou comprend couma Li finn reponn nou. Nou rappel l’exemple ki Jésus ti servi kot enn veuve ti contigne vinn supplie enn juge. Sa l’exemple-la montré nou ki, parfois nou aussi nou pou bizin prié Bondié plusieurs fois pou enn kitsoz. (Luc 18:1-8) Mais seulement, nou kapav sur ki si nou prié en accord avek volonté Bondié, jamais Li pou dire nou: “Arrete fatigue moi!”—Luc 11:5-9.

¹⁷ Bann serviteur Jéhovah finn trouve Li reponn zot la-priere bien souvent, surtout dan predication. Par exemple, deux soeur dan Philippines ti pé offert bann publication basé lor la Bible dan enn l’endroit retiré dan sa pays-la. Kan zot ti donne enn madame enn tract, zot ti remarké ki so lizié ti rempli ar larme. Li ti dire zot: “Hier soir, mo ti prié Bondié pou envoye kikenn kot moi pou etudié la Bible. Mo croire ki sa c’est enn reponse pou mo la-priere.” Enn tipé lé-temps apré, sa madame-la ti commence assisté reunion dan la Salle du Royaume. Dan enn lot pays, dan sud-est l’Asie, enn frere ti enn tipé peur pou al preche dan enn batiment ki ti bien protegé par enn system securité. Mais, li ti prié Jéhovah, li ti prend courage ek li ti rente dan sa batiment-la. Li ti tape la porte enn l’appartement, ek enn jeune madame ti sorti. Kan frere-la ti explik li pou ki raison li pé visite li, madame-la ti commence ploré. Li ti dire frere-la ki li ti pé rod bann Témoins de Jéhovah ek li ti prié Bondié pou aide li trouve zot. Avek plaisir, frere-la finn aide li pou rente en contact avek congregation ki ti pli pré.

18. (a) Kan Jéhovah reponn nou la-priere, couma nou bizin reagir? (b) Ki nou kapav sur si nou prié dan tou l’occasion?

¹⁸ Oui, la priere c’est enn disposition extraordinaire. Jéhovah disposé pou ecoute nou la-priere ek reponn nou. (Isaïe 30:18, 19) Mais, nou pou bizin veille bien couma Jéhovah reponn nou la-priere, parski Li pa toujours reponn nou dan fason ki nou ti pé attann. Kan nou realisé ki Li’nn reponn nou la-priere, fodé jamais nou blié pou remercié Li ek pou loué Li. (1 Thessaloniciens 5:18) En plus, rappel toujours conseil ki l’apotre Paul ti donné: “Dan tou kitsoz, par la priere ek supplication avek bann remerciement, demann Bondié seki zot bizin.” Oui, saisi tou l’occasion pou koz avek Bondié. Ou pou trouvé ki Paul ti ena raison kan li ti pé koz concernant bann dimoune ki Bondié reponn zot la-priere. Li ti dire: “La paix ki Bondié donné ek ki pli grand ki tou pensée, pou protege zot leker ek zot l’esprit.”—Philippiens 4:6, 7.

Eski ou kapav reponn?

• Ki different qualité la-priere nou kapav faire?

• Couma nou bizin prié?

• Ki nou kapav demandé dan nou la-priere?

• Ki role la priere ena kan enn kikenn inn faire peché?

[Zimage, page 29]

Bann la-priere sincere aide nou pou pa tombe dan tentation

[Zimage, page 31]

Par la priere, nou dire Bondié nou reconnaissance, seki tracasse nou ek nou demann Li seki nou bizin