Kouma Nou Kapav Kontign Manifeste Lespri Sakrifis?

 1. Kouma Jésus inn les enn bon lexanp par lavi sakrifis ki li’nn amene?

KAN Jésus ti lor later, li ti amenn enn lavi sakrifis ek li’nn les enn lexanp parfe pou nou. Li ti fer volonte Bondie pas avan so prop desir ek so konfor. (Jean 5:30) Li ti montre ki pa ti ena okenn limit dan bann sakrifis ki li ti dispoze pou fer kan li ti res fidel ziska lamor lor enn poto soufrans.​—Phil. 2:8.

 2. Kouma nou manifeste lespri sakrifis ek kifer nou bizin fer sa?

² Antan ki bann disip Jésus, nou osi nou bizin manifeste lespri sakrifis. Ki sa vedir ena lespri sakrifis? Sa vedir ki enn dimounn dispoze pou met so prop lintere enn kote pou li kapav ed lezot. Enn dimounn ki ena lespri sakrifis, li pa egois. (Lir Matthieu 16:24.) Kan nou pa egois, sa kapav ed nou pou fer lezot pas avan nou bann santiman ek nou bann preferans personel. (Phil. 2:3, 4) An realite, Jésus ti ansegne ki pou nou kapav ador Jéhovah, li bien inportan ki nou pa egois. Kifer? Parski lamour pous nou pou manifeste lespri sakrifis ek sa lamour-la montre ki nou bann vre disip Jésus. (Jean 13:34, 35) Reflesi lor bann benediksion ki nou gagne parski nou form parti dan enn fami internasional ki manifeste lespri sakrifis!

 3. Ki kapav anpes nou manifeste lespri sakrifis?

³ Me kanmem, nou bizin fer fas ar enn lennmi ki kapav tigit par tigit anpes nou pou manifeste lespri sakrifis. Sa lennmi-la se nou tandans pou montre nou egois. Rapel kouma Adam ek Ève ti manifeste sa tandans-la. Ève ti montre enn dezir egois kan li ti anvi vinn parey kouma Bondie. So mari osi ti manifeste sa defo-la kan li ti fer plezir so madam. (Gen. 3:5, 6) Apre ki Adam ek Ève ti detourn zot ar Jéhovah, Satan Lediab ti kontign tant bann dimounn pou ki zot vinn egois. Li ti mem esey fer sa avek Jésus. (Mat. 4:1-9) Dan nou lepok, Satan inn reisi detourn laplipar dimounn ar Jéhovah, ek li’nn pous zot pou manifeste enn latitid egois dan plizir fason. Si nou pa fer atansion, latitid egois ki ena partou dan lemond, kapav detin lor nou.​—Éph. 2:2.

 4. (a) Eski nou kapav tir nou bann tandans egois asterla? Explike. (b) Ki bann kestion nou pou examine?

⁴ Nou kapav konpar enn latitid egois ar larouy ki devlope lor enn feray. Si nou les enn kitsoz an feray deor, dan lapli ek soley, li kapav koumans rouye. Li pou grav si nou pa pran kont sa larouy-la parski li pou fann partou, ek lerla sa kitsoz-la pou deteriore ziska ki li fini net. Li parey osi pou nou, mem si asterla nou pa kapav tir nou linperfeksion ek nou tandans egois, nou bizin kontign lite kont sa bann tandans-la. Si nou pa fer atansion, nou pou nepli manifeste lespri sakrifis. (1 Cor. 9:26, 27) Kouma nou kapav kone ki nou egois? Kouma nou kapav amelior nou pou manifeste lespri sakrifis?

 5. (a) Kouma Labib parey kouma enn laglas? (Get zimaz dan koumansman lartik.) (b) Kan nou examinn noumem pou kone si nou egois, ki nou bizin evite?

⁵ Parey kouma nou kapav servi enn laglas pou gete kouma nou ete, alor nou kapav servi Labib pou examinn nou personalite ek koriz bann defo ki nou kapav trouve. (Lir Jacques 1:22-25.) Selman, se zis si nou servi enn laglas kouma bizin ki li pou ed nou pou koriz nou laparans. Par exanp, si nou zis zet enn ti koudey dan enn laglas, kitfwa nou pa pou remark enn ti defo, me ki kanmem bien grav. Ouswa si nou pa anfas ar laglas-la, nou kapav trouv enn lot dimounn ladan. Dan mem fason, pou nou kapav servi Labib pou kone si nou egois, fode pa nou lir li vit-vit ouswa servi li pou trouv defo enn lot dimounn.

 6. Kouma nou kapav “kontign” examinn an profonder lalwa parfe?

⁶ Par exanp, li posib ki nou pe lir Parol Bondie regilierman, kitfwa mem toulezour, me kanmem nou pa trouve ki nou pe koumans devlop bann tandans egois. Kouma sa kapav arive? Dan lexanp ki disip Jacques ti done lor enn misie ki “get limem” dan enn laglas, li ti servi enn mo Grek ki vedir examinn an profonder. Alor, sa misie-la ti pe get li bien dan sa laglas-la, selman li ti ena enn problem. Jacques ti dir: “Li ale ek li bliye deswit ki kalite dimounn li ete.” Wi, li ti sorti devan laglas-la san fer okenn sanzman lor seki li’nn trouve. Me, enn dimounn ki met an pratik Parol Bondie, li pa zis “examinn an profonder lalwa parfe” me osi li “kontign fer sa.” Alor, olie ki li bliye lalwa parfe ki ena dan Parol Bondie, li persevere pou swiv bann lansegnman Biblik. Jésus osi ti explik mem lide kan li ti dir: “Si zot kontign gard mo parol, zot vremem mo bann disip.”​—Jean 8:31.

 7. Kouma nou kapav servi Labib pou gete si nou ena bann tandans egois?

⁷ Alor, pou ou reisi konbat ou bann tandans egois, dabor, ou bizin pran letan pou lir Labib. Sa kapav ed ou pou trouve ki ou bizin ameliore. Me, ou bizin fer plis ki sa. Al an profonder ek fer bann resers. Kan ou pe lir enn resi dan Labib, met ou dan plas bann personaz, ek poz oumem sa bann kestion-la: ‘Kouma mo ti pou azir dan sa sitiasion-la? Eski vremem mo ti pou azir dan enn bon fason?’ Seki pli inportan, apre ki ou finn medit lor seki ou’nn lir, se fer zefor pou met an pratik seki ou’nn aprann. (Mat. 7:24, 25) Anou examinn resi lor Lerwa Saül ek lapot Pierre ek gete kouma sa kapav ed nou pou manifeste lespri sakrifis.

 8. Ki latitid Lerwa Saül ti ena kan li ti koumans regne, ek kouma li ti montre sa latitid-la?

⁸ Lexanp Saül li enn lavertisman ki montre kouma enn latitid egois kapav detrir nou lespri sakrifis. Kan Saül ti vinn lerwa, li ti konn rekonet so limit ek li ti ena limilite. (1 Sam. 9:21) Li ti refiz pini bann Izraelit ki ti koz an mal kont so rwayote, mem si zot ti met an dout lotorite ki Bondie ti donn li. (1 Sam. 10:27) Lerwa Saül ti aksepte ki lespri Bondie gid li kan li ti fer nasion Israël gagn laviktwar kont bann Amonit. Apre sa, avek imilite, li ti donn laglwar Jéhovah pou sa viktwar-la.​—1 Sam. 11:6, 11-13.

 9. Kouma Saül ti koumans devlop enn latitid egois?

⁹ Plitar, Saül ti les enn latitid egois ek lorgey devlop dan so leker, parey kouma larouy lor enn metal. Kan li ti gagn laviktwar lor bann Amalekit, li ti met so prop dezir avan so lobeisans pou Jéhovah. Saül ti ena enn gran dezir pou gagn dibien so bann lennmi, li ti pran sa bann dibien-la olie ki li ti detrir zot parey kouma Bondie ti donn lord. Saül ti telman ena lorgey ki li ti mem fer enn moniman pou limem. (1 Sam. 15:3, 9, 12) Kan profet Samuel ti fer li kone ki sa pa ti fer Jéhovah plezir, Saül ti defann limem. Li ti koz zis lor seki li ti obeir dan lord ki Bondie ti donn li. Li ti mem rann lezot responsab pou so erer. (1 Sam. 15:16-21) Anplis, lorgey ti fer Saül plis trakase pou so repitasion ki pou so lamitie avek Bondie. (1 Sam. 15:30) Kouma nou kapav servi sa resi lor Saül la kouma enn laglas pou ed nou manifeste lespri sakrifis?

10, 11. (a) Ki nou aprann lor lespri sakrifis dan lexanp Saül? (b) Kouma nou kapav evit swiv move lexanp Saül?

¹⁰ Premierman, seki ti ariv Saül montre ki fode pa nou ena enn tro gran konfians an noumem, ek panse ki si dan lepase nou ti manifeste lespri sakrifis, sa vedir ki li otomatik ki nou pou kontign manifeste li. (1 Tim. 4:10) Pa bliye ki pandan enn sertin tan, Saül ti ena enn bon kondwit ek li ti ena faver Bondie. Me li pa ti derasinn bann tandans egois ki ti pe koumans kontrol li. Finalman, Jéhovah ti rezet Saül akoz so dezobeisans.

¹¹ Deziemman, fode pa ki nou get zis bann domenn dan nou lavi kot nou pe fer bien ek pa pran kont bann domenn kot nou bizin travay. Koumadir lerla, nou pe servi enn laglas pou admir nou bann linz nef me nou pa remark enn salte ki ena lor nou figir. Kitfwa nou, nou pa resanble Saül, nou pena enn tro gran konfians an noumem. Selman, nou bizin fer tou pou rezet bann tandans ki kapav fer nou swiv so move lexanp. Si nou gagn bann konsey, fode pa nou defann noumem, dir ki seki nou’nn fer pa tro grav, ouswa rann lezot responsab. Olie ki nou fer kouma Saül, li pou pli bon ki nou aksepte bann konsey.​—Lir Psaume 141:5.

12. Kouma lespri sakrifis kapav ed nou si nou finn fer enn pese grav?

¹² Selman, ki nou pou fer si nou finn komet enn pese grav? Saül ti anvi sov so repitasion, ek sa ti anpes li regagn so lamitie avek Bondie. Me nou okontrer, si nou manifeste lespri sakrifis, sa kapav ed nou pou fer fas ar laont ek rod led neseser. (Prov. 28:13; Jacq. 5:14-16) Par exanp, enn frer ti koumans get pornografi laz 12 an, ek li ti kontign fer sa an sekre pandan plis ki di-z-an. Li rakonte: “Sa ti bien difisil pou dir mo madam ek bann ansien seki mo ti pe fer. Me asterla ki mo finn admet sa, mo santi ki’nn tir enn pwa lor mo zepol. Sertin parmi mo bann kamarad ti bien sagrin kan mo ti perdi mo privilez kouma asistan ministeryel, se koumadir mo ti’nn les zot tonbe. Pourtan, mo kone ki Jéhovah plis aksepte mo servis asterla ki kan mo ti pe get pornografi, ek se so fason panse ki pli inportan.”

13, 14. Kouma eski Pierre ti manifeste bann tandans egois?

¹³ Lapot Pierre ti manifeste lespri sakrifis kan Jésus ti pe form li. (Luc 5:3-11) Pourtan, li ti bizin konbat kont bann tandans egois ki li ti ena. Par exanp, Pierre ti ankoler kan Jacques ek Jean ti demann Jésus pou gagn bann gran pozision akote li dan Rwayom Bondie. Kitfwa li ti panse ki enn parmi sa bann plas-la ti bizin vinn pou li, parski Jésus ti fini dir ki Pierre ti pou ena enn rol spesial. (Mat. 16:18, 19) Jésus ti averti Jacques, Jean, Pierre ek bann lezot zapot ki fode pa zot egois ouswa esey “komann [zot bann frer] kouma bann sef.”​—Marc 10:35-45.

¹⁴ Mem apre ki Jésus ti esey koriz fason panse ki Pierre ti ena, Pierre ti kontign montre ki li ti ena bann tandans egois. Kan Jésus ti dir so bann zapot ki zot ti pou abandonn li pou enn sertin tan, Pierre ti abes lezot kan li ti dir ki li tousel ti pou res fidel. (Mat. 26:31-33) Li ti ena enn tro gran konfians an limem, akoz sa, dan sa mem lanwit-la, li pa ti manifeste lespri sakrifis. Li ti fer tou seki li ti kapav pou protez limem ek li ti renie Jésus trwa fwa.​—Mat. 26:69-75.

15. Kifer lexanp Pierre ankouraz nou?

¹⁵ Malgre ki Pierre ti bizin lite ek li ti fer bann erer, so lexanp ankouraz nou. Gras-a so bann zefor ek avek led lespri sin Bondie, Pierre ti reisi sirmont so bann tandans egois. Plitar, li ti montre ki li ti kapav kontrol limem ek ki li ti ena enn lamour ki ti pous li pou fer bann sakrifis pou lezot. (Gal. 5:22, 23) Li ti andir bann leprev ki kitfwa ti pli difisil ki bann leprev ki ti fer li tonbe dan lepase. Par exanp, li ti montre ki li ti ena limilite par fason ki li ti reazir kan lapot Paul ti koriz li an piblik. (Gal. 2:11-14) Apre ki li ti gagn konsey ar Paul, Pierre pa ti gard li dan so leker, ek li pa ti panse ki Paul ti gat so repitasion. Pierre ti kontign montre so lamour pou Paul. (2 Pierre 3:15) Lexanp Pierre kapav ed nou pou devlop enn lespri sakrifis.

16. Kouma nou kapav montre ki nou ena lespri sakrifis dan bann sitiasion difisil?

¹⁶ Reflesi kouma ou reazir dan bann sitiasion difisil. Kan lapot Pierre ek bann zapot ti dan prizon ek ti gagn bate akoz zot predikasion, zot ti dan lazwa “parski ti’nn ziz zot dign pou gagn dezoner akoz nom [Jésus].” (Actes 5:41) Ou osi ou kapav konsider persekision kouma enn lokazion pou imit Pierre ek swiv lexanp Jésus kan ou manifeste lespri sakrifis. (Lir 1 Pierre 2:20, 21.) Sa latitid-la kapav mem ed ou si bann ansien donn ou enn disiplinn ki ou bizin. Li bon ki nou swiv lexanp Pierre olie ki nou ofanse.​—Eccl. 7:9.

17, 18. (a) Ki nou kapav demann noumem lor nou bann lobzektif spiritiel? (b) Ki nou kapav fer si nou trouve ki nou ena enn tandans egois dan nou leker?

¹⁷ Lexanp Pierre kapav ed ou osi kan ou fixe bann lobzektif spiritiel. Ou kapav travay pou realiz ou bann lobzektif dan enn fason ki montre ki ou ena lespri sakrifis. Me fer atansion ki ou pa fixe sa bann lobzektif-la zis parski ou anvi gagn grander. Alor demann oumem: ‘Kifer mo anvi amelior mwa ouswa fer plis pou Jéhovah? Eski se parski mo anvi ki lezot donn mwa loner ouswa plis lotorite parey kouma Jacques ek Jean ti anvi?’

¹⁸ Si ou remarke ki dan ou leker ou pe devlop bann tandans egois, demann Jéhovah pou ed ou koriz ou fason panse ek ou bann santiman. Apre, fer plis zefor pou ki Jéhovah gagn laglwar, pa ou. (Ps. 86:11) Ou kapav osi fixe bann lobzektif ki pa pou atir latansion lor oumem. Par exanp, kitfwa ou kapav devlop pli bien sertin kalite ki form parti dan frwi lespri sin ki ou trouv pli difisil pou manifeste. Ouswa si ou prepar bien bann partisipasion ki ou ena dan renion me ki ou pa tro partisip dan netwayaz Lasal, kitfwa ou kapav fixe lobzektif pou aplik konsey ki trouv dan Romains 12:16.​—Lir.

19. Ki nou kapav fer pou nou pa dekouraze kan nou examinn nou atraver Labib?

¹⁹ Kan nou get noumem bien atraver Parol Bondie ki kouma enn laglas ek nou trouv bann defo ouswa bann tandans egois, kitfwa nou kapav dekouraze. Si sa ariv ou, reflesi lor sa misie ki met an pratik Parol Bondie ki Jacques mansione dan so lexanp la. Jacques pa dir si sa misie-la ti regle so problem deswit ouswa non. Li pa dir osi ki sa misie-la ti reisi koriz tou defo ki li ti ena, okontrer li dir ki li ti kontign ‘persevere dan lalwa parfe.’ (Jacq. 1:25) Sa misie-la ti rapel seki li ti trouve dan laglas ek li ti kontign amelior li. Wi, li bon ki ou ena enn lopinion pozitif lor oumem ek rapel ki nou tou nou inparfe. (Lir Ecclésiaste 7:20.) Kontign examinn lalwa parfe ek kontign manifeste lespri sakrifis. Jéhovah dispoze pou ed ou, parey kouma Li finn ed ou bann frer ek ser, ki ena faver Bondie ek so benediksion mem si zot inparfe.