Kontign Ena enn Gran Lamour pou Lezot

1-2. (a) Kifer lapot Pol ti dir ki lamour se “pli gran” kalite ki ena? (b) Ki kestion nou pou examine dan sa lartik-la?

KAN lapot Pol ti koz lor lafwa, lesperans, ek lamour, li ti dir ki “pli gran parmi sa trwa [kalite-la], se lamour.” (1 Kor. 13:13) Kifer li ti dir sa? Dan lavenir, nou pou nepli bizin ena lafwa ouswa lesperans dan bann promes Bondie, parski zot pou fini realize. Selman, nou pou touletan bizin montre lamour pou Zeova ek pou bann dimounn. An realite, nou lamour pou zot pou bizin kontign grandi.

² Nou pou touletan bizin ena lamour. Alor, anou reponn sa trwa kestion-la. Premierman, kifer nou bizin kontan sakenn nou kamarad? Deziemman, kouma nou kapav montre lamour anver lezot? Ek trwaziemman, kouma nou kapav kontign ena enn gran lamour pou lezot?

 3. Kifer nou bizin kontan nou bann frer ek ser?

³ Kifer li inportan ki nou kontan nou bann frer ek ser? Enn premie rezon se parski kan nou montre lamour pou nou bann frer ek ser, nou montre ki nou bann vre Kretien. Zezi ti dir so bann zapot: “Tou dimounn pou kone ki zot mo bann disip si zot ena lamour ant zot.” (Zan 13:35) Enn deziem rezon se parski kan nou ena lamour pou nou bann frer ek ser, nou ede pou ki ena linite. Pol ti dir ki lamour “li enn lien ki ini bann dimounn ansam dan enn fason parfe.” (Kol. 3:14) Ena enn trwaziem rezon bien inportan kifer nou bizin kontan lezot. Lapot Zan ti dir bann Kretien: “Enn kikenn ki kontan Bondie bizin kontan so frer osi.” (1 Zan 4:21) Alor, kan nou kontan lezot, nou montre ki nou kontan Bondie.

4-5. Servi enn lexanp pou montre lien ki ena ant nou lamour pou Bondie ek nou lamour pou nou bann frer ek ser.

⁴ Ki lien ena ant nou lamour pou Zeova ek nou lamour pou nou bann frer ek ser? Pou nou konpran sa, anou get lien ki ena ant nou leker ek bann lezot parti nou lekor. Kan enn dokter pran nou pou lor nou pwanie, pou gete si li feb ouswa li for, sa ed li pou kone dan ki leta nou leker ete. Ki lien nou kapav fer ant sa lexanp-la ek nou lamour?

⁵ Kan enn dokter pran nou pou, li kapav konn leta nou leker. Dan mem fason, nou pou kone ki kantite nou kontan Bondie kan nou reflesi lor ki kantite nou kontan nou bann frer ek ser. Si nou remarke ki nou lamour pou nou bann frer ek ser inn diminie, kitfwa savedir ki nou lamour pou Bondie osi inn diminie. Parkont, si regilierman nou montre lamour anver nou bann frer ek ser, se bann sign ki nou lamour pou Zeova li for.

 6. Kifer li bien grav si nou lamour pou nou bann frer ek ser pe diminie? (1 Zan 4:​7-9, 11)

⁶ Li bien grav si nou lamour pou nou bann frer ek ser pe diminie. Kifer? Parski se enn sign ki nou lamour pou Zeova pe diminie. Lapot Zan fer nou konpran sa kan li dir: “Enn kikenn ki pa kontan so frer, ki li’nn trouve, pa kapav kontan Bondie, ki li pa’nn trouve.” (1 Zan 4:20) Ki leson nou aprann? Zeova pou kontan nou zis si nou “kontan sakenn nou kamarad.”—Lir 1 Zan 4:​7-9, 11.

7-8. Sit sertin fason kouma nou kapav montre ki nou kontan nou bann frer ek ser.

⁷ Dan Labib, plizir fwa nou trouv lord: “Kontan sakenn [zot] kamarad.” (Zan 15:​12, 17; Rom. 13:8; 1 Tes. 4:9; 1 Pier 1:22; 1 Zan 4:11) Selman, lamour se enn santiman ki ena dan nou leker ek ki lezot pa kapav trouve. Alor, kouma nou kapav montre ki nou kontan nou bann frer ek ser? Par nou bann parol ek nou bann aksion.

⁸ Ena plizir fason ki nou kapav montre ki nou kontan nou bann frer ek ser. Anou get de-trwa lexanp. Labib dir: “Ki sakenn koz laverite ar so kamarad.” (Zaka. 8:16) “Res anpe avek zot kamarad.” (Mark 9:50) “Zot bizin touzour premie pou onor sakenn zot kamarad.” (Rom. 12:10) “Akeyir sakenn zot kamarad.” (Rom. 15:7) “Kontign . . . pardonn sakenn zot kamarad.” (Kol. 3:13) “Kontign sarye fardo sakenn zot kamarad.” (Gal. 6:2) “Kontign rekonfort sakenn zot kamarad.” (1 Tes. 4:18) “Kontign . . . fortifie sakenn zot kamarad.” (1 Tes. 5:11) “Priye pou sakenn zot kamarad.”—Zak 5:16.

 9. Kifer kan nou rekonfort lezot, sa montre ki nou kontan zot? (Get zimaz osi.)

⁹ Anou examinn enn lexpresion ki mansione dan paragraf avan. Pol ti dir: “Kontign rekonfort sakenn zot kamarad.” Kifer kan nou rekonfort lezot, sa montre ki nou kontan zot? Dapre enn referans Biblik, mo ki Pol servi pou “rekonfort” vedir “debout akote ar enn dimounn pou ankouraz li kan li pe pas dan bann sitiasion difisil.” Alor, kan nou rekonfort enn kikenn ki dan difikilte, nou ed li pou releve ek pou kontign servi Zeova avek fidelite. Alor, sak fwa ki nou rekonfort enn frer ouswa enn ser, nou montre ki nou kontan li.—2 Kor. 7:​6, 7, 13.

10. Ki lien ena ant konpasion ek rekonfor?

¹⁰ Ki lien ena ant konpasion ek rekonfor? Konpasion li pous enn kikenn pou rekonfort lezot ek pou esey soulaz zot. Alor, kan nou ena konpasion, sa ed nou pou rekonfort lezot. Pol explike ki konpasion ki Zeova ena pou bann dimounn ti pous Li pou rekonfort zot. Akoz sa, li dir ki Zeova Li “Papa ki ena boukou mizerikord ek Bondie ki konsol bann dimounn dan tou kalite sitiasion.” (2 Kor. 1:3) Konsernan sa verse-la, enn not pou letid dir ki Pol servi lexpresion “ena boukou mizerikord” pou dekrir santiman konpasion ki Zeova ena pou lezot. Not-la dir ki “Bondie Li Papa ouswa Lasours mizerikord, parski konpasion form parti so personalite.” So konpasion pous Li pou rekonfort “nou dan tou nou bann difikilte.” (2 Kor. 1:4) Parey kouma enn delo fre rafresi nou kan nou gagn so, Zeova rafresi ek rekonfort bann ki dan difikilte. Kouma nou kapav swiv lexanp Zeova kan nou montre konpasion ek nou rekonfort lezot? Enn fason nou fer sa, se kan nou devlop bann lezot kalite ki pou ed nou pou ena konpasion ek pou rekonfort lezot. Anou get sertin parmi sa bann kalite-la.

11. Dapre Kolosien 3:12 ek 1 Pier 3:​8, ki lezot kalite pou ed nou pou kontan lezot ek rekonfort zot?

¹¹ Ki kitsoz pou ed nou pou kontign kontan ek ‘kontign rekonfort sakenn nou kamarad’ sak zour? Nou bizin devlop bann kalite kouma lafeksion fraternel ek zantiyes. Ek kan enn kikenn soufer, nou osi nou “soufer ansam” ar li. (Lir Kolosien 3:12; 1 Pier 3:8.) Kouma sa bann kalite-la kapav ed nou? Kan nou ena konpasion pou lezot ek ki nou vremem gagn zot traka, sa pou pous nou pou rekonfort zot kan zot pe soufer. Zezi ti explik sa kan li ti dir: “Parol ki sorti dan labous enn dimounn montre ar ki kitsoz so leker ranpli. Enn bon dimounn dir bann bon kitsoz parski so leker ranpli ar bann bon kitsoz.” (Mat. 12:​34, 35) Alor, enn parmi bann meyer fason ki nou montre ki nou kontan nou bann frer ek ser, se kan nou rekonfort zot kan zot dan difikilte.

12. (a) Ar ki kitsoz nou bizin fer atansion? (b) Ki kestion nou pou reponn aster-la?

¹² Nou tou nou anvi “kontign kontan sakenn nou kamarad.” (1 Zan 4:7) Selman, nou bizin rapel ki Zezi ti dir ki “lamour laplipar dimounn [ti] pou diminie.” (Mat. 24:12) Zezi pa ti pe rod dir ki laplipar so bann disip ti pou aret kontan zot kamarad. Selman, dan lemond azordi, boukou dimounn pa kontan zot kamarad, ek nou bizin fer atansion ki nou pa les nou inflianse par sa fason panse-la. Kouma nou kapav kone si nou ena enn gran lamour pou nou bann frer ek ser?

13. Kouma nou kapav kone si nou ena enn gran lamour pou nou bann frer ek ser?

¹³ Pou nou kone si nou ena enn gran lamour pou lezot, nou kapav reflesi lor kouma nou reazir dan diferan sitiasion. (2 Kor. 8:8) Lapot Pier koz lor enn sa bann sitiasion-la. Li dir: “Avan tou kitsoz, ena enn lamour profon pou sakenn zot kamarad, parski lamour kouver enn kantite pese.” (1 Pier 4:8) Alor, fason ki nou reazir kan nou bann frer ek ser fer bann erer, ouswa kan zot bles nou, pou ed nou pou kone si nou ena enn gran lamour pou zot.

14. Dapre 1 Pier 4:​8, ki kalite lamour nou bizin ena? Explike.

¹⁴ Anou reflesi lor bann parol ki Pier ti dir. Premie parti verse 8 dir nou ki kalite lamour nou bizin ena, setadir “enn lamour profon.” Mo “profon” ki Pier servi, vedir “ki grandi.” Deziem parti sa verse-la explik lefe ki enn lamour profon ena, setadir li kouver pese nou bann frer ek ser. Pou nou konpran sa, anou pran enn lexanp. Nou lamour pou nou bann frer ek ser bizin parey kouma enn latwal stretch. Plis nou ris li, plis li grandi ek li kouver, pa zis enn ouswa de pese, me “enn kantite pese.” Dan mem fason, si nou ena enn lamour profon pou nou bann frer ek ser, nou pou kapav kouver ouswa pardonn zot bann erer ek pas lor zot bann defo.

15. Si nou ena enn gran lamour pou nou bann frer ek ser, ki nou pou kapav fer? (Kolosien 3:13)

¹⁵ Kan nou ena enn gran lamour pou nou bann frer ek ser, nou pou kapav pardonn zot bann erer mem kan sa bien difisil pou fer. (Lir Kolosien 3:13.) Kan nou pardonn lezot, nou montre ki nou ena enn gran lamour ek ki nou anvi fer Zeova plezir. Ki kitsoz ankor kapav ed nou pou pardonn erer nou bann frer ek ser ek pou pas lor zot bann defo?

16-17. Ki kitsoz ankor kapav ed nou pou pardonn erer nou bann frer ek ser? Explike. (Get zimaz osi.)

¹⁶ Konsantre twa lor bann kalite ki to bann frer ek ser ena, pa lor zot bann defo. Anou get enn lexanp. Fer koumadir to dan enn ti program avek de-trwa frer ek ser. To pe pas enn bon moman, ek alafin program-la, to fer enn selfie ar zot. Kitfwa to pou tir ankor de foto, tansion premie-la pa bon. Me ki to pou fer si lor enn sa bann foto-la, enn frer pa pe riye? Sirman to pou efas li, ek to pou gard sa de lezot foto-la, kot tou dimounn pe riye.

¹⁷ Nou kapav konpar sa bann foto-la ar bann souvenir ki nou ena. Bien souvan, kan nou pas letan avek nou bann frer ek ser, nou gard bann bon souvenir. Me fer koumadir ki, dan enn sa bann lokazion-la, enn frer ouswa enn ser inn bles nou. Ki nou bizin fer ar sa souvenir-la? Nou bizin efas li, parey kouma nou ti pou efas sa foto-la. (Prov. 19:11; Efe. 4:32) Nou ena telman boukou bon souvenir ar sa dimounn-la, ki nou pa anvi kontign pans lor sa erer ki li’nn fer la. Okontrer, se bann bon souvenir ki nou ena avek li ki nou anvi kontign mazine.

18. Dan sa lartik-la, ki bann kitsoz inportan nou’nn examine lor lamour?

¹⁸ Kifer nou anvi kontign ena enn gran lamour pou nou bann frer ek ser? Kouma nou’nn trouve dan sa lartik-la, kan nou kontan nou bann frer ek ser, sa montre ki nou kontan Zeova. Kouma nou kapav montre ki nou kontan nou bann frer ek ser? Enn fason nou fer sa, se kan nou rekonfort zot. Nou pou kapav “kontign rekonfort sakenn [nou] kamarad” si nou ena konpasion pou zot. Ek kouma nou kapav kontign ena enn gran lamour pou nou bann frer ek ser? Se kan nou fer tou seki nou kapav pou pardonn bann erer ki zot fer.

19. Azordi, kifer li bien inportan ki nou montre nou bann frer ek ser ki nou kontan zot?

¹⁹ Azordi, kifer li bien inportan ki nou montre nou bann frer ek ser ki nou kontan zot? Pier dir nou kifer kan li dir: “Lafin tou kitsoz finn koste. Alor, . . . ena enn lamour profon pou sakenn zot kamarad.” (1 Pier 4:​7, 8) Amezir ki nou pe koste ar lafin sa lemond-la, ki kitsoz nou sir pou arive? Zezi ti dir so bann disip: “Tou bann nasion pou ena laenn pou zot akoz mo nom.” (Mat. 24:9) Pou ki nou res fidel anver Zeova malgre laenn sa lemond-la, nou bizin gard nou linite. Ek si nou kontan nou bann frer ek ser, Satan pa pou kapav met divizion ant nou, parski lamour li “enn lien ki ini bann dimounn ansam dan enn fason parfe.”—Kol. 3:14; Fil. 2:​1, 2.