Bann berger ki ‘bann l’exemple pou troupeau Bondié’

“Guide troupeau Bondié ki lor zot charge . . . avek plaisir . . . , avek enn bon volonté . . . , [ek] vinn bann l’exemple pou sa troupeau-la.”—1 Pierre 5:2, 3.

1, 2. (a) Ki privilege Jésus ti donne l’apotre Pierre, ek kifer Jésus ti ena raison pou faire li confiance? (b) Ki Jéhovah pensé lor bann ancien ki Li’nn etabli?

Enn tipé avant la Pentecôte l’an 33 a.n.l., Pierre ek six lezot disciple ti pé prend enn ti-dejeuner ki Jésus ti preparé lor la plage la mer Galilée. Pa premier fois ki Pierre ti’nn trouve Jésus apré so resurrection. Surement li ti bien content ki Jésus ti vivant. Mais li possible aussi ki Pierre ti tracassé. Kifer? Parski zis dé-trois jour avant, li ti’nn renié Jésus, li ti dire ki jamais li pa ti konn li. (Luc 22:55-60; 24:34; Jean 18:25-27; 21:1-14) Eski Jésus ti reprend Pierre parski li pa ti ena la foi? Non. Au contraire, li ti donne Pierre privilege pou nourri ek pou prend soin so bann “ti-mouton.” (Jean 21:15- 17) L’histoire congregation chrétien dan premier siecle montré ki Jésus ti ena raison pou faire Pierre confiance. Ensam avek bann lezot zapotre ek bann ancien dan Jérusalem, Pierre ti bien prend soin bann congregation pendant enn period kot ti ena bann grand l’epreuve ek aussi enn grand l’accroissement.—Actes 1:15- 26; 2:14; 15:6-9.

² Zordi, a travers Jésus Christ, Jéhovah inn etabli bann zom qualifié pou servi couma bann berger spirituel, setadir bann ancien. Sa bann ancien-la guide So bann serviteur pendant sa lepok ki pli critik ki jamais finn ena dan l’histoire-la. (Éphésiens 4:11, 12; 2 Timothée 3:1) Eski Jéhovah ena raison pou faire confiance sa bann zom-la? Oui, parski zordi nou trouve la paix parmi bann chrétien dan le monde entier. C’est vrai ki sa bann ancien-la, zot bann dimoune imparfait ek zot faire erreur, pareil couma Pierre. (Galates 2:11-14; Jacques 3:2) Mais kan-mem, Jéhovah faire zot confiance pou prend soin so bann serviteur ki Li finn “acheté avek di-sang so prop Garson.” (Actes 20:28) Jéhovah ena enn grand l’affection pou sa bann ancien-la, ek Li considere zot couma bann ki “merite deux fois plus l’honneur.”—1 Timothée 5:17.

 3. Couma bann ancien kapav contigne faire zot travail avek plaisir?

³ Couma eski bann ancien kapav contigne faire zot travail avek plaisir ek vinn bann l’exemple pou la congregation? Pareil couma Pierre ek bann ancien dan premier siecle, zot compte lor l’esprit saint Bondié pou gagne la force necessaire pou assume zot bann responsabilité. (2 Corinthiens 4:7) En plus, l’esprit saint aide zot pou developpe fruit l’esprit, setadir l’amour, la joie, la paix, patience, bienveillance, bonté, la foi, douceur, maitrise de soi. (Galates 5:22, 23) Anou guetté couma bann ancien kapav donne enn l’exemple ek manifesté sa bann qualité-la, pendant ki zot prend soin troupeau Bondié.

Bann ancien content la congregation en entier ek chaque chrétien aussi

4, 5. (a) Couma eski Jéhovah ek Jésus montré l’amour pou la congregation? (b) Couma bann ancien kapav montré l’amour pou la congregation?

⁴ Pli grand qualité ki l’esprit saint produire c’est l’amour. Jéhovah montré so l’amour pou tou so bann serviteur kan Li donne zot la nourriture spirituel en abondance. (Isaïe 65:13, 14; Matthieu 24:45-47) Mais, Li pa zis nourri zot. Li ena enn l’attachement personnel pou chaque membre la congregation. (1 Pierre 5:6, 7) Jésus aussi content la congregation. Li finn donne so la-vie pou so bann brebis, ek li konn sakenn parmi zot personnellement, ‘par so nom.’—Jean 10:3, 14-16.

⁵ Bann ancien imite Jéhovah ek Jésus. Zot content tou bann membre dan congregation ek zot montré sa kan zot ‘faire zeffort pou enseigne’ la congregation. Zot bann discours ki basé lor la Bible nourri bann chrétien ek protege zot. Tou dimoune kapav trouve sa travail dur ki zot faire-la. (1 Timothée 4:13, 16) Parkont, seki beaucoup pa trouvé c’est le temps ki zot passé pou faire lezot kitsoz, couma par exemple: compile bann rapport, ecrire ek reponn bann lettre congregation, faire bann program, ek faire beaucoup lezot ti kitsoz pou ki bann reunion ek lezot activité passe “bien ek dan l’ordre.” (1 Corinthiens 14:40) Personne pa trouve zot faire la plupart sa bann travail-la; beaucoup pa mem koné ki zot faire tousala. Mais bann ancien faire sa par amour.—Galates 5:13.

6, 7. (a) Cite enn fason ki permette bann ancien konn zot bann frere ek soeur pli bien. (b) Kifer parfois li bon ki nou faire enn ancien konn nou bann sentiment?

⁶ Bann ancien ki ena l’amour faire zeffort pou montré enn l’interet personnel envers chaque membre la congregation. (Philippiens 2:4) Enn fason pou bann ancien konn pli bien chaque membre la congregation, c’est kan zot travail ensam avek bannla dan predication. Souvent, kan Jésus ti preché, so bann disciple ti accompagne li, ek lerla li ti profité pou encourage zot. (Luc 8:1) Enn ancien ki ena l’experience dire: “Mo finn trouvé ki pli bon fason pou konn enn frere ou-soit enn soeur ek pou encourage li, c’est kan mo travail avek li dan predication.” Si sa faire longtemps ki ou pa finn travail avek enn ancien dan predication, kifer ou pa faire l’arrangement pou faire sa?

⁷ L’amour ti pousse Jésus pou partage la joie ek chagrin so bann disciple. Par exemple, kan enn fois, 70 disciple ti al preché, zot ti bien joyeux kan zot ti retourné. Jésus aussi ti “rempli ar la joie.” (Luc 10:17-21) Mais, kan li ti trouvé couma Marie, so famille ek so bann camarade, ti bien chagrin kan Lazare ti mort, “Jésus ti ploré.” (Jean 11:33-35) Zordi aussi, bann ancien pa indifferent ar seki arrive zot bann frere ek soeur. L’amour pousse zot pou “partage la joie bann dimoune ki joyeux,” ek pou “ploré avek bann ki ploré.” (Romains 12:15) Si ena enn kitsoz dan ou la-vie ki faire ou bien content ou-soit ki faire ou bien chagrin, ou kapav partage sa bann sentiment-la avek bann ancien. Sa pou encourage zot kan zot tann enn kitsoz ki’nn faire ou content. (Romains 1:11, 12) Kan zot pou aprann par ki problem ou pé passé, sa pou permette zot fortifié ou ek encourage ou.—1 Thessaloniciens 1:6; 3:1-3.

8, 9. (a) Couma enn ancien ti montré l’amour envers so femme? (b) Kifer li bien important ki enn ancien montré l’amour envers so famille?

⁸ Nou trouve l’amour ki enn ancien ena pou la congregation, kan nou guette fason ki li traite so prop famille. (1 Timothée 3:1, 4) Si li marié, l’amour ek l’honneur ki li montré envers so femme, donne enn l’exemple ki lezot mari kapav imité. (Éphésiens 5:25; 1 Pierre 3:7) Mari Linda ti enn ancien pendant plus ki 20 an, mais asterla li’nn mort. Guette ki Linda dire lor li: “Mo mari ti toujours bien occupé pou prend soin la congregation. Mais li ti faire moi senti ki mo ti faire partie dan enn l’equipe. Souvent li ti dire moi ki li bien reconnaissant pou mo soutien, ek li ti passe so lé-temps libre avek moi. Alors, mo ti senti ki li content moi, ek mo pa ti jaloux kan li ti passe le temps pou servi la congregation.”

⁹ Si enn ancien ena bann zenfant, fason ki li discipline zot ek felicite zot, donne enn model ki bann parent kapav imité. (Éphésiens 6:4) Avredir, l’amour ki li manifesté envers so famille, montré ki li merite privilege ki li finn gagné kan l’esprit saint finn nomme li ancien.—1 Timothée 3:4, 5.

Bann ancien favorise la joie ek la paix par enn bon communication

10. (a) Ki kapav diminué la joie ek la paix dan congregation? (b) Ki question ti menace la paix dan congregation premier siecle, ek couma finn reglé sa?

¹⁰ L’esprit saint kapav produire la joie ek la paix dan leker enn chrétien, parmi enn college ancien, ek dan la congregation en entier. Mais, si pena enn communication franc ek sincere, sa la-joie ek la-paix-la kapav diminué. Le roi Salomon ti faire sa remark-la: “Bann plan pa marché kan pena conversation confidentiel.” (Proverbes 15:22) De lot coté, kan ena enn communication franc kot sakenn respecté so camarade, sa favorise la joie ek la paix. Par exemple, kan enn question concernant circoncision ti menace la paix dan congregation premier siecle, college central dan Jérusalem, ti rod direction l’esprit saint. Pa tou ancien ki ti ena mem l’opinion, ek sakenn ti dire seki li ti pensé lor sa sujet-la. Zot ti’nn bien discute sa question-la, lerla, zot ti tombe d’accord lor enn decision. Kan zot ti dire bann congregation ki decision zot ti prend, bann frere ti bien ‘content kan zot ti gagne sa l’encouragement-la.’ (Actes 15:6-23, 25, 31; 16:4, 5) Sa communication-la ti favorise la joie ek la paix.

11. Couma bann ancien favorise la joie ek la paix dan congregation?

¹¹ Zordi aussi pareil, bann ancien favorise la joie ek la paix dan congregation, kan zot ena enn bon communication entre zot. Kan ena bann problem ki menace la paix dan congregation, zot joinde ensam ek zot dire franchement seki zot pensé. Zot ecoute sakenn so camarade avek respé. (Proverbes 13:10; 18:13) Zot prié pou gagne l’esprit saint, ek apré sa, zot prend bann decision ki basé lor la Bible ek lor bann conseil ki “l’esclave fidel et avisé” donné. (Matthieu 24:45- 47; 1 Corinthiens 4:6) Enn fois ki college ancien inn prend enn decision ki basé lor la Bible, chaque ancien accepté direction l’esprit saint. Li soutenir sa decision-la, mem si la majorité pa finn accepté so l’opinion. Kan bann ancien montré sa qualité modestie-la, sa favorise la joie ek la paix, ek zot donne enn bon l’exemple la congregation lor fason ki bizin marche avek Bondié. (Mika 6:8) Eski ou modeste ek ou soutenir bann decision ki basé lor la Bible, ki bann ancien prend?

Bann ancien manifesté patience ek bienveillance

12. Kifer Jésus ti bizin ena patience ek li ti bon dan fason ki li ti traite so bann zapotre?

¹² Jésus ti ena patience ek li ti bienveillant setadir li ti bon dan fason ki li ti traite so bann zapotre, mem si souvent zot ti faire erreur. Par exemple, plusieurs fois, li ti montré zot l’importance pou manifesté l’humilité. (Matthieu 18:1-4; 20:25-27) Dernier soir ki Jésus ti passé lor la terre, li ti donne zot enn leson lor l’humilité kan li ti lave zot lipié. Pourtant, enn tipé apré sa, “ti ena enn grand discussion entre zot pou koné kisannla ki parette pli grand.” (Luc 22:24; Jean 13:1-5) Eski Jésus ti en colere avek so bann zapotre? Non, li ti garde so calme ek li ti raisonne avek zot. Li ti dire zot: “Kisannla ki pli grand, enn kikenn ki pé assizé a table, ou-soit enn kikenn ki pé servi? Eski c’est pa sa kikenn ki pé assizé a table-la? Mais moi, mo parmi zot couma enn kikenn ki pé servi.” (Luc 22:27) Jésus ti ena patience ek li ti bon, en plus li ti donne enn bon l’exemple, ek finalement, sa ti touche leker so bann zapotre.

13, 14. Kan eski bann ancien bizin surtout montré-zot bon?

¹³ Kitfois, li arrivé ki enn ancien aussi bizin conseil plusieurs fois enn kikenn concernant enn certaine faiblesse. Li possible ki ancien-la commence perdi patience avek sa dimoune-la. Mais si li rappel so bann prop defaut kan li pé ‘averti sa dimoune ki pena enn bon conduite-la,’ li pou kapav ena patience ek montré-li bon envers sa dimoune-la. Lerla, li pou imite Jéhovah ek Jésus ki montré sa bann qualité-la envers tou bann chrétien ek aussi envers bann ancien.—1 Thessaloniciens 5:14; Jacques 2:13.

¹⁴ Parfois, bann ancien bizin donne bann conseil bien ferme enn kikenn ki finn faire enn peché grave. Si sa dimoune-la pa repenti, bann ancien bizin tire li dan congregation. (1 Corinthiens 5:11-13) Mais kan-mem, maniere ki zot traite sa dimoune-la bizin montré ki c’est pa li ki zot detesté, mais peché ki li’nn faire. (Jude 23) Si bann ancien montré-zot bon envers enn dimoune ki’nn faire peché, li pou pli facile pou sa dimoune-la retourne vers la congregation.—Luc 15:11-24.

La foi pousse nou pou faire bann bon action

15. Cite enn fason couma bann ancien imite bonté Jéhovah. Ki pousse zot pou faire sa?

¹⁵ “Jéhovah bon envers tou dimoune,” mem envers bann ki pa apprecié tou seki Li faire pou zot. (Psaume 145:9; Matthieu 5:45) Nou trouve bonté Jéhovah surtout kan Li envoye so bann serviteur preche ‘la bonne nouvelle lor so royaume.’ (Matthieu 24:14) Bann ancien imite bonté Jéhovah kan zot prend la tête dan predication. Ki pousse zot pou contigne faire sa? C’est zot la-foi en Jéhovah ek dan so bann promesse.—Romains 10:10, 13, 14.

16. Couma bann ancien kapav “faire di-bien” envers zot bann frere ek soeur spirituel?

¹⁶ En plus ki zot bizin “faire di-bien envers tou dimoune” kan zot preché, bann ancien ena aussi responsabilité pou faire di-bien “surtout envers [zot] bann frere dan la foi.” (Galates 6:10) Enn fason pou faire sa, c’est par bann visite pastoral bien encourageant. Enn ancien dire: “Mo bien content faire bann visite pastoral. Sa donne moi l’occasion pou felicite bann frere ek soeur pou zot zeffort, ek pou faire zot koné ki nou bien apprecié zot bon travail.” Parfois, bann ancien kapav donne enn kikenn bann suggestion pou li progressé dan so service pou Jéhovah. Kan zot faire sa, zot montré ki zot ena la sagesse ek zot pé imite l’apotre Paul. Guetté dan ki fason l’apotre Paul ti koz ar bann frere Thessalonique: “En seki concerne zot, nou ena confiance dan nou Seigneur, ki zot pé faire ek zot pou contigne faire bann kitsoz ki nou finn donne zot l’ordre pou faire.” (2 Thessaloniciens 3:4) Kan bann ancien montré ki zot ena confiance dan bann frere coumsa, sa touche sa bann frere-la ek pousse zot pou agir bien. Lerla, li pli facile pou bannla “obeir bann ki dirige zot.” (Hébreux 13:17) Kan ou gagne enn visite pastoral ki’nn bien encourage ou, kifer ou pa dire ki quantité ou’nn apprecié sa visite-la?

La maitrise de soi necessaire pou manifesté la douceur

17. Ki leson Pierre ti aprann ar Jésus?

¹⁷ Jésus ti manifesté la douceur, mem kan so bann l’ennemi ti provok li. (Matthieu 11:29) Kan Judas ti trahir li, ek bann soldat ti vinn arrete li, Jésus ti manifesté la douceur ek la maitrise de soi. Sans li reflechi, Pierre ti tire enn l’epée, ek li ti reagir avek violence. Mais Jésus ti dire li: “Eski to pensé ki mo pa kapav dire mo Papa aide moi ek envoye-moi asterla-mem douze legion ange?” (Matthieu 26:51-53; Jean 18:10) Pierre ti bien aprann sa leson-la, ek plitar li ti faire bann chrétien rappel: “Christ . . . finn souffert pou zot, ek li finn laisse enn model pou zot, pou ki zot suive bien so trace. . . . Kan dimoune ti insulté li, li pa ti faire pareil. Kan li ti souffert, li pa ti menace [lezot].”—1 Pierre 2:21-23.

18, 19. (a) Kan surtout eski bann ancien bizin montré la douceur ek maitrise de soi? (b) Ki question nou pou examiné dan prochain lartik?

¹⁸ Si bann ancien envie gagne bann bon resultat, alors zot aussi, zot bizin manifesté la douceur, mem si certain traite zot dan enn fason ki pa juste. Par exemple, kan zot essaye aide enn kikenn dan congregation, kitfois sa dimoune-la pa reagir dan enn bon fason. Si enn kikenn ki bizin l’aide inn vinn faible ou-soit malade lor plan spirituel, li possible ki sa dimoune-la ‘koz sans reflechi, coumadir li pé donne coute l’epée’ bann ancien. (Proverbes 12:18) Seulement, pareil couma Jésus, bann ancien pa faire pareil, zot pa koz brite zot aussi, ni zot rod tire vengeance. Au contraire, zot maitrise-zot ek zot contigne montré zot l’amour pou sa chrétien ki faible-la. Kan zot agir coumsa, zot kapav faire beaucoup di-bien bann ki bizin l’aide. (1 Pierre 3:8, 9) Eski ou tire enn leson ar l’exemple bann ancien, ek ou aussi ou manifesté la douceur ek la maitrise de soi, kan ou gagne enn conseil?

¹⁹ Ena beaucoup ancien ki travail dur dan bann congregation pou prend soin bann serviteur Jéhovah dan le monde entier. Nou sur ki Jéhovah ek Jésus bien apprecié zot travail. Jéhovah ek so Garson ena aussi enn grand l’affection pou bann assistant ministeriel ki pé soutenir bann ancien dan travail ki zot pé faire, setadir “servi bann saint.” (Hébreux 6:10) Mais alors, kifer eski certain frere ki baptisé hesité pou faire sa ‘bon travail-la?’ (1 Timothée 3:1) Couma eski Jéhovah forme bann ki Li etabli couma bann ancien? Nou pou examine sa bann question-la dan prochain lartik.

Eski ou rappel?

• Cite certain fason ki bann ancien montré l’amour pou la congregation.

• Couma eski nou tou dan congregation kapav favorise la joie ek la paix?

• Kifer bann ancien ena patience ek montré-zot bon kan zot donne bann conseil?

• Couma bann ancien manifesté la bonté ek la foi?

[Zimage, page 19]

L’amour pousse bann ancien pou servi la congregation

[Zimage, page 19]

Zot aussi passe le temps avek zot famille dan bann detente . . .

. . . ek dan predication

[Zimage, page 20]

Kan ena enn bon communication entre bann ancien, sa favorise la joie ek la paix dan la congregation