“Prend soin troupeau Bondié ki’nn confié zot”

“Prend soin troupeau Bondié ki’nn confié zot, pa par obligation, mais volontairement.”​—1 PIERRE 5:2.

 1. Kan Pierre ti ecrire so premier lettre, ar ki situation bann chretien ti pé faire face?

C’EST enn tipé avant ki Néron ti declenche so persecution kont bann chretien dan Rome, ki l’apotre Pierre ti ecrire so premier lettre. Li ti envie fortifié so bann compagnon chretien. Satan le Diable ti “pé circulé,” ek ti pé rod bann chretien pou devoré. Pou tini ferme kont li, zot ti bizin “garde zot bon sens” ek “abaisse-zot enba la main puissant Bondié.” (1 Pierre 5:6, 8) Zot ti bizin aussi reste soudé ensam. Li ti pou bien dangereux si zot ti “morde zot ek devore zot entre zot-mem,” parski sinon sa ti kapav amenn “sakenn [pou] detruire so camarade.”​—Gal. 5:15.

2, 3. Kont kisannla nou bizin amenn enn la lutte, ek ki nou pou examiné dan sa deux lartik-la?

² Zordi, nou faire face ar mem qualité situation. Satan le Diable pé rod bann l’occasion pou devore nou. (Rév. 12:12) Ek bientot pou ena “enn grand tribulation couma jamais pa finn ena depuis commencement le monde.” (Mat. 24:21) Bann chretien dan premier siecle ti bizin faire attention pou pa laguerre pou nanyin entre zot-mem. Nou aussi nou bizin faire pareil. Pou nou reussi faire sa, parfois nou pou bizin l’aide bann ancien ki ena l’experience.

³ Anou guetté couma bann ancien kapav apprecié encore plus privilege ki zot ena pou “prend soin troupeau Bondié ki’nn confié zot.” (1 Pierre 5:2) Apré sa, nou pou examine fason ki zot bizin faire zot travail en tant ki berger. Dan prochain lartik, nou pou guetté couma congregation kapav “ena consideration pou bann ki travail dur parmi zot ek ki dirige zot.” (1 Thess. 5:12) Kan nou pou examine sa bann kitsoz-la, sa pou aide nou pou tini ferme kont nou pli grand Adversaire, ek nou pou comprend ki c’est kont li ki nou pé amenn enn la lutte.​—Éph. 6:12.

Prend soin troupeau Bondié

4, 5. Couma eski bann ancien bizin considere troupeau Bondié? Donne enn l’exemple.

⁴ Pierre ti encourage bann ancien dan premier siecle pou considere troupeau ki Bondié ti confié zot, pareil couma Bondié Li, Li ti considere so troupeau. (Lire 1 Pierre 5:1, 2.) Mem si lezot ti considere li couma enn colonne dan congregation, Pierre pa ti koz avek lezot ancien coumadir li ti pli superieur ki zot. Au contraire, kan li ti pé donne zot bann conseil li ti considere zot couma bann ancien ki pareil couma li. (Gal. 2:9) Pareil couma Pierre, College central zordi encourage bann ancien pou faire bann grand zeffort pou assume sa grand responsabilité ki zot ena-la, setadir pou prend soin troupeau Bondié.

⁵ L’apotre Pierre ti ecrire ki bann ancien ti bizin “prend soin troupeau Bondié ki’nn confié zot.” Li ti bien important ki zot reconette ki sa troupeau-la pou Jéhovah ek Jésus Christ. Bann ancien ena pou rann compte lor fason ki zot veille lor bann brebis Bondié. Faire coumadir enn bon camarade demann ou pou veille lor so bann zenfant alors ki li pa la. Eski ou pa pou prend zot bien soin ek nourri zot? Si enn ladan tombe malade, eski ou pa pou faire sur ki li gagne n’importe ki traitement medical ki bizin? Li pareil pou bann ancien dan congregation. Zot bizin “prend soin congregation Bondié ki Li’nn acheté avek di-sang so prop Garson.” (Actes 20:28) Touletan zot garde dan zot l’esprit ki Bondié finn acheté chaque brebis avek di-sang Christ Jésus, ki ena enn grand valeur. Parski zot ena enn compte pou rendé, bann ancien nourri, protege, ek prend soin troupeau Bondié.

 6. Dan lepok biblik, ki responsabilité bann berger ti ena?

⁶ Pense enn ti coute lor bann responsabilité ki bann berger ti ena dan lepok biblik. Zot ti bizin supporte chaleur pendant la journée ek fraicheur pendant la nuit, pou zot kapav veille lor zot troupeau. (Gen. 31:40) Zot ti mem riské zot la vie pou zot bann mouton. David, ki ti enn jeune berger, ti sap so troupeau ar bann zanimo sauvage, parmi ti ena enn lion ek enn l’ours. Ki David ti faire avek sa bann zanimo-la? Li dire: “Mo ti trappe-li par so la barbe, mo ti jette-li enba ek mo ti touye li.” (1 Sam. 17:34, 35) Li ti ena enn grand courage, pa vrai? Maziné ki quantité pré li ti été ar la gueule sa zanimo-la! Malgré sa, li ti faire tou seki li ti kapav pou sap sa mouton-la.

 7. Dan enn sens symbolik, couma bann ancien kapav sap enn brebis dan la gueule Satan?

⁷ Zordi, bann ancien bizin reste lor zot garde kont bann l’attak Satan le Diable, ki pareil couma l’attak enn lion. Sa kapav implik ki zot agir avek enn grand courage, ek dan enn sens symbolik zot sap sa brebis ki dan la gueule Satan le Diable-la. Dan enn certain sens, sa bann ancien-la trappe sa zanimo sauvage-la par so la barbe, ek lerla zot kapav sap sa brebis-la. Kitfois zot bizin raisonne avek bann frere ki pa reste lor zot garde ek ki laisse zot tenté par bann piege Satan. (Lire Jude 22, 23.) Bien sur, bann ancien pa faire sa sans l’aide Jéhovah. Avek tendresse zot trappe sa brebis ki’nn blessé-la, zot mette enn bandage lor so bann di-mal ek zot applik Parole Bondié, ki pareil couma enn medecine, ki pou soulage li.

 8. Vers ki kitsoz bann ancien dirige troupeau Bondié, ek couma zot faire sa?

⁸ Dan le passé bann berger ti guide aussi zot troupeau dan bann place kot zot pou gagne mangé ek de l’eau. Li pareil aussi pou bann ancien. Zot dirige troupeau Bondié vers la congregation, zot encourage bannla pou assisté reunion regulierement pou ki zot kapav bien nourri ek gagne “zot nourriture dan ler ki bizin.” (Mat. 24:45) Kitfois, bann ancien bizin passe inpé plus le temps pou aide bann ki malade lor plan spirituel pou accepté pou nourri zot ar Parole Bondié. Kitfois, enn brebis ki’nn perdi pé essaye retourne dan troupeau Bondié. Au lieu ki bann ancien farouche zot frere, avek l’amour zot explik li bann principe la Bible ek zot montré li couma li kapav applik sa dan so la vie.

9, 10. Couma eski bann ancien bizin prend soin bann dimoune ki malade lor plan spirituel?

⁹ Kan ou malade, ki qualité docteur ou prefere al guetté? Eski ou pou al guette enn docteur ki pa prend le temps pou ecoute ou ek ki vite-vite donne ou enn medecine parski li pressé pou prend prochain patient? Ou-soit ou pou prefere al guette enn docteur ki pou ecoute ou avek beaucoup l’attention, ki pou explik ou ki probleme kitfois ou pé gagné, ek ki bann different traitement ou kapav suive?

¹⁰ Li pareil pou bann ancien. Zot kapav ecoute sa dimoune ki malade lor plan spirituel-la ek zot faire kitsoz pou gueri so di-mal, dan enn certain sens coumadir zot pé “mette de l’huile lor li au nom Jéhovah.” (Lire Jacques 5:14, 15.) Pareil couma “ baume de Guiléad, ” Parole Bondié kapav soulage enn dimoune ki malade. (Jér. 8:22; Ézék. 34:16) Si li applik bann principe la Bible, sa kapav aide sa dimoune ki pa stable lor plan spirituel-la pou regagne so l’equilibre. Kan bann ancien prend le temps pou ecoute probleme enn dimoune ki malade lor plan spirituel ek kan zot prié avek li, sa soulage sa dimoune-la.

Pa par obligation mais volontairement

11. Ki pousse bann ancien pou prend soin troupeau Bondié volontairement?

¹¹ Apré sa Pierre ti rappel bann ancien deux kitsoz: c’est “pa par obligation” ki zot ti bizin faire zot travail en tant ki berger, mais zot ti bizin faire li “volontairement.” Ki pousse bann ancien pou servi zot bann frere volontairement? Ki ti pousse Pierre pou prend soin ek pou nourri bann brebis Jésus? Seki ti motive li c’est so l’amour ek so l’affection pou Seigneur Jésus. (Jean 21:15-17) L’amour ki zot ena, pousse bann ancien pou “nepli vive pou zot-mem, mais pou celui ki’nn mort pou zot.” (2 Cor. 5:14, 15) Sa l’amour-la, ensam avek l’amour ki zot ena pou Bondié ek pou zot frere, mette enn l’obligation lor zot pou servi troupeau Bondié, pou donne tou zot la force, zot ressource ek zot le temps. (Mat. 22:37-39) Zot donne tousala pa par obligation, mais volontairement.

12. Ziska ki point l’apotre Paul ti donne li-mem pou troupeau Bondié?

¹² Ziska ki point bann ancien bizin donne zot-mem pou troupeau Bondié? Kan zot prend soin troupeau Bondié, zot imite l’apotre Paul, ki li-mem ti imite Jésus. (1 Cor. 11:1) Parski Paul ek so bann compagnon ti ena enn grand l’affection pou bann frere dan Thessalonique, zot ti bien content pou partage avek zot ’pa zis bon nouvelle Bondié, mais aussi zot prop nâme.’ Kan zot faire sa, zot montré beaucoup douceur, “pareil couma enn mama prend soin avek beaucoup l’affection so bann zenfant ki li nourri.” (1 Thess. 2:7, 8) Paul ti comprend seki enn mama ressenti pou so bann zenfant ki li nourri. Li pou faire n’importe ki kitsoz pou zot, mem si li bizin levé dan millieu la nuit pou nourri zot.

13. Dan ki domaine bann ancien bizin garde zot l’equilibre?

¹³ Bann ancien bizin veillé ki zot garde enn l’equilibre entre responsabilité ki zot ena en tant ki berger ek responsabilité ki zot ena envers zot famille. (1 Tim. 5:8) Le temps ki bann ancien passé avek congregation c’est enn le temps ki ena beaucoup valeur ki zot pa pé passé avek zot famille. Enn fason ki zot kapav garde enn l’equilibre entre sa deux responsabilité-la c’est kan de temps en temps zot invite lezot pou zot l’adoration en famille. Pendant plusieurs l’année, pou so l’etude familial, Masanao, enn ancien ki vive dan Japon, ti invite bann celibataire ek bann famille ki pa ti ena enn papa dan la verité. Avek le temps, certain ki li finn aidé finn vinn bann ancien ek zot inn imite bon l’exemple Masanao.

Prend soin troupeau Bondié parski zot ena sa grand desir-la, pa pou enn profit malhonnete

14, 15. Kifer eski bann ancien bizin faire attention kont danger pou “content enn profit malhonnete,” ek couma zot kapav imite Paul dan sa domaine-la?

¹⁴ Pierre ti encourage aussi bann ancien pou prend soin troupeau Bondié, pa “parski zot content enn profit malhonnete, mais parski zot ena sa grand desir-la.” Travail ki bann ancien faire prend beaucoup zot le temps, pourtant zot pa attann pou gagne enn la paye pou sa. Pierre ti trouve sa necessaire pou averti bann ancien dan so lepok kont danger pou prend soin troupeau Bondié dan l’intention pou gagne “enn profit malhonnete.” Nou trouve bien sa danger-la kan nou guette la vie luxe ki bann chef religieux dan “Babylone la Grande” pé amené, alors ki beaucoup dimoune pé obligé vive dan la misere. (Rév. 18:2, 3) Bann ancien zordi ena bann bon raison pou reste lor zot garde kont n’importe ki tendance ki kapav amenn zot dan sa direction-la.

¹⁵ Paul ti laisse enn bon l’exemple pou bann ancien. Mem si li ti enn zapotre ek li ti kapav vinn “enn fardeau ki coute cher” pou bann chretien dan Thessalonique, li pa “ti mange mangé lezot dimoune.” Au contraire, li ’ti travail dur la-nuit li-jour.’ (2 Thess. 3:8) Beaucoup ancien zordi, parmi ena aussi bann surveillant itinerant, donne enn bon l’exemple dan sa domaine-la. Mem si zot accepté l’hospitalité zot bann compagnon chretien, zot pa “mette enn fardeau ki coute cher” lor personne.​—1 Thess. 2:9.

16. Ki sa vedir prend soin troupeau Bondié avek enn “grand desir”?

¹⁶ Bann ancien ena enn “grand desir” pou prend soin troupeau Bondié. L’esprit sacrifice ki zot manifesté kan zot aide zot bann frere ek soeur montré sa bien. Mais, sa pa vedir ki zot pou force bannla pou servi Jéhovah. En plus, bann ancien ki ena l’amour pa pou encourage lezot pou servi Bondié avek enn l’esprit competition. (Gal. 5:26) Bann ancien reconette ki chaque brebis li different. Zot ena enn grand desir pou aide zot bann frere pou servi Jéhovah dan la joie.

Pa domine lor troupeau Bondié mais vinn bann l’exemple

17, 18. (a) Kifer parfois bann zapotre ti gagne difficulté pou comprend l’enseignement Jésus lor l’humilité? (b) Ki leson nou kapav tiré ar zot l’exemple?

¹⁷ Couma nou finn examiné avant, bann ancien bizin garde dan zot l’esprit ki sa troupeau ki zot pé prend soin-la, li pa pou zot, mais pou Bondié. Alors, zot faire attention pou pa “domine lor l’heritage Bondié.” (Lire 1 Pierre 5:3.) Parfois, bann zapotre Jésus ti ena bann mauvais mobile ek sa ti pousse zot pou rod grandeur. Pareil couma bann chef dan bann nation, zot ti envie gagne enn grand position.​—Lire Marc 10:42-45.

¹⁸ Zordi, li bon ki bann frere ki “ena desir pou vinn enn surveillant” examine zot-mem pou guetté kifer zot ena sa desir-la. (1 Tim. 3:1) Bann ki deja ancien kitfois pou envie examine-zot-mem dan enn fason honnete pou guetté si zot ena enn desir pou gagne l’autorité ou-soit grandeur pareil couma certain zapotre Jésus ti ena. Si bann zapotre ti gagne difficulté dan sa domaine-la, alors bann ancien kapav reconette ki zot bizin travail dur pou evite tendance ki le monde ena pou content pou gagne l’autorité lor lezot.

19. Kan zot ena pou protege troupeau Bondié, ki bann ancien bizin rappel?

¹⁹ Li vrai ki parfois bann ancien bizin ferme, couma par exemple kan zot bizin protege troupeau Bondié kont “bann loulou ki dominere.” (Actes 20:28-30) Paul ti dire Tite ki li bizin contigne “encouragé ek corrigé avek tou l’autorité ki [li] ena.” (Tite 2:15) Oui, mem kan zot ena pou faire sa, bann ancien essaye traite bann dimoune ki impliké, avek respé. Zot reconette ki pou touche leker enn dimoune ek pousse li pou suive chemin ki bizin, c’est pa bann critik bien severe ki pou ena enn bon l’effet lor li, mais plutot kan zot convaink li avek douceur.

20. Jésus ti laisse enn bon l’exemple, couma bann ancien kapav imite li?

²⁰ Bon l’exemple ki Christ inn laissé pousse bann ancien pou content troupeau Bondié. (Jean 13:12-15) Sa touche nou leker a mesure ki nou lire couma li ti forme so bann disciple dan l’activité predication ek pou faire bann disciple. L’exemple ki li’nn laissé lor l’humilité ti touche leker so bann disciple. Sa ti pousse zot pou manifesté “enn l’esprit l’humilité, [ek pou] considere lezot couma pli superieur ki zot.” (Phil. 2:3) Li pareil pou bann ancien zordi. Zot senti-zot poussé pou suive l’exemple Jésus, ek zot aussi zot envie vinn “bann l’exemple pou troupeau [Bondié].”

21. Ki recompense bann ancien kapav attann pou gagné?

²¹ Pierre ti termine l’encouragement ki li ti donne bann ancien kan li ti koz lor enn promesse ki pou arrivé dan l’avenir. (Lire 1 Pierre 5:4.) Bann ancien ki’nn oint “pou gagne enn couronne la gloire ki pa kapav fletri,” avek Christ dan le ciel. Bann ancien ki forme partie parmi “bann lezot brebis” pou gagne privilege pou prend soin troupeau Bondié lor la terre kan “chef bann berger” pou dirigé. (Jean 10:16) Prochain lartik pou examine plusieurs fason couma bann membre congregation kapav soutenir bann ki Bondié inn choisir pou dirige congregation.

Revision

• Kifer li ti approprié ki Pierre encourage bann ancien dan so lepok pou prend soin troupeau Bondié ki’nn confié zot?

• Couma bann ancien bizin prend soin bann ki malade lor plan spirituel?

• Ki pousse bann ancien pou prend soin troupeau Bondié ki’nn confié zot?

[Zimage page 25]

Pareil couma bann berger dan lepok biblik, bann ancien zordi bizin protege “bann brebis” ki’nn confié zot