Faire zeffort pou vinn bann vrai disciple Christ

“Tou bon pié rapporte bann bon fruit, mais tou pié pourri rapporte bann fruit ki pena valeur.”—MAT. 7:17.

1, 2. Couma kapav faire difference entre bann vrai disciple Christ ek bann fausse chretien, surtout pendant sa lepok la fin-la?

JÉSUS ti dire ki pou kapav faire enn difference entre bann fausse chretien ek so bann vrai disciple par zot fruit, setadir zot l’enseignement ek zot conduite. (Mat. 7:15-17, 20) Oui, bann dimoune influencé par seki zot mette dan zot l’esprit ek zot leker, c’est enn kitsoz ki zot pa kapav evité. (Mat. 15:18, 19) Bann ki gagne bann fausse l’enseignement, zot produire bann “fruit ki pena valeur,” alors ki bann ki gagne l’enseignement lor la verité, zot produire bann “bon fruit.”

² Nou finn kapav trouve bien sa deux qualité fruit-la dan lepok la fin kot nou pé vive. (Lire Daniel 12:3, 10.) Bann fausse chretien ena enn fausse l’opinion lor Bondié ek souvent zot ena enn l’adoration hypocrite. Mais bann ki ena enn bon jugement lor plan spirituel, adore Bondié “avek l’esprit ek la verité.” (Jean 4:24; 2 Tim. 3:1-5) Zot faire zeffort pou manifesté bann qualité ki Christ ena. Mais ki nou kapav dire lor nou personnellement? Pendant ki nou pou examine cinq point ki pou permette nou identifié bann vrai chretien, anou demann nou-mem: ‘Eski mo conduite ek mo l’enseignement zot en accord avek Parole Bondié? Eski par fason ki mo vive, mo faire la verité parette attirant devant bann ki pé rod li?’

Zot mette en pratik Parole Bondié

 3. Ki kitsoz ki faire Jéhovah plaisir, ek couma sa concerne bann vrai chretien?

³ Jésus ti dire: “Pa tou seki dire moi, ‘Seigneur, Seigneur,’ ki pou rente dan royaume ki dan le ciel, mais celui ki faire volonté mo Papa ki dan le ciel.” (Mat. 7:21) Oui, seki faire Jéhovah plaisir c’est pa kan nou dire ki nou enn chretien, mais kan nou faire seki enn chretien bizin faire. Bann vrai disciple Christ laisse so l’enseignement influence tou zot la vie, parmi ena zot l’attitude envers l’argent, travail, divertissement, bann fête ki le monde celebré, mariage, ek zot relation avek zot prochain en general. Mais, bann fausse chretien zot, zot adopté mentalité ek comportement ki ena dan sa le monde ki pli allé pé vinn pli mauvais pendant lepok dernier jour.—Ps. 92:7.

4, 5. Couma nou kapav applik bann parole Jéhovah ki trouve dan Malaki 3:18 dan nou la vie?

⁴ A cause sa, prophete Malaki ti ecrire: “Pena doute ki encore enn fois, zot pou trouve difference entre enn bon dimoune ek enn mauvais dimoune, entre enn dimoune ki servi Bondié ek enn dimoune ki pa finn servi Li.” (Mal. 3:18) Pendant ki ou medite lor sa bann parole-la, demann ou-mem: ‘Eski mo pareil couma bann dimoune ki dan le monde ou-soit eski mo different? Eski mo faire tou pou ki mo bann camarade travail ou-soit mo bann camarade lekol accepté moi, ou-soit eski mo reste ferme en seki concerne bann principe la Bible? Eski mo defann mo bann croyance kan bizin?’ (Lire 1 Pierre 3:16.) Bien sur, nou pa envie parette couma bann dimoune ki trop juste, mais li bizin clair ki nou bien different ar bann ki pa content ek ki pa servi Jéhovah.

⁵ Si ou trouvé ki ou bizin ameliore ou, kifer ou pa prié lor la ek apré, fortifié ou lor plan spirituel a travers l’etude la Bible, la priere ek l’assistance reunion, ek faire sa bann kitsoz-la regulierement? Plus ou applik Parole Bondié, plus ou pou produire bann “bon fruit,” parmi ena ‘fruit nou la levre ki faire declaration publik pou nom Bondié.’—Héb. 13:15.

Preche Royaume Bondié

6, 7. En seki concerne message lor Royaume Bondié, ki difference nou kapav trouvé entre bann vrai chretien ek bann fausse chretien?

⁶ Jésus ti dire: “Mo bizin annonce la bonne nouvelle lor royaume Bondié dan bann lezot la ville . . . parski c’est a cause sa ki finn envoye moi.” (Luc 4:43) Kifer Jésus ti faire Royaume Bondié vinn theme principal so ministere? Li ti koné ki li-mem en tant ki le Roi sa Royaume-la, ensam avek so bann frere oint ressuscité, zot pou tire la source tou bann malheur ki pé affecté l’humanité, setadir peché ek Satan le Diable. (Rom. 5:12; Rév. 20:10) A cause sa, li ti donne l’ordre so bann disciple pou preche sa Royaume-la ziska la fin sa systeme-la. (Mat. 24:14) Bann dimoune ki zis dire ki zot bann disciple Christ, pa faire sa travail-la—en realité, zot pa kapav faire sa travail-la. Kifer? Pou au moins trois raison: Premierement, zot pa kapav preche seki zot pa comprend. Deuxiemement, la plupart parmi zot pena l’humilité ek courage ki bizin pou faire face ar zot voisin ki kapav bouffonne zot ou-soit opposé ar zot si zot preche message lor Royaume Bondié avek zot. (Mat. 24:9; 1 Pierre 2:23) Ek troisiemement, bann fausse chretien pena l’esprit saint Bondié.—Jean 14:16, 17.

⁷ Parkont, bann vrai disciple Christ comprend seki Royaume Bondié été ek seki li pou faire. En plus, zot donne sa Royaume-la priorité dan zot la vie ek zot preche li dan le monde entier, avek l’aide l’esprit saint Jéhovah. (Zek. 4:6) Eski ou participe regulierement dan sa l’activité-la? Eski ou pé essaye ameliore-ou en tant ki enn proclamateur sa Royaume-la, kitfois kan ou pé passe plus le temps dan ou ministere ou-soit kan ou pé vinn plus efficace ladan? Certain finn essaye ameliore qualité zot ministere kan zot servi la Bible plus. L’apotre Paul ki ti faire sa vinn enn l’habitude pou raisonne lor la Bible, ti ecrire: “Parole Bondié, li vivant ek li puissant.”—Héb. 4:12; Actes 17:2, 3.

8, 9. (a) Cite bann l’experience ki montré l’importance pou servi la Bible dan nou ministere. (b) Couma nou kapav prend l’habitude pou servi la Bible pli souvent?

⁸ Kan enn frere ti pé preche de porte en porte, li ti lire Daniel 2:44 ar enn missié catholique ek ti explik li couma Royaume Bondié pou amenn vrai la paix ek securité. Missié-la ti reponn: “Mo bien content ki ou finn ouvert la Bible ek ou finn montré moi seki ena ladan au lieu ki ou zis dire moi sa.” Anou guette enn lot l’experience. Kan enn lot frere ti lire enn texte la Bible ar enn madame ki ti enn membre dan l’Eglise orthodoxe grecque, madame-la ti pose li beaucoup question. Dan sa cas-la aussi, frere-la avek so madame, ti servi la Bible pou reponn li. Plitar sa madame-la ti dire zot: “Eski zot koné kifer mo ti accepté pou koz ar zot? Zot ti vinn kot moi avek la Bible, ek zot ti lire seki ena ladan.”

⁹ Bien sur, nou bann publication zot important, ek nou bizin offert zot dan predication. Mais, la Bible, c’est nou publication principal. Alors, si ou pa habitué servi li regulierement dan ou ministere, kifer ou pa fixé l’objectif pou faire sa? Kitfois ou kapav choisir deux-trois verset principal ki explik seki Royaume Bondié été ek couma li pou reglé bann probleme precis ki concerne surtout bann dimoune dan ou l’endroit. Apré, prepare-ou pou lire sa bann verset-la kan ou preche de porte en porte.

Nou fiere pou porte nom Bondié

10, 11. Concernant nom Bondié, ki difference ena entre Jésus ek beaucoup ki pretann suive li?

¹⁰ “ ‘Zot mo bann temoin,’ c’est seki Jéhovah dire, ‘ek Mo-mem Bondié.’ ” (Is. 43:12) Jésus Christ, pli grand Témoin de Jéhovah, ti considere sa couma enn grand privilege pou porte nom Bondié ek pou faire konn sa nom-la. (Lire Exode 3:15; Jean 17:6; Hébreux 2:12.) En realité, parski Jésus ti preche nom so Papa, ti appel li “Temoin fidele.”—Rév. 1:5; Mat. 6:9.

¹¹ Mais bann ki pretann represente Bondié ek so Garson, zot, zot finn manifesté enn l’attitude ki faire honté envers nom Bondié. Zot finn mem tire li dan zot traduction la Bible. Pa trop longtemps, bann l’eveque catholique ti gagne enn l’ordre ki reflete mem mauvais l’attitude. Ti dire zot ki pendant bann la messe, “fodé pa servi, ni prononce nom Bondié dan forme tétragramme YHWH.”a C’est vrai-mem enn mauvais l’attitude ki faire honté, pa vrai?

12. Couma finn associé encore pli bien bann serviteur Bondié ar Jéhovah en 1931?

¹² Pareil couma Christ ek enn grand “nuage temoin” ki ti existé avant li, bann vrai chretien fiere pou servi nom Bondié. (Héb. 12:1) En realité, en 1931, finn kapav associé encore pli bien bann serviteur Bondié ar Jéhovah, kan zot ti accepté nom “Témoins de Jéhovah.” (Lire Isaïe 43:10-12.) Alors, dan enn sens bien special, bann vrai disciple Christ ti vinn enn ‘peuple ki porte nom Bondié.’—Actes 15:14, 17.

13. Couma nou kapav vive en accord avek nom ki Bondié inn donne nou?

¹³ Couma nou kapav personnellement vive en accord avek nou nom unique? Enn premier kitsoz ki nou kapav faire, c’est rann temoignage avek fidelité lor Bondié. Paul ti ecrire: “Tou seki invok nom Jéhovah pou sauvé. Mais, couma eski zot pou invok enn kikenn en ki zot pena la foi? Ek couma eski zot pou ena la foi en enn kikenn, alors ki jamais zot pa finn tann koz lor li? Ek couma zot pou tendé si personne pa preché? Ek couma zot pou preché a moins ki finn envoye zot?” (Rom. 10:13-15) Avek tact, nou bizin aussi devoile bann fausse l’enseignement religieux ki deshonore nou Createur, couma par exemple l’enseignement lor enn l’enfer difé, ki faire croire ki nou Bondié ki rempli ar l’amour, Li cruel alors ki c’est Satan le Diable ki cruel.—Jér. 7:31; 1 Jean 4:8; compare avek Marc 9:17-27.

14. Couma certain finn reagir kan zot inn aprann nom personnel Bondié?

¹⁴ Eski ou fiere pou porte nom ou Papa ki dan le ciel? Eski ou aide lezot pou konn sa nom saint-la? Enn madame ki reste Paris, en France, ti tann dire ki bann Témoins de Jéhovah konn nom Bondié, alors li ti demann premier Témoin ki li ti joinde pou montré li sa nom-la dan so la Bible. Kan li ti lire Psaume 83:18, sa ti faire enn grand l’effet lor li. Li ti commence etudié la Bible ek zordi, li enn soeur fidele ki pé servi dan enn lot pays. Kan enn madame catholique ki reste en Australie ti trouve nom Bondié dan la Bible premier fois, li ti ploré tellement li ti content. Sa faire plusieurs l’année asterla ki li servi couma pionnier permanent. Pa trop longtemps, kan bann Témoins de Jéhovah dan Jamaïque ti montré enn madame nom Bondié dan so prop la Bible, li aussi li ti ploré tellement li ti content. Alors, ou bizin fiere pou porte nom Bondié ek pareil couma Jésus, faire tou dimoune konn sa nom ki ena valeur-la.

“Pa content le monde”

15, 16. Couma bann vrai chretien considere le monde, ek ki question nou bizin pose nou-mem?

¹⁵ “Pa content le monde, ni bann kitsoz ki ena dan le monde. Si enn kikenn content le monde, l’amour nou Papa pa dan li.” (1 Jean 2:15) Le monde ek so l’esprit immoral zot opposé ar Jéhovah ek ar so l’esprit saint. A cause sa, bann vrai disciple Christ pa zis evité pou pa forme partie dan le monde, mais zot detesté le monde. Kifer? Parski zot koné ki enn kikenn ki “camarade ar le monde, li l’ennemi ar Bondié.”—Jacq. 4:4.

¹⁶ Kitfois li difficile pou suive sa conseil Jacques-la dan enn le monde kot ena beaucoup tentation. (2 Tim. 4:10) A cause sa, Jésus ti prié pou so bann disciple. Li ti dire: “Mo pa pé demann toi pou tire zot dan le monde, mais pou veille lor zot a cause sa kikenn ki mauvais-la. Zot pa faire partie dan le monde, pareil couma moi mo pa faire partie dan le monde.” (Jean 17:15, 16) Demann ou-mem: ‘Eski mo faire tou seki mo kapav pou pa faire partie dan le monde? Eski lezot konn mo position en rapport avek bann fête ek bann coutume ki pa biblik? Eski zot konn aussi mo position envers bann fête ki, mem si zot pena enn l’origine païen, zot reflete dan enn fason bien clair l’attitude sa le monde-la?’—2 Cor. 6:17; 1 Pierre 4:3, 4.

17. Ki kapav pousse bann dimoune sincere pou prend position pou Jéhovah?

¹⁷ Nou kapav sur ki position ki nou finn prend ek ki en accord avek la Bible pa pou faire nou gagne faveur sa le monde-la, mais sa kapav pousse bann dimoune sincere pou envie konn plus. Oui, kan sa bann dimoune-la trouvé ki nou la foi li bien enraciné dan la Bible ek ki sa influence tou domaine dan nou la vie, kitfois zot kapav reagir bien ek coumadir lerla zot dire bann oint: “Nou pou al avek zot parski nou finn tann dire ki Bondié avek zot.”—Zek. 8:23.

Manifesté vrai l’amour

18. Ki sa impliké pou montré l’amour pou Jéhovah ek pou nou prochain?

¹⁸ Jésus ti dire: “To bizin content Jéhovah to Bondié avek tou to leker ek avek tou to nâme ek avek tou to l’esprit” ek “to bizin content to prochain couma to-mem.” (Mat. 22:37, 39) Sa l’amour-la (agapê en grec) c’est enn l’amour ki basé lor seki droite ek ki prend en consideration devoir enn dimoune, bann principe ek bann regle bon conduite. Mais li implik souvent enn l’affection bien profond. Li kapav aussi bann sentiment amical ek bien fort. (1 Pierre 1:22) Enn dimoune manifesté sa l’amour-la par bann parole ek bann action ki pa egoïste; alors nou kapav dire ki sa l’amour-la li contraire ar l’egoïsme.—Lire 1 Corinthiens 13:4-7.

19, 20. Raconte certain l’experience ki montré pouvoir ki l’amour ena.

¹⁹ Parski l’amour c’est enn qualité ki l’esprit saint Bondié produire, li permette bann vrai chretien pou faire seki lezot pa kapav faire, couma par exemple surmonte bann difference ki ena a cause race, culture, ek politik. (Lire Jean 13:34, 35; Gal. 5:22) Bann dimoune ki couma bann brebis bien touché kan zot trouve sa qualité l’amour-la. Par exemple, kan enn jeune missié juif en Israël ti assisté reunion premier fois, li ti etonné pou trouve bann Témoins juif ek arabe pé adore Jéhovah ensam. Sa ti pousse li pou assisté reunion regulierement ek pou etudié la Bible. Nou kapav demann nou-mem: ‘Eski mo montré sa qualité l’amour sincere-la envers mo bann frere? Eski mo faire zeffort pou accueillir dan enn fason amical bann nouveau ki vinn la Salle du Royaume, n’importe ki zot nationalité, zot couleur la peau ou-soit zot position social?’

²⁰ En tant ki bann vrai chretien, nou faire zeffort pou montré l’amour envers tou dimoune. Dan Salvador, enn jeune proclamatrice ti pé etudié la Bible avek enn madame catholique ki ena 87 an ek ki ti bien attaché ar so religion. Enn jour, madame-la ti tombe bien malade ek ti bizin reste l’hopital. Kan li ti retourne kot li, bann Témoins ti visite li ek ti faire sur ki li ena kitsoz pou mangé. Zot ti visite li pendant apepré enn mois. Mais, dan religion madame-la personne pa ti vinn visite li. Ki resultat sa finn ena? Li ti tire tou so bann zidole, li ti quitte so religion ek li ti reprend so l’etude la Bible. Oui, l’amour ki bann chretien manifesté ena enn grand pouvoir! Li kapav touche leker bann dimoune plus ki bann parole.

21. Couma nou kapav assure nou l’avenir?

²¹ Bientot Jésus pou dire tou bann ki pretann servi li: “Jamais mo ti konn zot! Sorti devant moi, allé, zot ki pratik seki kont la Loi.” (Mat. 7:23) Alors, anou produire bann fruit ki honore nou Papa ek so Garson. Jésus ti dire: “N’importe ki dimoune ki tann mo bann parole ek ki mette zot en pratik pou comparé ar enn zom avisé, ki’nn range so lakaz lor roche.” (Mat. 7:24) Oui, si nou montré ki nou bann vrai disciple Jésus, nou pou gagne faveur Bondié, ek nou l’avenir pou assuré, coumadir li pou ena so fondation lor roche!

[Note]

Eski ou rappel?

• Couma nou kapav faire difference entre bann vrai disciple Christ ek bann fausse chretien?

• Cite certain “fruit” ki identifié bann vrai chretien.

• Ki l’objectif ou kapav fixé kan ou pé produire bann fruit spirituel?