Nou Kapav Ena Confiance dan Bann Rappel Jéhovah

 1. Ki bann sujet peuple Bondié etudié regulierement, ek ki profit nou gagné kan nou ré-etudié zot?

ESKI finn deja arrivé kan ou pé prepare ou letid La Tour de Garde ki ou’nn demann-ou-mem: ‘Eski nou pa finn deja etudié sa sujet-la avant?’ Si sa faire inpé le temps ki ou pé frequente congregation, surement ou finn remarké ki nou etudié certain sujet plusieurs fois. Par exemple, souvent nou etudié bann sujet lor: Royaume Bondié, la ranson, l’activité pou faire bann disciple, ek bann qualité couma lamour ek la foi. Tousala forme partie dan nou nourriture spirituel. Kan nou ré-etudié sa bann sujet-la, sa aide nou pou reste fort dan la foi ek pou “vinn bann dimoune ki mette la parole en pratik, ek pa bann ki zis tendé.”​—Jacq. 1:22.

 2. (a) Avek ki kitsoz souvent bann rappel Bondié faire reference? (b) Couma bann la loi Bondié zot diferan avek bann la loi humain?

² Souvent mot Hébreu ki’nn traduire par “rappel” faire reference ar bann la loi, bann commandement, ek bann l’ordre ki Bondié donne so peuple. Nou kapav touletan faire confiance bann la loi Jéhovah, zot pa pareil couma bann la loi humain ki souvent bizin changé ou-soit ré-mette a-jour. Li vrai ki Jéhovah ti donne certain la loi ki ti applik dan enn certain lepok ou-soit situation. Mais c’est pa parski nou pa pé suive zot zordi ki zot inn perdi zot valeur. Enn psalmiste ti dire: “La justice to bann rappel li pou touletan.”​—Ps. 119:144.

3, 4. (a) Ki parfois bann rappel Jéhovah impliké? (b) Ki bienfait bann Israélite ti pou gagné si zot ti prend compte sa bann rappel-la?

³ Kitfois ou finn remarké ki parfois bann rappel Jéhovah implik bann message l’avertissement. Regulierement nation Israël ti gagne bann l’avertissement ar bann prophete Bondié. Par exemple, enn tipé apré ki bann Israélite ti rente dan Later Promise, Moïse ti donne zot sa l’avertissement-la: “Veille bien lor zot-mem pangar zot laisse zot leker tenté ek zot vrai-mem detourné ar Jéhovah ek zot commence adore lezot bondié ek prosterne devant zot; ek pangar colere Jéhovah enflammé kont zot.” (Deut. 11:16, 17) La Bible montré ki Bondié ti donne so peuple beaucoup rappel pou aide zot.

⁴ Plusieurs fois, Jéhovah ti rappel bann Israélite ki zot ti bizin ena la crainte pou Li, ecoute so la voix, ek sanctifié so nom. (Deut. 4:29-31; 5:28, 29) Si zot ti prend compte sa bann rappel-la, pena doute ki zot ti pou gagne beaucoup benediction.​—Lév. 26:3-6; Deut. 28:1-4.

 5. Kifer Jéhovah ti combatte pou le Roi Hizqiya?

⁵ Nation Israël ti passe par bann moment difisil, mais pendant tou sa le temps-la, Bondié ti tini promesse ki Li ti faire ar zot. Par exemple, kan Sennakérib, le Roi l’Assyrie, ti attak Juda ek ti menace pou tire le Roi Hizqiya lor trone, Jéhovah ti envoye enn ange pou aide so peuple. Dan enn sel la nuit, ange Bondié ti detruire “tou bann zom fort, ki ti ena courage” dan l’armée l’Assyrie ek ti faire Sennakérib obligé retourne kot li dan la honte. (2 Chron. 32:21; 2 Rois 19:35) Kifer Bondié ti combatte pou le Roi Hizqiya? Parski “li [Hizqiya] ti reste attaché ar Jéhovah. Li pa ti tourne lé-dos ek arrete suive Jéhovah, mais li ti contigne garde [so] bann commandement.”​—2 Rois 18:1, 5, 6.

 6. Couma le Roi Yoshiya ti montré ki li ti ena confiance en Jéhovah?

⁶ Enn lot dimoune ki ti obeir bann commandement Jéhovah c’est le Roi Yoshiya. Kan li ti ena huit an, “li ti commence faire seki droite devant lizié Jéhovah . . . Li pa ti detourne ni a droite ni a gauche.” (2 Chron. 34:1, 2) Yoshiya ti montré ki li ti ena confiance en Jéhovah kan li ti detruire tou bann zidole ki ti ena dan pays ek kan li ti retabli vrai l’adoration. Kan li ti faire sa, Jéhovah pa ti beni zis li tousel mais aussi nation Israël.​—Lire 2 Chroniques 34:31-33.

 7. Ki ti arrivé kan nation Israël ti desobeir bann rappel Jéhovah?

⁷ Malheureusement, peuple Bondié pa ti touletan ena confiance dan bann rappel Jéhovah. Pendant bann siecle, zot ti desobeir Jéhovah plusieurs fois. Kan zot la foi ti faible, souvent zot ti “laisse tou sorte qualité l’enseignement sarié [zot] partout-partout couma di-vent,” pareil couma seki l’apotre Paul ti dire. (Éph. 4:13, 14) Ek couma ti annoncé, kan zot pa ti mette zot confiance dan bann rappel Jéhovah, zot ti bien souffert.​—Lév. 26:23-25; Jér. 5:23-25.

 8. Ki leson nou kapav tiré ar l’exemple nation Israël?

⁸ Ki leson nou kapav tiré ar l’exemple nation Israël? Pareil couma bann Israélite, zordi Bondié discipline so peuple ek donne zot bann conseil. (2 Pierre 1:12) Chaque fois ki nou lire Parole Bondié, nou gagne bann rappel. Jéhovah laisse nou choisir si nou pou obeir so bann commandement ou-soit si nou pou zis faire seki parette bon pou nou. (Prov. 14:12) Anou guette certain raison kifer nou kapav ena confiance dan bann rappel Jéhovah ek bann bienfait ki nou kapav gagné kan nou prend zot compte.

 9. Kan bann Israélite ti dan desert, couma Jéhovah ti donne zot l’assurance ki Li ti pé soutenir zot?

⁹ Bann Israélite ti passe 40 an dan enn “desert ki faire peur.” Kan zot ti commence sa voyage-la, Jéhovah pa ti donne zot bann detail precis couma Li ti pou dirige zot, protege zot ek prend zot soin. Kan-mem, Li ti montré zot plusieurs fois ki zot ti kapav ena confiance en Li ek dan so bann instruction. Jéhovah ti servi enn colonne nuage li-jour ek enn colonne difé a-soir pou rappel bann Israélite ki Li ti pé soutenir zot pendant sa voyage difisil-la. (Deut. 1:19; Ex. 40:36-38) Li ti aussi donne zot tou seki zot ti bizin. “Zot linge pa ti usé ek mem zot lipié pa ti enflé.” Pena doute, “zot pa ti mank nanyé.”​—Neh. 9:19-21.

10. Couma Jéhovah pé guide so peuple zordi?

¹⁰ Zordi, bann serviteur Bondié pré pou rente dan le monde nouveau kot pou ena la justice. Eski nou ena confiance ki Jéhovah pou donne nou seki nou bizin pou gagne lavi sauve pendant ‘la grande tribulation’? (Mat. 24:21, 22; Ps. 119:40, 41) Li vrai ki Jéhovah pa pé servi enn colonne nuage ni enn colonne difé pou guide nou pou rente dan le monde nouveau. Mais Li pé servi so l’organisation pou aide nou reste lor nou garde. Par exemple, pou nou fortifié nou spiritualité, l’organisation Jéhovah pé touletan encourage nou pou lire la Bible, pou reserve enn soirée pou nou l’Adoration en Famille, pou assisté reunion ek preché regulierement. Eski nou finn faire bann changement pou suive sa bann instruction-la? Si oui, sa pou aide nou pou developpe enn la foi solide ki pou faire nou rente dan le monde nouveau.

11. Dan ki fason Bondié montré ki Li interessé ar nou?

¹¹ Pou aide nou reste fort lor plan spirituel, l’organisation Jéhovah donne nou aussi bann conseil ki concerne nou lavi toulé-jour. Par exemple, bann conseil pou garde enn bon l’attitude lor bann kitsoz materiel ek pou amenn enn lavi simple pou diminué nou bann tracas. Nou finn aussi gagne bann conseil concernant nou fason habillé ek coiffé, nou bann divertissement, ek ki quantité le temps nou pou passé pou faire bann grand letid. Reflechi aussi lor bann rappel concernant securité dan nou lakaz, nou moyen transport, nou bann la Salle du Royaume ek pou prepare-nou si ena enn urgence. Sa bann conseil-la montré ki Bondié interessé ar nou la santé ek nou bonheur.

12. (a) Lor ki sujet souvent Jésus ti koz avek so bann disciple? (b) Ki kitsoz Jésus ti faire avek l’humilité ki ti ena enn grand l’effet lor Pierre, ek ki l’effet sa bizin ena lor nou?

¹² Dan premier siecle, peuple Bondié regulierement ti gagne bann rappel. Plusieurs fois, Jésus ti koz avek so bann disciple lor l’importance pou ena l’humilité. Selman, li pa ti zis dire zot ki sa vedir ena l’humilité​—li ti aussi montré zot sa par so l’exemple. Dan la nuit avant so lamor, Jésus ek so bann zapotre ti rassemblé pou faire Pâque. Pendant ki so bann zapotre ti pé mangé, Jésus ti levé ek ti lave zot lipié​—enn travail ki normalement enn serviteur faire. (Jean 13:1-17) Seki Jésus ti faire, ti ena enn grand l’effet lor zot. Apepré 30 an plitar, l’apotre Pierre, ki ti present pendant sa repas-la, ti donne bann Chretien bann conseil lor l’humilité. (1 Pierre 5:5) L’exemple Jésus bizin pousse nou tou pou ena l’humilité dan fason ki nou traite lezot.​—Phil. 2:5-8.

13. Cite enn qualité important ki Jésus ti enseigne so bann disciple pou developpé.

¹³ Enn lot sujet ki souvent Jésus ti koz avek so bann disciple, c’est l’importance pou ena enn la foi solide. Bann disciple pa ti reussi tire enn demon lor enn garson ki ti possedé, alors zot ti demann Jésus: “Kifer nou pa finn kapav tire demon-la?” Jésus ti reponn: “Parski zot pena assez la foi. Vrai-mem mo dire zot: Si zot ena la foi mem grosseur ki enn lagrin la moutarde, . . . nanyé pa pou impossible pou zot.” (Mat. 17:14-20) Toute longue so ministere, Jésus ti enseigne so bann disciple ki la foi li enn qualité bien important. (Lire Matthieu 21:18-22.) Eski nou pé profite tou bann l’occasion ki nou gagné pou fortifié nou la foi, couma par exemple, bann l’assemblée ek bann reunion? Sa bann rassemblement-la pa zis faire nou gagne la joie, mais nou gagne aussi l’occasion pou montré nou confiance en Jéhovah.

14. Zordi, kifer li important pou developpe enn lamour pareil couma Christ?

¹⁴ Dan bann l’Écritures Grecques Chrétiennes ena beaucoup rappel ki montré nou l’importance pou ena lamour sakenn pou nou camarade. Jésus ti dire ki deuxieme pli grand commandement c’est: “Content to prochain couma to-mem.” (Mat. 22:39) Jacques, demi-frere Jésus, ti appel lamour, “la loi royal.” (Jacq. 2:8) L’apotre Jean ti ecrire: “Mo bann frere ki mo bien content, mo pé ecrire zot, pa concernant enn nouveau commandement, mais enn vié commandement ki zot ti gagné depuis commencement.” (1 Jean 2:7, 8) Kan Jean ti koz lor “enn vié commandement,” ki li ti pé rod dire? Li ti pé koz lor commandement pou content sakenn nou camarade. Sa commandement-la ti “vié” parski sa ti faire plusieurs dizaine l’année ki Jésus ti donne sa, “depuis commencement.” Mais li ti aussi “nouveau” parski, kitfois kan bann disciple ti pou dan bann nouveau situation, zot ti pou bizin manifesté lamour ek faire sacrifice pou lezot. Zordi nou bien reconnaissant kan nou gagne bann rappel ki aide nou pou evite ena mem l’attitude egoïste ki beaucoup dimoune ena dan le monde. Au contraire, nou montré enn vrai lamour.

15. Pou ki raison principal Jésus ti vinn lor later?

¹⁵ Jésus ti vrai-mem interessé avek bann dimoune. Nou trouve sa kan li ti gueri bann dimoune malade ek handicapé ek kan li ti ressuscite bann dimoune mor. Selman, raison principal kifer Jésus ti vinn lor later, c’est pa pou gueri bann dimoune, mais pou preché ek enseigné. Ek sa ti ena enn pli grand l’effet lor zot lavi. Couma? Par exemple, tou bann dimoune ki Jésus ti gueri ek ti ressuscité, plitar ti vinn vié ek ti mor. Mais bann ki ti accepté message ki Jésus ti preché, zot, zot ti gagne possibilité pou gagne lavi eternel.​—Jean 11:25, 26.

16. Zordi, couma bann Témoins de Jéhovah pé obeir l’ordre Jésus pou faire bann disciple?

¹⁶ Zordi, partout lor later, bann disciple Jésus pé contigne l’activité predication ki li ti commencé dan premier siecle. Jésus ti donne so bann disciple enn mission: “Alors, allé ek faire bann disciple parmi bann dimoune dan tou bann nation.” (Mat. 28:19) Sa-mem ki zot ti faire, ek nou aussi pareil! Plis ki sept million Témoins de Jéhovah pé preche Royaume Bondié avek zele dan plis ki 230 pays. Zot pé faire letid la Bible regulierement avek plusieurs million dimoune. Sa l’activité predication-la prouvé ki nou pé vive dan bann dernier jour.

17. Ki conseil Paul ek Pierre ti donne bann Chretien?

¹⁷ Li clair ki bann rappel ti aide bann premier Chretien pou garde zot la foi solide. Kan l’apotre Paul ti prisonnier dan Rome, li ti dire Timothée: “Contigne reste attaché ar modele bann bon parole ki to finn aprann ar moi.” (2 Tim. 1:13) Surement sa ti bien encourage Timothée. L’apotre Pierre ti encourage bann Chretien pou developpe bann qualité couma l’endurance, l’affection pou zot bann frere, ek maitrise de soi. Apré sa, li ti dire zot: “Mo pou toujours disposé pou rappel zot sa bann kitsoz-la, mem si zot deja konn sa ek ki zot bien etabli dan la verité.”​—2 Pierre 1:5-8, 12.

18. Couma bann Chretien premier siecle ti considere bann rappel?

¹⁸ Bann lettre ki Paul ek Pierre ti ecrire ti ressemblé “bann parole ki bann saint prophete ti dire longtemps.” (2 Pierre 3:2) Eski nou bann frere dan premier siecle ti agacé kan zot ti gagne sa bann rappel-la? Non, parski zot ti koné ki c’est enn fason ki Bondié ti pé montré so lamour pou zot. Sa ti aide zot pou “contigne grandi dan connaissance nou Seigneur ek Sauveur Jésus Christ ek dan so faveur ki personne pa merité.”​—2 Pierre 3:18.

19, 20. Kifer nou bizin ena confiance dan bann rappel ki Jéhovah donne nou, ek ki bienfait nou gagné kan nou faire sa?

¹⁹ Zordi, nou ena bann bon raison pou ena confiance dan bann rappel ki Jéhovah donne nou dan so Parole, la Bible. Bann conseil ki ena ladan zot touletan bon. (Lire Josué 23:14.) Dan la Bible, nou trouve fason ki Bondié inn agir avek bann dimoune imparfait pendant plusieurs millier l’année. Bondié finn faire ecrire sa pou nou profit. (Rom. 15:4; 1 Cor. 10:11) Nou finn trouve bann prophetie la Bible realisé dan nou lepok. Bann prophetie, zot couma bann rappel ki finn ecrire a l’avance. Par exemple, plusieurs million dimoune finn vinn bann adorateur Jéhovah, pareil couma ti annoncé pou arrivé “dan periode final bann jour.” (Is. 2:2, 3) Bann condition dan le monde pé vinn pli pire ek sa aussi pé realise bann prophetie la Bible. Ek, pareil couma nou ti dire avant, l’activité predication ki nou pé faire dan le monde entier pé realise dan enn fason direct bann parole Jésus.​—Mat. 24:14.

²⁰ Pendant plusieurs siecle, nou Createur finn montré bien ki nou kapav faire Li confiance. Eski nou gagne bann bienfait ar so bann rappel? Nou bizin ena la foi dan so bann rappel. Enn soeur ki appel Rosellen ti dire: “A mesure ki mo ti commence mette tou mo confiance en Jéhovah, mo ti trouve pli bien couma so la main ti pé soutenir moi ek fortifié moi.” Nou aussi, anou prend compte bann rappel ki Jéhovah donne nou, sa pou faire nou gagne bann grand bienfait!