Ki qualité l’esprit ou manifesté?

 1. Ki Paul ti dire kan li ti ecrire bann chretien premier siecle?

KAN l’apotre Paul ti ecrire bann chretien premier siecle, plusieurs fois li ti dire ki li ti esperé ki Bondié ek Christ approuve l’esprit ki bann congregation manifesté. Par exemple, li ti ecrire bann chretien dan Galatie: “Frere, ki faveur nou Seigneur Jésus Christ ki personne pa merité, li avek l’esprit ki zot manifesté. Amen.” (Gal. 6:18) Ki li ti pé rod dire par “l’esprit ki zot manifesté”?

2, 3. (a) Kan Paul ti servi mot “l’esprit,” ki parfois sa ti representé? (b) Ki bann question nou kapav pose-nou-mem concernant l’esprit ki nou manifesté?

² Kan Paul servi mot “l’esprit” dan sa contexte-la, sa represente l’attitude ki pousse nou pou koz ou-soit pou agir dan enn certain fason. Kitfois enn dimoune kapav bon, ena consideration pou lezot, ena enn bon caractere, li genereux, ou-soit li pardonné. La Bible dire ki li bon si enn dimoune ena enn “caractere trankil ek douce” ek “enn l’esprit calme.” (1 Pierre 3:4; Prov. 17:27) Par kont, enn lot dimoune kitfois ena tendance pou dire kitsoz pou blesse lezot, li materialiste, li offensé vite, ou-soit li ena enn l’attitude independant. Pli pire encore, ena certain ki manifesté enn l’attitude immoral, desobeissant, ou-soit mem rebelle.

³ A cause sa, kan Paul ti servi bann l’expression couma par exemple “ki faveur nou Seigneur Jésus Christ ki personne pa merité, li avek l’esprit ki zot manifesté,” li ti pé encourage so bann frere pou manifesté enn l’esprit ki en accord avek volonté Bondié ek personnalité Christ. (Phil. 4:23; lire Colossiens 3:9-12.) Zordi, li bon ki nou demann-nou-mem: ‘Ki qualité l’esprit ou-soit l’attitude mo manifesté? Couma mo kapav manifesté pli bien enn l’attitude ki faire Bondié plaisir? Eski mo kapav faire mo part pou ameliore l’esprit positif ki ena dan congregation?’ Anou prend enn l’exemple, dan enn plantation anthurium, couleur chaque fleur faire plantation-la joli. Eski nou pareil couma enn sa bann “fleur-la”? Eski nou pé aidé pou faire congregation vinn pli joli? Pena okenn doute, nou bizin faire zeffort pou faire sa. Anou guetté asterla ki nou kapav faire pou manifesté enn l’esprit ki faire Bondié plaisir.

 4. Ki été “l’esprit le monde”?

⁴ La Bible dire: “Nou pa finn recevoir l’esprit le monde, mais l’esprit ki sorti kot Bondié.” (1 Cor. 2:12) Ki été “l’esprit le monde”? C’est mem l’esprit ki mentionné dan Éphésiens 2:2 ki dire: “Enn lepok, zot ti pé marche dapré sa le monde-la, dapré sa kikenn ki chef lor pouvoir ki l’air ena, sa l’esprit ki pé agir asterla dan bann garson desobeissance.” Sa “l’air[-la]” c’est l’esprit le monde ou-soit so l’attitude mental ek li partout autour nou, pareil couma l’air. Nou trouve li souvent dan l’attitude bann dimoune ki dire: ‘Personne pa bizin dire moi seki mo bizin faire,’ ou-soit ‘ou bizin laguerre pou ou bann droit!’ Sa bann dimoune-la c’est zot-mem “bann garson desobeissance” dan le monde Satan.

 5. Ki mauvais l’attitude certain Israélite ti ena?

⁵ Pa premier fois ki nou trouve bann l’attitude coumsa. Dan lepok Moïse, Qorah ti rebellé kont bann ki ti ena l’autorité dan Israël. Li ti pé vise surtout Aaron ek so bann garson ki ti ena privilege pou servi couma bann pretre. Kitfois li ti trouve zot bann defaut. Ou-soit dapré li, Moïse ti pé faire preference, li ti pé donne so famille bann privilege. N’importe ki li ti pensé, li clair ki Qorah ti pé guette bann kitsoz dan enn fason humain. Li pa ti koz avek respé ar bann zom ki Jéhovah ti etabli, kan li ti dire zot: “Nou’nn fatigué ar zot . . . Kifer eski zot bizin faire chef dan congregation?” (Nomb. 16:3) Dathân ek Abiram aussi pareil, zot ti reproche Moïse, zot ti dire ki li ti pé ‘envie faire prince lor zot.’ Kan Moïse ti faire appel zot, dan enn fason arrogant zot ti dire: “Nou pa pou vini!” (Nomb. 16:12-14) Li clair ki Jéhovah pa ti content l’attitude ki zot ti ena. Li ti touye tou bann ki ti rebellé.​—Nomb. 16:28-35.

 6. Couma certain dan premier siecle ti montré ki zot ti ena enn mauvais l’attitude, ek kitfois pou ki raison zot ti ena sa l’attitude-la?

⁶ Certain dan premier siecle aussi ti critik bann ki ti’nn etabli dan congregation, zot ti “meprise bann ki ti ena l’autorité.” (Jude 8) Li parette ki sa bann zom-la pa ti satisfait ar privilege ki zot ti ena. Zot ti essaye influence lezot pou rebellé kont bann zom ki Bondié ti etabli dan congregation ek ki ti pé faire tou seki zot kapav pou accompli travail ki Bondié ti confié zot.​—Lire 3 Jean 9, 10.

 7. Kifer nou bizin faire bien attention ar nou l’attitude dan congregation?

⁷ Li clair ki enn l’attitude coumsa pena so place dan congregation. A cause sa, nou bizin faire bien attention ar l’attitude ki nou ena. Bann ancien dan congregation pa parfait, pareil couma bann ancien dan lepok Moïse ek dan lepok l’apotre Jean pa ti parfait. Li kapav arrivé ki bann ancien faire bann erreur ki affecté nou personnellement. Si enn situation coumsa arrivé, fodé pa ki enn membre congregation imite fason ki bann dimoune dan le monde reagir, setadir li envie ki faire “la justice” ou-soit ki “faire kitsoz kont sa frere-la”! Parfois Jéhovah choisir pou pa arrete-Li-mem lor certain ti erreur ki bann ancien kapav faire. Eski nou pa kapav faire pareil? Certain dan congregation finn faire enn peché grave ek finn refuse presente-zot devant bann ancien ki faire parti dan enn comité ki finn etabli pou aide zot. Kifer? Parski zot pa content certain kitsoz avek sa bann ancien-la. Zot pareil couma enn patient ki pa accepté enn traitement ki pou aide li, parski ena kitsoz ki li pa content avek sa docteur ki finn donne li sa traitement-la.

 8. Ki verset la Bible kapav aide nou pou ena enn bon l’attitude envers bann ki’nn etabli dan congregation?

⁸ Pou rejette sa l’attitude-la, li bon nou rappel ki la Bible decrire Jésus avek “sept zetoile dan so la main droite.” Sa bann “zetoile[-la]” represente bann ancien ki’nn oint ek zot kapav represente aussi tou bann ancien dan bann congregation. Jésus kapav dirige sa bann “zetoile” ki dan so la main-la dan n’importe ki fason li trouve bon. (Rév. 1:16, 20) Alors, en tant ki Chef congregation chretien, Jésus ena tou pouvoir lor bann college ancien. Si enn ancien vrai-mem bizin enn discipline, sa Kikenn ki ena “lizié couma enn la flamme difé[-la]” pou veillé ki li gagne sa discipline-la dan ler ek dan fason ki Li decidé. (Rév. 1:14) Entre-temps, nou contigne ena respé pou bann ki’nn etabli par l’esprit saint, parski Paul ti ecrire: “Obeir bann ki pé dirige zot ek soumette ar zot, parski bannla pé contigne veille lor zot nâme couma bann ki pou rann compte; pou ki zot kapav faire sa avek la joie ek sans plaigné, sinon sa pou faire zot-mem di-tort.”​—Héb. 13:17.

 9. (a) Ki l’attitude enn chretien kapav montré kan li gagne enn discipline? (b) Ki pli bon reaction nou kapav ena kan nou gagne enn discipline?

⁹ Kan enn chretien gagne enn discipline ou-soit perdi so privilege, so reaction montré si li ena enn bon ou-soit enn mauvais l’attitude. Avek tact, bann ancien ti conseil enn jeune frere ki ti joué bann video game violent. Malheureusement, li pa ti accepté sa conseil-la. Alors, li ti perdi so privilege pou servi couma assistant ministeriel parski li ti nepli rempli bann condition ki mentionné dan la Bible. (Ps. 11:5; 1 Tim. 3:8-10) Apré, sa frere-la ti faire tou dimoune koné ki li pa ti d’accord avek sa decision-la. Plusieurs fois, li ti ecrire filiale pou critik bann ancien ek li ti mem influence lezot dan congregation pou faire pareil. Mais sa pa servi nanyé ki nou mette en danger la paix congregation en entier zis pou essaye justifié nou bann action. Li pou pli bon ki nou considere discipline couma enn moyen ki ouvert nou lizié lor bann defaut ki nou pa finn remarké ek accepté discipline-la sans grogné.​—Lire Lamentations 3:28, 29.

10. (a) Ki nou kapav aprann lor enn bon ek enn mauvais l’attitude dan Jacques 3:16-18? (b) Ki bienfait pou ena kan nou manifesté “sagesse ki sorti la-haut”?

¹⁰ Jacques 3:16-18 montré nou ki bon l’attitude ek ki mauvais l’attitude kapav ena dan enn congregation. Li dire: “Kot ena jalousie ek enn tendance pou laguerre, ena aussi desordre ek tou sorte qualité kitsoz impur. Mais sagesse ki sorti la-haut li avant tou pur, apré li pacifik, li raisonnable, li disposé pou obeir, li rempli ar misericorde ek bann bon fruit, li pa faire preference, li pa hypocrite. En plus, la grain fruit la justice li semé dan la paix pou bann ki faire la paix.” Kan nou agir en accord avek “sagesse ki sorti la-haut,” nou bann bon qualité pou encourage bann frere ek soeur pou manifesté enn bon l’attitude dan congregation.

11. (a) Si nou garde enn bon l’attitude, ki sa pou empeche nou faire? (b) Ki nou aprann ar l’exemple David?

¹¹ Nou bizin rappel ki Jéhovah finn etabli bann ancien pou “prend soin congregation Bondié.” (Actes 20:28; 1 Pierre 5:2) Alors, li sage pou respecté sa disposition ki Bondié inn prend-la, ki nou enn ancien ou-soit non. Kan nou manifesté enn bon l’attitude, sa pou empeche nou pou accorde enn trop grand l’importance ar bann privilege dan congregation. Kan le roi Saül, ki ti regne en Israël, ti trouvé ki David ti’nn vinn enn menace pou so position en tant ki le roi, Saül “ti contigne guette David avek mefiance.” (1 Sam. 18:9) Saül ti commence developpe enn mauvais l’attitude ek ti mem envie touye David. Au lieu ki nou accorde enn trop grand l’importance ar bann privilege pareil couma Saül, li beaucoup pli bon ki nou imite David. Malgré tou bann l’injustice ki li ti bizin supporté, David ti touletan respecté l’autorité ki Bondié ti donne Saül.​—Lire 1 Samuel 26:23.

12. Ki kitsoz pou favorise l’unité dan congregation?

¹² Nou tou nou pena mem fason pensé, alors, sa kapav faire nou agacé avek nou bann frere dan congregation. Sa kapav arrivé mem parmi bann ancien. Bann conseil la Bible kapav aide nou dan sa domaine-la, couma par exemple: “Zot bizin toujours premier pou honore sakenn so camarade,” ek “pa pensé ki zot trop malin.” (Rom. 12:10, 16) Au lieu ki nou persisté ek pensé ki nou ena raison, nou bizin reconette ki souvent, pena zis enn sel bon fason pensé. Si nou essaye comprend fason pensé lezot, nou pou kapav favorise l’unité dan congregation.​—Phil. 4:5.

13. Couma nou bizin considere nou prop l’opinion, ek ki l’exemple biblik kapav aide nou?

¹³ Eski sa vedir ki li mauvais ki nou donne nou l’opinion si nou trouve enn kitsoz dan congregation ki nou pensé bizin corrigé? Non. Dan premier siecle, ti ena enn probleme ki ti provok enn desaccord parmi beaucoup dan congregation. Bann frere “ti prend decision ki Paul ek Barnabas ek certain parmi zot ti pou al vers bann zapotre ek bann ancien ki ti Jérusalem, concernant sa discussion-la.” (Actes 15:2) Surement, sakenn parmi sa bann frere-la ti ena so prop l’opinion lor sa sujet-la ek so prop l’idée couma pou reglé sa probleme-la. Pourtant, apré ki sakenn ti exprime so l’opinion ek bann frere ti prend enn decision avek l’aide l’esprit saint, zot pa ti contigne koz lor zot prop l’opinion. Apré ki bann congregation ti gagne lettre concernant decision ki ti’nn prend, “zot ti bien content par sa l’encouragement-la” ek zot ti “vinn fort dan la foi.” (Actes 15:31; 16:4, 5) Li pareil aussi zordi, enn fois ki nou finn koz ar bann frere responsable lor enn probleme, nou bizin laisse zot examine probleme-la avek l’aide la priere ek reglé li.

14. Couma nou kapav manifesté enn bon l’attitude envers lezot?

¹⁴ Personnellement, nou ena beaucoup possibilité pou manifesté enn bon l’attitude. Sakenn parmi nou kapav faire beaucoup di-bien autour nou si nou disposé pou pardonné kan lezot offense nou. Parole Bondié dire nou: “Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker. Pareil couma Jéhovah inn pardonne zot avek tou so leker, faire pareil zot aussi.” (Col. 3:13) L’expression “si kikenn ena enn kitsoz kont enn lot” montré ki parfois nou kapav ena bann bon raison pou nou en colere kont lezot. Selman, fodé pa nou trop sensible ek laisse bann ti defaut lezot agace nou. Sinon sa pou troublé la paix dan congregation. Au contraire, nou pou essaye imite Jéhovah ek pardonné avek tou nou leker, ek contigne servi Jéhovah dan l’unité.

15. (a) Ki nou kapav aprann lor pardon ar l’exemple Job? (b) Couma la priere kapav aide nou pou manifesté enn bon l’attitude?

¹⁵ En rapport avek pardon, l’exemple Job kapav aide nou. So trois soi-disant camarade ti offense li kan zot ti dire li beaucoup mauvais kitsoz. Selman, Job ti pardonne zot. Couma? “Li ti prié pou so bann camarade.” (Job 16:2; 42:10) Kan nou prié pou lezot, sa kapav change nou l’attitude envers zot. Kan nou prié pou tou nou bann frere ek soeur, sa aide nou pou developpe mem l’attitude ki Jésus Christ. (Jean 13:34, 35) En plus ki nou prié pou nou bann frere, nou bizin prié pou gagne l’esprit saint. (Luc 11:13) L’esprit saint Bondié pou aide nou pou manifesté bann qualité spirituel dan nou rapport avek lezot.​—Lire Galates 5:22, 23.

16, 17. En rapport avek ‘l’esprit ki nou manifesté,’ ki ou bien decidé pou faire personnellement?

¹⁶ Si chaque membre dan congregation fixé l’objectif pou faire so part pou ena enn bon l’esprit dan congregation, sa pou amenn bann bon resultat! Apré ki nou finn examine sa lartik-la, kitfois nou pou prend decision pou ameliore nou l’attitude ek pou encourage plus lezot. Si nou decide pou faire sa, anou laisse Parole Bondié montré nou ki changement nou kapav faire. (Héb. 4:12) Paul, ki ti envie vinn enn bon l’exemple dan bann congregation, ti dire: “Mo koné ki pena nanyé ki temoigne kont moi. Pourtant mo pa dire ki a cause sa mo juste, mais c’est Jéhovah ki examine moi.”​—1 Cor. 4:4.

¹⁷ Kan nou faire zeffort pou agir en accord avek sagesse ki sorti kot Bondié, sans ki nou ena enn trop grand l’opinion lor nou-mem ou-soit lor nou bann privilege, nou pou faire nou part pou ki ena enn bon l’esprit dan congregation. Si nou pré pou pardonné ek nou ena enn bon l’attitude envers lezot, nou pou favorise la paix avek nou bann compagnon chretien. (Phil. 4:8) Kan nou faire sa, nou kapav sur ki ‘l’esprit ki nou manifesté’ pou faire plaisir Jéhovah ek Jésus.​—Philém. 25.