“Gete! Enn Gran Lafoul”

 1. Ver lafin premie siek Nou Lepok, dan ki sitiasion lapot Zan ti ete?

VER lafin premie siek Nou Lepok, lapot Zan ti dan enn sitiasion bien difisil. Li ti anprizone lor lil Patmos, li ti bien vie, ek kitfwa li ti dernie zapot ki ti ankor vivan. (Rev. 1:9) Li ti kone ki bann aposta ti pe fann bann fos lansegnman ek ki zot ti pe kree divizion parmi bann Kretien. Eski savedir ki ti pou nepli ena bann vre Kretien?​—Zid 4; Rev. 2:15, 20; 3:1, 17, NW.

 2. Dapre Revelasion 7:9-14, ki vizion extraordiner Zan ti gagne? (Get zimaz lor kouvertir.)

² Alor ki Zan ti dan sa sitiasion difisil la, Bondie ti fer li gagn enn vizion extraordiner ki ti pou realize dan lavenir. Dan sa vizion-la, enn anz dir kat lezot anz tini bann divan destriksion gran detres ziska ki fini sel enn group esklav dan enn fason definitif. (Rev. 7:1-3) Dan sa group-la ena 144,000 dimounn ki pou regn avek Zezi dan lesiel. (Lik 12:32; Rev. 7:4) Apre sa, Zan trouv enn lot group. Sa group-la telman gran ki Zan kriye: “Gete!” Sa lexpresion-la kitfwa montre ki Zan etone ek ki li pa’nn atann pou trouv enn kitsoz koumsa. Ki kitsoz Zan trouve? ‘Enn gran lafoul, ki personn pa kapav konte, ki sorti dan tou nasion, tribi, pep, ek lang pe debout devan tronn ek devan Lagno.’ (Lir Revelasion 7:9-14, NW.b) Pena dout ki Zan bien kontan kan li trouve ki dan lavenir bann milye dimounn pou pratik vre ladorasion!

 3. (a) Kifer vizion ki Zan ti gagne bizin fortifie nou lafwa? (b) Ki nou pou examine dan sa lartik-la?

³ Pena dout ki sa vizion-la ti fortifie lafwa Zan. Alor, sa vizion-la bizin fortifie nou lafwa ankor plis, parski nou pe viv dan lepok kot li pe realize! Avek nou prop lizie nou pe trouv plizir milyon dimounn, ki ena lespwar pou travers gran detres ek viv pou touletan lor later, pe ador Zeova ansam. Sa fer plis ki 80 an ki Zeova inn fer so bann serviter konpran kisannla form parti dan gran lafoul. Dan sa lartik, nou pou aprann kouma Zeova inn fer sa. Apre sa, nou pou examinn de kitsoz konsernan gran lafoul: (1) enn kantite dimounn form parti ladan, ek (2) bann dimounn ki form parti ladan sorti partou lor later. Sa bann explikasion-la bizin fortifie lafwa tou bann dimounn ki ena lespwar pou form parti dan sa group ki’nn beni par Zeova la.

 4. Ki verite Biblik bann relizion ki swadizan Kretien pa konpran, ek kouma bann Etidian Labib ti konpran sa verite-la?

⁴ Labib dir ki enn zour bann dimounn ki obeir Bondie pou viv pou touletan lor later. Me laplipar bann relizion ki swadizan Kretien pa ansegn sa verite Biblik la. (2 Kor. 4:3, 4) Zot ansegne ki tou bann bon dimounn al dan lesiel kan zot mor. Parkont, enn ti group Etidian Labib, ki ti pe pibliye magazinn Latour Degard depi 1879, ti ansegn enn kitsoz bien diferan. Zot ti konpran ki Bondie pou re-fer later vinn enn paradi, ek ki plizir milyon dimounn ki obeir Bondie pou viv lor later, pa dan lesiel. Selman, se avek letan ki zot inn bien konpran kisannla ki ti pou sa bann dimounn obeisan la.​—Mat. 6:10.

 5. Ki bann Etidian Labib ti konpran lor bann 144,000?

⁵ Gras-a Labib, bann Etidian Labib ti konpran osi ki Bondie ti pou aste enn group dimounn “lor later” pou al regn avek Zezi dan lesiel. (Rev. 14:3, NW) Dan sa group-la ti pou ena 144,000 Kretien bien zele ki ti pou’nn servi Zeova avek fidelite lor later. Me ki bann Etidian Labib ti konpran lor gran lafoul?

 6. Ki bann Etidian Labib ti panse lor gran lafoul?

⁶ Dan sa vizion-la, Zan ti trouv sa group-la “pe debout devan tronn ek devan Lagno.” (Rev. 7:9, NW) Bann Etidian Labib ti konpran par sa bann parol-la ki gran lafoul ti pou al dan lesiel parey kouma bann 144,000. Me si toulede group, setadir bann 144,000 ek gran lafoul, ti pou al dan lesiel, ki diferans ti pou ena ant zot? Bann Etidian Labib ti panse ki bann dimounn ki form parti dan gran lafoul ti bann Kretien ki pa ti san poursan obeisan ar Bondie kan zot ti lor later. Kitfwa sa bann dimounn-la ti pe swiv bann prinsip Biblik, me sertin parmi zot ti kontign frekant zot bann legliz. Bann Etidian Labib ti panse ki sa bann dimounn-la ti kontan Bondie, me ki zot lamour pa ti ase for pou ki zot kapav regne avek Zezi. Akoz sa, sa bann dimounn-la ti pou kapav al dan lesiel ek debout devan tronn, me zot pa ti pou kapav asiz lor bann tronn.

 7. Dapre bann Etidian Labib, kisannla ti pou viv lor later pandan Regn Mil An Zezi Kris, ek ki zot ti panse lor bann zom fidel ki ti mor avan Zezi Kris?

⁷ Me alor, kisannla ti pou viv lor later? Bann Etidian Labib ti panse ki, apre ki bann 144,000 ek gran lafoul ti pou al dan lesiel, bann milyon lezot dimounn ti pou viv lor later ek ti pou gagn bann benediksion gras-a Regn Mil An Zezi Kris. Bann Etidian Labib pa ti panse ki sa bann milyon dimounn la ti pou servi Zeova avan ki Regn Mil An Zezi Kris koumanse. Okontrer, zot ti panse ki sa bann milyon dimounn-la ti pou aprann fer volonte Zeova pandan Regn Mil An Zezi Kris. Lerla, bann dimounn ki ti pou obeir bann prinsip Zeova ti pou gagn lavi eternel lor later, me bann ki ti pou rebel kont Zeova ti pou detrir. Bann Etidian Labib ti panse osi ki kitfwa bann dimounn ki ti pou servi kouma “prins” lor later pandan Regn Mil An ti pou gagn zot rekonpans pou al dan lesiel apre sa Regn Mil An la. Zot ti panse osi ki parmi sa bann ‘prins-la’ ti pou ena bann zom fidel ki ti’nn mor avan Zezi Kris ek ki ti pou resisite pandan Regn Mil An.​—Ps. 45:16.

 8. Dapre bann Etidian Labib, ki trwa group ti sipoze ena dan proze Bondie?

⁸ Alor, bann Etidian Labib ti panse ki ti ena trwa group: (1) bann 144,000 ki ti pou regn avek Zezi dan lesiel; (2) gran lafoul bann Kretien ki pa ti ena ase lamour pou Bondie, ki ti pou debout devan tronn ek devan Lagno dan lesiel; ek (3) bann milyon dimounn ki ti pou lor later ek ki ti pou aprann fer volonte Zeova pandan Regn Mil An Zezi Kris.c Me avek letan, lalimier laverite ti koumans briye pli for ek Zeova ti ed so bann serviter pou konpran pli bien sa size-la.​—Prov. 4:18.

 9. (a) Dan ki fason eski gran lafoul debout “devan tronn ek devan Lagno” mem si zot lor later? (b) Kifer fason ki bann Etidian Labib ti konpran Revelasion 7:9 li lozik?

⁹ An 1935, bann Temwin Zeova ti konpran pli bien kisannla sa gran lafoul ki Zan ti trouve la. Zot ti konpran ki gran lafoul pa ti bizin dan lesiel pou “debout devan tronn ek devan Lagno.” Gran lafoul ti fer sa dan enn fason sinbolik. Mem si bann dimounn ki form parti dan gran lafoul zot viv lor later, zot kapav debout “devan tronn” kan zot rekonet ki Zeova Limem Dirizan liniver ek kan zot aksepte so lotorite kan zot obeir Li. (Iza. 66:1) Zot kapav debout “devan Lagno” kan zot ena lafwa dan sakrifis Zezi. Enn lot verse Labib ki ed nou konpran ki Revelasion 7:9 ena enn sans sinbolik se Matie 25:31, 32. Sa verse-la dir ki “tou bann nasion,” parmi ena osi bann move dimounn, “pou rasanble devan” Zezi ki pou lor so tronn ki ranpli ar laglwar. Alor, li kler ki tou sa bann nasion-la zot lor later, pa dan lesiel. Sa nouvo lexplikasion-la li lozik. Se pou sa rezon-la ki okenn par dan Labib pa dir ki gran lafoul pou al dan lesiel. Sel group ki pou al viv pou touletan dan lesiel se bann 144,000, ki pou “regne kouma bann lerwa ki diriz later” ansam avek Zezi.​—Rev. 5:10, NW.

10. Kifer li inportan ki gran lafoul aprann konn Zeova ek koumans ador Li avan ki Regn Mil An Zezi Kris koumanse?

¹⁰ Alor, depi 1935, bann Temwin Zeova inn konpran ki gran lafoul, se enn group Kretien fidel ki ena lesperans pou viv pou touletan lor later. Pou ki zot reisi travers gran detres, sa bann Kretien-la pou bizin aprann konn Zeova ek koumans ador Li avan ki Regn Mil An Zezi Kris koumanse. Zot pou bizin ena enn lafwa bien for pou ki zot reisi “sap dan bann maler ki pou arive” avan Regn Mil An Zezi Kris.​—Lik 21:34-36.

11. Pou ki rezon kitfwa sertin Etidian Labib ti panse ki sertin dimounn ti pou al dan lesiel apre Regn Mil An?

¹¹ Kifer sertin Etidian Labib ti panse ki sertin dimounn, ki ti pou montre enn gran fidelite lor later, ti pou al viv dan lesiel apre Regn Mil An? Latour Degard Me 1913, an Franse, ti koz lor sa posibilite-la. Sertin Etidian Labib kitfwa ti pe demann zotmem: ‘Kifer bann serviter fidel Zeova dan lepase ti pou gagn enn sinp leritaz pou viv lor later, alor ki bann Kretien ki pa ti sa kantite fidel-la ti pou gagn rekonpans pou al dan lesiel?’ Biensir, sa rezonnman-la ti baze lor de kitsoz ki fos: (1) ki gran lafoul ti pou al dan lesiel ek (2) ki se bann Kretien ki pa ti ena ase lamour pou Zeova ki ti form parti dan gran lafoul.

12-13. Ki kitsoz bann Kretien ki pou al viv dan lesiel ek gran lafoul rekonet konsernan zot rekonpans?

¹² Nou finn trouve ki, depi 1935, bann Temwin Zeova inn bien konpran ki bann dimounn ki pou travers Armagedon se zotmem gran lafoul ki Zan ti trouve dan so vizion. Zot pou “travers gran detres” ki pou ena lor later, ek zot pou “kontign kriye bien for: ‘Se gras-a nou Bondie ki pe asiz lor tronn ek gras-a Lagno ki nou gagn delivrans.’” (Rev. 7:10, 14, NW) Anplis, Labib ansegne ki bann dimounn ki resisite pou al viv dan lesiel, zot ena enn “meyer” lesperans konpare ar bann fidel serviter Zeova dan lepase. (Ebre 11:40) Kan zot finn konpran tousala, avek boukou lazwa nou bann frer ek ser ti koumans invit bann dimounn pou servi Zeova pou ki zot gagn posibilite pou viv pou touletan lor later.

¹³ Bann dimounn ki form parti dan gran lafoul zot bien kontan zot lesperans. Zot konpran ki se Zeova ki deside kotsa so bann fidel serviter pou servi Li, swa dan lesiel ouswa lor later. Toulede group, setadir, bann Kretien ki ena lesperans pou al dan lesiel ek gran lafoul, rekonet ki zot gagn zot rekonpans gras-a faver Zeova ki zot pa merite. Zot gagn sa rekonpans-la zis parski Zeova inn donn laranson, setadir sakrifis Zezi Kris.​—Rom. 3:24, NW.

14. Apre 1935, kifer boukou frer ek ser ti pe demann zotmem kouma sa profesi konsernan gran lafoul la ti pou akonpli?

¹⁴ Apre ki pep Bondie ti konpran sa nouvo lexplikasion-la an 1935, boukou frer ek ser ti ankor pe demann zotmem kouma bann ki ena lesperans pou viv lor later ti pou vinn enn “gran lafoul.” Par exanp, Ronald Parkin ti ena 12 an kan ti gagn sa nouvo lexplikasion lor gran lafoul la. Ronald rapel: “Sa lepok-la, ti ena anviron 56,000 proklamater lor later, ek boukou parmi zot, kitfwa mem laplipar ti ena lesperans pou al viv dan lesiel. Alor sa gran lafoul-la pa ti paret sa kantite gran-la.”

15. Kouma Zeova pe kontign rasanble enn gran lafoul?

¹⁵ Selman, pandan bann dizenn lane apre, lorganizasion ti avoy bann misioner dan plizir pei, ek kantite bann Temwin Zeova ti pe kontign ogmante. Anplis, an 1968, ti koumans enn program lansegnman Labib baze lor liv La vérité qui conduit à la vie éternelle. Sa liv-la ti explik bann verite Biblik dan enn fason sinp ek sa ti atir pli boukou dimounn ver Zeova. Dan lespas kat-r-an, plis ki 500,000 dimounn ti pran batem. Avek letan, dan l’Europe de l’Est ek dan sertin pei dan l’Afrique, ti nepli ena linterdiksion lor nou laktivite. Ek Legliz Katolik ti koumans perdi so lanpriz dan bann pei l’Amérique latine ek dan lezot pei. Alor, plizir milyon dimounn ankor ti pran batem. (Iza. 60:22) Sa bann dernie lane-la, lorganizasion Zeova inn fer boukou zouti bien efikas pou ed bann dimounn konn bann lansegnman Labib. Pena dout ki Zeova pe rasanble enn gran lafoul, ek azordi zot plis ki wit milyon dimounn.

16. Kotsa bann dimounn ki form parti dan gran lafoul sorti?

¹⁶ Kan Zan ti ekrir seki li ti trouve dan so vizion, li ti dir ki gran lafoul ti pou sorti dan “tou nasion, tribi, pep, ek lang.” Boukou lane avan, profet Zakari ti predir enn kitsoz koumsa. Li ti ekrir: “Dan sa lepok-la, dis zom dan tou lang bann nasion pou trap, wi, zot pou trap linz enn Zwif bien for, ek zot pou dir: ‘Nou anvi al avek zot parski nou finn tann dir ki Bondie avek zot.’”​—Zaka. 8:23.

17. Ki bann Temwin Zeova pe fer pou ed bann dimounn ki sorti dan tou nasion ek lang?

¹⁷ Pou zot reisi rasanble bann dimounn ki koz diferan lang, bann Temwin Zeova kone ki predikasion bonn nouvel bizin fer dan plizir lang. Sa fer plis ki 130 an ki nou pe tradir bann piblikasion Biblik. Me azordi, nou pe fer enn kitsoz ki zame pa’nn arive avan. Nou pe tradir bann piblikasion dan plizir santenn lang. Li kler ki Zeova pe fer enn mirak dan nou lepok. Li pe rasanble enn gran lafoul ki sorti dan tou nasion. Gras-a Labib ek bann piblikasion Biblik ki disponib dan plizir lang, gran lafoul pe ador Zeova dan linite, mem si zot sorti partou lor later. Anplis, boukou dimounn rekonet ki bann Temwin Zeova zot bann predikater bien zele ek ki zot ena lamour ant zot. Tousala vremem fortifie nou lafwa, pa vre!​—Mat. 24:14; Zan 13:35.

18. (a) An-akor avek seki Izai 46:10, 11 dir, kifer sa pa etonn nou ki Zeova inn realiz profesi konsernan gran lafoul? (b) Kifer bann dimounn ki ena lesperans pou viv lor later pa panse ki Zeova pe priv zot enn kitsoz?

¹⁸ Profesi konsernan gran lafoul vremem rann nou zwaye! Sa pa etonn nou ki Zeova inn realiz sa profesi-la dan enn fason extraordiner. (Lir Izai 46:10, 11.d) Bann dimounn ki form parti dan gran lafoul zot rekonesan anver Zeova pou lesperans ki Li’nn donn zot. Zot pa panse ki Zeova pe priv zot enn kitsoz parski Li pa finn swazir zot pou al regn avek Zezi dan lesiel. Dan Labib nou lir ki lespri sin ti gid boukou zom ek fam fidel, me kanmem sa zot pa form parti dan bann 144,000. Enn parmi sa bann dimounn-la se Zan Batis. (Mat. 11:11) Ena David osi. (Zist. 2:34) Zan Batis, David ek boukou lezot dimounn ankor pou resisite pou viv dan Paradi lor later. Ansam avek gran lafoul, zot pou gagn posibilite pou montre zot fidelite anver Zeova ek pou soutenir so souverennte.

19. Si nou konpran sinifikasion vizion Zan konsernan gran lafoul, ki nou pou fer?

¹⁹ Se premie fwa dan listwar ki Bondie inn rasanble bann milyon dimounn ki sorti dan tou nasion pou ador Li dan linite. Mem si nou ena lesperans pou viv dan lesiel ouswa lor later, nou bizin ed maximum dimounn posib pou form parti dan gran lafoul bann “lezot mouton.” (Zan 10:16) Biento, Zeova pou amenn gran detres ki pou detrir tou bann gouvernman ek bann relizion ki’nn fer bann dimounn bien soufer. Lerla, tou bann dimounn ki form parti dan gran lafoul pou gagn enn privilez extraordiner. Zot pou servi Zeova lor later pou touletan!​—Rev. 7:14, NW.