Liv Revelasion​—Ki Li Dir lor To Lavenir?

 1. Ki desizion inportan tou dimounn bizin pran?

AZORDI, bann dimounn ena enn desizion bien inportan pou pran. Eski zot pou soutenir Zeova, Li ki ena drwa pou diriz liniver, ouswa eski zot pou soutenir so lennmi, Satan? Ena zis de kan, ek tou dimounn bizin swazir dan ki kan li pou ete. Desizion ki zot pou pran pou montre si zot pou gagn lavi eternel ouswa non. (Mat. 25:31-33, 46) Pandan“gran detres,” zot pou gagn enn mark ki pou montre si zot pou viv ouswa si zot pou mor.​—Rev. 7:14; 14:9-11; Eze. 9:4, 6.

 2. (a) Ki Ebre 10:35-39 ankouraz nou pou fer? (b) Kouma liv Revelasion kapav ed nou?

² Lir Ebre 10:35-39. Si to’nn swazir pou soutenir gouvernman Bondie, to’nn pran enn bon desizion. Asterla, to anvi ed lezot osi pou pran enn bon desizion. Alor, to kapav servi bann linformasion ki ena dan liv Revelasion pou ed zot. Sa liv-la montre seki pou ariv bann ki opoz zot ar Zeova. Li montre osi bann benediksion ki bann dimounn ki soutenir gouvernman Bondie pou gagne. Nou bizin etidie sa bann lansegnman bien inportan la. Kan nou fer sa, nou pou plis motive pou kontign servi Zeova. Anplis, nou kapav servi seki nou’nn aprann pou ed lezot pou pran enn bon desizion, setadir pou koumans servi Zeova ek pou kontign servi Li.

 3. Ki nou pou examine dan sa lartik-la?

³ Dan sa lartik-la, nou pou reponn sa bann kestion-la: Ki pou ariv bann dimounn ki soutenir gouvernman Bondie? Ek ki pou ariv bann dimounn ki soutenir bebet kouler rouz ki ena dan liv Revelasion?

 4. Ki group lapot Zan trouve ansam avek Zezi dan lesiel?

⁴ Dan enn vizion, lapot Zan trouv de group ki pe soutenir dominasion Bondie. Zot gagn enn zoli benediksion: lavi pou touletan. Dan sa premie group-la, ena 144,000 dimounn ki sorti depi lor later. (Rev. 7:4) Ansam avek Zezi, zot pou form enn gouvernman, ouswa enn Rwayom, dan lesiel ek zot pou diriz later. (Rev. 5:9, 10; 14:3, 4) Dan sa vizion-la, Zan trouv zot pe debout ansam avek Zezi lor Montagn Sion dan lesiel.​—Rev. 14:1.

 5. Biento, ki pou ariv bann ki ena lesperans pou al dan lesiel me ki ankor lor later?

⁵ Depi lepok bann zapot ziska zordi, Zeova finn swazir bann milye dimounn pou form parti bann 144,000. (Lik 12:32; Rom. 8:17) Me Zan aprann ki zis enn tigit dimounn parmi sa group-la ki pou ankor vivan lor later pandan bann dernie zour. Zot “sele” pou vinn permanan inpe avan gran detres. (Rev. 7:2, 3; 12:17) Lerla, pandan gran detres, zot pou al dan lesiel ek zot pou zwenn ansam avek bann lezot manb 144,000 ki deza dan lesiel. Laba, zot pou regn ansam avek Zezi dan Rwayom Bondie.​—Mat. 24:31; Rev. 5:9, 10.

6-7. (a) Ki lot group Zan trouve, ek ki nou aprann lor zot? (b) Kifer tou bann Kretien bizin interes zot ar Revelasion sapit 7?

⁶ Apre ki li’nn trouv sa premie group-la dan lesiel, Zan trouv “enn gran lafoul.” Sa group-la diferan ar bann 144,000, parski Labib pa dir ki kantite dimounn ena dan sa group-la. (Rev. 7:9, 10) Ki nou aprann lor zot? Labib dir: “Sa bann la, zot finn travers dan enn gran persekision, zot finn lav zot rob e finn fer zot vinn blan dan disan Annyo.” (Rev. 7:14) Apre ki zot travers gran detres, sa “gran lafoul” la pou viv lor later ek zot pou gagn bann benediksion extraordiner.​—Ps. 37:9-11, 27-29; Prov. 2:21, 22; Rev. 7:16, 17.

⁷ Ninport ki lesperans to ena, eski to mazinn tomem pe viv lepok kot Revelasion sapit 7 pe realize? Sa pou enn lepok extraordiner, ki nou ena lesperans pou viv dan lesiel ouswa lor later! Nou pou extra kontan ki nou’nn swazir pou soutenir gouvernman Bondie! Ki kitsoz ankor Revelasion dir nou lor gran detres?​—Mat. 24:21.

 8. Kouma gran detres pou koumanse, ek kouma laplipar dimounn pou reazir?

⁸ Kouma nou’nn trouve dan lartik avan, biento sistem politik sa lemond-la pou atak Gran Babilonn, lanpir mondial fos relizion. (Rev. 17:16, 17) Sa pou koumansman gran detres. Eski akoz sa boukou dimounn pou koumans servi Zeova? Non. Okontrer, Revelasion sapit 6 montre ki, bann dimounn ki pa servi Zeova pou rod proteksion ar sistem politik ek komersial sa lemond-la, ki konpare ar bann montagn. Parski zot pa pou soutenir Rwayom Bondie, Zeova pou konsider zot kouma so bann lennmi.​—Lik 11:23; Rev. 6:15-17.

 9. Pandan gran detres, kouma pep Zeova pou bien diferan ar bann lezot dimounn, ek ki pou ariv zot?

⁹ Pandan gran detres, bann fidel serviter Zeova pou vremem bien diferan ar bann lezot dimounn. Zot pou sel group lor later ki pe servi Zeova ek ki pa pe soutenir bebet sovaz. (Rev. 13:14-17) Ek parski zot pe res fidel ar Zeova, bann lennmi Zeova pou bien ankoler. Lerla, plizir nasion pou zwenn ansam pou atak pep Bondie partou lor later. Labib apel sa latak-la, latak Gog ki sorti pei Magog.​—Eze. 38:14-16.

10. Dapre Revelasion 19:19-21, kouma Zeova pou reazir kan Gog pou atak So pep?

¹⁰ Kouma Zeova pou reazir kan Gog pou atak So pep? Zeova dir: “Mo gran koler pou monte.” (Eze. 38:18, 21-23) Revelasion sapit 19 dir nou seki arive apre. Zeova pou avoy so Garson pou protez So pep ek pou detrir zot bann lennmi. Bann “larme lesiel,” setadir bann anz ki fidel ek bann 144,000, pou zwenn ansam avek Zezi pou lager kont Gog ki sorti pei Magog. (Rev. 17:14; 19:11-15) Kouma sa lager-la pou fini? Tou bann dimounn ek bann lorganizasion ki opoz zot ar Zeova pou detrir net.​—Lir Revelasion 19:19-21.

11. Ki levennman pli inportan ena dan liv Revelasion?

¹¹ Esey mazine seki bann fidel serviter Bondie ki lor later pou resanti apre ki bann lennmi Bondie finn detrir! Sa lepok-la, pou ena boukou lazwa lor later! Mem si pou ena enn gran lazwa dan lesiel kan Gran Babilonn pou detrir, pou ena enn lot kitsoz ki pou rann tou dimounn ankor plis zwaye. (Rev. 19:1-3) An realite, se levennman pli inportan dan liv Revelasion: Maryaz Lagno.​—Rev. 19:6-9.

12. Dapre Revelasion 21:1, 2, kan pou ena maryaz Lagno?

¹² Kan eski pou ena maryaz Lagno? Zis avan lager Armagedon, tou bann 144,000 pou’nn fini rasanble dan lesiel. Selman, pa pou ankor ariv ler pou maryaz-la. (Lir Revelasion 21:1, 2.) Se apre lager Armagedon, ek kan tou bann lennmi Bondie pou’nn fini detrir, ki pou ena maryaz Lagno.​—Ps. 45:3, 4, 13-17.

13. Ki pou arive pou maryaz Lagno?

¹³ Ki pou arive pou maryaz Lagno? Parey kouma enn maryaz reini ansam enn zom ek enn fam, maryaz Lagno pou reini ansam Lerwa Zezi Kris ar so “nouvel-marye,” bann 144,000. Sa levennman inportan la pou etabli enn nouvo gouvernman ki pou diriz later pandan 1,000 an.​—Rev. 20:6.

14-15. Ar ki kitsoz Revelasion sapit 21 konpar bann 144,000? (Get zimaz lor kouvertir.)

¹⁴ Apre sa, Revelasion sapit 21 konpar bann 144,000 ar enn extra zoli lavil ki apel “Nouvo Zerizalem.” (Rev. 21:2, 9) Sa lavil-la ena 12 ros fondasion, ek lor zot finn ekrir “nom douz apot Annyo Bondie.” Kifer sa ti interes Zan? Parski li ti trouv so nom lor enn parmi sa bann ros-la. Sa vremem enn gran privilez!​—Rev. 21:10-14; Efe. 2:20.

¹⁵ Sa lavil-la pa parey kouma lezot lavil. Sa lavil-la so gran semin an or pir, li ena 12 laport an perl, ek so fondasion ek so bann miray ranpli ar pier presiez. Lavil-la enn kare parfe. (Rev. 21:15-21) Me Zan ti remarke ki enn kitsoz ti manke! Li dir: “E mo pa ti trouv okenn tanp dan lavil parski tanp lavil ti Segner Bondie Toupwisan ek Annyo. Lavil la pa ti bizin soley ouswa lalinn pou ekler li. Laglwar Bondie so lalimier e Annyo Bondie so flanbo.” (Rev. 21:22, 23) Bann ki form parti Nouvo Zerizalem pou ansam avek Zeova. (Ebre 7:27; Rev. 22:3, 4) Ek se Zeova ek Zezi ki tanp sa lavil-la.

16. Ki pou arive pandan Regn Mil An Zezi Kris?

¹⁶ Bann Kretien ki ena lesperans pou al dan lesiel bien zwaye kan zot pans sa lavil-la. Me bann ki ena lesperans pou viv lor later, zot osi zot interese ar sa lavil-la. Pandan Regn Mil An Zezi Kris, Nouvo Zerizalem pou fer later gagn boukou benediksion. Zan trouv sa bann benediksion-la pe koule kouma enn “larivier delo lavi.” Ek dekote sa larivier-la ena “bann pie lavi” avek bann fey ki “servi pou geri lepep.” (Rev. 22:1, 2) Sa lepok-la, tou dimounn pou kapav profit sa bann bon kitsoz-la. Tigit par tigit, tou bann ki obeir Zeova pou vinn parfe. Pa pou ena maladi ek douler, ek personn pa pou plore parski li sagrin.​—Rev. 21:3-5.

17. Dapre Revelasion 20:11-13, kisannla pou gagn bann benediksion pandan Regn Mil An Zezi Kris?

¹⁷ Kisannla pou gagn sa bann benediksion-la? Bann premie ki pou gagn sa bann benediksion-la se gran lafoul ki pou travers Armagedon ek bann zanfan ki kitfwa pou ne dan lemond nouvo. Me Revelasion sapit 20 promet osi ki bann mor pou resisite. (Lir Revelasion 20:11-13.) Bann fidel serviter Zeova dan lepase pou resisite. Me bann dimounn ki pa’nn gagn lokazion pou konn Zeova, zot osi zot pou resisite. (Zist. 24:15; Zan 5:28, 29) Eski savedir ki tou dimounn pou resisite pandan Regn Mil An Zezi Kris? Non. Bann ki’nn gagn lokazion pou servi Zeova, me ki’nn refiz servi Li, pa pou resisite. Parski zot pa’nn sezi lokazion ki zot inn gagne, zot pa merit viv dan Paradi ki pou lor later.​—Mat. 25:46; 2 Tes. 1:9; Rev. 17:8; 20:15.

18. Ki pou arive alafin bann 1,000 an?

¹⁸ Alafin bann 1,000 an, tou bann imin pou vinn parfe. Bann konsekans pese Adan pou nepli ena lefe lor bann imin. (Rom. 5:12) Kifer? Parski zot pou’nn fini disparet net. Lerla, alafin bann 1,000 an, bann ki lor later pou “koumans viv” parski zot pou’nn vinn parfe.​—Rev. 20:5, NW.

19. Kifer bizin enn leprev final?

¹⁹ Nou kone ki Zezi ti res fidel ar Bondie mem kan Satan ti teste li. Me eski tou dimounn ki pou vinn parfe pou res fidel ar Zeova kan Satan pou esey teste zot? Kan Satan pou sorti dan pwi-san-fon alafin bann 1,000 an, sak dimounn pou kapav montre Zeova ki li pou res fidel anver Li. (Rev. 20:7) Bann ki res fidel anver Zeova pandan leprev final, pou gagn lavi pou touletan ek zot pou konn vre liberte. (Rom. 8:21) Bann ki rebel kont Zeova pou detrir net, ansam avek Satan ek so bann demon.​—Rev. 20:8-10.

20. Ki to resanti kan to mazinn bann profesi ki ena dan liv Revelasion?

²⁰ Ki to resanti apre ki to’nn examinn sertin parti liv Revelasion? Mazine kouma li pou extraordiner kan nou pou trouv sa bann profesi-la realize? Eski sa pa motiv twa pou invit lezot pou ador Zeova ansam avek nou? (Rev. 22:17) Asterla ki nou’nn trouve seki pou arive dan lavenir, nou extra kontan, ek nou anvi dir parey kouma lapot Zan: “Amen. Vini, Segner Zezi!”​—Rev. 22:20.