Liv Revelasion​—Ki Li Vedir pou Twa Azordi?

1-2. Sit enn rezon kifer nou bizin interes nou ar liv Revelasion.

ESKI enn kikenn inn deza montre twa bann foto ki li ena dan so album? Kan to get bann foto-la, to trouv boukou dimounn ki to pa kone. Me ena enn foto ki kapte to latansion. Kifer? Parski to lor-la. Kan to get foto-la, to pe esey reflesi kan ek kotsa ti pran sa foto-la. To pe esey rapel osi bann lezot dimounn ki ena lor foto-la. An realite, to bien kontan sa foto-la parski to lor-la.

² Liv Revelasion, li parey kouma sa foto-la. Kifer? Pou omwin de rezon. Premierman, liv Revelasion finn ekrir pou nou. Premie verse sa liv-la dir: “Revelasion Zezi Kris, ki Bondie finn done pou montre so bann serviter seki pou arive biento.” (Rev. 1:1) Alor, seki’nn ekrir dan sa liv-la, li pa pou tou dimounn; li pou nou, bann serviter Bondie. Antan ki bann serviter Zeova, nou bizin pa etone pou aprann ki nou pe ede pou realiz bann profesi ki trouv dan sa liv extraordiner la. An realite, nou “dan sa foto-la.”

3-4. Dapre liv Revelasion, kan eski bann profesi ki trouv dan sa liv-la pou realize, ek ki sa bizin pous nou pou fer?

³ Deziem rezon pou kifer nou bizin interes nou ar bann profesi ki ena dan liv Revelasion se akoz lepok ki zot pe realize. Zan ti explike kan sa bann profesi-la ti pou realize. Li ti dir: “Gras-a lespri sin, mo finn retrouv mwa pandan zour Lesegner.” (Rev. 1:10, NW) Kan Zan ti ekrir sa bann parol-la, an 96 Nou Lepok, “zour Lesegner” ti ankor bien-bien lwin. (Mat. 25:14, 19; Lik 19:12) Dapre bann profesi Biblik, sa zour-la ti koumanse an 1914 kan Zezi ti vinn Lerwa dan lesiel. Depi sa lane-la, bann profesi ki trouv dan liv Revelasion ek ki konsern bann serviter Bondie, inn koumans akonpli. Wi, nou pe viv “pandan zour Lesegner”!

⁴ Parski nou pe viv sa lepok extraordiner la, nou bizin swiv konsey ki trouv dan Revelasion 1:3, ki dir: “Bienere dimoun ki lir, e bienere bann ki tann parol profesi, e ki gard seki finn ekrir isi; parski letan ki finn fixe pou sa bann kitsoz la pre pou arive.” Alor, nou bizin ‘lir, tann parol profesi, e gard seki finn ekrir,’ setadir obeir zot. Ki bann parol nou bizin obeir?

 5. Kouma liv Revelasion montre ki li bien inportan ki nou fer sir ki nou pe ador Zeova dan fason ki Li Li anvi?

⁵ Depi premie sapit liv Revelasion, nou aprann ki Zezi konn bien tou seki pe pase dan bann lasanble. (Rev. 1:12-16, 20; 2:1) Nou konpran sa kan nou lir bann mesaz ki Zezi ti avoy set lasanble dan Lazi Miner. Dan sa bann mesaz-la, Zezi ti donn bann konsey bien presi pou ki bann Kretien sa lepok-la fer sir ki zot pe ador Zeova dan fason ki Li Li anvi. Anplis, sa bann mesaz-la ankor bien itil pou bann serviter Bondie azordi. Ki leson nou aprann dan sa bann mesaz-la? Nou Sef, Zezi, kone si nou ena enn bon lamitie avek Zeova. Zezi diriz nou ek protez nou, ek li trouv tou kitsoz. Li kone seki nou bizin fer pou ki nou kontign gagn faver Zeova. Ki bann konsey Zezi ti done ek ki nou bizin obeir azordi?

 6. (a) Dapre Revelasion 2:3, 4, ki problem lasanble Efez ti ena? (b) Ki leson nou aprann ar konsey ki Zezi ti donn zot?

⁶ Lir Revelasion 2:3, 4. Fode pa nou perdi lamour ki nou ti ena o-koumansman pou Zeova. Dan mesaz ki Zezi ti avoy bann Kretien ki dan lasanble Efez, li ti dir zot ki zot ti ena landirans ek ki zot ti kontign servi Zeova malgre zot bann difikilte. Selman, zot ti nepli kontan Zeova parey kouma avan. Si zot pa ti regagn sa lamour ki zot ti ena o-koumansman la, zot pa ti pou kapav ador Zeova dan fason ki Li Li anvi. Dan mem fason azordi, nou bizin pa zis andire, me nou bizin kone osi pou ki rezon nou pe andire. Zeova pa zis interese ar seki nou fer, me Li osi interese ar bann rezon pou kifer nou pe fer sa. Nou motivasion bien inportan pou Li. Zeova anvi ki nou ador Li parski nou kontan Li ek nou rekonesan anver Li.​—Prov. 16:2; Mark 12:29, 30.

 7. (a) Dapre Revelasion 3:1-3, ki problem ti ena dan lasanble Sard? (b) Ki leson nou aprann ar konsey ki Zezi ti donn zot?

⁷ Lir Revelasion 3:1-3. Nou bizin kontign res lor nou gard. Bann frer ek ser dan lasanble Sard ti ena enn lot problem. Mem si dan lepase zot ti pe servi Zeova, asterla zot ti aret servi Li. Akoz sa, Zezi ti dir sa lasanble-la: “Revey twa.” Ki leson nou aprann? Biensir, Zeova pa pou bliye seki nou’nn fer pou Li. (Ebre 6:10, NW) Selman, fode pa nou panse ki, akoz nou’nn bien servi Zeova dan lepase, li nepli neseser ki nou fer zefor pou servi Li asterla. Mem si nou nepli kapav fer parey kouma avan, nou bizin kontign res bien okipe dan “travay Lesegner.” Nou bizin kontign res lor nou gard.​—1 Kor. 15:58; Mat. 24:13; Mark 13:33.

 8. Dapre Revelasion 3:15-17, ki leson nou kapav aprann ar bann parol ki Zezi ti dir bann Kretien dan Laodise?

⁸ Lir Revelasion 3:15-17. Nou bizin aktif ek servi Zeova avek tou nou leker. Dan mesaz ki Zezi ti avoy lasanble Laodise, li ti met laksan lor enn lot problem. Zot ladorasion pou Zeova ti “tied.” Parski zot ti perdi zot motivasion, Zezi ti dir zot ki zot ti ‘mizer ek malere.’ Zot ti bizin servi Zeova avek tou zot leker ek zot ti bizin aktif. (Rev. 3:19) Ki leson nou aprann? Si nou’nn perdi inpe motivasion, nou bizin ogmant nou rekonesans pou tou bann bon kitsoz ki Zeova ek so lorganizasion fer pou nou. (Rev. 3:18) Fode pa ki nou telman anvi ena enn lavi konfortab, ki nou bann aktivite spiritiel nepli enn priorite pou nou.

 9. Dapre mesaz ki Zezi ti avoy bann Kretien dan Pergam ek dan Tiatir, ki kitsoz nou bizin rezete?

⁹ Nou bizin rezet lansegnman bann aposta. Zezi ti koriz sertin Kretien dan lasanble Pergam, parski zot ti pe kree divizion dan lasanble. (Rev. 2:14-16) Li ti felisit bann Kretien dan lasanble Tiatir parski zot ti rezet “lansegnman Satan,” ek li ti ankouraz zot pou ‘gard bien’ laverite. (Rev. 2:24-26) Bann Kretien ki ti malad lor plan spiritiel ek ki ti les zot inflianse par bann fos lansegnman, ti bizin repanti. Ki leson nou aprann? Nou bizin rezet tou bann lansegnman ki pa an-akor avek laverite. Bann aposta “fer sanblan zot relizie alor ki zot bann ipokrit.” (2 Tim. 3:5) Si nou etidie Labib an profonder, li pou pli fasil pou nou rekonet bann fos lansegnman ek nou rezet zot.​—2 Tim. 3:14-17; Zid 3, 4.

10. Ki leson ankor nou kapav aprann ar seki Zezi ti dir lasanble Pergam ek Tiatir?

¹⁰ Nou bizin rezet tou bann form limoralite sexiel. Bann frer ek ser dan lasanble Pergam ek Tiatir ti ena enn lot problem. Zezi ti kondann sertin parmi zot, parski zot pa ti rezet limoralite sexiel. (Rev. 2:14, 20) Ki leson nou aprann? Mem si nou pe servi Zeova depi plizir lane, ek ki nou ena boukou privilez, fode pa nou panse ki Zeova pou aksepte ki nou ena enn lavi imoral. (1 Sam. 15:22; 1 Pier 2:16) Mem si bann valer moral sa lemond-la pe degrade, Zeova anvi ki nou kontign gard so bann prinsip moral.​—Efe. 6:11-13.

11. Ki nou’nn aprann ziska ler? (Get lankadre “Bann Leson pou Nou Azordi.”)

¹¹ Ki nou’nn aprann ziska ler? Nou’nn trouve ki nou bizin fer sir ki nou ador Zeova dan fason ki Li Li anvi. Si nou pe fer enn kitsoz ki Zeova pa kontan, nou bizin fer bann sanzman deswit pou ki nou kapav gagn faver Zeova. (Rev. 2:5, 16; 3:3, 16) Zezi ti koz lor enn lot kitsoz bien inportan dan bann mesaz ki li ti avoy bann lasanble. Ki sa kitsoz bien inportan la?

12. Ki nou kapav aprann ar bann mesaz ki Zezi ti avoy lasanble Smirn ek Filadelfi? (Revelasion 2:10)

¹² Anou get bann mesaz ki Zezi ti avoy lasanble Smirn ek Filadelfi. Li ti dir zot ki fode pa zot per si zot gagn bann persekision, parski Zeova ti pou rekonpans zot si zot ti res fidel. (Lir Revelasion 2:10; 3:10) Ki leson nou aprann? Nou bizin atann ki nou pou gagn bann persekision, ek nou bizin pre pou andir zot. (Mat. 24:9, 13; 2 Kor. 12:10) Kifer li bien inportan ki nou rapel sa?

13-14. Kouma bann kitsoz ki mansione dan Revelasion sapit 12 finn ena enn lefe lor bann serviter Bondie?

¹³ Liv Revelasion fer nou kone ki nou pou gagn bann persekision pandan “zour Lesegner,” setadir lepok ki nou pe viv azordi. Revelasion sapit 12 montre ki ti ena enn lager dan lesiel, zis apre ki Zezi ti vinn Lerwa dan Rwayom Bondie. Misel, setadir Zezi apre ki li ti retourn dan lesiel, ek so bann anz ti lager kont Satan ek so bann demon. (Rev. 12:7, 8) Satan ek so bann demon ti perdi sa lager-la. Lerla, finn zet zot lor later, ek zot pe fer tou bann dimounn lor later soufer. (Rev. 12:9, 12) Ki lefe sa finn ena lor bann serviter Bondie?

¹⁴ Liv Revelasion explik nou kouma Satan inn reazir. Satan nepli kapav al dan lesiel, alor li atak bann serviter Bondie ki lor later ek ki ena lesperans pou al viv dan lesiel. Sa bann Kretien-la zot bann reprezantan Rwayom Bondie ek zot “ena sa travay-la: rann temwaniaz lor Zezi.” (Rev. 12:17, NW; 2 Kor. 5:20; Efe. 6:19, 20) Kouma sa profesi-la finn realize?

15. Kisannla sa “de temwin” ki mansione dan Revelasion sapit 11 la, ek ki ti ariv zot?

¹⁵ Satan ti fer bann lennmi Bondie atak bann Kretien ki ti ena lesperans pou al dan lesiel ek ki ti pe organiz laktivite predikasion Rwayom Bondie. Sa bann zom-la ti reprezant sa “de temwin” ki mansione dan liv Revelasion-la. Liv Revelasion explike ki zot bann lennmi ti touy zot.b (Rev. 11:3, 7-11, NW) An 1918, ti met bann fos lakizasion lor wit frer ki ti pe organiz travay predikasion, ek ti kondann zot pou fer plizir lane dan prizon. Boukou dimounn ti panse ki travay sa bann Kretien-la ti arete, ek sa ti koumadir ti “touy” zot laktivite.

16. Ki ti arive an 1919, ek ki Satan pe kontign fer depi sa lepok-la?

¹⁶ Profesi ki ena dan Revelasion sapit 11 dir osi ki sa “de temwin” la ti pou resisite apre inpe letan. Mwins ki enn an apre ki sa bann frer-la ti al dan prizon, sa profesi-la ti realize dan enn fason ki personn pa ti atann. An Mars 1919, sa bann Kretien-la ti sorti dan prizon, ek plitar ti kennsel tou bann lakizasion ki ti ena kont zot. Lerla, deswit zot ti rekoumans organiz travay predikasion. Me Satan inn kontign atak bann serviter Zeova. Depi sa lepok-la, Satan pe avoy “enn larivier” persekision lor tou bann serviter Zeova. (Rev. 12:15) Vremem, se enn moman kot sakenn parmi nou bizin ena “landirans ek lafwa.”​—Rev. 13:10.

17. Mem si Satan ti kontign atak bann serviter Bondie, ki led zot ti gagne?

¹⁷ Revelasion sapit 12 explike ki bann serviter Bondie ti pou gagn enn led ki zot pa ti pe atann. Liv Revelasion dir ki “later” ti aval sa “larivier” persekision la. (Rev. 12:16) Ek se samem ki ti arive! Parfwa, bann kitsoz ki ena dan lemond Satan, kouma par exanp, bann lakour, pran bann desizion ki an faver bann serviter Zeova. Bann Temwin Zeova plizir fwa inn gagn bann case dan lakour ek sa finn donn zot enn sertenn liberte. Kouma zot finn servi sa liberte-la? Zot inn sezi tou lokazion ki zot ti gagne pou fer travay ki Zeova ti donn zot. (1 Kor. 16:9) Ki sa travay-la sa?

18. Pandan bann dernie zour, ki travay pli inportan nou ena pou fer?

¹⁸ Zezi ti anonse ki bann serviter Zeova ti pou pres “Bonn Nouvel Rwayom Bondie” partou lor later avan ki lafin vini. (Mat. 24:14) Kan zot prese, zot gagn led bann anz ki ena “enn mesaz Bonn Nouvel eternel pou proklam ar tou bann ki vivan lor later ek tou bann nasion, tribi, langaz ek pep.”​—Rev. 14:6.

19. Ki mesaz ankor nou bizin anonse?

¹⁹ Apart bon nouvel lor Rwayom Bondie, bann serviter Zeova ena enn lot mesaz ankor pou anonse. Zot bizin osi ed bann anz ki mansione dan Revelasion sapit 8 a 10. Sa bann anz-la anons bann maler ki bann dimounn ki rezet Rwayom Bondie pou gagne. Alor, bann Temwin Zeova pe anons enn mesaz zizman, ki koumadir “lagrel ek dife.” Sa mesaz-la anons bann zizman ki Zeova pou amene lor tou bann kitsoz ki ena dan lemond Satan. (Rev. 8:7, 13) Bann dimounn bizin kone ki lafin bien pre, pou ki zot kapav fer bann sanzman dan zot lavi, pou ki zot pa mor pandan “zour koler Zeova.” (Sof. 2:2, 3) Me sa mesaz-la pa fer bann dimounn plezir. Alor, nou bizin ena kouraz pou anons sa mesaz-la. Pandan gran detres, dernie mesaz ki nou pou anonse pou pli direk ankor.​—Rev. 16:21.

20. Ki nou pou examine dan de prosin lartik?

²⁰ Li bien inportan ki nou obeir bann parol sa profesi-la, parski seki finn ekrir dan liv Revelasion finn ekrir pou nou. (Rev. 1:3) Me kouma eski nou kapav andir bann persekision ek kontign pres sa bann mesaz-la avek kouraz? Nou pou gagn lafors ek kouraz gras-a sa de kitsoz-la: Premierman, nou bizin kone seki liv Revelasion dir lor bann lennmi Bondie, ek deziemman, nou bizin konn bann benediksion ki nou pou gagne dan lavenir si nou res fidel anver Zeova. Dan de prosin lartik, nou pou examinn sa bann kitsoz-la.