Eski nou bizin celebré bann fête?

BANN fête religieux ek lezot fête populaire ki celebré zordi dan beaucoup pays, zot pa sorti dan la Bible. Alors, kot-sa zot sorti? Si ou kapav faire bann recherche dan enn bibliothek, ou pou trouve sa interessant pou guette seki bann livre reference dire concernant bann fête ki populaire kot ou resté. Guette dé-trois l’exemple.

Pâques. The Encyclopædia Britannica dire: “Dan Nouveau Testament, pena nanyin ki faire nou croire ki [bann premier chrétien] ti celebré Pâques.” Couma eski Pâques finn commencé? So racine trouve dan bann religion païen. Pâques supposé faire dimoune rappel resurrection Jésus, mais bann coutume associé avek sa fête-la, zot pa chrétien. Par exemple, concernant “dizef Pâques” ki bien populaire, livre Celebrations dire: ‘Li parette ki longtemps ti peinde ek ti mange dizef pou bann fête printemps en Égypte, Perse, Grèce ek Rome. Dan sa lepok-la bann Perse ti pé donne dizef en cadeau pou fête l’equinoxe printemps.’

Fête l’année. Beaucoup pays ena different jour pou fête l’année, ek ena beaucoup different coutume ki associé avek sa fête-la. Concernant l’origine sa fête-la, The World Book Encyclopedia dire: “L’empereur romain Jules César ti etabli le l^er janvier couma jour l’année en 46 a.n.l. Bann Romain ti dedié sa jour-la pou Janus, bondié bann la-porte ek bann commencement. Mois janvier ti gagne so nom avek Janus, ki ti ena deux figure—enn ki guette devant ek enn ki guette derriere.” Alors bann fête l’année basé lor bann tradition païen.

Halloween (fête des morts). The Encyclopedia Americana dire: “Ena enn rapport entre certain coutume ki ena pendant Halloween, ek enn ceremonie ki bann pretre Celte ti faire avant lepok bann chrétien. Bann Celte ti ena bann fête pou deux parmi zot bann bondié principal—bondié soleil ek bondié bann dimoune mort . . . , so fête ti tombe le 1^er novembre, commencement nouveau l’année pou bann Celte. Fête pou bann dimoune mort finn doucement-doucement rente dan bann coutume chrétien.”

Bann lezot fête. Li pa possible pou koz lor tou bann fête ki dimoune celebré dan le monde. Seulement, Jéhovah pa accepté bann fête ki donne la gloire bann dimoune, ou-soit bann l’organisation ki dimoune finn faire. (Jérémie 17:5-7; Actes 10:25, 26) Si nou rappel aussi kot-sa bann fête religieux-la sorti, sa pou aide nou pou koné si zot faire plaisir Bondié ou-soit non. (Isaïe 52:11; Révélation 18:4) Bann principe la Bible ki mentionné dan chapitre 16 sa livre-la, pou aide ou pou decidé si Bondié d’accord ou-soit non, kan nou participe dan bann fête ki pena rapport avek religion.