KESTION BANN LEKTER

Dan lepok Jean Baptiste, “bann dimounn ti pe atann, ek dan zot leker, zot tou ti pe rezone konsernan Jean: ‘Eski se pa limem kitfwa ki le-Christ?’” (Luc 3:15) Kifer li posib ki bann Zwif ti pe atann ki Lemesi aparet sa lepok-la? Ena plizir rezon.

Apre ki Jésus ti ne, Jéhovah ti avoy so bann anz pou koz avek bann berze ki ti pe gard zot troupo dan bann laplenn pre ar Bethléhem. Bann anz ti anonse: “Zordi enn sover inn ne pou zot dan lavil David, limem Christ, Lesegner.” (Luc 2:8-11) Apre sa, ansam avek sa bann anz-la, ti ena “enn gran larme anz dan lesiel, ki ti pe loue Bondie ek ti pe dir:a ‘Laglwar pou Bondie lao dan bann oter, ek lor later, lape parmi bann dimounn ki Li kontan.’”​—Luc 2:13, 14.

Sirman sa mesaz-la ti ena enn gran lefe lor sa bann berze ki ti ena limilite la. Deswit zot ti al Bethléhem, ek kan zot ti trouv Joseph, Marie ek Jésus, zot tibaba, “zot ti fer konn sa mesaz ki bann anz ti dir zot lor sa zanfan-la.” Lerla, “tou bann ki ti tann sa ti bien etone ar seki sa bann berze-la ti dir.” (Luc 2:17, 18) Sa expresion “tou bann ki ti tann sa” montre ki bann berze pa ti koz zis ar Joseph ek Marie, me osi ar lezot dimounn. Apre, kan bann berze ti retourn kot zot, zot ti kontign “glorifie ek loue Bondie pou tou bann kitsoz ki zot finn tande ek trouve, parey kouma finn anons zot.” (Luc 2:20) Pena dout ki sa bann berze-la pa ti gard pou zotmem bann bon kitsoz ki zot ti tande konsernan le-Christ!

Kan Marie ti amenn so garson premie-ne dan tanp Jérusalem pou prezant li devan Jéhovah parey kouma Lalwa Mosaïk ti demande, profetes Anne “ti koumans remersie Bondie ek [ti] koz lor sa zanfan-la ar tou seki ti pe atann delivrans Jérusalem.” (Luc 2:36-38; Ex. 13:12) Alor, bann dimounn ti kontign tann nouvel konsernan nesans Lemesi.

Plitar, “bann astrolog ki sorti dan Les ti vinn dan Jérusalem, ek zot ti demande: ‘Kot sa kikenn ki finn ne kouma lerwa bann Zwif la ete? Parski nou finn trouv so zetwal kan nou ti dan Les, ek nou finn vini pou donn li loner.’” (Mat. 2:1, 2) Kan li ti tann sa, “Lerwa Hérode ek osi tou bann ki dan Jérusalem ti bien trakase. Li ti rasanble tou bann sef pret ek bann skrib ki ti parmi lepep, li ti demann zot ki kote le-Christ ti pou ne.” (Mat. 2:3, 4) Alor, boukou dimounn ti kone ki Lemesi ki Bondie ti promet, ti’nn ne!b

Luc 3:15, ki nou ti mansione lao, montre ki sertin Zwif ti panse ki Jean Baptiste ti kapav le-Christ. Selman, Jean pa ti soutenir sa lide-la parski li ti dir: “Sa kikenn ki pe vinn apre mwa-la, li pli for ki mwa, mo pa dign pou tir so sandalet. Li, li pou batiz zot avek lespri sin ek dife.” (Mat. 3:11) Sa bann parol Jean la ti fer bann dimounn atann ankor plis Lemesi.

Eski li posib ki bann Zwif dan premie siek ti baz zot lor profesi 70 semenn ki trouv dan Daniel 9:24-27 pou kalkil lepok kan Lemesi ti pou arive? Nou pa kapav rezet sa posibilite-la, me nou pa kapav konfirm li osi. An realite, dan lepok Jésus, ti ena boukou diferan interpretasion konsernan 70 semenn ek okenn ladan pa parey avek fason ki nou konpran sa profesi-la zordi.c

Bann Essénien, ki boukou dimounn ti konsider kouma enn sekt Zwif ki ti viv dan dezer, ti ansegne ki, ver lafin enn peryod 490 an, ti pou ena de Mesi ki ti pou aparet. Me nou pa kapav sir ki bann Essénien ti baz zot kalkil lor profesi Daniel. Mem si zot ti fer sa, li difisil pou krwar kouma bann Zwif an zeneral ti pou’nn kapav les zot inflianse par kalkil enn group dimounn izole.

Dan deziem siek Nou Lepok, sertin Zwif ti krwar ki sa 70 semenn-la ti koumanse avek destriksion premie tanp an 607 Avan Nou Lepok ek ti fini avek destriksion deziem tanp, an 70 Nou Lepok. Ti ena lezot Zwif ki ti panse ki sa profesi-la ti realize dan period bann Maccabée, dan deziem siek Avan Nou Lepok. Alor, bann Zwif pa ti dakor ant zotmem lor fason ki ti bizin kalkil sa 70 semenn-la.

Si bann zapot ek bann premie Kretien ti bien konpran profesi 70 semenn, nou kapav atann ki zot ti pou mansionn sa profesi-la kouma enn prev ki Jésus Christ ti Lemesi ek ki li ti’nn ariv exakteman lepok ki ti anonse. Me selman, pena okenn prev ki bann premie Kretien ti fer sa.

Li bon ki nou remark enn lot kitsoz. Souvan bann ki’nn ekrir bann Levanzil ti montre ki Jésus Christ ti realiz sertin profesi ki trouv dan bann Lekritir Ebraik. (Mat. 1:22, 23; 2:13-15; 4:13-16) Pourtan, okenn ekrivin pa montre ki ena enn lien ant profesi 70 semenn ek kan Jésus ti vinn lor later.

An rezime: Nou pa kapav sir ki bann dimounn dan lepok Jésus ti bien konpran profesi 70 semenn. Selman, bann Levanzil donn bann lezot bon rezon ki bann Zwif ti ena pou “atann” Lemesi.