“Fer Mwa Ena enn Leker Konple pou ki Mo Ena Lakrint pou To Nom”

 1. Ki savedir ena lakrint pou Bondie, ek kifer sa li bien inportan pou bann ki kontan Zeova?

BANN Kretien kontan Bondie ek zot ena lakrint pou Li. Sertin kapav panse ki sa de lide-la pa an-akor. Selman, nou pa pe koz lor enn kalite lakrint ki fer bann dimounn gagn per. Nou pe koz lor enn lakrint ki fer bann dimounn ena enn gran respe pou Bondie. Zot pa anvi desevwar zot Papa ki dan lesiel, parski zot pa anvi gat zot lamitie avek Li.​—Ps. 111:10, NW; Prov. 8:13.

 2. Dapre seki David inn dir dan Psom 86:11, ki de kitsoz nou pou examine asterla?

² Lir Psom 86:11.b Ki sa bann parol-la aprann nou? Zot montre nou ki David ti kone ki kantite li inportan pou ena enn gran respe pou Zeova. Anou examine kouma nou kapav aplik seki David ti dir dan so lapriyer. Premierman, nou pou get de-trwa rezon kifer nou bizin ena enn gran respe pou nom Bondie. Ek deziemman, nou pou gete kouma dan nou lavi toulezour, nou kapav montre ki nou ena enn gran respe pou nom Bondie.

 3. Kouma lexperyans ki Moiz ti fer ti ed li pou kontign ena enn gran respe pou nom Bondie?

³ Sey mazine seki Moiz ti resanti kan li ti lor Montagn Oreb ek ki li ti trouv enn parti laglwar Zeova pas devan li. Kitfwa samem lexperyans pli extraordiner ki enn dimounn inn fer avan ki Zezi vinn lor later! Moiz ti tann enn anz dir: “Zeova, Zeova, enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans, ki montre lamour fidel anver bann milye dimounn, ki pardonn bann erer, bann fot, ek bann pese.” (Ex. 33:17-23; 34:5-7) Sirman Moiz ti rapel sa lexperyans-la kan li ti servi nom Zeova. Sa pa etonn nou ki Moiz plitar ti ankouraz bann Izraelit pou ena “lakrint pou nom zot Bondie, Zeova, enn nom ki merit laglwar ek respe.”​—Det. 28:58.

 4. Ki kitsoz kapav ed nou pou ena plis respe pou Zeova?

⁴ Kan nou reflesi lor nom Zeova, li bon ki nou reflesi osi lor personalite Zeova. Nou bizin medit lor bann kalite ki Li ena, kouma par exanp so pwisans, so sazes, so lazistis, ek so lamour. Kan nou medit lor sa bann kalite-la ek bann lezot kalite ki Li ena, sa pou motiv nou pou respekte Li ankor plis.​—Ps. 77:11-15.

5-6. (a) Ki sinifikasion nom Bondie? (b) Dapre Exod 3:13, 14 ek Izai 64:8, kouma Zeova realiz so volonte?

⁵ Ki kitsoz nou kone lor sinifikasion nom Bondie? Boukou spesialis Labib dakor pou dir ki nom Zeova vedir “Li Fer Vinn.” Sinifikasion nom Zeova fer nou konpran ki nanye pa kapav anpes Zeova fer seki Li anvi. Zeova ena kapasite pou realiz so proze.

⁶ Kouma Li fer sa? Premierman, Zeova kapav vinn tou seki bizin pou realiz so proze. (Lir Exod 3:13, 14.c) Souvan, nou bann piblikasion ankouraz nou pou medit lor sa kapasite extraordiner ki Zeova ena la. Deziemman, Zeova kapav osi fer so bann serviter inparfe vinn seki bizin pou servi Li ek pou realiz so volonte. (Lir Izai 64:8.d) Se koumsa ki Zeova realiz so volonte. Nanye pa kapav anpes Li realiz so proze.​—Iza. 46:10, 11.

 7. Kouma nou kapav ogmant nou rekonesans pou nou Papa ki dan lesiel?

⁷ Kouma nou kapav ogmant nou rekonesans pou nou Papa ki dan lesiel? Nou kapav fer sa kan nou medit lor seki Li’nn fer ek osi lor seki nou reisi fer gras-a Li. Par exanp, kan nou medit lor Zeova so kreasion, nou inpresione ar tou seki Li’nn fer. (Ps. 8:3, 4) Ek kan nou medit lor seki Zeova finn ed nou akonpli pou nou kapav fer so volonte, sa ogmant nou respe pou Li. Nom “Zeova” li vremem extraordiner! So nom inplik so personalite, tou seki Li’nn fer, ek tou seki Li pou fer.​—Ps. 89:7, 8.

 8. Dapre Deteronom 32:2, 3, ki Zeova anvi konsernan so nom?

⁸ Zis avan ki bann Izraelit ti rant dan Later Promiz, Zeova ti fer Moiz aprann bann parol enn sante. (Det. 31:19) Lerla, Moiz ti fer lepep aprann sa sante-la. (Lir Deteronom 32:2, 3.e) Kan nou medit lor verse 2 ek 3, li kler ki Zeova pa anvi ki so nom res enn sekre, ouswa ki bann dimounn panse ki so nom tro sakre pou pronons li. Li anvi ki tou dimounn konn so nom! Bann Izraelit ti vremem gagn enn gran privilez pou tann Moiz koz lor Zeova ek So gran nom! Seki Moiz ti ansegn zot ti fortifie zot lafwa ek ti ankouraz zot, parey kouma ti lapli ki ed bann plant pou grandi. Kouma nou kapav fer sir ki nou ansegn dan sa fason-la?

 9. Kouma nou kapav ede pou sanktifie nom Bondie?

⁹ Kan nou prese, nou kapav servi Labib pou montre bann dimounn nom Bondie, Zeova. Nou kapav donn zot bann piblikasion, montre zot bann video, ouswa fer zot al lor nou sit Internet ki donn loner Zeova. Dan travay, dan lekol, ouswa kan nou pe vwayaze, nou kapav rod bann lokazion pou koz lor Zeova ek so bann kalite. Nou kapav koz lor bann zoli kitsoz ki Zeova pou fer pou bann imin ek pou later. Kan bann dimounn tann bann kitsoz koumsa, kitfwa pou premie fwa zot pou realize ki kantite Zeova kontan zot. Kan nou explik bann dimounn laverite lor nou bon Papa, nou pe ede pou ki so nom sanktifie. Nou ed zot pou konpran ki sertin kitsoz ki zot inn aprann lor Bondie se bann mansonz, bann foste ki Satan inn dir pou sali nom Bondie. Seki nou ansegn bann dimounn lor Labib, samem pli bon kitsoz ki zot kapav aprann.​—Iza. 65:13, 14.

10. Kan nou etidie Labib avek bann dimounn, kifer fode pa nou zis ansegn zot bann lalwa Zeova?

¹⁰ Kan nou etidie Labib avek bann dimounn, nou bizin fer zot konn nom Zeova ek ankouraz zot servi sa nom-la. Nou bizin osi ed zot pou aprann konn Zeova bien. Eski nou pou reisi fer sa si nou zis ansegn zot bann lalwa, bann instriksion, ek bann komannman Zeova? Enn bon etidian Labib kitfwa pou aprann bann lalwa Bondie, ek kitfwa li pou mem apresie zot. Me eski li pou obeir Zeova parski li kontan Li? Pa bliye ki Ev ti konn bann lalwa Bondie, me li pa ti vremem kontan Bondie, ek Adan osi parey. (Zen. 3:1-6) Alor, fode pa nou zis ansegn nou bann etidian bann lalwa Zeova. Ki nou bizin fer ankor?

11. Kan nou ansegn nou bann etidian bann lalwa Bondie, kouma nou kapav ed zot pou kontan sa Kikenn ki finn etabli sa bann lalwa-la?

¹¹ Bann lalwa Zeova zot touletan bon pou nou. (Ps. 119:97, 111, 112) Me nou bann etidian Labib kitfwa pa pou pans koumsa si zot pa konpran ki Zeova finn donn nou sa bann lalwa-la parski Li kontan nou. Alor, nou kapav demann nou bann etidian: “Dapre twa, kifer Zeova demann so bann serviter fer sa, ouswa pa fer sa? Ki sa aprann twa lor Zeova?” Si nou ed nou bann etidian pou medit lor Zeova ek pou devlop enn gran lamour pou so nom, nou pou plis kapav tous zot leker. Nou bann etidian pa pou kontan zis bann lalwa, me zot pou osi kontan sa Kikenn ki finn etabli sa bann lalwa-la. (Ps. 119:68) Zot lafwa pou grandi ek sa pou ed zot pou andir bann difikilte ki zot kapav gagne.​—1 Kor. 3:12-15, NW.

12. Dan ki sitiasion ek kifer David so leker pa ti res konple anver Zeova? Ki konsekans sa finn ena?

¹² Lerwa David ti anvi servi Zeova avek tou so leker. Akoz sa, li ti demann Zeova enn kitsoz bien inportan: “Fer mwa ena enn leker konple.” (Ps. 86:11) Dan so lavi, David ti trouve kouma li fasil pou ena enn leker partaze. Enn fwa, kan li ti lor so teras, li ti trouv Betsabe, enn madam ki ti marye, pe bengne. Dan sa moman-la, eski David so leker ti konple ouswa so leker ti partaze? Li ti konn lalwa Zeova, ki dir: “Fode pa ki to anvi gagn fam to prosin.” (Ex. 20:17) Me kanmem sa, li ti kontign get Betsabe. So leker ti partaze ant so dezir pou sa fam-la ek so dezir pou fer Zeova plezir. Mem si David ti kontan ek ti ena lakrint pou Zeova depi bien lontan, li ti azir dan enn fason egois. Lerla, David ti fer bann move kitsoz. Li ti zet dezoner lor nom Zeova. Ek akoz David, bann inosan ti bien soufer, parmi ti ena osi bann manb so fami.​—2 Sam. 11:1-5, 14-17; 12:7-12.

13. Kouma nou kone ki leker David ti revinn konple?

¹³ Zeova ti disiplinn David, ek David ti rekoumans ena enn bon relasion avek Zeova. (2 Sam. 12:13; Ps. 51:2-4, 17) David ti rapel bann soufrans ek maler ki ti arive parski ti les so leker partaze. Nou kapav osi konpran Psom 86:11 dan sa fason-la: “Donn mwa enn leker ki pa partaze.” Eski Zeova ti ed David pou ena enn leker konple, setadir ki pa partaze? Wi, parski plitar Parol Bondie ti dir ki David so “leker ti . . . antie pou Zeova, so Bondie.”​—1 Ler. 11:4; 15:3.

14. Ki nou bizin demann noumem, ek kifer?

¹⁴ Lexanp David ankouraz nou. Me li osi enn lavertisman pou nou, parski David ti fer enn pese bien grav. Mem si nou fek koumans servi Zeova ouswa nou pe servi Li depi plizir lane, nou bizin demann noumem, ‘Eski mo pe tini ferm kont bann latak Satan ki anvi diviz mo leker?’

15. Kouma lakrint pou Bondie kapav protez nou si nou trouv bann zimaz imoral?

¹⁵ Par exanp, si to trouv enn zimaz lor televizion ouswa lor Internet ki kapav fer twa ena bann panse imoral, kouma to pou reazir? Kitfwa to kapav esey konvink tomem ki zimaz-la ouswa fim-la pa pornografik. Me kitfwa se enn kitsoz ki Satan pe servi pou diviz to leker? (2 Kor. 2:11) Nou kapav konpar sa zimaz pornografik la ar enn ti sizofin ki enn kikenn servi pou fann enn gro bout dibwa. Pou koumanse, misie-la met pwint sizofin-la dan dibwa-la. Me amezir ki li tap sizofin-la, dibwa-la fann an-de. Nou kapav konpar bann zimaz imoral kouma pwint sa sizofin-la. O-koumansman, kitfwa sa bann kitsoz-la pa paret danzere, me bien vit sa kapav fer twa fer enn pese kont Zeova ek fer twa ena enn leker partaze. Alor, pa les okenn kitsoz imoral rant dan to leker! Kontign fer zefor pou ena enn leker konple ek sa pou fer twa ena lakrint pou nom Zeova!

16. Kan nou tante pou fer enn move kitsoz, ki bann kestion nou bizin poz noumem?

¹⁶ Apart bann zimaz imoral, Satan kapav servi lezot kitsoz osi pou tant nou. Kouma nou pou reazir? Li fasil pou rod bann pretext. Par exanp, nou kapav dir ar noumem: ‘Mo pa pou exkli si mo fer sa, alor sirman li pa sa kantite grav-la.’ Me sa kalite rezonnman-la bien pa bon! Vomie nou poz noumem bann kestion kouma: ‘Eski Satan pe esey servi sa tantasion-la pou diviz mo leker? Si mo les mo bann move dezir kontrol mwa, eski mo pou sali nom Zeova? Si mo fer sa, eski sa pou fer mwa vinn pli pros ar Bondie, ouswa eski sa pou elwagn mwa ar Li?’ Pran letan pou medit lor bann kestion koumsa. Priye pou gagn sazes. Reponn sa bann kestion-la dan enn fason onet ek pa rod anbet tomem. (Zak 1:5) Si to analiz tomem koumsa, sa pou protez twa. Sa pou ed twa pou tini ferm kont bann tantasion, ek parey kouma Zezi, to pou kapav dir: “Sorti la ale Satan!”​—Mat. 4:10.

17. Kifer fode pa ki nou leker partaze? Donn enn lexanp.

¹⁷ Fode pa ki nou ena enn leker partaze. Anou pran lexanp enn lekip ki so bann manb pa dakor ant zot. Sertin zwer pe rod laglwar zis pou zotmem, ena ki pa respekte bann reg, ek ena osi ki pena respe pou zot antrener. Bien difisil pou enn lekip koumsa gagn enn match, pa vre! Parkont, enn lekip kot ena linite ek kot tou so bann zwer zwe ansam, ena plis sans pou sorti vinker. To leker kapav vinn kouma sa lekip ki vinker la si to bann panse, to bann dezir, ek to bann santiman, toule trwa ansam pous twa pou servi Zeova. Pa bliye ki Satan ti pou kontan ki to leker partaze. Li anvi ki to bann panse, to bann dezir, ek to bann santiman ‘pa dakor ant zot’ ek ki zot al kont bann prinsip Zeova. Selman, pou ki to servi Zeova, to bizin ena enn leker konple. (Mat. 22:36-38) Alor, fode zame to les Satan diviz to leker!

18. An-akor avek Mishe 4:5, ki to bien deside pou fer?

¹⁸ Parey kouma David, priye Zeova ek dir Li: “Fer mwa ena enn leker konple pou ki mo ena lakrint pou to nom.” Fer tou seki to kapav pou azir an-akor avek sa lapriyer-la. Sak zour, dan tou to bann desizion, ki zot gran ouswa tipti, montre ki to ena enn gran respe pou nom Zeova ki sin. Kan to fer sa, twa ki enn Temwin Zeova, to pou donn laglwar nom Zeova. (Prov. 27:11) Si nou fer sa, nou tou nou pou kapav dir, parey kouma profet Mishe: “Nou pou mars o-nom Zeova nou Bondie pou touletan.”​—Mish. 4:5.