Imit Landirans Zeova

1-2. Kouma promes Zeova ki trouv dan Izai 65:16, 17 kapav ankouraz nou pou pa bes lebra?

LASANBLE rezional 2017 ti ena enn tem bien ankourazan: “Pa Bes Lebra!”. Sa lasanble-la ti montre nou kouma nou kapav andir nou bann problem. Kat-r-an finn pase depi ki nou finn gagn sa lasanble-la, ek nou ankor pe andire dan sa move lemond-la.

² Ki bann difikilte to fek gagne? Eski enn manb to fami ouswa enn bon kamarad inn mor? Eski to ena enn maladi bien grav? Eski to lasante pe degrade parski to pe vinn vie? Eski to’nn bizin fer fas ar enn katastrof natirel, laviolans, ouswa persekision? Eski to pe soufer akoz pandemi COVID-19, ouswa enn lot kitsoz? Nou atann avek inpasians zour kot sa bann problem-la pou form parti lepase, kan nou pou bliye zot ek zot pou nepli fatig nou!​—Lir Izai 65:16, 17.b

 3. Ki nou bizin fer depi asterla mem, ek kifer?

³ Lavi dan sa lemond-la bien dir, ek kitfwa nou pou bizin andir bann pli gran difikilte dan lavenir. (Mat. 24:21) Alor, nou bizin kontign ena plis landirans. Kifer? Parski Zezi ti dir: “Se par zot landirans ki zot pou sov zot lavi.” (Lik 21:19, NW) Kan nou reflesi lor kouma lezot inn reisi andir bann mem difikilte ki nou, sa kapav ed nou pou ena plis landirans.

 4. Kifer nou kapav dir ki Zeova meyer lexanp konsernan landirans?

⁴ Kisannla meyer lexanp konsernan landirans? Se nou Bondie Zeova. Sa repons-la kapav etonn twa, me si to reflesi bien, to pou konpran kifer. Se Lediab ki pe diriz lemond. Akoz sa, sa lemond-la ranpli ar problem. Zeova ena kapasite pou rezoud tou sa problem-la enn sel kout, me Li’nn fixe enn zour pou Li fer sa. (Rom. 9:22) An atandan, nou Bondie pe kontign andire ziska ki sa zour-la arive. Anou get nef kitsoz ki Zeova pe andire.

 5. Kouma nom Bondie inn sali, ek ki to resanti kan to reflesi lor la?

⁵ Inn sali so nom. Zeova kontan so nom, ek Li anvi ki tou dimounn respekte so nom. (Iza. 42:8) Me sa fer anviron 6,000 an asterla depi ki nom Zeova inn sali. (Ps. 74:10, 18, 23) Sa ti koumanse dan zardin Edenn kan Lediab (setadir “Kalomniater”) ti pretann ki Bondie pa ti anvi ki Adan ek Ev gagn enn kitsoz ki zot ti bizin pou zot ere. (Zen. 3:1-5) Depi sa zour-la, finn ena enn fos lakizasion lor Zeova, ki swadizan Li priv bann imin seki zot vremem bizin. Zezi ti bien afekte parski ti sali nom so Papa. Akoz sa, kan li ti ansegn so bann disip kouma pou priye, li ti ankouraz zot pou dir: “Nou Papa lao dan lesiel, ki to nom sanktifie.”​—Mat. 6:9.

 6. Kifer Zeova finn les boukou letan pase avan ki Li prouve ki Li ena drwa pou dirize dan lesiel ek lor later?

⁶ Boukou opoz zot ar Li ek ar so drwa pou dirize. Zis Zeova tousel ki ena drwa pou dirize dan lesiel ek lor later, ek Limem meyer Dirizan ki ena. (Rev. 4:11) Me Lediab finn esey anbet bann anz ek bann imin pou fer zot krwar ki Bondie pena drwa pou dirize. Sa ti pou pran boukou letan pou prouve ki Zeova ena drwa pou dirize ek ki Limem meyer Dirizan ki ena. Me Bondie ena sazes ek Li’nn les bann imin diriz zot par zotmem pandan lontan, pou ki zot konpran ki zot pa pou reisi diriz zot par zotmem si zot pa ekout zot Kreater. (Zer. 10:23) Gras-a pasians Bondie, personn pa pou ena okenn dout ki Bondie ena drwa pou dirize dan lesiel ek lor later. Zot tou dan liniver pou kone ki Zeova Limem meyer Dirizan ki ena ek ki se zis so Rwayom ki pou kapav amenn lape ek sekirite lor later.

 7. Kisannla finn rebel kont Zeova, ek ki Li pou fer ar zot?

⁷ Sertin parmi so bann zanfan inn rebel kont Li. Kan Zeova inn kree bann anz ek bann imin, zot ti parfe. Me apre, enn anz, Satan (setadir “Opozan”) inn rebel kont Zeova ek li’nn konvink bann imin parfe, Adan ek Ev, pou rebel kont Zeova zot osi. Apre sa, lezot anz ek lezot imin osi inn rebel kont Zeova. (Zid 6) Plitar, Zeova ti swazir enn pep pou Li, nasion Izrael. Me avek letan, sertin manb nasion Izrael ti rezet Zeova ek zot ti ador bann fos bondie. (Iza. 63:8, 10) Tousala inn bien bles Zeova! Me kanmem sa, Li’nn andire ek Li pou kontign andire ziska ki Li detrir tou bann rebel. Lerla, Zeova ek bann ki fidel anver Li, zot pou ere parski zot pou nepli bizin andire. Tou seki move dan sa lemond-la pou nepli existe!

8-9. Ki bann mansonz pe fane lor Zeova, ek ki nou kapav fer?

⁸ Bann mansonz Lediab. Satan inn pretann ki Zob ek tou bann lezot fidel serviter Zeova, pe servi Zeova par lintere. (Zob 1:8-11; 2:3-5) Lediab pe kontign fer sa lakizasion-la azordi. (Rev. 12:10) Nou kapav montre ki Satan enn manter kan nou andir nou bann difikilte ek nou res fidel ar Zeova parski nou kontan Li. Lerla, parey kouma Zob, Zeova pou beni nou parski nou finn andire.​—Zak 5:11.

⁹ Satan servi bann sef relizie pou dir ki Zeova Li kriel ek ki Li responsab tou bann soufrans ki ena lor later. Par exanp, kan enn zanfan mor, sertin sef relizie mem dir ki Bondie inn pran zanfan-la parski Li ti bizin plis anz dan lesiel. Sa bann sef relizie la zot vremem pena okenn respe pou Bondie! Me nou, nou kone ki Zeova enn Papa ki ena boukou lamour. Kan nou malad ouswa kan enn kikenn ki nou kontan mor, nou pa met tor lor Bondie. Okontrer, nou kone ki enn zour Li pou geri bann malad ek Li pou resisit bann mor. Nou anvi dir tou dimounn ki Zeova Li enn Bondie ki ena boukou lamour. Koumsa, Zeova pou kapav reponn ‘sa kikenn ki pe provok Li la.’​—Prov. 27:11.

10. Ki kitsoz Psom 22:23, 24 aprann nou lor Zeova?

¹⁰ So bann serviter ki Li bien kontan pe kontign soufer. Zeova enn Bondie ki ena boukou konpasion. Li bien tris kan Li trouv nou soufer, kitfwa akoz persekision, maladi, ouswa nou prop linperfeksion. (Lir Psom 22:23, 24.) Zeova konpran nou lapenn. Li anvi soulaz nou ek Li pou soulaz nou. (Konpar ar Exod 3:7, 8; Izai 63:9.) Biento, “Li pou souy tou [nou] larm. Pa pou ena ni lamor, ni dey, ni lamantasion, ni douler.”​—Rev. 21:4.

11. Ki Zeova resanti pou so bann serviter fidel ki’nn mor?

¹¹ Lamor so bann kamarad. Ki Zeova resanti pou so bann serviter fidel ki’nn mor? Li vremem anvi trouv zot! (Zob 14:15) Esey mazine ki kantite Zeova anvi retrouv so kamarad Abraam! (Zak 2:23) Ouswa retrouv Moiz, avek ki Li ti koze “fas-a-fas”! (Ex. 33:11) Zeova anvi tann David ek bann lezot ekrivin Psom sant bann zoli kantik pou Li! (Ps. 104:33) Zeova pa bliye so bann kamarad ki’nn mor. (Iza. 49:15) Li rapel tou ti detay lor zot personalite. Pou Bondie, tou so bann kamarad “vivan.” (Lik 20:38) Enn zour, Li pou resisit zot. Lerla, Li pou kapav rekoumans ekout zot bann lapriyer sinser ek Li pou aksepte zot ladorasion. Si enn kikenn ki to kontan inn mor, sa bann panse-la kapav rekonfort twa ek ankouraz twa!

12. Pandan bann dernie zour, ki kitsoz pe rann Zeova bien tris?

¹² Bann move dimounn fer lezot dimounn ditor. Kan rebelion ti koumanse dan zardin Edenn, Zeova ti kone ki sitiasion dan lemond ti pou anpire avan ki li ameliore. Zeova deteste lemal, linzistis, ek laviolans ki ena dan lemond azordi. Zeova inn touletan gagn traka bann dimounn ki feb ek ki pa kapav defann zotmem, kouma bann orfelin ek bann vev. (Zaka. 7:9, 10) Zeova bien tris kan Li trouv so bann fidel serviter gagn persekision ek al dan prizon. Nou kapav sir ki Zeova kontan tou so bann serviter ki pe andire ansam avek Li.

13. Ki kitsoz bien degoutan Zeova pe trouve lor later, ek ki Li pou fer biento?

¹³ Bann dimounn pe vinn deplizanpli imoral. Bondie inn kree bann imin dan so resanblans, me Satan kontan fer bann imin fer bann kitsoz ki imoral. Dan lepok Noe, kan Zeova “ti trouve ki bann dimounn ti pe fer boukou move kitsoz . . . Zeova ti regrete ki Li ti kree bann dimounn lor later, ek so leker ti fermal.” (Zen. 6:5, 6, 11) Eski sitiasion dan lemond inn ameliore? Non! Satan bien kontan kan li trouv tou bann form limoralite ki ena lor later azordi, parmi ena ladilter ek lomosexialite! (Efe. 4:18, 19) Satan plis kontan ankor kan se bann serviter Zeova ki fer bann pese bien grav. Kan zour ki Li’nn fixe pou arive, Zeova pou montre ki Li deteste limoralite ek Li pou detrir tou bann dimounn imoral ki pa anvi sanze.

14. Ki bann imin pe fer ar bann zanimo ek ar nou planet?

¹⁴ Bann imin pe detrir later ki Li’nn kree. Dimounn pe “dominn dimounn pou zot prop maler.” Anplis, zot pe detrir later ek bann zanimo, mem si Zeova ti donn zot lord pou okip later ek bann zanimo. (Ekle. 8:9; Zen. 1:28) Dapre bann exper, dan de-trwa lane, anviron enn milyon varyete plant ek zanimo kapav disparet akoz bann imin. Nou konpran kifer boukou dimounn trakase pou lanvironnman! Erezman ki Zeova promet ki Li pou “detrir bann ki detrir later” ek ki Li pou fer later antie vinn enn paradi.​—Rev. 11:18; Iza. 35:1.

15-16. Ki kitsoz bizin motiv nou pou andire ansam avek Zeova? Explike.

¹⁵ Reflesi lor tou bann kitsoz ki Zeova pe andire depi plizir milye lane. (Get lankadre “Bann Kitsoz ki Zeova Pe Andire.”) Zeova ti kapav detrir sa move lemond-la ninport kan. Me gras-a so pasians, nou pe gagn boukou benediksion! Reflesi lor sa lexanp-la. Fer koumadir enn misie ek so madam al aprann ki zot zanfan ki pankor ne, pou ne avek bann problem lasante bien grav, so lavi pou bien difisil, ek li pa pou viv lontan. Mem si zot kone ki zot pou gagn bann difikilte pou okip zanfan-la, sa bann paran-la bien kontan kan zanfan-la ne. Zot kontan zot zanfan, alor zot pre pou andir ninport ki difikilte ki zot pou gagne ek zot pou donn li meyer lavi ki ena.

¹⁶ Dan mem fason, tou bann desandan Adan ek Ev zot inparfe kan zot ne. Me kanmem sa, Zeova kontan zot ek Li gagn zot traka. (1 Zan 4:19) Me Zeova pa parey kouma bann paran dan sa lexanp-la, parski Zeova kapav ed so bann zanfan. Li’nn fini fixe enn dat kot Li pou tir tou soufrans ki ena lor later. (Mat. 24:36) Lamour ki Zeova ena pou nou, ankouraz nou pou kontign andire!

17. Kifer lexanp Zezi ki trouv dan Ebre 12:2, 3 donn nou lafors pou kontign andire?

¹⁷ Zeova enn lexanp parfe konsernan landirans. Zezi ti imit landirans so Papa. Kan li ti lor later, Zezi ti andir bann koze kontrer, laont, ek enn poto soufrans akoz nou. (Lir Ebre 12:2, 3, NW.c) Nou sir ki landirans Zeova inn donn Zezi lafors pou andire. Ek landirans Zeova kapav donn nou osi lafors pou andire.

18. Kouma 2 Pier 3:9 ed nou pou konpran seki pe arive gras-a pasians Zeova?

¹⁸ Lir 2 Pier 3:9. Zeova kone ki meyer moman pou detrir sa move lemond-la. So pasians inn permet enn gran lafoul, plizir milyon dimounn, pou rasanble pou ador Li. Zot tou zot bien kontan ki Zeova inn andire, parski sa finn donn zot letan pou ne, pou aprann kontan Li, ek pou vwe zot lavi avek Li. Kan Zeova pou rekonpans bann milyon dimounn ki’nn andire ziska lafin, sa pou prouve ki Li’nn pran enn bon desizion kan Li’nn deside pou ena pasians!

19. Ki kitsoz nou bien deside pou fer, ek ki rekonpans nou pou gagne?

¹⁹ Gras-a lexanp Zeova, nou’nn aprann kouma nou kapav andire avek lazwa. Malgre tou bann move kitsoz ki arive akoz Satan, Zeova Li res “nou Bondie ere.” (1 Tim. 1:11, NW) Pandan ki nou atann avek pasians ki Zeova sanktifie so nom, zistifie so souverennte, tir tou lemal ki ena lor later, ek rezoud tou nou bann problem, nou osi nou kapav res zwaye. Anou bien deside pou kontign andire ek anou pa bliye ki Zeova osi pe andire. Si nou fer sa, sa promes-la pou realize pou sakenn parmi nou: “Li pou bienere sa dimoun ki tini ferm dan leprev. Bann ki prouve zot ferm pou resevwar kouronn laviktwar ki Bondie finn promet bann ki kontan li.”​—Zak 1:12.