Kouma Nou Kapav Ador Bondie dan Fason ki Fer Li Plezir?

Kouma nou ti trouve dan leson avan, se pa tou relizion ki fer Bondie plezir. Selman, nou kapav ador nou Kreater dan enn fason ki Li kontan. Eski ena enn “vre relizion” ki fer Li plezir? (Zak 1:27) Anou gete seki Labib dir.

1. Kotsa nou kapav aprann kouma pou ador Bondie kouma Li anvi?

Nou kapav aprann sa dan Labib. Zezi ti dir Bondie: “To parol laverite.” (Zan 17:17) Ena sertin relizion ki pa koz lor laverite ki ena dan Parol Bondie, Labib. Zot ranplas li ar seki bann dimounn ansegne ek zot bann tradision. Me Zeova pa kontan bann ki “detourn lalwa Bondie.” (Lir Mark 7:9.) Kouma nou kapav fer Bondie plezir? Kan nou swiv seki Labib dir lor fason ki nou bizin ador Li, ek kan nou aplik so bann konsey.

2. Kouma nou bizin ador Zeova?

Nou bizin ador zis Zeova, parski Li nou Kreater. (Revelasion 4:11) Savedir ki nou bizin kontan Li ek ador zis Li tousel, ek fode pa nou servi bann stati ek bann zimaz.​—Lir Izai 42:8.

Nou bizin ador Zeova dan enn fason ki “sin e agreab.” (Romin 12:1) Savedir ki nou bizin viv dapre so bann prinsip. Par exanp, bann ki kontan Zeova pou kontan pou obeir so bann prinsip lor maryaz. Ek zot pa pou fer bann move kitsoz kouma par exanp, fime, mas fey betel, droge, ouswa bwar tro boukou lalkol.a

3. Kifer nou bizin ador Zeova ansam avek bann ki ador Li?

Gras-a bann renion ki nou fer sak semenn, nou kapav ‘sant louanz pou Zeova dan lasanble.’ (Psom 111:1, 2) Enn fason pou fer sa, se kan nou sant bann kantik. (Lir Psom 104:33.) Zeova demann nou pou asiste bann renion parski Li kontan nou, ek Li kone ki sa pou ed nou pou viv ere pou touletan. Dan nou bann renion, lezot kapav ankouraz nou ek nou osi nou kapav ankouraz lezot.

ANOU GET INPE PLIS

4. Fode pa nou servi bann stati ek bann zimaz pou ador Bondie

VIDEO: Eski Bondie Aksepte ki Servi Zimaz ek Stati pou Ador Li? (3:26)

• Ki ti arive kan sertin serviter Bondie ki mansione dan Labib ti servi enn stati pou ador Li?

Sertin dimounn esey vinn pli pros ar Bondie kan zot servi bann stati ek bann zimaz pou ador Li. Me kan nou fer sa, eski nou vremem vinn pli pros avek Li ouswa nou pe elwagn nou avek Li? Lir Exod 20:4-6 ek Psom 106:35, 36, ek apre sa, get sa bann kestion-la ansam:

• Ki kitsoz ouswa ki bann zimaz ou’nn trouve bann dimounn servi pou ador Bondie?

• Ki Zeova resanti kan nou servi bann stati ek bann zimaz pou ador Li?

• Eski ou panse ki nou kapav servi bann stati ek bann zimaz pou ador Bondie? Kifer ou dir sa?

5. Nou liber nou ar bann fos krwayans kan nou ador zis Zeova

VIDEO: Laverite Finn Liber Mwa (5:16)

Lir Psom 91:14, ek apre sa, get sa kestion-la ansam:

• Nou montre ki nou kontan Zeova kan nou ador zis Li tousel. Si nou fer sa, ki Li promet Li pou fer pou nou?

6. Nou ador Bondie pandan nou bann renion

Nou loue Zeova ek nou ankouraz sakenn nou kamarad kan nou sante ek kan nou reponn pandan bann renion. Lir Psom 22:22, ek apre sa, get sa bann kestion-la ansam:

• Eski ou kontan kan lezot reponn pandan bann renion?

• Eski ou ti pou kontan prepar ou pou donn enn repons?

7. Zeova kontan kan nou partaz seki nou aprann

Nou ena boukou lokazion pou partaz seki nou aprann dan Labib avek lezot. Lir Psom 9:1 ek 34:1, ek apre sa, get sa kestion-la ansam:

• Ki kitsoz ou finn aprann dan Labib, ek ki ou ti pou kontan partaz avek enn lot dimounn?

SEKI NOU’NN APRANN

Nou fer nou Kreater plezir kan nou ador zis Li tousel, kan nou loue Li pandan bann renion, ek kan nou partaz avek lezot seki nou’nn aprann.

Eski Ou Rapel?

• Kotsa nou kapav aprann kouma pou ador Bondie dan enn bon fason?

• Kifer nou bizin ador zis Zeova?

• Kifer nou bizin ador Bondie ansam avek bann dimounn ki anvi fer Bondie plezir?

DEKOUVER

Dan lartik « Je ne suis plus esclave des idoles » gete kouma enn madam inn reisi aret servi bann stati pou ador Bondie.

“Labib Sanz Bann Dimounn” (Latour Degard, 1^e Ziliet 2011, an Franse)

Bann konsey ki kapav ed ou pou reponn pandan bann renion.

“Loue Zeova dan Kongregasion” (Latour Degard, Zanvie 2019)

Gete kouma enn misie inn gagn bann bienfe kan li’nn asiste bann renion, mem si sa pa ti fasil pou li.

Zeova Inn Pran Mwa Bien Swin (3:07)

Boukou dimounn asosie lakrwa avek bann relizion Kretien, me eski nou bizin servi lakrwa pou ador Bondie?

“Kifer Bann Temwin Zeova Pa Servi Lakrwa pou Ador Bondie?” (Lartik lor jw.org)