Seki Rwayom Bondie Pou Fer

Rwayom Bondie pe deza dirize dan lesiel. Biento li pou fer bann gran sanzman lor later. Anou get sertin bon kitsoz ki nou kapav atann li pou fer.

1. Kouma Rwayom Bondie pou amenn lape ek lazistis lor later?

Pandan lager Armagedon, Zezi ki Lerwa dan Rwayom Bondie, pou detrir bann move dimounn ek bann gouvernman. (Revelasion 16:14, 16) Se lerla ki sa promes-la pou realize: “Ankor enn tigit letan bann ki fer lemal pou disparet.” (Psom 37:10) Gras-a Rwayom Bondie, Zezi pou fer sir ki ena lape ek lazistis partou lor later.​—Lir Izai 11:4.

2. Kouma lavi pou ete kan volonte Bondie pou realize lor later?

Kan Rwayom Bondie pou dirize, “bann ki swiv bon sime pou posed later e viv lor la pou toultan.” (Psom 37:29) Imazine kouma lavi pou ete kan pou ena zis bann dimounn ki swiv bon sime, ki kontan Zeova, ek ki kontan sakenn zot kamarad! Personn pa pou malad ek tou dimounn pou viv pou touletan.

3. Ki Rwayom Bondie pou fer apre ki bann move dimounn inn detrir?

Apre ki bann move dimounn inn detrir, Zezi pou regne antan ki Lerwa pandan 1,000 an. Pandan sa 1,000 an-la, Zezi ek bann 144,000 ki pou regne avek li, pou ed bann dimounn lor later pou vinn parfe. Alafin sa lepok-la, later pou vinn enn zoli paradi. Lerla, tou dimounn pou ere parski zot pe obeir bann lalwa Zeova. Apre sa, Zezi pou redonn Rwayom-la so Papa, Zeova. Ek finalman, Zeova so “nom [pou] sanktifie.” (Matie 6:9, 10) Tousala pou montre ki Zeova, Li enn bon dirizan, ek ki Li gagn traka so bann sitwayen. Apre sa, Zeova pou detrir Satan, bann demon, ek ninport kisannla ki swazir pou rebel kont So lotorite. (Revelasion 20:7-10) Gras-a Rwayom Bondie, lavi pou parfe ek sa pou dire pou touletan.

ANOU GET INPE PLIS

4. Rwayom Bondie pou detrir tou bann gouvernman imin

“Dimounn finn dominn dimounn pou zot prop maler.” (Ekleziast 8:9) Gras-a so Rwayom, Zeova pou repar tou bann dega ki finn arive akoz sa linzistis-la.

Lir Daniel 2:44 ek 2 Tesalonisien 1:6-8, ek apre sa, get sa bann kestion-la ansam:

• Ki Zeova ek So Garson, Zezi, pou fer ar bann gouvernman imin ek bann ki soutenir zot?

• Kouma seki ou’nn aprann lor Zeova ek Zezi, rasir ou ki zot pou azir dan enn fason ki zis?

5. Zezi limem pli bon Lerwa ki ena

Antan ki Lerwa dan Rwayom Bondie, Zezi pou ed bann dimounn lor later dan boukou fason. Zwe VIDEO-la pou trouve kouma Zezi finn montre ki li vremem anvi ed bann dimounn ek ki Bondie finn donn li pouvwar pou fer sa.

VIDEO: Zezi Inn Montre seki Rwayom Bondie Pou Fer (1:13)

Kan li ti lor later, Zezi ti donn enn avangou seki Rwayom Bondie pou fer dan lavenir. Lekel parmi sa bann benediksion-la ou plis anvi trouve? Lir sa bann verse-la pou aprann plis lor sa bann benediksion-la.

6. Enn zoli lavenir gras-a Rwayom Bondie

VIDEO: Lavenir Extraordiner ki Pe Atann Nou (4:38)

Lir Psom 145:16, ek apre sa, get sa kestion-la ansam:

• Ki ou resanti kan ou kone ki Zeova pou ‘rasazie e satisfe tou kreatir’?

SEKI NOU’NN APRANN

Rwayom Bondie pou realiz proze ki Zeova ena pou bann dimounn. Li pou fer later vinn enn paradi ek bann bon dimounn pou ador Zeova pou touletan.

Eski Ou Rapel?

• Kouma Rwayom Bondie pou sanktifie nom Zeova?

• Kifer nou kapav sir ki Rwayom Bondie pou realiz tou bann promes ki ena dan Labib?

• Parmi tou seki Rwayom Bondie pou fer, ki kitsoz ou plis anvi trouve?

DEKOUVER

Dekouver seki vedir Armagedon.

“Ki Ete Lager Armagedon?” (Lartik lor jw.org)

Examinn bann levennman ki pou arive pandan sa peryod ki Zezi ti apel “gran soufrans” la.​—Matie 24:21.

“Ki Ete Gran Soufrans?” (Lartik lor jw.org)

Gete kouma bann fami kapav mazinn zot ansam dan Paradi.

Mazinn Twa dan Paradi (1:50)

Dan lartik « J’étais tourmenté par de nombreuses questions, » enn dimounn ki ti rebel kont politik explike kotsa li finn gagn repons so bann kestion.

”Labib Sanz Bann Dimounn” (Latour Degard, 1^e Zanvie 2012, an Franse)