LARTIK LETID 16
Imit Zeova dan Fason ki Nou Konsider Nou Bann Frer ek Ser
“Pa ziz dapre laparans me ziz dapre lazistis.”—ZAN 7:24.
KANTIK 101 Travay Ansam dan Linite
REZIMEa
1. Ki verite bien rekonfortan Labib ansegn nou lor Zeova?
ESKI to ti pou kontan ki bann dimounn ziz twa dapre to kouler lapo, to figir, ouswa to groser? Biensir ki to pa ti pou kontan. Sa vremem rekonfort nou kan nou kone ki Zeova pa ziz nou dapre nou laparans! Par exanp, kan Samiel ti get bann garson Zese, li pa ti trouv seki Zeova ti trouve. Zeova ti dir Samiel ki enn parmi bann garson Zese ti pou vinn lerwa Izrael. Me kisannla Zeova ti pou swazir? Kan Samiel ti trouv Eliab, premie garson Zese, li ti dir: “Pena okenn dout, limem ki Zeova inn swazir ek ki pe debout devan Li.” Eliab ti telman inpresionan ki Samiel ti panse ki se limem ki Zeova ti pou swazir. Me Zeova ti dir Samiel: “Pa get so laparans, ni so oter, parski mo finn rezet li.” Ki leson nou aprann? Zeova Limem donn nou leson-la kan Li dir: “Enn dimounn trouv zis seki paret devan so lizie, me Zeova trouv seki ena dan leker.”—1 Sam. 16:1, 6, 7.
2. Dapre Zan 7:24, kifer fode pa nou ziz enn dimounn dapre so laparans? Donn enn lexanp.
2 Antan ki bann dimounn inparfe, nou tou nou ena tandans pou ziz lezot dapre zot laparans. (Lir Zan 7:24.) Me seki nou trouve ar nou lizie pa aprann nou boukou kitsoz lor enn kikenn. Anou pran enn lexanp: Mem enn bon dokter ki ena boukou lexperyans, li pa pou aprann boukou lor so pasian si li zis get li. Li bizin ekout pasian-la bien si li anvi kone ki li resanti, ki problem lasante li’nn deza gagne, ouswa ki bann sintom li ena. Kitfwa dokter-la pou osi fer enn X-ray ar pasian-la pou get andan so lekor. Si li pa fer sa bann kitsoz-la, dokter-la riske donn pasian-la enn move tretman. Dan mem fason, nou pa pou kapav konpran bien nou bann frer ek ser si nou aret nou zis lor zot laparans. Nou bizin esey konpran ki kalite dimounn zot ete vremem. Biensir, nou pa kapav lir dan leker, alor zame nou pa pou konpran zot parey kouma Zeova konpran zot. Me nou kapav fer nou maximum pou imit Zeova. Kouma?
3. Kouma bann lexanp Biblik ki nou pou examine pou ed nou pou imit Zeova?
3 Kouma Zeova tret so bann serviter? Li ekout zot. Li pran kont zot sitiasion ek bann kitsoz ki’nn inflians zot. Ek Li montre konpasion anver zot. Asterla, anou gete kouma Zeova ti tret Zonas, Eli, Agar, ek Lot, ek kouma nou kapav imit Li dan fason ki nou tret nou bann frer ek ser.
EKOUT BIEN
4. Kifer nou kapav ena enn move lopinion lor Zonas?
4 Nou pa konn boukou kitsoz lor Zonas, alor nou kapav panse ki li infidel ouswa ki pa kapav fer li konfians. Zeova ti donn li lord pou anons enn zizman lor lavil Niniv. Me olie ki li ti obeir, Zonas ti pran enn bato ki ti al dan lot direksion, “lwin ar Zeova.” (Zonas 1:1-3) Eski to ti pou donn Zonas enn lot sans pou obeir lord Zeova? Kitfwa non. Selman, Zeova ti trouve ki li ti merit enn deziem sans.—Zonas 3:1, 2.
5. Dapre Zonas 2:1, 2, 9, ki nou aprann lor Zonas?
5 Zonas ti montre ki kalite dimounn li ti ete vremem dan so lapriyer. (Lir Zonas 2:1, 2, 9.b) Pena dout ki Zonas ti priye Zeova plizir fwa. Me dan sa lapriyer-la, nou konpran ki Zonas pa ti zis enn kikenn ki ti refiz enn mision. So bann parol montre ki li ti ena limilite, ki li ti rekonesan, ek ki li ti bien deside pou obeir Zeova. Alor, sa pa etonn nou ki Zeova pa ti aret Li lor erer Zonas. Okontrer, Li ti reponn so lapriyer, ek Li ti kontign servi li kouma profet!
Nou pou kapav montre plis konpasion anver nou bann konpagnon si nou fer zefor pou konpran zot sitiasion (Get paragraf 6)e
6. Kifer li vo lapenn ki nou ekout bien?
6 Pou nou kapav ekout bien lezot, nou bizin ena limilite ek pasians. Li vo lapenn ki nou ekout lezot. Anou get trwa rezon kifer. Premierman, nou pa pou tir vit-vit bann move konklizion lor lezot. Deziemman, nou pou konpran zot santiman ek osi kifer zot inn azir dan enn sertenn fason, ek sa pou ed nou pou ena plis konpasion anver zot. Ek trwaziemman, kan nou les lezot koze, sa kapav ed zot pou aprann bann kitsoz lor zotmem. Parfwa, enn kikenn bizin exprim so santiman pou li reisi konpran so prop santiman. (Prov. 20:5) Enn ansien dan l’Asie dir: “Mo rapel enn erer ki mo ti fer: Mo ti koze avan ki mo ekoute. Mo ti dir enn ser ki li ti bizin donn bann pli bon repons dan renion. Plitar, mo ti aprann ki li pa ti tro konn lir ek ki li ti pe fer boukou zefor pou reponn.” Li vremem bien inportan ki bann ansien ekout “tou bann linformasion” avan ki zot donn enn konsey.—Prov. 18:13.
7. Ki nou aprann ar fason ki Zeova ti tret Eli?
7 Sertin frer ek ser gagn difikilte pou koz lor zot santiman akoz zot pase, zot kiltir, ouswa zot personalite. Kouma nou kapav ed zot pou ouver zot leker ek dir nou seki zot vremem resanti? Rapel fason ki Zeova ti azir anver Eli kan li ti pe sove akoz Zezabel. Se apre plizir zour ki Eli ti reisi dir so Papa ki dan lesiel seki li ti resanti. Zeova ti pran letan pou ekout li. Apre sa, Li ti ankouraz Eli ek Li ti donn li bann travay inportan pou fer. (1 Ler. 19:1-18) Kitfwa sa pou pran inpe letan avan ki nou bann frer ek ser santi zot alez pou koz ar nou. Me se zis kan zot inn pare pou koze ki nou pou kapav kone seki zot vremem resanti. Si nou ena pasians parey kouma Zeova, avek letan zot pou fer nou konfians. Lerla, kan zot pou pare pou partaz zot santiman ar nou, nou pou bizin ekout zot bien.
APRANN KONN TO BANN FRER EK SER
8. Dapre Zenez 16:7-13, kouma Zeova ti ed Agar?
8 Agar, servant Sarai, ti azir dan enn fason bien bet kan li ti vinn madam Abram. Kan li ti tom ansint, li ti koumans mepriz Sarai ki pa ti ena zanfan. Sa sitiasion-la ti telman anpire ki Sarai ti pous Agar. (Zen. 16:4-6) Akoz nou inparfe, kitfwa nou kapav panse ki Agar ti bien move ek ki li ti gagn seki li ti merite. Me Zeova pa ti trouv Agar dan sa fason-la. Li ti fer enn anz al get li. Kan anz-la ti trouv Agar, li ti ed Agar pou sanz so latitid ek ti beni li. Agar ti rann li kont ki Zeova ti pe obzerv li ek ki Li ti konn tou lor so sitiasion. Li ti dir: “To enn Bondie ki trouve, . . . sa kikenn ki trouv mwa la.”—Lir Zenez 16:7-13.c
9. Kifer Zeova ti tret Agar dan enn bon fason?
9 Ki Zeova ti remarke ar Agar? Zeova ti konn bien so pase ek tou seki li ti andire. (Prov. 15:3) Agar ti enn Ezipsienn ki ti pe viv dan enn fami Ebre. Parfwa, kitfwa li ti santi li kouma enn etranze. Ouswa kitfwa so fami ek so pei ti mank li. Anplis, Abram ti ena enn lot madam. Pandan enn tan, sertin zom fidel ti ena plis ki enn madam, me sa pa ti dan proze Zeova. (Mat. 19:4-6) Alor, sa pa etonn nou ki sa ti kree zalouzi ek laenn dan lafami. Zeova ti kone ki Agar ti tret Sarai dan enn move fason. Me kanmem sa, Li ti konpran santiman Agar ek so pase, ek akoz sa Li ti azir ar bonte avek li.
Aprann konn to bann frer ek ser pli bien (Get paragraf 10-12)f
10. Kouma nou kapav aprann konn nou bann frer ek ser pli bien?
10 Nou kapav imit Zeova kan nou esey konpran sakenn nou kamarad. Aprann konn to bann frer ek ser pli bien. Koz avek zot avan ek apre bann renion, pres avek zot, ek si posib invit zot pou enn repa. Kan to fer sa, to kapav etone. Par exanp, kitfwa to pou realize ki enn ser ki paret pa zanti, an realite li timid. Ouswa enn frer ki to ti panse li materyalis, an realite li bien zenere. Ouswa enn fami ki souvan vinn tar renion, an realite pe andire malgre lopozision. (Zob 6:29) Biensir, fode pa nou “rant dan zafer lezot dimounn.” (1 Tim. 5:13, NW) Me selman, li bon ki nou aprann konn nou bann frer ek ser ek ki nou kone ki kitsoz finn form zot personalite. Sa kapav ed nou pou konpran zot pli bien.
11. Kifer li inportan ki bann ansien konn bien zot bann frer ek ser?
11 Se sirtou bann ansien ki bizin aprann konn zot bann frer ek ser pli bien. Anou examinn lexanp enn frer ki apel Artur, ki ti pe servi kouma responsab sirkonskripsion. Li avek enn lot ansien ti vizit enn ser ki ti paret bien timid. Artur dir: “Nou ti aprann ki so misie ti mor de-trwa lane apre zot maryaz. Mem si so lavi ti bien difisil, li ti ed so de tifi pou kontan Zeova ek pou res fidel anver Li. Azordi, li pa tro trouv kler, ek li pe fer enn depresion. Kanmem sa, so lafwa ek so lamour pou Zeova inn res bien for. Nou’nn rann nou kont ki nou ti ena boukou pou aprann ar lexanp sa ser-la.” (Fil. 2:3) Sa responsab sirkonskripsion la ti swiv lexanp Zeova. Zeova konn so bann mouton ek Li konn zot soufrans. (Ex. 3:7) Kan bann ansien konn bien zot bann frer ek ser, zot plis kapav ed zot.
12. Ki bienfe Yip Yee ti gagne kan li ti aprann konn enn ser dan so lasanble?
12 Si to agase akoz enn frer ouswa enn ser, aprann konn li pli bien. Lerla, sa pou fer twa ena plis konpasion pou li. Anou get enn lexanp. Yip Yee, enn ser ki res dan l’Asie, dir: “Enn ser dan mo lasanble ti abitie koz bien for. Akoz sa, mo ti panse ki li ti ena bann move manier. Me enn zour, kan mo ti pres avek li, mo ti aprann ki li ti abitie ed so bann paran pou vann pwason dan bazar. Pou atir bann klian, li ti bizin koz bien for.” Yip Yee dir: “Mo ti realize ki mo ti bizin aprann konn mo bann frer ek ser pli bien pou mo konpran zot.” Twa osi, to bizin fer zefor pou aprann konn to bann frer ek ser pli bien. Kan to swiv konsey ki Labib done pou ouver to “leker angran,” an realite to pe imit Zeova ki kontan “tou dimoun.”—1 Tim. 2:3, 4; 2 Kor. 6:11-13.
MONTRE KONPASION
13. Dapre Zenez 19:15, 16, ki bann anz ti fer kan Lot ti pe tarde, ek kifer?
13 Kan li ti pas par enn sitiasion bien difisil, Lot ti tarde pou swiv bann instriksion Zeova. De anz ti vinn dir li kit Sodom ansam avek so fami. Kifer? Zot ti dir li: “Nou pou detrir sa landrwa-la.” (Zen. 19:12, 13) Me landemin gramatin, Lot ek so fami ti ankor kot zot. Alor bann anz ti averti Lot ankor enn fwa. Me li ti pe kontign “tarde.” Kitfwa nou kapav panse ki Lot pa ti kas latet ar seki Zeova ti dir, ouswa ki li ti dezobeisan. Me Zeova pa ti abandonn Lot. “Akoz konpasion ki Zeova ti ena pou li,” bann anz ti trap lame Lot ek so fami ek ti amenn zot andeor lavil.—Lir Zenez 19:15, 16.d
14. Pou ki rezon kitfwa Zeova ti ena konpasion anver Lot?
14 Ena plizir rezon kifer Zeova ti ena konpasion anver Lot. Kitfwa Lot ti pe ezite pou ale parski li ti per bann dimounn ki ti res andeor lavil. Ti ena lezot danze osi. Sirman Lot ti tann koz lor sa de lerwa ki ti tom dan bann pwi koltar la, dan enn vale ki pa ti tro lwin. (Zen. 14:8-12) Lot ti enn papa ek enn mari, alor li ti trakase pou so fami. Anplis, Lot ti bien ris, alor kitfwa li ti ena enn zoli lakaz dan Sodom. (Zen. 13:5, 6) Biensir, tousala pa ti bann rezon valab pou ki Lot pa obeir Zeova toutswit. Selman, Zeova pa ti aret li lor bann erer ki Lot ti fer. Okontrer, Li ti konsider Lot kouma enn kikenn ki “drwat.”—2 Pier 2:7, 8.
Kan nou ekout lezot bien, nou pou kone kouma nou kapav ena konpasion anver zot (Get paragraf 15-16)g
15. Olie ki nou ziz enn dimounn par so bann aksion, ki nou bizin fer?
15 Olie ki nou ziz enn dimounn par so bann aksion, nou bizin fer nou maximum pou konpran seki li resanti. Veronica, enn ser ki res dan l’Europe, ti esey fer sa. Li rakonte: “Ena enn ser ki ti touletan paret dan enn move mood. Li ti touletan res dan so kwin. Parfwa, mo ti per pou koz ar li. Me mo ti dir ar momem, ‘Si mo ti dan so plas, mo ti pou kontan ena enn kamarad.’ Alor, mo ti desid pou demann li seki li resanti. Finalman, li ti devid so leker ar mwa! Asterla, mo konpran li pli bien.”
16. Kifer nou bizin demann Zeova so led pou ki nou ena konpasion?
16 Se zis Zeova tousel ki kapav konpran nou net. (Prov. 15:11) Alor, demann Li so led pou trouv lezot dan mem fason ki Li ek pou kone kouma to kapav ena konpasion anver zot. Enn ser ki apel Anzhela ti trouve ki lapriyer ti ed li pou ena plis konpasion. Dan so lasanble, ti ena enn ser ki ti inpe apar. Anzhela rekonet: “Li ti pou bien fasil pou koumans kritik sa ser-la ek pou ‘lav lame’ ar li. Me mo ti demann Zeova so led pou ki mo kapav ena konpasion anver li.” Eski Zeova ti reponn lapriyer Anzhela? Li dir: “Nou ti al prese ansam ek apre sa nou ti koze pandan plizir lertan. Mo ti ekout li avek konpasion. Asterla, mo plis kontan li ek mo bien deside pou ed li.”
17. Ki nou bizin bien deside pou fer?
17 To pa kapav swazir pou montre konpasion zis anver sertin frer ek ser selman. Parey kouma Zonas, Eli, Agar, ek Lot, zot tou pe fer fas bann problem. Ek dan sertin sitiasion, kitfwa sa bann problem inn arive par zot fot. An realite, nou tou nou’nn deza met noumem dan problem, pa vre? Alor, li normal ki Zeova demann nou pou montre konpasion anver lezot. (1 Pier 3:8) Kan nou obeir Zeova, nou ede pou ki ena linite dan nou fami internasional, kot ena tou sort kalite dimounn. Alor, anou bien deside pou ekout bien nou bann frer ek ser, pou aprann konn zot pli bien, ek pou montre konpasion anver zot.
KANTIK 87 Vini! Zot Pou Gagn Rekonfor
a Nou inparfe, akoz sa nou ena tandans pou ziz lezot ek zot mobil. Me Zeova Li, Li “trouv seki ena dan leker.” (1 Sam. 16:7) Dan sa lartik-la, nou pou examine kouma Zeova ti tret Zonas, Eli, Agar, ek Lot avek boukou lamour. Sa pou ed nou pou imit Zeova dan fason ki nou konsider nou bann frer ek ser.
b Zonas 2:1, 2, 9: “1 Lerla Zonas ti priye Zeova depi dan vant pwason, 2 ek li ti dir: ‘Dan dezespwar, mo’nn kriye Zeova, ek Li’nn reponn mwa. Depi dan fon Tom, mo’nn kriye twa pou ed mwa. To finn tann mo lavwa. 9 Me mwa, mo pou ofer twa bann sakrifis ek ar mo lavwa mo pou montre twa mo rekonesans. Promes ki mo’nn fer twa, mo pou tini li. Se Zeova ki delivre.’”
c Zenez 16:7-13: “7 Plitar, anz Zeova ti trouv li pre ar enn lasours dan dezer, lasours ki ti trouv lor semin ki al Shour. 8 Anz-la ti dir li: ‘Agar, servant Sarai, kot to sorti ek kot to pe ale?’ Li ti reponn: ‘Mo pe sove depi kot Sarai.’ 9 Lerla anz Zeova ti dir li: ‘Retourn kot Sarai ek imilie twa devan li.’ 10 Apre, anz Zeova ti dir li: ‘Mo pou miltipliye to desandans, zot pou vinn telman boukou ki pa pou kapav kont zot.’ 11 Anz Zeova ti azoute: ‘To ansint, ek to pou donn nesans enn garson. To bizin apel li Ismael, parski Zeova finn tann to soufrans. 12 Li pou ena enn move karakter parey kouma enn bourik sovaz. Li pou kont tou dimounn ek tou dimounn pou kont li. Ek li pou res anfas tou so bann frer.’ 13 Lerla, Agar ti pronons nom Zeova ek ti dir Li: ‘To enn Bondie ki trouve,’ ek li ti azoute: ‘Eski mo finn vremem trouv isi sa kikenn ki trouv mwa la?’”
d Zenez 19:15, 16: “15 Kan soley ti pe koumans leve, bann anz-la ti koumans met presion lor Lot, zot ti dir li: ‘Degaze! Pran to madam ek to de tifi ki avek twa, pou ki to pa mor akoz erer sa lavil-la.’ 16 Kan li ti pe tarde, lerla, akoz konpasion ki Zeova ti ena pou li, bann zom-la ti trap so lame ek lame so madam ek lame so de tifi, ek zot ti fer li sorti ek ti met li andeor lavil.”
e DESKRIPSION ZIMAZ: Enn frer aze agase parski enn zenn frer inn rant tar dan renion. Plitar, li aprann ki sa zenn frer-la inn rant tar parski li’nn fer enn aksidan loto.
f DESKRIPSION ZIMAZ: Enn responsab group predikasion trouv enn ser ki paret inpe apar. Plitar, li aprann ki sa ser-la timid ek ki li pa tro alez avek bann dimounn ki li pa tro kone.
g DESKRIPSION ZIMAZ: Premie fwa ki enn ser zwenn avek enn lot ser dan Lasal, li panse ki sa ser-la ena enn karakter bien for ek ki li pa interes li ar lezot. Me kan li pas letan avek sa ser-la, li rann li kont ki li pa koumsa.