Mbola matanjaka ny tanora ka afaka manompo bebe kokoa an’i Jehovah. (Ohab. 20:29) Misy, ohatra, manorina sy mikojakoja Efitrano Fanjakana. Manompo ao amin’ny Betela koa ny tanora sasany, ka manao pirinty sy manakambana Baiboly na boky ara-baiboly. Misy koa manampy tra-boina miaraka amin’ny Vavolombelona efa za-draharaha. Be dia be koa ny tanora mpisava lalana mianatra tenim-paritra na teny vahiny, mba hitoriana ny vaovao tsara. Nihira toy izao ny mpanao salamo: ‘Izay mitady an’i Jehovah tsy mba ho ory zava-tsoa.’ (Sal. 34:10) Tsy mba mandiso fanantenana an’izay mazoto manompo azy tokoa i Jehovah. Raha manao izay azontsika atao isika mba hanompoana azy, dia toy ny hoe ‘manandrana’ ka hahita fa ‘tsara izy.’ Tena ho sambatra isika raha manompo azy amin’ny fo manontolo. w16.08 3:5, 8

Afaka manome hery antsika amin’ny alalan’ny fanahy masina i Jehovah, sady tena te hanao an’izany. (1 Tan. 29:12) Tena mila mangataka fanahy masina àry isika, raha te hahavita hiatrika an’izay fitsapana alefan’i Satana sy ny tontolony. (Sal. 18:39; 1 Kor. 10:13) Faly isika fa manana ny Tenin’Andriamanitra, izay avy amin’ny herin’ny fanahy masina. Betsaka koa ny sakafo ara-panahy azontsika isam-bolana. Mampahery antsika koa ny Zakaria 8:9, 13. Tenin’i Jehovah tamin’ny Jiosy nanorina ny tempolin’i Jerosalema no voalaza ao. Mahazo hery koa isika satria ampiofanin’i Jehovah any amin’ny fivoriana sy fivoriambe ary sekoly ara-baiboly. Manampy antsika izy ireny mba hanana antony tsara hanompoana azy sy hahavita ny andraikitra ampanaoviny antsika ary hanatratra tanjona. (Sal. 119:33) Miezaka mafy àry ve ianao mba hahazo hery avy amin’izany fampiofanan’i Jehovah izany? w16.09 1:10, 11

Hita ao amin’ny Lalàn’i Mosesy fa tena tsy tian’i Jehovah raha miakanjo hoatran’ny lehilahy ny vehivavy, na miakanjo hoatran’ny vehivavy ny lehilahy. (Deot. 22:5) Misy karazan’akanjo mahatonga ny lehilahy ho hoatran’ny vehivavy koa ankehitriny, na mahatonga ny vehivavy ho hoatran’ny lehilahy. Misy koa tsy ahafahana manavaka tsara hoe lehilahy ve ilay manao azy sa vehivavy. Hita avy amin’ilay lalàna nomen’i Jehovah anefa fa tsy tiany hanao fitafiana toy izany isika. Misy toro lalana manampy ny Kristianina hahay hifidy akanjo ao amin’ny Baiboly. Azontsika arahina foana izy ireny, na aiza na aiza misy antsika, ary na inona na inona kolontsaina na toetany any amin’ny tanintsika. Tsy mila lisitra lava be isika mba hahalalana hoe inona no karazana fitafiana azo ekena sy tsy azo ekena. Manaraka ny toro lalan’ny Baiboly fotsiny isika. Na izany aza, dia mbola be dia be ny karazana fitafiana azontsika anaovana. w16.09 3:3, 4