Tsy ampy ny miteny amin’ny zanakao hoe inona no tsara ary inona no ratsy. Mila ampisaintsainina izy dia anontaniana, ohatra, hoe: ‘Nahoana no raran’ny Baiboly ny zavatra sasany mety hahafinaritra antsika? Nahoana ianao no resy lahatra fa mahasoa anao foana ny mankatò ny toro lalan’ny Baiboly?’ (Isaia 48:17, 18) Misy zavatra hafa tena tokony hasainao eritreretin’ny zanakao koa, raha te hatao batisa izy: Fantany tsara ve ny andraikitry ny Kristianina, ary vonona hanao an’izany ve izy? Hainy ve hoe inona ny soa ho azony ary inona no tsy maintsy hiaretany? Nahoana no azo lazaina hoe betsaka lavitra noho ny zavatra hiaretany ny soa ho azony? (Mar. 10:29, 30) Azo inoana fa ho tonga ao an-tsainy izany rehefa vita batisa izy. Aleo anefa dieny mbola tsy vita batisa izy, dia efa ampiana hisaintsaina tsara an’ireo. Azo antenaina kokoa amin’izay hoe ho resy lahatra izy fa mahasoa azy foana ny manaraka an’izay lazain’ny Baiboly. w17.12 21 § 14-15

Maro aminareo, ry rahalahy sy anabavy malala, no miady amin’ny aretina. Misy koa efa zokinjokiny nefa mbola tsy maintsy mikarakara havana be taona. Ny sasany indray miady mafy vao mahazo izay tena ilain’ny ankohonany. Maro no tena mijaly, satria indray mitontona ao aminy ny ankamaroan’ireo olana ireo. Raha zavatra tsy mananaina aza anefa sarobidy amin’i Jehovah, tsy mainka ve fa ianao! Sarobidy aminy ianao satria noho ianao tia azy no mahatonga anao hanompo azy, fa tsy noho ianao voatery manao an’izany. (Sal. 19:1, 3, 14) Fantatr’ilay Raintsika be fitiavana ny momba anao rehetra. ‘Na ny volon-dohanao aza voaisany’ daholo. (Mat. 10:30) Manome toky antsika koa ny mpanao salamo hoe: “Fantatr’i Jehovah ny fiainan’ny tsy manan-tsiny.” (Sal. 37:18) Hitany ny olana rehetra atrehinao, ary afaka manome anao hery hiaretana ny olana tsirairay izy. w18.01 7 § 1; 8 § 4

Resy lahatra ny olona maro rehefa nahita ny nananganan’i Petera an’i Tabita, ka lasa “nino ny Tompo.” Afaka niresaka tamin’ny hafa momba an’i Jesosy àry izy ireo, sady afaka nanaporofo hoe mahavita manangana ny maty i Jehovah. (Asa. 9:36-42) Nanangana ny maty koa ny apostoly Paoly. Tany Troasy, any avaratrandrefan’i Torkia amin’izao, izy indray mandeha. Nanao lahateny tao amin’ny rihana faharoa tamin’ny trano iray izy, hatramin’ny misasakalina. Nanatrika teo ny ankizilahy atao hoe Eotyka, ary nipetraka teo am-baravarankely. Tafatory anefa izy dia nianjera avy teny. I Lioka angamba no tonga voalohany teny aminy sy nijery azy. Dokotera i Lioka ka fantany fa tsy hoe naratra sy torana fotsiny ilay ankizilahy, fa maty mihitsy. Nidina i Paoly avy eo ary namihina an’i Eotyka. Gaga be ny olona satria hoy izy: “Efa niverina ny ainy.” Nisy vokany be tamin’izay nanatri-maso teo izany. “Fampiononana lehibe no azon’izy ireo” rehefa fantatr’izy ireo hoe velona indray ilay ankizilahy efa maty.—Asa. 20:7-12. w17.12 5 § 10-11