I vyani vino twamanya pa luse luno Yeova wakwata? Uzye walangilila uli ukuti “asilonda umuntu ali wensi akononwe”? (2 Pet. 3:9) Elenganyini pali vino walangizye uluse uku antu aluvyanyizye sana. Umwene Devedi wacisile imembu izipisye wakwe uzelele alino nu kukoma umuntu. Nomba lino Devedi walapile Yeova wamulanzile uluse nu kumwelela. (2 Sam. 12:​1-12) Umwene Manase wacisile ivintu viipe sana umu umi wakwe. Nomba lino walapiile Yeova wamulanzile uluse nu kumwelela. (2 Mila. 33:​9-16) Malyasi yaa yakatwiusya ukuti Yeova akalanga uluse ndi cakuti umuntu walapila. Yeova alatuutulula antu yaa pano ilwike ukuti yacitanga iviipe nupya yalapiile. w24.05 4 ¶12

Pa cisila cakuti Yeova wapususya antu yakwe ukufuma umu uzya umu Ijipti, wasonsile ya simapepo akuomba api tenti lya kupepelapo. Aina Levi nayo yali nu kulaomba imilimo yuze iya pi tenti lya kupepelapo. Uzye Yeova wasakamalanga ningo yano yaombelanga api tenti lya kupepelapo, nanti yano ikalanga umupipi ni tenti lya kupepelapo, ukucila asyala? Awe. Yeova ataya na kapatulula. Yonsi kwene aikalanga umu nkambi yakweti isyuko lya kuipakizya ucuza na Yeova umu nzila iliimwi, asi mulandu ni milimo ino yapeezilwe api Itenti lya kupepelapo nanti kuno ikalilanga. Wakwe, walesile ukuti yonsi yalola ikumbi alino ni cimbilimbili ca moto icali papela iitenti lya kupepelapo. (Kufu. 40:38.) Ndi cakuti ikumbi lyatandika ukuya kuze, yonsi kwene kumwi sile na ikalanga ukutali yalilolanga nu kutandika ukulonga iviya vyao, kupangulula ma tenti, alino nu kutandika ukupitila pamwi. (Mpe. 9:​15-23) Vikwene avino caya na ndakai kwene, asi mulandu na kuno tukaikala, Yeova watutemwa, akatusakamala nupya akatucingilila. w24.06 4 ¶10-12

Umi wakwe Devedi wali mu uzanzo. Umwana wakwe Abusalomu walondanga kumukoma pakuti aliwe apyane pa wene. (2 Sam. 15:​12, 13) Devedi walondekwanga ukuutuka kufuma mu Yelusalemu lilyo kwene sile. Lino aomvi yakwe yapitanga, Devedi wilwike ukuti kwalondekwanga umwi uwalinzile ukusyala mu Yelusalemu pakuti amunena vino Abusalomu akupanga ukucita. Fwandi wanenyile Zadoki na ya simapepo yauze ukuswilila mu musumba pakuti yamunena ivikucitika. (2 Sam. 15:​27-29)Yalinzile ukuya acenjele sana pa kuomba umulimo uu. Devedi wanenyile Zadoki na Husyai cuza wakwe muze ukuti yamwazwe pakuti afikilizye vino wapanzile ukucita. (2 Sam. 15:​32-37) Husyai waicisile kwati akutungilila Abusalomu nu kumupanda mano, lelo cino wacisile vii walondanga ukwazwa Devedi pakuti akazanze Abusalomu. Lino Abusalomu uvwila ukupanda mano kwakwe Husyai, Husyai wanenangako Zadoki na Abiata. (2 Sam. 17:​8-16) Lyene yasininkizye ukuti yanena Devedi pali vino Abusalomu akupanga ukucita. (2 Sam. 17:17) Yeova wazwile Zadoki na ya simapepo yauze ukucingilila Devedi.—2 Sam. 17:​21, 22. w24.07 4-5 ¶9-10