Зефаниа
1 Иудагийн хаан Амоны хүү Иосиагийн үед Ехова Хезекиагийн гуч, Амариагийн жич, Гедалиагийн ач, Кушигийн хүү Зефаниагаар* хэлүүлсэн үг нь дараах юм.
2 Ехова: «“Би бүх юмыг газрын хөрснөөс арчина” гэж тунхаглаж байна.
3 Мөн Ехова: “Би хүн, амьтныг устгана.
Тэнгэрийн шувууд, далайн загас,
Бүдрүүлэх зүйлс*, хорон муу хүмүүсийг устгана.
Би хүмүүсийг газрын хөрснөөс арчина.
4 Би Иуда, Иерусалимын бүх оршин суугчийг шийтгэнэ.
Энэ газраас Баалын бүх үлдэгдлийг ор мөргүй арилгана.
Харийн бурхдын тахилчид болон
Энэ ард түмний хуурамч тахилчдын нэрийг дахин хэн ч дурсахааргүй болгоно.
5 Дээвэр дээр тэнгэрийн эрхэст мөргөдөг,
Мөн надад мөргөж, үнэнч байна гэж тангарагладаг мөртлөө
Малкомд үнэнч байна гэж тангарагладаг хүмүүсийг Ехова би устгана.
6 Ехова намайг дагахаа больсон,
Удирдамж зааврыг минь хайдаггүй, асууж лавладаггүй хүмүүсийг Ехова би хөнөөнө” гэж тунхаглаж байна.
7 Еховагийн өдөр ойрхон байгаа учраас Хэмжээгүй эрхт Эзэн Еховагийн өмнө чимээгүй бай.
Ехова тахил бэлдсэн, урьсан зочдоо ариусгасан.
8 Тэрбээр: “Ехова би тахил өргөх өдрөө ноёд, хааны хөвгүүдтэй,
Мөн гадныхны хувцсыг өмсдөг бүх хүнтэй тооцоо бодно.
9 Эзнийхээ өргөөг хүчирхийлэл, заль мэхээр дүүргэдэг,
Тавцан* дээр гардаг хүн бүртэй би тэр өдөр тооцоо бодно” гэж айлдсан.
10 Мөн Ехова ийн айлдаж байна.
“Тэр өдөр Загасны дааман хаалганаас хашхирах дуу,
Хотын хоёрдугаар дүүргээс уйлах чимээ,
Толгодын тэндээс чанга нижигнээн сонсогдоно.
11 Мактешийн* оршин суугчид аа, гашуудагтун!
Яагаад гэвэл худалдаачид бүгдээрээ устаж үгүй болсон.
Мөнгө жинлэдэг бүх хүн устгагдсан.
12 Тэр үед би дэн барин Иерусалимыг сайтар нэгжиж,
Бардам сэхүүн хүмүүстэй тооцоо хийнэ.
Учир нь тэд: «Ехова сайн ч юм хийхгүй, муу ч юм хийхгүй» гэж боддог.
13 Тэдний эд хөрөнгө булаагдаж, гэр орон нь сүйрнэ.
Тэд гэр орон барих боловч тэндээ амьдрахгүй.
Тэд усан үзэм тариалах боловч дарсыг нь уухгүй.
14 Еховагийн агуу өдөр ойрхон байна!
Ойрхон бөгөөд асар хурдтай ойртож байна!
Еховагийн өдрийн дуу чимээ аймшигтай юм.
Дайчид хүртэл цөхрөн хашхирна.
15 Тэр өдөр бол уур хилэнгийн өдөр,
Гуниг цөхрөл, зовлон шаналлын өдөр,
Салхи шуурга, сүйрлийн өдөр,
Харанхуй, хар бараан өдөр,
Үүлс хуралдсан, түнэр харанхуйн өдөр,
16 Бэхлэгдсэн хотууд болон булангийн өндөр цамхгуудын эсрэг
Бүрээ үлээж, дайны уухай хадаах өдөр.
17 Би хүмүүсийг зовлонд унагана.
Тэд сохор хүн шиг явна.
Учир нь тэд Ехова миний эсрэг нүгэл үйлдсэн билээ.
Тэдний цус шороо шиг,
Гэдэс нь ялгадас шиг асгарна*.
18 Еховагийн уур хилэнгийн өдөр тэднийг алт нь ч, мөнгө нь ч аврахгүй.
Учир нь миний уур хилэнгийн гал газар нутгийг* бүхэлд нь түймэрдэнэ.
Бүх оршин суугчийг нь маш аймшигтайгаар устгана” гэж айлдсан.