Хоёрдугаар Тесалоник

1 Бидний Бурхан Эцэг болон Эзэн Есүс Христтэй санаа нэгтэй Тесалоникийн хурлынханд Паул Силуан* Тимот нар бичиж байна.

2 Бурхан Эцэг болон Эзэн Есүс Христ та нарыг нигүүлсэж, амар тайвныг соёрхох болтугай.

3 Та нар итгэлээ улам батжуулж, бие биеэ илүү их хайрладаг болж байгааг бид мэдлээ. Тиймээс бид Бурханд талархах ёстой. Талархах нь ч зөв юм. 4 Хавчлагад өртөж, зовлон үзэж байгаа ч тэвчээртэй, бат итгэлтэй байгаа та нараараа бид бахархан, Бурхны хурлуудын гишүүдэд ярьдаг. 5 Энэ нь Бурхан хэрэг явдлыг шударгаар шүүснийг баталдаг бөгөөд Бурхан та нарыг Хаант төрд нь орох зохистой гэж үзсэн. Учир нь та нар үүний төлөө зовж байгаа.

6 Бурхан шударга учраас та нарыг зовоодог хүмүүсийг шийтгэнэ. 7 Эзэн Есүс хүчирхэг тэнгэрийн элчүүдтэйгээ хамт тэнгэрээс, дүрэлзэх галын дунд илчлэгдэх үедээ зовж байгаа та нарыг бидэнтэй хамт зовлонгоос ангижруулж, 8 Бурхныг мэддэггүй, өөрийнх нь тухай сайн мэдээний дагуу амьдардаггүй хүмүүсээс өшөө авна. 9 Эзэн тэднийг шүүгээд бүрмөсөн устгаж шийтгэнэ, хойшид анхаарч харахгүй, агуу хүчээрээ туслахгүй. 10 Эзэн маань ариун хүмүүстэйгээ хамт алдаршихаар ирэхэд түүнд итгэдэг хүмүүс түүнийг бахдан биширнэ. Тэдний дунд та нар байх юм. Учир нь биднийг тунхаглахад та нар итгэсэн.

11 Тиймээс та нар Бурхан өөрсдийг тань сонгосныг бодож зохистой байгаасай гэж бид үргэлж залбирдаг. Бас Бурхан санаандаа нийцдэг сайн бүхнийг хүч чадлаараа бүрэн хийгээсэй, та нарын итгэлдээ хөтлөгдөн хийсэн бүхнийг амжилттай болгоосой гэж залбирдаг. 12 Бурхан болон Эзэн Есүс Христийн нигүүлслийн дагуу Эзэн Есүсийн нэр та нараар, мөн та нар ч Есүсийн ачаар алдаршаасай гэж бид ийн залбирдаг.