БУРХНЫ ҮЙЛЧЛЭГЧИЙН ЁСООР АМЬДРАХ НЬ

Ажлын өдөр болдог цуглааны шинэ онцлог

2018 оны 1-р сараас эхлэн ажлын өдөр болдог цуглаанаар, судлахад зориулсан онлаин «Ариун Судрын Шинэ ертөнц орчуулга» (nwtsty) дахь тайлбар болон үзүүлэн таниулах материалыг үзнэ. Энэхүү судлахад зориулсан хувилбар танай хэлээр гараагүй байлаа ч цуглаандаа бэлдэхэд тань тус болно гэдэгт эргэлзэхгүй байна. Хамгийн гол нь, энэ материал хайр халамжтай Эцэг Еховатай улам дотносоход тань туслах биз ээ.

ТАЙЛБАР

Библид гардаг соёл, газар зүй, үг хэллэгийн талаарх мэдээлэл энд бий.

Матай 12:20

Бөхөж буй зул: Жижигхэн шавар саванд чидун жимсний тос хийж зул асаадаг байв. Маалингаар хийсэн зулын гол тосыг дээш нь татаж дөлийг бөхөөхгүй байлгадаг ажээ. «Бөхөж буй зул» гэдгээр дөл нь унтраад утаа нь суунаглаж, цогтойгоо байгаа зулыг хэлжээ. Есүс дарамтлагдсан, эгэл жирийн хүний, бөхөж буй зултай зүйрлэм найдварыг яасан ч хөсөрдүүлэхгүйг Исаиа 42:3-т ийнхүү зөгнөн хэлжээ.

Матай 2:2

Бид дорно зүгт байхдаа: «Дорно зүг» гэж орчуулсан грек үгийг махчилбал «мандах, гарах» гэсэн утгатай. Хам сэдвийг нь үзвэл энэ үгээр зурхайчид од хаана харсныг хэлсэн бололтой. Зарим хүн зурхайчдыг тэнгэрийн зүүнтэйд од харсан гэх юм уу, од «гарч» байгааг эсвэл үзэгдэж байгааг харснаа хэлсэн гэж ойлгодог.

ҮЗҮҮЛЭН ТАНИУЛАХ МАТЕРИАЛ

Гэрэл зураг, зураг чимэглэл, дуугүй видео, дүрс бичлэгээр Библид гардаг нарийн ширийн зүйлийг харуулсан.

Бетфаг, Чидун уул, Иерусалим

Зүүн зүгээс буюу өнөөгийн эт-Тур тосгоноос (Библид гардаг Бетфаг бололтой) Иерусалимыг чиглэн Чидун уулын нэгэн өндөрлөг газар луу орох замыг энэ видеонд харуулж байна. Бетан нь Бетфагийн зүүн талд, Чидун уулын зүүн энгэрт байв. Есүс дагалдагчидтайгаа Иерусалимд байхдаа Бетанд хонодог байсан. Бетан нь одоогийн «Лазарын газар» гэсэн утга илэрхийлдэг Эл-Азариа (эсвэл Эл-Эйзариа) гэдэг араб нэртэй газар юм. Марта Мариа Лазар гурвын гэрт Есүс хонодог байсан (Мт 21:17; Мр 11:11; Лу 21:37; Ёох 11:1). Тэдний гэрээс Иерусалим руу явахдаа Есүс, бичлэгт харуулсантай төстэй замаар явсан бололтой. МЭ 33 оны нисан сарын 9-нд Есүс илжигний дудран унаад Иерусалимд очихдоо Бетфагаас Чидун уулыг даваад явсан бололтой.

Бетанаас Бетфаг орох зам
Бетфаг
Чидун уул
Кидроны хөндий
Сүмийн уул

Өсгийд хадсан хадаас

Хүний өсгийд хадсан 11,5 см урттай төмөр хадаасны гэрэл зургийн хуулбар. Энэ хадаасыг 1968 онд Иерусалимын хойд зүгт малтлага хийж байгаад олж, Ромын үеийнх гэж тогтоожээ. Хүнийг модон шонд хадаж цаазалдаг байсныг археологийн олдвор баталдаг. Ромын цэргүүд Есүс Христийг шонд иймэрхүү хадаасаар хадсан бололтой. Энэхүү эд өлгийн зүйл нь нэгэн чулуун авснаас олдсон. Эндээс харвал, шонд хадуулж цаазлагдсан хүнийг оршуулдаг байжээ (Мт 27:35).