16, 17. Хурганы хуримаас өмнө юу болох ёстой вэ?

¹⁶ Тослогдсон 144 000 хүн бүгдээрээ тэнгэрт гармагц Хурганы хуримын бэлтгэл ажлын сүүлийн шат эхэлнэ (Илч. 19:9). Гэхдээ энэ баярт үйл явдлаас өмнө нэг юм болно. Тослогдсон 144 000-аас үлдсэн хүмүүсийг тэнгэрт гарахын өмнөхөн Гог Еховагийн ард түмэн рүү довтлохыг санаарай (Езе. 38:16). Ямар ч хамгаалалтгүй мэт харагдах Бурхны үйлчлэгчид яах вэ? «Та нар энэ тулалдаанд дайтах хэрэггүй. ... Өөрсдийгөө жагсаан, зогсоож, та нарын төлөөх ЭЗЭНий авралыг харагтун» гэсэн зааврыг дагана (Ш.дэд 20:17). Дэлхий дээр үлдсэн байсан тослогдсон христианууд Магогийн Гогийн довтолгооны дараа бүгд тэнгэрт гарна. Илчлэлт 17:14-т Бурхны ард түмний дайснуудын талаар, «Тэд Хурганы эсрэг дайн хийх бөгөөд Хурга тэднийг ялах болно. Учир нь Тэр бол эздийн Эзэн, хаадын Хаан билээ. Түүнтэй хамт байгчид нь дуудагдсан, сонгогдсон, итгэмжит хүмүүс юм» гэж бичсэн байдаг. Тэгэхлээр Есүс 144 000 хамтран захирагчтайгаа дэлхийд ирж Еховагийн ард түмнийг аварна.

¹⁷ Тэгээд Хармагедон болж Еховагийн ариун нэр алдаршина (Илч. 16:16). Ямаатай зүйрлэм бүх хүн «мөнх шийтгэлд орно». Дэлхий дээр цаашид муу муухай юм байхгүй болно. «Үй олон хүн» агуу их гай гамшгийн оргил үеийг эсэн мэнд давна. Эцэст нь «Илчлэлт» номд гардаг сэтгэл хөдөлгөм үйл явдал болох Хурганы хурим болно (Илч. 21:1–4).d Дэлхий дээр үлдсэн бүх хүн Бурхны сайшаалыг хүлээсэндээ баярлан, агуу их хайр энэрлийг нь мэдэрнэ. Хурганы хурим ямар сайхан болох бол оо! Тэр өдрийг үзэхийг бид тэсэн ядан хүлээж байна (2 Петр 3:13-ыг уншина уу).