Enonelo Yeebaribari Enna Ovuwa

 1. Athu amodha peno enawoga aavi wodhela dhohudhiha dhamBibliyani? (Provérbios 1:20, 21)

DHILABO dhowinjhiva, sokweya wawona addibila egaali vari vathu elaleyaga ohagalalene. we ohulaleya ni makalelo yala? Akala onoweragana podi wera onowubuwela yolebela enafwanyeya livuru na provérbios — enihina: Enonelo enokuwa vaari vaathu wihina yiwe dholaga. (Omwileri Provérbios 1:20, 21.) Mbibiliyani ni mmalivuruni mwehu enofwanyeyamo “enonelo yeebaribari” — enonelo ya Yehova. Ni siyeyo athu enahoweliwa wegi ekanne egumi yohimala. Nnohagalala nawonaga athu yawaakelaga malivuru ehu. Mbwenye amodha kinafuna wiwa nde Bibiliya anawogiye. Amodha enoniteya mwaha enubuwela wihina Bibiliya kanna mabasa. Amodha enovanyiha nde Bibiliya anahudhihe ewogaga wihina muthu anahara dholaga dha mbibiliyani dowali ni dowithukula. Naarive dhigari ndo dhohudhiha dha Yehova dhinna wafwanya athu aatene ni oliye onowerana ndo nuudhivela.

 2. Enonelo yeebaribari enafwanyeya wuvi peno? Ki athu owinjhiva enathoma wera ddi?

² Makalelo mamodha a Yehova woniha enonelo yaye peno fuudhela madhu aye, ali Bibiliya. Podi wera athu aatene peno ehikanna ofuru wokanna Bibiliya. Ki wodhela marevista ehu enakumihiwa Mbibiliyani? Mwaha mareeliho a Yehova, enofwanyeya ni dhiwogelo dhowakwana 1 000. Ale enamwileri marevista ala, ni eparihedhaga mabasa nde enahudheriwa, enokavihereya. Naarive dhigari ndo, athu owinjhiva peeno kinafuna ovuruwana nde Bibiliya anahudhihiye eli enonelo yebaribari. Yeragana dhothoma dhewa aliwa eniroromela annya ni athu amodha ohiya omuroromela Yehova. Amodhaya enanoona ninga nili athu olodhowa mwaha ohara nde anahudhiha Bibiliya. Ohudhera wula nnere woona mwahaya bwaddi athu egubuwelaga ndo. Mbwenye nihinathi, nnere woona ethu enanikavihera okanna enonelo ya Yehova.

 3. Nnonihe aavi wihina nihikanna thotho?

³ Bibiliya onowoga egi: ‘Omova Yehova fumambelelo wa enonelo, ni omunona owela enonelo.’ (Pro. 9:10) Thotho enovolowelavo oparihedha mabasa nde nnonilihu wihina nerena dhothoma dhapama, mbwenye nnowoniha wihina nihikanna thotho wodhela omunona Yehova, — “Obe naveda onona makalelo Yehova anubuweliye” nahinati werana yothoma. Iyo podi werana eyo wodhela woona nde anawoga Bibiliya ni marevista ehu. Nerana ndo nnowoniha wihina nihikanna thotho. — Pro. 2:5-7.

 4. Mwahaya bwaddi Yehova baahi dinaanivahe enonelo yebaribari?

⁴ Yehova baahi dinanivaha enonelo yeebaribari. (Rom. 16:27) Mwahaya bwaddi? Ethu yobajha, sowihina Yehova dimpaddusi oliye ohunona dhithu dhatedhene wodhela nde apaddusiye. (Sal. 104:24) Yanabili, dhithu dhatedhene aneriye dhinowoniha thotho dhaye. (Rom. 11:33) Yanatharu, oparihedha mabasa dholaga dha Yehova winokavihera. (Pro. 2:10-12) Nafunaga wihina nikanne enonelo yeebaribari, nnohowela orumedha nde anahudhiha Bibiliya nuuhiya wihina eeddihe dhowera dhehu ni dhothoma dhehu.

 5. Mwaha athu ohusayela enonelo ya Yehova, yokumelelavoya siivi?

⁵ Owinjhiva nnafwanyihu mmalaleyelo, enowoonelamo wihina dhihikalawo dhopadduwa dhotikiniha, mbwenye kinarumedha wihina ohukalawo mpaddusi ni enubuwela wihina dhatedhene dhere oruthuwa. Mbwenye amodha enawoga wihina Mulugu ohukalawo, Amodha enubuwela wihina Bibiliya dakale teto kanna mabasa ni enothoma werana nde dhinafuniiwa. Ki vano yokumelelaya siivi? Nerege mwilaboni, dhithudha dhihiwomela? Mwaha athu wiroromela ohiya omuroromela Mulugu, nerege aliwa ehifwanya ohagalala webaribari? Ni ejhehero yolibiha? Nasugwa dhinapadduwa mwilaboni nnokanna ebaribari wihina: ‘Kaawo enonelo, Yubuwelelo, newene yolaga enamurusa Yehova.’ (Pro. 21:30) Eyo enoonthukulela odidelave osayela enonelo ya Yehova! Mbwenye, sowukula onona wihina athu owinjhiva kinubuwela ndo. Mwahaya bwaddi?

 6. Mowiwanana ni yolebela ela, ahinavuruwana enonelo ya Mulugu baani?

⁶ Owinjhiva kinavuruwana “enonelo yebaribari yalaleyiwaga.” Mowiwanana ni Bibiliya, ehikalawo makuru mararu athu ehinafuna ovuruwana enonelo yebaribari. “athu olodhowa,” “anihelu,” ni “ataduwa.” (Omwileri Provérbios 1:22-25.) Nnafuna nona dhikalelo dhinathukulela athu yala ohirumedha enonelo ya Mulugu ni ethu baani nnafunihu werana wihina nihikale ndo.

 7. Mwahaya bwaddi amodha egadidela okala olodhowa?

⁷ Nikuru nobanjha bale eli “oolodhowa” Enarumedha dhithu bure-bure, obe ehinarusa olekethiwa. (Pro. 14:15) Malabo owinjhivene nnowafwanya athu owi ndala mmalaleyelo. Motajhiha, karajhiha wawubuwela anamwinjhi enalekethiwa ni anamaholela gereja ni anamathonga. Owinjhiva enootakaleliwa yonelamo wihina yere olekethiwa ni anamaholela gereja. Mbwenye athu enasorihiwa va Provérbios 1:22 enoodidelave okalave olodhowa obe ehisayelaga onona ebaribari. (Jer. 5:31) Aliwa enoodhiveliwa werana nde dhinafuniwa teto kina efunelo yohudhera nde Bibiliya anahudhihiye obe wawiwelela malamulo a Yehova. Athu amodha enubuwela ninga mwihiyana dhala ali munyagereja anakala Okebeki elabo yo kanada, aawogile ni namona a Yehova dhala egi: “akala namaholelihu eere onileketha, nibili thaaye, kahi nehu!” Iyo kannafuna okala ninga ale anapwaza dhithu dhomuzimuni! — Pro. 1:32; 27:12.

 8. Ddiniyani enanikavihere withwelavo epaddi yomuzimuni?

⁸ Kahiyo ebewene, Bibiliya onanikongomedhiye oxagiha mubuyelo wehu egi: ‘Mubuwelege ninga apogo.’ (1 Cor. 14:20) Iyo nnowithwelavo epaddi yomuzimuni naparihedhaga mabasa dholaga dhamBibiliyani mwigumini mwehu. Vang’ono-vang’ono, nnere woona ni mentwihu makalelo dholaga ndo dhinanikaviheriwa warabela makathamiho, ni werana dhothoma ni thotho. Dhehu dhinaneddela avi wodhela muselu yoola, akala ohubajha omuhudhera Bibiliya ni woona mutugumano malabwene, yere okala yapama wikoha: mwahaya bwaddi gahiharaga thalo dhinagithukulele wivelela wa Yehova ni obaddiziwa? Ni nnowunnuwelavo ninga anamahudhiha ni anamalaleya a muthenga dhomwene, dhothoma dhehu dhinowoniha wi nnoholeliwa ni malagano amBibiliyani? Nnowoniha dhikalelo dhekiristawu nakanna muladdu ni athu amodha? Nona wihina nnohowela wiwomihedha, nnohowela opwasedha dhithu Yehova ananihudhihiye, ‘dhinanvaha thotho ole ali olodhowa.’ — Sal. 19:7.

 9. Nimakalelo baani aliba “nihelu” enonihiwa wihina kinafuna ovuruwana enonelo yeebaribari?

⁹ Nikuuru nanabili naathu ehinarumedha enonelo yeebaribari ya Mulugu baaliba “nihelu.” Malabo mamodha, nnogumana nathu yayo mmalaleyelo. Aliwa enodhiveliwa wanyoza amodha. (Sal. 123:4) Bibiliya ohuwoga wihina Malabo okuthula, enere okalawo athu a nihelu. (2 Ped. 3:3, 4) Ninga amwasano a Lothi yahali ororomeleya, peeno athuya kinna efunelo yovuruwana dhoholela dhowela. (Gén. 19:14) owinjhiva enowanyoza ale enahara dholaga dhamBibliyani. Dhofuna dhewa dhinowathukulela aliwa ‘werana dhithu dhabure’. (Judas 7, 17, 18) Makalelo Bibiliya anaawogiye athu a nihelu enowiwanana ni apostata, naamodha emusukumme Yehova!

10. Mowiwanana ni yolebela ya Salmos 1:1, nnarabele addi okala aliba nihelu?

¹⁰ Nahikala pasope iyo podi okanna dhikalelo dhaliba nihelu. Nnere ddi wihina eyo ehipadduwe? Makalelo obajha fuhandana naliba nihelu (Omwileri Salmos 1:1.) Eyo enatapulela ohileri newene ohivuruwana muselu dhinadhela wapostata. Onorajhihaga wubuwela nahere nanganyedhaga dhoholela dhinadhela wa Yehova nnikuru naaye? Wihina eyo ehipadduwe nnohowela wikoha: Gakela dhoholela dhixa munikuruni na Yehova, ginowoga dhithu dhohufwanelela? Gihikanna ekalelo yosayela ofwanya dhoviriganiha dha ale enaniholela? Nasaddula mubuwelo wehu wodhela makalelo ala o wubuwela, nnere omuhagalasa Yehova.— Pro. 3:34, 35.

11. “Ataduwa” enawona aavi malagano a Yehova?

¹¹ Nikuru nanatharu ehinarumedha enonelo ya Yehova “baataduwa.” Aliwa ataduwa mwaha enokodda okalawo mowiwanana ni malagano a Mulugo. Ethu enafuniwa, fuwerana nde dhinadhivela. (Pro. 12:15) Nimakalelo yayo aliwa enamukodda Yehova ali ntxela na enonelo yeebaribari. (Sal. 53:1) Nakala mmabasani olaleya malabo owinjhivene enoniteya mwaha waariha malagano a mBibliyani. mbwenye aliwa kinna ethu yathima enaakavihera. Bibiliya anihina: ‘Enonelo yebaribari sowunuwelavo wa ole oli taduwa; oliye kanakanna yowoga akala vaari vaathu.’ (Pro. 24:7) Yolebela ela enowoniha wi ataduwa kinavaha dholaga dhapama Kahiyo ebewene Yehova anaddelaga wihina “nikale wolapela naataduwa”! — Pro. 14:7.

12. Enanikavihere ddi ohikala ninga ataduwa?

¹² Mohiyana naale eniidda dholaga dha Mulugu, iyo nnowenjhedhedha odhivela wehu wodhela makalelo Yehova anubuweliye, vamodha ni malagano aye. Iyo nnolibiha odhivela wula nonaga ohiyana olivo wodhela ale enawiwelela malagano a Yehova ni ale yahinawiwelela. Kasugwa makathamiho enafwanya athu wodhela okodda enonelo ya Mulugu. Vano kubuwela makalelo egumawo eliwa yapama mwaha omwiwelela Yehova. — Sal. 32:8, 10.

13. Nerege Yehova ononiwaddihedha wiwelela enonelo yaye?

¹³ Enonelo ya Yehova eli vanenevene, mbwenye oliye kanawaddihedha athu wihina erumedhe. Teto oliye kanakuwa makathamiho enadhela mwaha okoodda enonelo yaye. (Pro. 1:29-32) Ale enathoma ohimwiwelela Yehova “enere ofwanyiwa makathamiho wodhela dhowera dhewa.” Makalelo ewa owerana dhithudha, dhinerege watatamulela makathamiho, ni goyi, ofiyedha oyelela egumi yewa. Teto livuru na Provérbios 1:33 enowawoga mareliho enaakanne ale eniwelela enonelo ya Yehova ni eparihedhaga mabasa mwigumini mwewa. ‘Ole angivuruwana anere okalawo nubareleya ni anerege okalawo ahovile ethu-sithu.’

14-15. Nnahudhera ddi ni livuru na Provérbios 4:23?

¹⁴ Waparihedha mabasa enonelo ya Mulugu, onere wawakela mareeliho. Ninga nonilihu enonelo ya Yehova eli vanenevene. Motajhiha, livuru na Provérbio, Yehova ononivaha dholaga dhapama dhinanikavihera. Nnere woona dhotajhiha nayi.

¹⁵ Obarele murima wawo. Bibiliya onowoga egi: ‘Mwadhatedhene, obarele murima wawo, mwaha thintxela neegumi.’ (Pro. 4:23) Kabiha wubuwela dhithu dhinahoweleya wihina obarele murima wawo. Nnohowela onjha dhithu dhapama, wapara mabasa avade, nuhiya werana dhithu dhutotele makathamiho. Nnohowela werana emodhave epaddi yehu yomuzimuni. Malabo amatene nnowinjhiha wodhela omwileri Bibiliya, nnodhowa omutugumanoni ni nnowegeredha dhipaddidhihu. Iyo nnokala oviheyeene wihina napare mabasa olaleya, ni nnosukuma dhikalelo dhanikwerebeyihe epaddi yehu yomuzimuni, nirabelaga dhithu dhatakalihe mubuwelo wehu, ninga mwaredhelo wonyakavala ni wandana wabure.

16. Mwahaya bwaddi livuru na Provérbios 23:4, 5 niganikavihera peeno?

¹⁶ Ohagalale ni nde onniwena. Bibiliya anovaha yolaga ela: ‘Kuwondde mwaha osayela oreela. . . . Kukumele mento dhoreela, kadhinaliba orameya, Mwaha dhihikanna mampelo ninga pangwe, dhinovavela odhulu.’ (Pro. 23:4, 5) Kuroromele wihina korowa onniwena dhinere olegela, naarive dhigaali ndo, nnawonihu peeno baathu orela ni ovuwa esayelaga korowa. Bumwahaya aliwa enowerana dhithu dhinatakaliha ndina newa, wandana wewa ni egumiwa. (Pro. 28:20; 1 Tim. 6:9, 10) Vano enonelo enonikavihera okanna moonelo wapama wodhela korowa. Eyo enonikavihera ni enoonibarela wodhela okala athu oothabwa othuwathuwela korowa ni enonthukulela okala ohagalala nindhe ninnihuna. — Ecl. 7:12.

17. Nnande addi wawoga ‘madhu ni enonelo’ ninga enawogela Provérbios 12:18?

¹⁷ Wabihege wubuwela wahinathi owoga. Nahikala pasope iyo podi witotela makathamiho wodhela nde nnawogihu. Bibiliya onowoga egi: ‘Madhu ohapimelela enaligana ni olatiwa ni supadda, Mbwenye nlumi na muthu athotho murombwe.’ (Pro. 12:18) Iyo nnodhana murenddele nahiwogaga wodhela dhoviriganiha dhathu amodha. (Pro. 20:19) Wihina madhu ehu yakavihere amodha ohiya wapiha mbani, enohoweleya mmurimani mwehu edhalemo enonelo ya Mulugu. (Luc. 6:45) Naapenddaga wodhela ndhe Bibiliya anawogiye, madhu ehu podi okala ninga ‘ntxela neenonelo,’ enaahagalasa athu amodha. — Pro. 18:4.

18. Ni makalelo baani Provérbios 24:6 ananikaviheriye dhehu oneddelaga pama mmalaleyelo?

¹⁸ Ohare dhoholela. Bibiliya ononivaha dholaga dhinanikavihere okanna egumi yapama: ‘Ni dhoholela dhapama onere wanda owaniha koddo, ni anamalaga owinjhiva onere ogonjhiha.’ (Pro. 24:6) Kasugwa makalelo malagano ala enuukaviheriwa waparaga mabasa oolaleya ni wahudhihaga. Ohiya opanddaga dhammuruni mwawo waparaga mabasa ala oolaleya, ononamo avi ohara dhoholela nnakelihu mmutugumanoni! Omutugumanoni nnoxagihiwa, wodhela mwaha dhinawogiwa ni dhipaddi dhinonihiwa ni arogola. Ohiya eyo, nikuru na Yehova nnonivaha dhipano dhinanikavihera ninga— malivuru ni vidiyu — dhinaakavihera athu amodha wonelamo ndhe dhinahudhiha Bibiliya. We onohudhera olabihedha pama dhipano ndha?

19. We onakala aavi wubuwelaga dholaga ananivaha Yehova? (Provérbios 3:13-18)

¹⁹ Omwileri Provérbios 3:13-18. Nnotamaalela vanlubale wodhela dholaga dhapama nnafwanyihu mBibiliyani! Egumi yehu yakalele avi nahere nahikanna malagano a Yehova? Nihona dhotajhiha dha dholaga dhapama dhinafwanyeya livuru na Provérbios. Ebaribari wihina Yehova ohuvaha dholaga dhinafwanyeya mBibiliyani aatene. Nnafuna niparihedhe mabasa dholaga dhatedhene nnafwanyihu mBibiliyani egumihu yaatene. Athu owinjhiva kinavaha thima enonelo ya Mulugu; mbwenye iyo nihikanna ebaribari wihina ‘ale enadidela ovuruwana [enonelo] ya Mulugu enere ohagalala.’