Apocalipse​—Peeno anatapulela ddi mwigumini mwawo?

1-2. Ethu baani enanthukulela iyo okanna efunelo wodhela livuru nna na Apocalipse?

WE onorajhihaga okanna oneti wosugwa fotu dhamukwawo? Podi wera vafotoniva onowawona athu ohanonniwe. Mbwenye voharela we woona fothu enadahinya murima wawo. Mwahaya? Mwaha we ori vafotoni vevale. Vano we wubuwela mudhidhiya ni mburoya mutirarinyu fotu ele. Teto onoxixa wawubuwela athu eri vafotoni vale niwe. Fotu ela ehikanna thima mwigumini mwawo.

² Livuru na Apocalipse niri ninga fotu yela. Mwahaya? Mwaha wa dhithu biili. Yobajha, mwaha livuru nna alebeliwe di iyo baahi. Versu yowambela enihina: ‘Yovuhulela ya Yesu Kiristu, oonihiwe ni Mulugu, wihina awonihe adharaaye dhithu dhinaapadduwe mohilegela.’ (Apo. 1:1) Enowoneya pamadhene wihina dhithu dhilebiwe mulivuruni muna, kilebeliwe athu atene, mbwenye elebeliwe adhaari oororomeleya a Mulugu. Wa iyo, kavo ethu enantikiniha onona wi ninna okavihera makalelo dhinakwanela dhovuhulela ndha dhotikiniha. Ni madhu mamodha, enakala ninga iyo ninna wiwona “vafotuni.”

3-4. Dhovuhulela dha Apocalipse dhambele wakwanela alini, ki eyo enanipatha ni makalelo baani?

³ Ethu yanabili, enanthukulela iyo okanna efunelo ni dhovuhulela dha Apocalipse, enovolowelavo mudhidhi dhinaakwanele dhovuhulela ndha. Murumiwi Juwawu ohuwoga mudhidhiya dhinaakwanele dhovuhulela ndha, nuwoga egi: ‘Wodhela oveetheliwa, gaari labo na Nabwiya.’ (Apo. 1:10) Juwawu aalembe madhu ala yaka ya 96 mudhidhi wehu, ‘labo Nanabwiya’ naari nihinafiye. (Mat. 25:14, 19; Luc 19:12) Mowiwanana ni dhovuhulela dha mBibliyani, ‘labo Nanabwiya’ nambele yaka ya 1914 Yesu nubajha othonga odhulu. Obajha yaka yele odhowa osongolo, dhovuhulela dha Apocalipse dhinaapatha adhaari a Mulugu, obajha wakwanela. Mowindo, malabo yala, nnakalawo ‘labo Nanabwiya’!

⁴ Woona wi nnakalawo mudhidhi wotikiniha, nnofwanelela ovuruwana pamadhene yolaga ela eri va Apocalipse 1:3: ‘Oohagalala duule anileri ni ndhu nootama ni enawiwa madhu a yovuhulela ela ni eniwelela dhithudha dhilebiwemo, mwaha mudhidhiya ohufiya omakuthulo.’ Bumwahaya ohiya kale, nnohowela ‘wileri ni ndhu notaama’ wawiwa madhu a yovuhulela ela ni ‘wiwelela dhithu dhatedhene’ dhilebiwemo. Mbwenye madhu nnahowelihu wawiwelela bavi?

 5. Livuru na Apocalipse nnawoga thima baani ninnihuna yomulabela Yehova mwamakalelo oliye anarumedhiye?

⁵ Wambela omaromo wa kapitulu na livuru na Apocalipse, nnowonelamo wi Yesu ohunona dhatedhene dhinapadduwa mmulogoni. (Apo. 1:12-16, 20; 2:1) Eyo enowoneyiha pamadhene wodhela muthenga Yesu arumihedhiye mulogo mitanu nabili dho Aziya menor. Mbwenye kadda mulogo wahikanna muthenga wewene, oliye oherana ndo wihina aakavihere makiristawu oobajha omwebedha Yehova mwamakalelo anarumedhiye. Ele Yesu awongiye, enowapatha peeno adhaari a Mulugu. Ethu baani nnahudherihuvo? Mwene ehu Yesu Kiristu, ohunona pamadhene makalelo eriwa withwelavo wehu omuzimuni. Yesu anoniholela teto anonibarela, ni ohunona dhatedhene dhinapadduwa. Ni ohunona ethu nnahowelihu wera, wihina nrumedhiwe vamentoni va Yehova. Yoholela baani Yesu avahiliye va livuru na Apocalipse nnahowelihu wiwelela peeno?

 6. a) Mowiwanana ni Apocalipse 2:3, 4, mulogo wo Efezu wanna makathamiho baani? b) Ki iyo nnahudheravo ddi?

⁶ Omwileri Apocalipse 2:3, 4. Kaniyelele odhivela nannihuna omambelelo ni Yehova. Muthenga Yesu arumiliye mulogo wo Efezu onowoneya wihina naarive efwanyiwaga makathamiho owinjhiva, aliwa yodhowave emulabelaga Yehova nuuvilela. Mbwenye yowukulihaya sowi, aliwa oyelela odhivela yanniwana omambelelo. Mowindala, yaari yathima aliwa ohogolowela odhivela yanniwana ni Yehova omambelelo, ni makalelo yayo Yehova fwarumedhiye webedha wewa. Ni makalelo mamodhave, ohiya ovilelave, nnohowela werana ethu emodhaya. Nnohowela ovilela nnonaga ethuya enanthukulela ovilela. Mulugu ehu Yehova, kanasugwera baahi dhendhe nnerihuna, mbwenye anosugwera ethu enanthukulela ovilela. Efunelo yehu sathima vamentoni va Yehova. Mwahaya? Mwaha oliye anafuna wi webedha wehu okumelelege vati vamurima vamodha ni otamalela wehu. — Pro. 16:2; Mar 12:29, 30.

 7. a) Mowiwanana ni Apocalipse 3:1-3, Addibila amulogo wo Sardis yanna makathamiho baani? b) Ki iyo nnofwanelela neere ddi?

⁷ Omwileri Apocalipse 3:1-3. Nnofwanelela okalave mento. Addibila a mulogo wo Sardis yahikanna makathamiho oohiyana. Aliwa yahimulabela Yehova nuviheya malabo amundduli, mbwenye nuvira mudhidhi aliwa ohogolowela mundduli. Bumwahaya Yesu adhe eerege yofwanelela ‘okala mento.’ Ki iyo peeno nnahudheravo ddi? Nihinona wi Yehova kadha aadduwala mabasa nnamparelihu. (Heb. 6:10) Naari dhigari ndo, nihubuwelege wi woona wi nihimulabela malabo amundduli, vano iyo podi ovugula oviheya wehu. Naarive peeno nikanne dhithu dhinanihiha ohukala ooviheya ninga malabo amundduli, nnofwanelela okala ooviheya ni ‘mabasa a Nabwiya,’ wihina nande okala mento ofiyera omakuthulo. — 1 Cor. 15:58; Mat. 24:13; Mar 13:33.

 8. Nnahudheravo ddi ni madhu a Yesu aawongiye ni mulogo wo Lawudiseya enafwanyeya va Apocalipse 3:15-17?

⁸ Omwileri Apocalipse 3:15-17. Nnohowela okala ooviheya ni omulabela Yehova ni murima wehu wamutene. Muthenga Yesu arumiliye mulogo wo Lawudiseya wowoga makathamiho mamodha yaariwo. Aliwa yahimala ‘oridha’ obe nere, kayaviheya ni dhithu dhomuzimuni. Mwaha wa yeyo, Yesu owoga wi aliwa ‘ehiheruwa, ihawa.’ Aliwa yofwanelela ohogolowela omulabela Yehova nuviheya. (Apo. 3:19) Ki iyo nnahudheravo ddi? Noona wihina ninna oyelela oviheya nannihuna kale, nnofwanelela otamalela dhatedhene Yehova ananivahiye. (Apo. 3:18) Kannafuna othuwathuwela dhithu dhimodha, osayela dhoreela, vano omagomiherowa naahiye mabasa oomuzimuni mburo wanabili.

 9. Mowiwanana ni madhu a Yesu Kiristu arumiliye mulogo wo Pergamu ni wo Tiyatira, nnohowela okala pasope ninddi?

⁹ Nnohowela osukuma dhohudhiya dha Apostata. Yesu wasumulula addibila amodha Opergamu, mwaha aliwa yanna ogawa mulogo. (Apo. 2:14-16) Mbwenye oliye wathethela addibila o Tiyatira mwaha othawa ‘dhithu dhooddiha dha Saddana’ ni wakongomedha egi ‘mulibihedhe yele munninyuna ofiyera miyo odha’ ni wawaddela wihina epareele ebaribari. (Apo. 2:24-26) Addibila yabanjhe ohara dhohudhiha dhowoota, yohowela othwaruwa. Nnahudheravo ddi? Nnohowela osukuma dhohudhiha dhatedhene dhihiniwanana nindhe Yehova anawogiye. Mapostata enakala ninga ehikanna ‘ekalelo yofuna omulabela Mulugu’ obe neere enakala ninga aliwa enothuwa-thuwela ndhe Bibliya anawogiye, mbwenye ndhe dhineriwana kadhiniwanana ni malamulo a Bibliya. (2 Tim. 3:5) Wihina noonelemo teto nsukume dhohudhiha ndha dhabure, nnohowela okala anamahudhera apama a madhu a Mulugu. — 2 Tim. 3:14-17; Judas 3, 4.

10. Nnahudheravo ddi ni muthenga Yesu awogiliye ni mulogo wo Pergamu ni wo Tiyatira?

¹⁰ Kanikavihere newene kanenye obe kanirumedhe makalelo amatene ooraruwa. Addibila Oopergamu ni Ootiyatira, yahikanna makathamiho mamodhaya. Yesu watoriha addibila amodha mwaha aliwa kayasukuma mararuwo. (Apo. 2:14, 20) Ethu baani nnahudherihuvo? Kanubuwelege wi mwaha omulabela Yehova yaka dhowinjhivadhene obe okanna mutholo mmulogoni, anere onifugulela oneti wavayeka nivolosiha mmararuwoni. (1 Sam. 15:22; 1 Ped. 2:16) Dhohudhiha dha elabo dhinna othabwa kadda labo, mbwenye Yehova anafuna wi nikale oohiyana, ni nikanne mubuwelo wapama wodhela muselu yoyo. — Efé. 6:11-13.

11. Ofiyera vala nihudhere ddi? (Kasugwa kwaduru “Dhithu nnahudherihuvo peeno.”)

¹¹ Ofiyera vala nihudhere ddi? Nihona wi sathima omwebedha Yehova ni makalelo anafuniye. Akala ninna werana ethu-siithu ehinamuhagalasa Yehova, nnohowela osaddula egumihu mowaguva wihina nrumedhiwe ni oliye. (Apo. 2:5, 16; 3:3, 16) Mbwenye Yesu ohuwoga ethu emodhaya wodhela mulogo ndha. Ethu baani?

12. Nnahudheravo ddi peeno ni madhu aawonge Yesu ni mulogo wo Esmirna ni wo Filadelfiya? (Apocalipse 2:10)

¹² Vano, nnafuna noone ethu awonge Yesu wodhela mulogo wo Esmirna ni wo Filadelfiya. Oliye owoga ni addibila wihina ehove mwaha woharahariwa, mwaha Yehova eere wareeliha yakalave oororomeleya wa Yehova. (Omwileri Apocalipse 2:10; 3:10) Peeno nnahudheravo ddi? Nnere woonihiwa goyi mwaha woharahariwa, teto nnohowela wiwegeredha ovanene wodhela muselu yoyo. (Mat. 24:9, 13; 2 Cor. 12:10) Mwahaya bwaddi yohubusera ela ekala yapama?

13-14. Nlogo na Mulugu nnafwanyiwa addi ni dhopadduwa ndha dhiri va Apocalipse kapitulu 12?

¹³ Livuru na Apocalipse nnihina nlogo na Mulugu neerege oharahariwa malabo yala a peeno — ‘labo Nanabwiya.’ Apocalipse kapitulu 12 anihina Yesu nukala mwene owana ni Saddana vamodha ni ademoniyu aye. (Apo. 12:7, 8) Amwiddani ala a Mulugu ehigonjhihiwa ni wigareliwa elabo yavati, bumwahaya mwilaboni mukala goyi enlubale. (Apo. 12:9, 12) Dhatedhene dhendho dhinavolowela avi nlogo na Mulugu?

¹⁴ Livuru nenna na Apocalipse nnowoga makalelo aakale Saddana. Oliye kanna oneti wofiya elabo yodhulu, bumwahaya anathabwa wanyanyuwela adhaari oothikitheliwa a Mulugu. Oothikitheliwa ala anagiwana ale enakavihera Omwene wa Mulugu ni ‘enaapara mabasa oovaha onamoona wa Yesu.’ (Apo. 12:17; 2 Cor. 5:20; Efé. 6:19, 20) Dhatedhene dhendho dhinaakwanela addi peeno?

15. ‘Anamoona abiili’ enawogiwa va kapitulu 11 a Apocalipse enagiwana aani, ki yapadduwele ddi?

¹⁵ Saddana ohalabihera amwiddani a Mulugu a elabo yela yavati, wihina yavunganyedhe mabasa aaddibila oothikitheliwa yaaholela mabasa oolaleya. Alobwana ala, yagiwana ‘anamoona abiili’ eri va livuru na Apocalipse epiwe.b (Apo. 11:3, 7-11) Yaka ya 1918, aalobwana yala atanu natharu, yahinkedhiwa ni makalelo abure, ni ovokeriwa mukambura yaka dhowinjhivadhene. Athu owinjhiva yubuwela wi mabasa yaapara alobwana ala oothikitheliwa, yahimala.

16. Ethu baani yohujhehera epadduwe mweri wa Março wa yaka ya 1919, mbwenye Saddana kahinye wera ddi?

¹⁶ Yovuhulela eri va Apocalipse kapitulu 11, enihina wavira mwana mudhidhi vag’onovi ‘anamoona ala abiili’ yeere ohogolowela okalawo. Yovuhulela ela ehakwanela mwamakalelo athu yahajheheriwa, yaka ehinamale addibila ale ovokeriwa mukambura. Mweri wa Março, yaka ya 1919 addibila ale oothikitheliwa ovenyihiwamo mukambura, nuvira mwana mudhidhi dhithu dhatedhene athu yawinkedhiwa obibiddeliwa. Mohulegela addibila ala, wahogolowela waholela mabasa oolaleya. Mbwenye eyo kimuhinhe Saddana oharahara nlogo na Mugulu. Obajha mudhidhi yole ofiyera peeno, oliye anna oharahara nlogo na Mulugu. (Apo. 12:15) Bumwahaya, iyo atene nnohowela ovilela ni omuroromela Yehova. — Apo. 13:10.

17. Adhaari a Mulugu enaakela nikavihero baani mohujhehera?

¹⁷ Kapitulu 12 na livuru na Apocalipse, nnowoga wihina nlogo na Mulugu nere wawakela mareelihu ni makalelo yahajheheriiwa. Yakala ninga wi ‘theya’ yere ‘watama wamidha mahinjhe’ a oharahariwa. (Apo. 12:16) Siyeyo epadduwe. Malabo mamodha, dhipaddi dhimodha dha Saddana, motajhiha, aliba enawoga muladdu enonivuruwana pamadhene, teto aliwa enokala nikavihero wa nlogo na Mulugu. Malabo owinjhiva adhaari a Yehova, enokanna razawu otiribunale ni enokanna ofuru womulabela Yehova. Aliwa enalabihera avi ofuru ola enavahiwiwa? Enolabihera ofuru ola enakanniwana wihina yaapare mabasa evahiwiwa ni Yehova. (1 Cor. 16:9) Mabasa baani?

18. Mabasa baani ninnihuna malabo yala ookuthula?

¹⁸ Yesu ohuvuhulela wihina adhaari a Mulugu yerege wapara mabasa oolaleya a ‘muthenga dhixa.’ (Mat. 24:14) Wihina yande, aliwa yere okanna nikavihero nangero, obe neere nikuuru nangero. Angero ala yahikanna ‘muthenga dhapama wihina yalaleyele ale enakala velaboni yavati, a malogo matene, mahimo, ni adhiwogelo dhatedhene.’ — Apo. 14:6.

19. Muthenga baani onafwanelela ovuwihiwa naale enamudhivela Yehova?

¹⁹ Nlogo na Mulugu, kannalaleya bahi muthengave muxa wa Omwene wa Mulugu. Enokavihera mabasa aangero elebiwe va Apocalipse kapitulu 8 ofiyera kapitulu 10. Angero ala, enovuwiha dhohoseya dhinlubale dhohiya-iyana wa ale ehinarumedha Omwene wa Mulugu. Bumwahaya, Anamoona a Yehova enovuwiha muthenga onaliganihiwa ni ‘maralala ni mootho,’ enawoga wodhela otoriha wa Mulugu wodhela elabo yela yabure ya Saddana. (Apo. 8:7, 13) Athu enohowela onona wihina omagomihero wihaddamela ni enofuneya werana masadduwo mowaguva yafunaga ovuluwa labo na Yehova. (Sof. 2:2, 3) Mbwenye ola kahiyo muthenga athu enafuniwa wiwa. Bumwahaya nnohowela oliba murima wihina nande werana yeyo. Wafiya ohoseya winlubale, muthenga wogomihera wotoriha onaakale wopiha mbani ni wohimukuwana muthu. — Apo. 16:21.

20. Muwari mwa musolo minli dhinaharela nnaasuze ddi?

²⁰ Mwebaribarene, nnofwanelela wawiwelela ‘madhu eri va yovuhulela ela’, mwaha nnokosa epaddi ya yowakwaneliha ya yovuhulela elebiwe va Apocalipse. (Apo. 1:3) Ki nnande addi okala oororomeleya naarive niharahariwaga ni odhowave nilaleyaga nuliba murima? Dhithu biili podi onlibiha: yobajha, onona wi livuru na Apocalipse nnowawoga amwiddani a Mulugu, ni yanabiili, onona mareeliho nnawakelihu osongolo, nadidelave okala oororomeleya wa Yehova. Siyeyo nnafunihu woona muwari mwa musolo minli dhinaharela.