Jeremías
28 Mií ku̱i̱ya̱ saá, tá ki̱xáʼa ta̱ rey Sedequías ta̱ ñuu Judá xáʼndachíñura, tá ku̱i̱ya̱ ku̱mí tí yo̱o̱ u̱ʼu̱n, ta̱ profeta Hananías se̱ʼe ta̱ Azur ta̱ ñuu Gabaón ni̱ka̱ʼa̱nra ña̱yóʼo xíʼi̱n chí yéʼé veʼe Jehová nu̱ú na̱ su̱tu̱ ta saátu nu̱ú ndiʼi na̱ ñuu: 2 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Sakúachii̱ yókó* ta̱ rey ñuu Babilonia. 3 Ndiʼi ña̱ʼa ña̱ ni̱xi̱yo veʼe Jehová ña̱ nda̱kiʼin ta̱ rey Nabucodonosor ta̱ ñuu Babilonia ku̱a̱ʼa̱n xíʼinra chí Babilonia, ti̱xin u̱vi̱ ku̱i̱ya̱ taxii̱ ña̱ ná ndikó tukuña lugar yóʼo’”. 4 “‘Ta taxitui̱ ña̱ ná ndikó ta̱ Jeconías se̱ʼe ta̱ Jehoiaquim ta̱ rey ñuu Judá, xíʼin ndiʼika na̱ ñuu Judá na̱ nda̱kiʼinna ku̱a̱ʼa̱n chí ñuu Babilonia, káchi Jehová, saáchi sakúachii̱ yókó ta̱ rey ñuu Babilonia’”.
5 Tasaá ni̱ka̱ʼa̱n ta̱ profeta Jeremías xíʼin ta̱ profeta Hananías nu̱ú ndiʼi na̱ su̱tu̱ ta saátu nu̱ú ndiʼi na̱ ñuu na̱ xi̱ndita chí yéʼé veʼe Jehová. 6 Ta̱ profeta Jeremías ka̱chira: “Saá koo. Ná keʼé Jehová ña̱yóʼo, ná saxínu Jehová ndiʼi ña̱ ni̱ka̱ʼún kuu, ta ná taxira ndikó ndiʼi ña̱ʼa ña̱ ni̱xi̱yo veʼe Jehová ña̱ nda̱kiʼinna ku̱a̱ʼa̱n xíʼinna chí Babilonia ta saátu ndiʼi na̱ ñuu na̱ nda̱kiʼinna ku̱a̱ʼa̱n xíʼinna. 7 Soo ixaún ña̱ ma̱ní, kuniso̱ʼo ña̱ ka̱ʼi̱n xíʼún ta saátu ndiʼi na̱ ñuu ná kuniso̱ʼona ña̱ ka̱ʼi̱n. 8 Na̱ profeta na̱ xi̱ndoo tá ya̱chi̱ tá kúma̱níka kooyó profeta xi̱kaʼa̱nna ña̱ koo ku̱a̱chi, tu̱ndóʼo xíʼin kue̱ʼe̱ nu̱ú ku̱a̱ʼání país ta saátu nu̱ú ñuu náʼnu. 9 Tá iin na̱ profeta káʼa̱nna ña̱ vií kundoo na̱ yiví ta xínu ña̱ káʼa̱nna, saá kúú ña̱ kunda̱a̱-inina ña̱ mií Jehová kúú ta̱ chi̱ndaʼá-ñaʼá”.
10 Tasaá ki̱ʼin ta̱ profeta Hananías yókó tú kánuu si̱kí* ta̱ profeta Jeremías ta sa̱kúachiranú. 11 Ta̱ Hananías ni̱ka̱ʼa̱nra nu̱ú ndiʼi na̱ ñuu: “Ña̱yóʼo kúú ña̱ káʼa̱n Jehová: ‘Ki̱ʼva saá sakúachii̱ yókó ta̱ rey Nabucodonosor ta̱ ñuu Babilonia ti̱xin u̱vi̱ ku̱i̱ya̱ ta tavái̱nú si̱kí ndiʼi na̱ ñuu’”. Ta ta̱ profeta Jeremías nda̱kiʼinra ku̱a̱ʼa̱nra.
12 Tándi̱ʼi sa̱kúachi ta̱ profeta Hananías yókó tú xi̱núu si̱kí ta̱ profeta Jeremías, saá ni̱ka̱ʼa̱n Jehová xíʼin ta̱ Jeremías: 13 “Kúáʼan ta ka̱ʼún xíʼin ta̱ profeta Hananías: ‘Ña̱yóʼo kúú ña̱ káʼa̱n Jehová: “Iin yókó tú yitu̱nva kúú tú sa̱kúachiún soo keʼún iin yókó tú ka̱a nu̱ú túyóʼo”. 14 Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Chinúi̱ iin yókó tú ka̱a si̱kí ndiʼi na̱ ñuu ña̱ va̱ʼa ná kachíñuna nu̱ú ta̱ rey Nabucodonosor ta̱ ñuu Babilonia, ta ta̱yóʼo kúú ta̱ kachíñuna nu̱ú. Ta nda̱a̱ kití yukú tí íyo chí yuku̱ ndataxii̱ ndaʼa̱ra”’”.
15 Tasaá ni̱ka̱ʼa̱n ta̱ profeta Jeremías ña̱yóʼo xíʼin ta̱ profeta Hananías: “Hananías, ixaún ña̱ ma̱ní kuniso̱ʼo, su̱ví Jehová kúú ta̱ níchindaʼá yóʼó; sa̱ndáʼviún na̱ ñuu yóʼo xíʼin ña̱ vatá* ña̱ ni̱ka̱ʼún. 16 Xa̱ʼa̱ ña̱kán, ña̱yóʼo kúú ña̱ káʼa̱n Jehová: ‘Sandíʼi-xa̱ʼíi̱ yóʼó nu̱ú ñuʼú yóʼo. Ku̱i̱ya̱ yóʼo kuviún saáchi chi̱kaún-ini na̱ ñuu ña̱ koona contra Jehová’”.
17 Ta tá yo̱o̱ u̱xa̱ ña̱ ku̱i̱ya̱ kán ni̱xi̱ʼi̱va ta̱ profeta Hananías.