1 Crónicas

29 Ta̱ rey David ni̱ka̱ʼa̱nra xíʼin ndiʼi na̱ nda̱kutáʼan kán: “Se̱ʼi̱ ta̱ Salomón ta̱ nda̱kaxin Ndióxi̱, iin ta̱ loʼova kúúra ta̱ kǒo xíni̱va̱ʼara keʼéra ku̱a̱ʼá ña̱ʼa ta chiñu ña̱ keʼéra yóʼo iin chiñu ña̱ káʼnuní kúúña, saáchi templo Jehová Ndióxi̱ kúú ña̱ ixava̱ʼara ta su̱ví kuenta iin na̱ yiví kúúña. 2 Xa̱a̱ chi̱kaa̱níi̱ ndee̱ ña̱ i̱xatu̱ʼvai̱ ña̱ʼa ña̱ kuniñúʼuna ña̱ ixava̱ʼana veʼe Ndióxi̱. Xa̱a̱ ndu̱kúi̱ oro ña̱ kuniñúʼuna ña̱ ixava̱ʼana ña̱ʼa ña̱ oro, plata ña̱ kuniñúʼuna ña̱ ixava̱ʼana ña̱ʼa ña̱ plata, cobre ña̱ kuniñúʼuna ña̱ ixava̱ʼana ña̱ʼa ña̱ cobre, hierro ña̱ kuniñúʼuna ña̱ ixava̱ʼana ña̱ʼa ña̱ hierro, ta saátu yitu̱n tú kuniñúʼuna, yu̱u̱ ña̱ ónice, yu̱u̱ ña̱ chiti̱inna xíʼin ña̱ʼa ña̱ íyo nda̱a̱ táki̱ʼva íyo cemento, yu̱u̱ válí ña̱ mosaico xíʼin ndiʼi yu̱u̱ ña̱ liviní ta saátu ku̱a̱ʼání yu̱u̱ ña̱ alabastro. 3 Ta nu̱ú ndiʼika ña̱ʼa ña̱ xa̱a̱ sa̱ndákoo tu̱ʼvai̱ ña̱ kuniñúʼuna ña̱ ixava̱ʼana veʼe ña̱ yi̱i̱, saátu taxii̱ oro xíʼin plata ña̱ kúú kuenta miíi̱ ña̱ va̱ʼa kuniñúʼunaña xíʼin veʼe Ndióxi̱, xa̱ʼa̱ ña̱ kúʼvi̱ní-inii̱ xínii̱ veʼera. 4 Taxii̱ 102,600 kilo* ña̱ oro ña̱ ke̱e chí Ofir xíʼin 239,400 kilo* ña̱ plata ña̱ va̱ʼaní ña̱ chikaa̱na ini iin tá iin cuarto, 5 oro ña̱ kuniñúʼuna ña̱ ixava̱ʼana ña̱ʼa ña̱ oro, plata ña̱ kuniñúʼuna ña̱ ixava̱ʼana ña̱ʼa ña̱ plata ta saátu ña̱ kuniñúʼuna ña̱ ixava̱ʼana nda̱a̱ ndáaka ña̱ʼa. Ta vitin, ¿ndáa ndóʼó kúni̱ taxi iin ña̱ʼa ndaʼa̱ Jehová?”.

6 Ta na̱ ni̱ka̱ʼa̱n taxi ña̱yóʼo kúú na̱ xi̱niʼi yichi̱ nu̱ú na̱ veʼena, na̱ xi̱niʼi yichi̱ nu̱ú na̱ tribu na̱ ñuu Israel, na̱ xi̱niʼi yichi̱ nu̱ú mil na̱ ta̱a ta saátu na̱ xi̱niʼi yichi̱ nu̱ú iin cientona xíʼin na̱ xi̱kuumií chiñu nu̱ú ta̱ rey. 7 Ta na̱yóʼo ta̱xina 171,000 kilo* ña̱ oro, 10,000 dárico,* 342,000 kilo* ña̱ plata, 615,600 kilo* ña̱ cobre xíʼin 3,420,000 kilo* ña̱ hierro. 8 Na̱ xi̱kuumií yu̱u̱ ña̱ liviní ta̱xinaña ta ta̱ánva̱ʼanaña* ini cuarto nu̱ú xi̱ñuʼu ña̱ʼa ña̱ ndáyáʼvi veʼe Jehová, ña̱ xi̱kiʼin ta̱ Jehiel ta̱ guersonita kuenta xíʼin. 9 Ndiʼi na̱ ñuu ni̱kusi̱íní-inina xa̱ʼa̱ ña̱ ta̱xina ña̱yóʼo saáchi xíʼin ndiʼi níma̱na ta̱xinaña ndaʼa̱ Jehová, ta saátu ta̱ rey David ni̱kusi̱íní-inira.

10 Tasaá, ta̱ David nda̱sakáʼnura Jehová nu̱ú ndiʼi na̱ nda̱kutáʼan kán. Ta ta̱ David ka̱chira: “Ndiʼi tiempo ná ndukáʼnún Jehová, Ndióxi̱ yivándi̱ ta̱ Israel. 11 Miíún Jehová káʼnuníún, kúúmiíníún ndee̱, kuenta miíún kúú ndiʼi ña̱ʼa ña̱ livi, ndáyáʼviníún ta xíniñúʼu ixato̱ʼóna yóʼó, saáchi kuenta miíún kúú ndiʼi ña̱ʼa ña̱ íyo chí ndiví xíʼin nu̱ú ñuʼú. Jehová, kuenta miíún kúú reino ta miíún kúú ta̱ chíñu káʼnu. 12 Miíún kúú ta̱ táxi ña̱ ku̱i̱ká ta táxiún ña̱ kundayáʼvi iin na̱ yiví, ta miíún kúú ta̱ xáʼndachíñu nu̱ú ndiʼi ña̱ʼa. Kúúmiíníún ndee̱, ta saátu táxiún ña̱ ná kundayáʼviní iin na̱ yiví ta ndásandakún-ini ndiʼina. 13 Vitin táxindi̱ tíxa̱ʼvi ndaʼún Ndióxi̱ miíndi̱ ta ndásakáʼnundi̱ ki̱vi̱ún ña̱ liviní.

14 ”Soo, ¿ndáa ta̱ kúú yi̱ʼi̱ ta ndáana kúú na̱ ñui̱ ña̱ va̱ʼa taxindi̱ ndiʼi ña̱ʼa yóʼo ndaʼún? Ndiʼi ña̱ xa̱a̱ ta̱xindi̱ ndaʼún, miíún kúú ta̱ ta̱xiña ndaʼa̱ndi̱. 15 Nu̱ú miíún nda̱a̱ táki̱ʼva íyo na̱ ke̱e inka ñuu saá íyondi̱, táki̱ʼva ni̱xi̱yo na̱ táʼanndi̱ na̱ xi̱ndoo xi̱naʼá. Saáchi ndiʼi tiempo ña̱ tákundi̱ nu̱ú ñuʼú yóʼo, nda̱a̱ táki̱ʼva íyo iin ku̱nda̱ti̱* saá íyoña ta kǒo ña̱ ndátukavíndi̱. 16 Jehová Ndióxi̱ miíndi̱, ndiʼi ña̱ ku̱i̱ká ña̱ nda̱kayandi̱ ña̱ va̱ʼa ixava̱ʼandi̱ iin veʼe nu̱ú ndasakáʼnuna ki̱vi̱ún ña̱ yi̱i̱, miívaún kúú ta̱ ta̱xiña ndaʼa̱ndi̱; kuenta miívaún kúú ndiʼiña. 17 Ndióxi̱ miíi̱, kúnda̱a̱ va̱ʼava inii̱ ña̱ xítoún ndáaña ndíkaa̱ níma̱ iin na̱ yiví ta kúni̱ún ña̱ nda̱kú ná koo inina xíʼún. Xíʼin ndiʼi níma̱i̱ ta̱xii̱ ndiʼi ña̱ʼa yóʼo ndaʼún, ta kúsi̱íní-inii̱ ña̱ xítoi̱ ña̱ nda̱kutáʼan na̱ ñuún yóʼo ta ta̱xina ña̱ʼa yóʼo ndaʼún. 18 Jehová Ndióxi̱ ta̱ Abrahán, ta̱ Isaac xíʼin ta̱ Israel, na̱ táʼanndi̱ na̱ xi̱ndoo xi̱naʼá, chindeétáʼan xíʼin na̱ ñuu yóʼo ña̱ va̱ʼa ndiʼi tiempo ná kuni̱na keʼéna ña̱yóʼo ta ná kachíñuna nu̱ún xíʼin ndiʼi níma̱na. 19 Ta káʼa̱ntui̱ xíʼún ña̱ ná chindeétáʼún xíʼin se̱ʼi̱ ta̱ Salomón ña̱ va̱ʼa xíʼin ndiʼi níma̱ra ná kandíxara chiñu ña̱ xáʼndaún, ña̱ sándakaʼún ndi̱ʼi̱ keʼéndi̱ ta saátu ley ña̱ táxiún, ña̱ va̱ʼa ná keʼéra ndiʼi ña̱ʼa yóʼo ta ixava̱ʼara templo ña̱ xa̱a̱ i̱xatu̱ʼvai̱ ku̱a̱ʼání ña̱ʼa xa̱ʼa̱”.

20 Tasaá ni̱ka̱ʼa̱n ta̱ David xíʼin ndiʼi na̱ nda̱kutáʼan kán: “Vitin ndasakáʼnundó Jehová Ndióxi̱yó”. Ta ndiʼi na̱ nda̱kutáʼan kán nda̱sakáʼnuna Jehová Ndióxi̱ na̱ táʼanna na̱ xi̱ndoo xi̱naʼá ta xi̱kuxítína nda̱a̱ nu̱ú ñuʼú nu̱ú Jehová ta saátu nu̱ú ta̱ rey. 21 Ta nda̱kundeéna ni̱so̱kóna ña̱ʼa nu̱ú* Jehová ta xa̱ʼmituna kití* ta ni̱so̱kónarí nu̱ú Jehová ki̱vi̱ kán ta saátu tá inka ki̱vi̱: ni̱so̱kóna 1,000 si̱ndi̱ki̱ válí, 1,000 ndikachi* che̱e xíʼin 1,000 ndikachi válí ta ni̱so̱kótuna vino xíʼin tíyóʼo; ku̱a̱ʼání ña̱ʼa ta̱xi na̱ ñuu Israel ña̱ va̱ʼa so̱kónaña nu̱ú Ndióxi̱. 22 Xi̱xina ta xi̱ʼina nu̱ú Jehová ki̱vi̱ kán ta ni̱kusi̱íní-inina. Ta saátu ndi̱kó tukuna nda̱kaxinna ta̱ Salomón se̱ʼe ta̱ David ña̱ koora rey ta ña̱ yichi̱ u̱vi̱ kúú ña̱ ke̱ʼéna ña̱yóʼo, ta xi̱ni Jehová ña̱ nda̱kaxinnara ña̱ kuniʼira yichi̱ nu̱ú ndiʼi na̱ ñuu, saátu nda̱kaxinna ta̱ Sadoc ña̱ koora su̱tu̱. 23 Ta̱ Salomón ndu̱ura rey ta xi̱koora* nu̱ú trono Jehová ña̱ va̱ʼa ndakiʼinra chiñu yivára ta̱ David. Va̱ʼaní xi̱kana ndiʼi ña̱ xi̱keʼéra ta ndiʼi na̱ israelita xi̱kandíxana ña̱ xi̱kaʼa̱nra. 24 Na̱ xi̱niʼi yichi̱ nu̱ú na̱ ñuu, na̱ ta̱a na̱ ndakúní na̱ xi̱xaʼa̱n nu̱ú ku̱a̱chi ta saátu ndiʼika na̱ se̱ʼe ta̱ rey David ka̱ndíxana ña̱ kaʼndachíñu ta̱ rey Salomón nu̱úna. 25 Jehová ta̱xira ña̱ ná kundayáʼviní ta̱ Salomón nu̱ú ndiʼi na̱ ñuu Israel, ta saátu ta̱xira ña̱ káʼnuní ná koora nu̱ú ndiʼika na̱ rey na̱ ni̱xi̱yo ñuu Israel.

26 Ta̱ David se̱ʼe ta̱ Jesé kúú ta̱ xa̱ʼndachíñu nu̱ú ndiʼi na̱ ñuu Israel, 27 ta 40 ku̱i̱ya̱ kúú ña̱ xa̱ʼndachíñura nu̱ú na̱ ñuu Israel. U̱xa̱ ku̱i̱ya̱ xa̱ʼndachíñura chí Hebrón, ta 33 ku̱i̱ya̱ xa̱ʼndachíñura chí Jerusalén. 28 Ku̱si̱íní-inira xa̱ʼa̱ ña̱ ku̱a̱ʼání ku̱i̱ya̱ xi̱takura ta ni̱xi̱ʼi̱ra tá xa̱a̱ ku̱chéeníra. Xi̱kuumiíra ku̱a̱ʼání ña̱ ku̱i̱ká ta xi̱ndayáʼviníra ta se̱ʼera ta̱ Salomón kúú ta̱ ni̱xa̱a̱ ndu̱u rey. 29 Ta ndiʼi ña̱ káʼa̱n xa̱ʼa̱ ta̱ rey David ni̱ka̱ʼyi̱ña nu̱ú ña̱ ka̱ʼyi ta̱ Samuel ta̱ xi̱taxi consejo, ta̱ profeta Natán xíʼin ta̱ Gad ta̱ xi̱xito visión, 30 ta saátu ni̱ka̱ʼyi̱ ndiʼika ña̱ káʼa̱n xa̱ʼa̱ ña̱ ku̱u tá xa̱ʼndachíñura, ndee̱ ña̱ xi̱kuumiíra xíʼin ndiʼi ña̱ʼa ña̱ ndo̱ʼora tá tiempo ña̱ ni̱xi̱yora, saátu ña̱ ndo̱ʼo na̱ ñuu Israel xíʼin ndiʼika na̱ ñuu na̱ ni̱xi̱yo yatin kán.