1 Crónicas

9 Ndiʼi na̱ israelita ni̱ka̱ʼyi̱ ki̱vi̱na xíʼin na̱ veʼena ta va̱xiña nu̱ú Libro ña̱ káʼa̱n xa̱ʼa̱ na̱ Rey ñuu Israel. Ta nda̱kiʼinna na̱ yiví na̱ ñuu Judá ku̱a̱ʼa̱n xíʼinna chí Babilonia xa̱ʼa̱ ña̱ va̱ása nda̱kú níxi̱yo inina xíʼin Ndióxi̱. 2 Na̱ siʼnaka ndi̱kó ñuuna xi̱kuu sava na̱ israelita, na̱ su̱tu̱, na̱ levita xíʼin na̱ xi̱kachíñu ini templo.* 3 Ta savatu na̱ veʼe ta̱ Judá, ta̱ Benjamín, ta̱ Efraín xíʼin ta̱ Manasés ni̱xa̱a̱na xi̱kundoona chí Jerusalén, na̱yóʼo xi̱kuuna: 4 ta̱ Utái se̱ʼe ta̱ Amihud, se̱ʼe ta̱ Omrí, se̱ʼe ta̱ Imrí, se̱ʼe ta̱ Baní, na̱ ki̱xi ti̱xin na̱ veʼe ta̱ Pérez se̱ʼe ta̱ Judá. 5 Ta̱ Asaya xíʼin na̱ se̱ʼera. Na̱yóʼo ki̱xina ti̱xin na̱ veʼe ta̱ Selá. Ta̱ Asaya kúú ta̱ xi̱kuu se̱ʼenu̱ú yivára. 6 Saátu ta̱ Jeuel ta̱ ki̱xi ti̱xin na̱ veʼe ta̱ Zérah ndi̱kóra chí Jerusalén. Ndi̱kótu inkaka 690 na̱ ki̱xi ti̱xin na̱ veʼe ta̱ Judá.*

7 Na̱ veʼe ta̱ Benjamín na̱ ni̱xa̱a̱ xi̱kundoo kán xi̱kuu ta̱ Salú ta̱ xi̱kuu se̱ʼe ta̱ Mesulam, se̱ʼe ta̱ Hodavías, se̱ʼe ta̱ Hasenuá, 8 saátu ta̱ Ibneyá se̱ʼe ta̱ Jeroham, ta̱ Elá ta̱ xi̱kuu se̱ʼe ta̱ Uzí, se̱ʼe ta̱ Micrí, xíʼin ta̱ Mesulam ta̱ xi̱kuu se̱ʼe ta̱ Sefatías, se̱ʼe ta̱ Reuel, se̱ʼe ta̱ Ibniya. 9 Ta su̱ví na̱yóʼo níxi̱kuu ndiʼina saáchi ni̱xi̱yo inkaka 956 na̱ veʼe ta̱ Benjamín na̱ ni̱xa̱a̱ xi̱kundoo chí Jerusalén. Ndiʼi na̱ ta̱a yóʼo xi̱kuuna na̱ xi̱niʼi yichi̱ nu̱ú na̱ veʼena.

10 Na̱ su̱tu̱ na̱ ni̱xa̱a̱ xi̱kundoo kán xi̱kuu ta̱ Jedayá, ta̱ Jehoiarib, ta̱ Jakín, 11 ta̱ Azarías (ta̱ xi̱kuu se̱ʼe ta̱ Hilquías, se̱ʼe ta̱ Mesulam, se̱ʼe ta̱ Sadoc, se̱ʼe ta̱ Merayot, se̱ʼe ta̱ Ahitub, ta ta̱ Ahitub xi̱kuu ta̱ xi̱niʼi yichi̱ nu̱úna ti̱xin veʼe* Ndióxi̱ ta̱ nda̱a̱), 12 ta̱ Adaya (ta̱ xi̱kuu se̱ʼe ta̱ Jeroham, se̱ʼe ta̱ Pasjur, se̱ʼe ta̱ Malkiya), ta̱ Maasái (ta̱ xi̱kuu se̱ʼe ta̱ Adiel, se̱ʼe ta̱ Jahzerá, se̱ʼe ta̱ Mesulam, se̱ʼe ta̱ Mesilemit, se̱ʼe ta̱ Imer), 13 xíʼin ndiʼi na̱ ñani na̱yóʼo, na̱ xi̱niʼi yichi̱ nu̱ú na̱ veʼena, 1,760 xi̱kuu na̱ ta̱a na̱ ndakúní na̱ xa̱a̱ ni̱xi̱yo tu̱ʼva ña̱ kachíñuna veʼe Ndióxi̱ ta̱ nda̱a̱.

14 Ta na̱ levita na̱ ni̱xa̱a̱ xi̱kundoo kán xi̱kuu ta̱ Semaya (ta̱ xi̱kuu se̱ʼe ta̱ Hasub, se̱ʼe ta̱ Azricam, se̱ʼe ta̱ Hasabías), na̱ ki̱xi ti̱xin na̱ veʼe ta̱ Merarí; 15 xíʼin ta̱ Bacbacar, ta̱ Héresh, ta̱ Galal, ta̱ Matanías (ta̱ xi̱kuu se̱ʼe ta̱ Micá, se̱ʼe ta̱ Zicrí, se̱ʼe ta̱ Asaf), 16 ta̱ Abdías (ta̱ xi̱kuu se̱ʼe ta̱ Semaya, se̱ʼe ta̱ Galal, se̱ʼe ta̱ Jedutún), ta saátu ta̱ Berekías se̱ʼe ta̱ Asá, se̱ʼe ta̱ Elcaná, na̱ xi̱ndoo chí nu̱ú ni̱xi̱yo ñuu na̱ netofatita.

17 Ta na̱ xi̱kuumií chiñu ña̱ kundaana yéʼé xi̱kuu ta̱ Salum, ta̱ Acub, ta̱ Talmón, ta̱ Ahimán ta saátu ñanina ta̱ Salum ta̱ xi̱niʼi yichi̱ nu̱úna, 18 ta ta̱yóʼo kúú ta̱ xi̱ndaa chí yéʼé ta̱ rey ña̱ kíndo̱o chí este.* Na̱yóʼo kúú na̱ xi̱ndaa yéʼé chí nu̱ú xi̱ndoo na̱ levita. 19 Ta ta̱ Salum, se̱ʼe ta̱ Coré,* se̱ʼe ta̱ Ebiasaf, se̱ʼe ta̱ Coré, ta saátu na̱ ñanira na̱ ki̱xi ti̱xin na̱ veʼe yivára, na̱ coreíta,* na̱yóʼo kúú na̱ xi̱kiʼin kuenta xíʼin chiñu ña̱ xi̱keʼé na̱ xi̱ndaa yéʼé tabernáculo, ta na̱ yivána kúú na̱ xi̱kuumií chiñu ña̱ kiʼinna kuenta xíʼin yéʼé nu̱ú xi̱ndoo na̱ ñuu Jehová. 20 Tá ya̱chi̱, ta̱ Finehás se̱ʼe ta̱ Eleazar kúú ta̱ xi̱niʼi yichi̱ nu̱ú na̱yóʼo ta mií Jehová chi̱ndeétáʼan xíʼinra. 21 Ta̱ Zacarías se̱ʼe ta̱ Meselemías kúú ta̱ xi̱ndaa chí yéʼé tabernáculo.

22 Ta ndiʼi na̱ nda̱kaxinna ña̱ kundaana yéʼé xi̱kuuna 212. Na̱yóʼo xi̱ndoona chí ñuu ña̱ nda̱kiʼin na̱ veʼena. Ta̱ David xíʼin ta̱ Samuel ta̱ xi̱taxi consejo kúú na̱ nda̱kaxin na̱yóʼo ña̱ keʼéna chiñu yóʼo chi xi̱ndaaní-ininana. 23 Miína xíʼin se̱ʼena kúú na̱ xi̱kuumií chiñu ña̱ kundaana yéʼé veʼe Jehová, ta tiempo saá iin veʼe loʼova xi̱kuu ña̱yóʼo. 24 Na̱ xi̱ndaa yéʼé ni̱xi̱yona ku̱mí saá táʼví: chí este, chí oeste, chí norte ta saátu chí sur. 25 Tá xi̱yaʼa loʼo tiempo, na̱ ñanina xi̱keena chí ñuu nu̱ú xi̱ndoona ta xi̱xaʼa̱nna xi̱chindeétáʼanna xíʼinna u̱xa̱ ki̱vi̱. 26 Ni̱xi̱yo ku̱mí na̱ levita na̱ xi̱kuumií chiñu ña̱ ndáyáʼvika ña̱ kundaana yéʼé ta xi̱ndaaní-ininana. Na̱yóʼo xi̱kiʼinna kuenta xíʼin veʼe nu̱ú xi̱xixina ta saátu xíʼin cuarto nu̱ú xi̱ñuʼu ña̱ʼa ña̱ ndáyáʼviní veʼe Ndióxi̱ ta̱ nda̱a̱. 27 Iníí ñuú xi̱ndaana iníísaá sa̱tá veʼe Ndióxi̱ ta̱ nda̱a̱, saáchi ña̱yóʼo kúú chiñu ña̱ xi̱kuumiína ta xi̱niʼina llave ña̱ va̱ʼa kunána yéʼé ndiʼi xi̱ta̱a̱n.*

28 Sava na̱yóʼo xi̱kiʼinna kuenta xíʼin ña̱ʼa ña̱ xi̱xiniñúʼu na̱ xi̱kachíñu; xi̱ndakaʼvinaña tá xi̱kiʼinnaña ku̱a̱ʼa̱n xíʼinna ta saátu tá xi̱sandándikónaña. 29 Sava na̱yóʼo ta̱xina chiñu ndaʼa̱na ña̱ kiʼinna kuenta xíʼin ña̱ʼa ña̱ xi̱xiniñúʼuna, ndiʼi ña̱ʼa ña̱ yi̱i̱, harina ña̱ va̱ʼaní, vino, aceite, olíbano* xíʼin aceite tá kúúmií bálsamo.* 30 Sava na̱ se̱ʼe na̱ su̱tu̱ xi̱keʼéna aceite tá kúúmií bálsamo. 31 Ta̱ Matitías, iin ta̱ levita ta̱ xi̱kuu se̱ʼenu̱ú iin ta̱ coreíta ta̱ xi̱naní Salum, kúú ta̱ xi̱kuumií chiñu ña̱ kiʼinra kuenta xíʼin ña̱ʼa ña̱ xi̱ ixava̱ʼana ini sartén. 32 Sava na̱ ñanira na̱ cohatita kúú na̱ xi̱kuumií chiñu ña̱ ixava̱ʼana si̱ta̱váʼa ña̱ xi̱sokóna nu̱ú* Ndióxi̱ ndiʼi sábado.

33 Na̱yóʼo kúú na̱ xi̱xita ta xi̱niʼina yichi̱ nu̱ú na̱ veʼe na̱ levita ini cuarto nu̱ú xi̱xixina, ta va̱ása níxi̱keʼéna inkaka chiñu, chi xa̱a̱ ni̱xi̱yova chiñu ña̱ xi̱xiniñúʼu keʼéna ñuú xíʼin káʼñu.* 34 Na̱yóʼo kúú na̱ xi̱niʼi yichi̱ nu̱ú na̱ levita ta xi̱ndoona chí Jerusalén.

35 Ta̱ Jeiel ni̱xi̱yora chí Gabaón, ta xi̱kuura yivá na̱ xi̱ndoo kán. Ñá síʼira xi̱naníñá Maacá. 36 Ta̱ Abdón xi̱kuu se̱ʼenu̱úra, tándi̱ʼi ka̱ku ta̱ Zur, ta̱ Quis, ta̱ Baal, ta̱ Ner, ta̱ Nadab, 37 ta̱ Guedor, ta̱ Ahió, ta̱ Zacarías xíʼin ta̱ Miclot. 38 Ta̱ Miclot xi̱kuura yivá ta̱ Simeam. Ndiʼi na̱yóʼo yatin xi̱ndoona xíʼin na̱ ñanina chí ñuu Jerusalén, yatin xi̱ndoona xíʼin inkaka na̱ ñanina. 39 Ta̱ Ner xi̱kuura yivá ta̱ Quis; ta̱ Quis xi̱kuura yivá ta̱ Saúl; ta̱ Saúl xi̱kuura yivá ta̱ Jonatán, ta̱ Malki-Súa, ta̱ Abinadab xíʼin ta̱ Esbaal. 40 Ta se̱ʼe ta̱ Jonatán xi̱kuu ta̱ Merib-Baal. Ta̱ Merib-Baal xi̱kuura yivá ta̱ Miqueas. 41 Ta na̱ se̱ʼe ta̱ Miqueas xi̱kuu ta̱ Pitón, ta̱ Mélec, ta̱ Tahrea xíʼin ta̱ Acaz. 42 Ta̱ Acaz xi̱kuura yivá ta̱ Jará; ta̱ Jará xi̱kuura yivá ta̱ Alémet, ta̱ Azmávet xíʼin ta̱ Zimrí. Ta̱ Zimrí xi̱kuura yivá ta̱ Mozá. 43 Ta̱ Mozá xi̱kuura yivá ta̱ Bineá; ta̱ Bineá xi̱kuura yivá ta̱ Refayá; ta̱ Refayá xi̱kuura yivá ta̱ Eleasá; ta̱ Eleasá xi̱kuura yivá ta̱ Azel. 44 I̱ñu̱ xi̱kuu na̱ se̱ʼe ta̱ Azel ta na̱yóʼo xi̱nanína Azricam, Bocrú, Ismael, Searías, Abdías xíʼin Hanán. Ndiʼi na̱yóʼo xi̱kuu se̱ʼe ta̱ Azel.