1 Crónicas

18 Tá ni̱ya̱ʼa loʼo tiempo, ta̱ David ku̱chiñura ka̱nitáʼanra xíʼin na̱ filisteo, ta nda̱kiʼinra ñuu Gat xíʼin ñuu ña̱ ni̱xi̱yo yatin kán ndaʼa̱na. 2 Ta saátu ku̱chiñura ka̱nitáʼanra xíʼin na̱ ñuu Moab, ta na̱ moabita ki̱xáʼana káchíñuna nu̱ú ta̱ David ta xi̱chaʼvina impuesto ndaʼa̱ra.

3 Ta̱ David ku̱chiñura ka̱nitáʼanra xíʼin ta̱ Hadadézer ta̱ kúú rey ñuu Zobá yatin chí Hamat, tá ku̱a̱ʼa̱n ta̱yóʼo ndakiʼinra ña̱ xi̱kuu ñuʼúra chí yu̱ta Éufrates. 4 Ta̱ David ku̱chiñura nda̱kiʼinra 1,000 carreta tú xíka nu̱ú ku̱a̱chi, ti̱inra 7,000 na̱ yósó* kuáyi̱ ta saátu 20,000 na̱ soldado na̱ xíka xáʼá tasaá ni̱xa̱ʼnu̱ra xa̱ʼa̱ kuáyi̱ tí íxi̱tá carreta, soo 100 kúú tí va̱ása níxa̱ʼnu̱ra xa̱ʼa̱. 5 Tá ki̱xi na̱ sirio na̱ ndóo chí Damasco ña̱ chindeétáʼanna xíʼin ta̱ rey Hadadézer ta̱ ñuu Zobá, ta̱ David xa̱ʼníra 22,000 na̱yóʼo. 6 Tasaá chi̱ndoo ta̱ David na̱ soldadora chí Siria ña̱ xi̱kindo̱o yatin chí Damasco, ta na̱ sirio ki̱xáʼana káchíñuna nu̱úra ta xi̱chaʼvina impuesto ndaʼa̱ra. Ta Jehová xi̱chindeétáʼanra xíʼin ta̱ David nda̱a̱ ndáaka nu̱ú xi̱xaʼa̱nra nu̱ú ku̱a̱chi. 7 Ta̱ David ki̱ndaara escudo ña̱ ti̱ku̱i̱ta̱* ña̱ oro ña̱ xi̱niʼi na̱ xi̱kachíñu nu̱ú ta̱ Hadadézer, ta nda̱kiʼinraña ku̱a̱ʼa̱n xíʼinra chí Jerusalén. 8 Ta̱ rey David nda̱kiʼinra ku̱a̱ʼání cobre ña̱ ni̱xi̱yo chí Tibhat xíʼin Cun, ña̱ xi̱kuu ñuu ta̱ Hadadézer. Ta cobre yóʼo kúú ña̱ xi̱niñúʼu ta̱ Salomón ña̱ i̱xava̱ʼara ña̱ʼa ña̱ cobre nu̱ú xi̱ñuʼu ti̱kui̱í, nama̱* xíʼin inkaka ndaʼáchíñu ña̱ cobre.

9 Tá ku̱ndaa̱-ini ta̱ rey Tou ta̱ ñuu Hamat ña̱ ku̱chiñu ta̱ David ka̱nitáʼanra xíʼin ndiʼi na̱ soldado ta̱ Hadadézer ta̱ rey ñuu Zobá, 10 ndi̱ku̱n saá chi̱ndaʼára se̱ʼera ta̱ Hadoram nu̱ú ta̱ rey David ña̱ va̱ʼa nda̱ka̱tu̱ʼunrara á íyo va̱ʼara ta saátu ña̱ ka̱ʼa̱nra tu̱ʼun va̱ʼa xíʼinra xa̱ʼa̱ ña̱ ku̱chiñura ka̱nitáʼanra xíʼin ta̱ Hadadézer (saáchi xa̱a̱ ku̱a̱ʼání yichi̱ ka̱nitáʼan ta̱ Hadadézer xíʼin ta̱ Tou). Ta̱ Hadoram níʼira ña̱ʼa ña̱ plata, ña̱ oro ta saátu ña̱ cobre ta̱xira ndaʼa̱ ta̱ David. 11 Ta̱ rey David nda̱taxira ña̱yóʼo ndaʼa̱ Jehová, nda̱a̱ táki̱ʼva ke̱ʼéra xíʼin plata ta saátu xíʼin oro ña̱ nda̱kiʼinra ndaʼa̱ na̱ ñuu na̱ ku̱chiñura ka̱nitáʼanra xíʼin: ña̱ nda̱kiʼinra ndaʼa̱ na̱ ñuu Edom, na̱ ñuu Moab, ndaʼa̱ na̱ ammonita, na̱ filisteo xíʼin na̱ amalequita.

12 Ta̱ Abisái se̱ʼe ñá Zeruyá xa̱ʼníra 18,000 na̱ edomita chí yoso̱ ña̱ naní Sal. 13 Ta ta̱ David chi̱ndoora na̱ soldadora chí Edom, ta na̱ edomita ki̱xáʼana káchíñuna nu̱úra. Mií Jehová xi̱chindeétáʼan xíʼin ta̱ David ña̱ xi̱kuchiñura xi̱kanitáʼanra nda̱a̱ ndáaka nu̱ú xi̱xaʼa̱nra nu̱ú ku̱a̱chi. 14 Ta̱ David nda̱kundeéra xa̱ʼndachíñura iníí ñuu Israel ta nda̱kúní xi̱ndatiinra ku̱a̱chi xíʼin ndiʼi na̱ ñuura. 15 Ta̱ Joab se̱ʼe ñá Zeruyá xi̱kuu ta̱ xi̱niʼi yichi̱ nu̱ú na̱ soldado, ta ta̱ Jehosafat se̱ʼe ta̱ Ahilud xi̱kuu ta̱ xi̱kaʼyi xa̱ʼa̱ ña̱ʼa ña̱ xi̱kuu. 16 Ta̱ Sadoc se̱ʼe ta̱ Ahitub xíʼin ta̱ Ahimélec se̱ʼe ta̱ Abiatar xi̱kuuna su̱tu̱, ta ta̱ Savsá xi̱kuu secretario. 17 Ta̱ Benaya se̱ʼe ta̱ Jehoiadá xi̱kuu ta̱ xi̱niʼi yichi̱ nu̱ú na̱ keretita xíʼin na̱ peletita, ta na̱ ta̱a se̱ʼe ta̱ rey David ni̱xa̱a̱na xi̱kuumiína chiñu ña̱ ndáyáʼvi nu̱úra.