1 Crónicas

23 Tá xa̱a̱ ku̱chée ta̱ David ta si̱lóʼo kúma̱ní kuvira, nda̱kaxinra ta̱ Salomón ña̱ koora rey nu̱ú na̱ ñuu Israel. 2 Tasaá sa̱ndátakara ndiʼi na̱ níʼi yichi̱ nu̱ú na̱ ñuu Israel, na̱ su̱tu̱ xíʼin na̱ levita. 3 Nda̱kaʼvina na̱ levita na̱ xi̱kuumií 30 ku̱i̱ya̱ á ku̱a̱ʼáka ta ndiʼi na̱yóʼo xi̱kuuna 38,000. 4 Nu̱ú ndiʼi na̱yóʼo, 24,000 kúú na̱ xi̱kiʼin kuenta xíʼin chiñu ña̱ xi̱keʼéna veʼe Jehová ta 6,000 xi̱kuu na̱ xi̱keʼé inkaka chiñu ña̱ ndáyáʼvi ta saátu xi̱kuuna juez, 5 ta 4,000 xi̱kuu na̱ xi̱ndaa yéʼé ta saátu 4,000 xi̱kuu na̱ xi̱ndasakáʼnu Jehová xíʼin instrumento tú ni̱ka̱ʼa̱n ta̱ David xa̱ʼa̱: “Ke̱ʼíi̱ ndiʼi instrumento yóʼo ña̱ va̱ʼa kuniñúʼunanú ña̱ ndasakáʼnuna Ndióxi̱”.

6 Viíní nda̱taʼví ta̱ David na̱ se̱ʼe ta̱ Leví: ta̱ Guersón, ta̱ Cohat xíʼin ta̱ Merarí. 7 Ta̱ Ladán xíʼin ta̱ Simeí, na̱ ki̱xi ti̱xin na̱ veʼe na̱ guersonita. 8 Ta u̱ni̱ xi̱kuu na̱ se̱ʼe ta̱ Ladán: ta̱ Jehiel ta̱ xi̱niʼi yichi̱ nu̱úna, ta̱ Zetam xíʼin ta̱ Joel. 9 Ta u̱ni̱ xi̱kuu na̱ se̱ʼe ta̱ Simeí: ta̱ Selomot, ta̱ Haziel xíʼin ta̱ Harán. Ta na̱yóʼo kúú na̱ xi̱niʼi yichi̱ nu̱ú na̱ veʼe ta̱ Ladán. 10 Ta se̱ʼe ta̱ Simeí xi̱kuu ta̱ Jáhat, ta̱ Ziná, ta̱ Jeús xíʼin ta̱ Berías. 11 Ta̱ Jáhat kúú ta̱ nu̱ú xi̱niʼi yichi̱ nu̱úna ta ta̱ u̱vi̱ xi̱kuu ta̱ Zizá.* Soo ta̱ Jeús xíʼin ta̱ Berías kǒo ku̱a̱ʼá se̱ʼena níxi̱yo, ta tá nda̱kaʼvina na̱yóʼo iin familia kuitíva ndu̱una ta iin chiñu kuití kúú ña̱ xi̱keʼé ndiʼina.

12 Ku̱mí xi̱kuu na̱ se̱ʼe ta̱ Cohat: ta̱ Amram, ta̱ Izhar, ta̱ Hebrón xíʼin ta̱ Uziel. 13 Na̱ se̱ʼe ta̱ Amram xi̱kuu ta̱ Aarón xíʼin ta̱ Moisés. Soo ta̱ Aarón xíʼin na̱ se̱ʼera kúú na̱ nda̱kaxinna ña̱ kachíñuna tabernáculo, ña̱ so̱kóna ña̱ʼa nu̱ú* Jehová, ña̱ kachíñuna nu̱úra ta kuniñúʼuna ki̱vi̱ Ndióxi̱ ña̱ va̱ʼa taxira bendición ndaʼa̱ na̱ ñuu ndiʼi tiempo. 14 Ta xíʼin na̱ levita nda̱kaʼvina na̱ se̱ʼe ta̱ Moisés ta̱ xi̱kachíñu nu̱ú Ndióxi̱ ta̱ nda̱a̱. 15 Ta na̱ se̱ʼe ta̱ Moisés xi̱kuu ta̱ Guersom xíʼin ta̱ Eliezer. 16 Nu̱ú ndiʼika na̱ veʼe ta̱ Guersom, ta̱ Sebuel kúú ta̱ xi̱niʼi yichi̱ nu̱úna. 17 Nu̱ú ndiʼika na̱ veʼe ta̱ Eliezer, ta̱ Rehabías kúú ta̱ xi̱niʼi yichi̱ nu̱úna. Iinláva xi̱kuu se̱ʼe ta̱ Eliezer, soo se̱ʼera ta̱ Rehabías ku̱a̱ʼáníva xi̱kuu se̱ʼera. 18 Ta nu̱ú ndiʼi na̱ se̱ʼe ta̱ Izhar, ta̱ Selomit kúú ta̱ xi̱niʼi yichi̱ nu̱úna. 19 Se̱ʼe ta̱ Hebrón xi̱kuu ta̱ Jerías ta ta̱yóʼo kúú ta̱ xi̱niʼi yichi̱ nu̱úna; ta̱ u̱vi̱ xi̱kuu ta̱ Amarías, ta̱ u̱ni̱ xi̱kuu ta̱ Jahaziel ta ta̱ ku̱mí xi̱kuu ta̱ Jecameam. 20 Ta se̱ʼe ta̱ Uziel xi̱kuu ta̱ Miqueas, ta̱yóʼo kúú ta̱ xi̱niʼi yichi̱ nu̱úna ta ta̱ u̱vi̱ xi̱kuu ta̱ Isías.

21 Na̱ se̱ʼe ta̱ Merarí xi̱kuu ta̱ Mahlí xíʼin ta̱ Musí. Ta na̱ se̱ʼe ta̱ Mahlí xi̱kuu ta̱ Eleazar xíʼin ta̱ Quis. 22 Nina ñaʼá xi̱kuu se̱ʼe ta̱ Eleazar ta kǒo se̱ʼeta̱ara níxi̱yo nda̱a̱ tá ni̱xi̱ʼi̱ra, ña̱kán na̱ táʼanra na̱ se̱ʼe ta̱ Quis kúú na̱ ti̱ndaʼa̱ xíʼin náyóʼo. 23 U̱ni̱ xi̱kuu se̱ʼe ta̱ Musí: ta̱ Mahlí, ta̱ Éder xíʼin ta̱ Jeremot.

24 Na̱yóʼo kúú na̱ se̱ʼe ta̱ Leví na̱ nda̱kaʼvina nda̱a̱ táki̱ʼva íyo na̱ veʼena, ta saátu na̱ xi̱niʼi yichi̱ nu̱ú na̱ veʼena. Nda̱kaʼvina na̱yóʼo ta ka̱ʼyina ki̱vi̱na ta xi̱kixáʼana xi̱kachíñuna veʼe Jehová tá xi̱kuumiína 20 ku̱i̱ya̱. 25 Saáchi ta̱ David ni̱ka̱ʼa̱nra: “Jehová Ndióxi̱ na̱ ñuu Israel, ta̱xira ña̱ ndakindee̱ na̱ ñuura ta koora Jerusalén ndiʼi tiempo. 26 Ta saátu va̱ása xíniñúʼu xa̱a̱ síín síín nu̱ú ku̱ʼu̱n na̱ levita xíʼin tabernáculo ni ña̱ʼa ña̱ xíniñúʼuna ña̱ va̱ʼa keʼéna chiñu ini ña̱yóʼo”. 27 Nda̱a̱ táki̱ʼva íyo chiñu ña̱ xa̱ʼnda ta̱ David, nda̱kaʼvina na̱ levita na̱ kúúmií 20 ku̱i̱ya̱ á ku̱a̱ʼáka. 28 Chiñu ña̱ xi̱kuumií na̱yóʼo kúú ña̱ chindeétáʼanna xíʼin na̱ se̱ʼe ta̱ Aarón ña̱ kachíñuna veʼe Jehová, ña̱ kiʼinna kuenta xíʼin yéʼé veʼera, cuarto nu̱ú xi̱xixi na̱ yiví ta saátu nu̱ú xi̱ndakatana ña̱ʼa ña̱ yi̱i̱, ta saátu keʼéna inkaka chiñu ña̱ xíniñúʼu keʼéna veʼe Ndióxi̱ ta̱ nda̱a̱. 29 Chiñu ña̱ xi̱kuumií na̱yóʼo kúú ña̱ kiʼinna kuenta xíʼin si̱ta̱váʼa ña̱ sóko̱na nu̱ú Ndióxi̱, harina ña̱ va̱ʼaní ña̱ sóko̱na nu̱ú Ndióxi̱, galleta yásín* ña̱ kǒo yuxa̱n iyá* ñúʼu xíʼin, si̱ta̱váʼa ña̱ kúva̱ʼa nu̱ú xi̱yo̱, yuxa̱n ña̱ xa̱a̱ nda̱sakana ta saátu xi̱niñúʼu chuʼunna ndiʼi ña̱yóʼo. 30 Ndiʼi xi̱ta̱a̱n* xíʼin ndiʼi xi̱kuaá xi̱niñúʼu ku̱ʼu̱nna nu̱ú Jehová ña̱ va̱ʼa taxina tíxa̱ʼvi ndaʼa̱ra ta ndasakáʼnunara. 31 Ndiʼi tiempo xi̱chindeétáʼanna xíʼin na̱ xi̱xaʼmi kití* ta xi̱sokónarí nu̱ú Jehová ki̱vi̱ sábado, tá xi̱kuuña yo̱o̱ xa̱á ta saátu tá xi̱xiyo vikó nda̱a̱ táki̱ʼva káʼa̱n ley ña̱ ta̱xi Ndióxi̱, ta xi̱keʼé ni̱ʼina ña̱yóʼo nu̱ú Jehová. 32 Ta saátu xi̱saxínuna chiñu ña̱ xi̱kuumiína ti̱xin tabernáculo, lugar ña̱ yi̱i̱ ta saátu xi̱saxínuna chiñu ña̱ xi̱keʼéna ini veʼe Jehová xíʼin na̱ ñanina na̱ se̱ʼe ta̱ Aarón.