1 Crónicas

24 Nda̱taʼvína ndiʼi na̱ se̱ʼe ta̱ Aarón. Na̱ se̱ʼe ta̱ Aarón xi̱kuu ta̱ Nadab, ta̱ Abihú, ta̱ Eleazar xíʼin ta̱ Itamar. 2 Ta siʼnaka ta̱ Nadab xíʼin ta̱ Abihú ni̱xi̱ʼi̱ nu̱ú yivána ta va̱ása níxi̱yo se̱ʼena, soo ta̱ Eleazar xíʼin ta̱ Itamar kǒo nísandákoovína ña̱ koona su̱tu̱. 3 Ta̱ David (xíʼin ta̱ Sadoc ta̱ ki̱xi ti̱xin na̱ veʼe ta̱ Eleazar xíʼin ta̱ Ahimélec ta̱ ki̱xi ti̱xin na̱ veʼe ta̱ Itamar) viíní nda̱taʼvíra na̱yóʼo ña̱ va̱ʼa keʼéna chiñuna. 4 Ku̱a̱ʼáka xi̱kuu na̱ xi̱niʼi yichi̱ nu̱ú na̱ se̱ʼe ta̱ Eleazar soo loʼova xi̱kuu na̱ xi̱niʼi yichi̱ nu̱ú na̱ se̱ʼe ta̱ Itamar, ña̱kán siaʼa kúú ña̱ nda̱taʼvínana: 16 kúú na̱ xi̱niʼi yichi̱ nu̱ú na̱ se̱ʼe ta̱ Eleazar ta 8 kúú na̱ xi̱niʼi yichi̱ nu̱ú na̱ se̱ʼe ta̱ Itamar.

5 Ta saátu chi̱kaa̱na suerte* ña̱ va̱ʼa ndataʼvína na̱ se̱ʼe ta̱ Eleazar xíʼin na̱ se̱ʼe ta̱ Itamar, saáchi sava na̱yóʼo xi̱kuu na̱ xi̱niʼi yichi̱ nu̱ú na̱ xi̱kachíñu lugar ña̱ yi̱i̱ ta saátu savana xi̱kuu na̱ xi̱niʼi yichi̱ nu̱ú na̱ xi̱kachíñu nu̱ú Ndióxi̱ ta̱ nda̱a̱. 6 Tasaá, ta̱ Semaya se̱ʼe ta̱ Netanel ta̱ xi̱kuu secretario na̱ levita ka̱ʼyira ki̱vi̱na, ta xi̱ni ta̱ rey tá ke̱ʼéra ña̱yóʼo saátu xi̱ni na̱ xi̱niʼi yichi̱ nu̱ú na̱ ñuu, ta̱ su̱tu̱ Sadoc, ta̱ Ahimélec se̱ʼe ta̱ Abiatar xíʼin na̱ xi̱niʼi yichi̱ nu̱ú na̱ veʼe na̱ su̱tu̱ xíʼin na̱ levita. Ta xa̱a̱ síín síín nda̱taʼvína na̱ veʼe ta̱ Eleazar xíʼin na̱ veʼe ta̱ Itamar, ta iin tá iin na̱yóʼo nda̱kaxinna.

7 Tá chi̱kaa̱na suerte,* ta̱ nu̱ú ka̱na ki̱vi̱ kúú ta̱ Jehoiarib, ta̱ u̱vi̱ xi̱kuu ta̱ Jedayá, 8 ta̱ u̱ni̱ xi̱kuu ta̱ Harim, ta̱ ku̱mí xi̱kuu ta̱ Seorim, 9 ta̱ u̱ʼu̱n xi̱kuu ta̱ Malkiya, ta̱ i̱ñu̱ xi̱kuu ta̱ Mijamín, 10 ta̱ u̱xa̱ xi̱kuu ta̱ Hacoz, ta̱ u̱na̱ xi̱kuu ta̱ Abías, 11 ta̱ i̱i̱n xi̱kuu ta̱ Jesúa, ta̱ u̱xu̱ xi̱kuu ta̱ Secanías, 12 ta̱ u̱xu̱ iin xi̱kuu ta̱ Eliasib, ta̱ u̱xu̱ u̱vi̱ xi̱kuu ta̱ Jaquim, 13 ta̱ u̱xu̱ u̱ni̱ xi̱kuu ta̱ Hupá, ta̱ u̱xu̱ ku̱mí xi̱kuu ta̱ Jesebeab, 14 ta̱ xa̱ʼu̱n xi̱kuu ta̱ Bilgá, ta̱ xa̱ʼu̱n iin xi̱kuu ta̱ Imer, 15 ta̱ xa̱ʼu̱n u̱vi̱ xi̱kuu ta̱ Hezir, ta̱ xa̱ʼu̱n u̱ni̱ xi̱kuu ta̱ Hapizez, 16 ta̱ xa̱ʼu̱n ku̱mí xi̱kuu ta̱ Petahías, ta̱ o̱ko̱ xi̱kuu ta̱ Jehezquel, 17 ta̱ o̱ko̱ iin xi̱kuu ta̱ Jakín, ta̱ o̱ko̱ u̱vi̱ xi̱kuu ta̱ Gamul, 18 ta̱ o̱ko̱ u̱ni̱ xi̱kuu ta̱ Delayá ta ta̱ o̱ko̱ ku̱mí xi̱kuu ta̱ Maazías.

19 Ña̱yóʼo kúú chiñu ña̱ xi̱kuumiína tá xi̱kiʼvina veʼe Jehová, nda̱a̱ táki̱ʼva íyo chiñu ña̱ xa̱ʼnda Jehová Ndióxi̱ na̱ ñuu Israel nu̱ú ta̱ Aarón, ta̱ táʼanna ta̱ ni̱xi̱yo xi̱naʼá.

20 Ta ndiʼika na̱ levita na̱ ki̱ndoo kúú na̱yóʼo: ta̱ Subael se̱ʼe ta̱ Amram; ta̱ Jehdeyá se̱ʼe ta̱ Subael; 21 ta̱ Isías ta̱ xi̱niʼi yichi̱ nu̱úna, ta̱ xi̱kuu se̱ʼe ta̱ Rehabías; 22 ta̱ Selomot ta̱ ki̱xi ti̱xin na̱ veʼe na̱ izharita; ta̱ Jáhat se̱ʼe ta̱ Selomot; 23 ta̱ Jerías ta̱ xi̱niʼi yichi̱ nu̱úna, ta̱ xi̱kuu se̱ʼe ta̱ Hebrón; ta̱ u̱vi̱ xi̱kuu ta̱ Amarías; ta̱ u̱ni̱ xi̱kuu ta̱ Jahaziel ta ta̱ ku̱mí xi̱kuu ta̱ Jecameam; 24 ta̱ Miqueas se̱ʼe ta̱ Uziel; ta̱ Samir se̱ʼe ta̱ Miqueas. 25 Ta̱ Zacarías se̱ʼe ta̱ Isías; ta̱ Miqueas xi̱kuura ñani ta̱ Isías.

26 Ta̱ Mahlí xíʼin ta̱ Musí se̱ʼe ta̱ Merarí; ta̱ Beno se̱ʼe ta̱ Jaazías. 27 Ta̱ Beno, ta̱ Soham, ta̱ Zacur xíʼin ta̱ Ibrí se̱ʼe ta̱ Jaazías, ta̱ ki̱xi ti̱xin na̱ veʼe ta̱ Merarí; 28 ta̱ Eleazar se̱ʼe ta̱ Mahlí kǒo se̱ʼera níxi̱yo; 29 ta̱ Jerahmeel se̱ʼe ta̱ Quis; 30 xíʼin ta̱ Mahlí, ta̱ Éder xíʼin ta̱ Jerimot na̱ xi̱kuu se̱ʼe ta̱ Musí.

Ndiʼi na̱yóʼo xi̱kuuna se̱ʼe ta̱ Leví nda̱a̱ táki̱ʼva íyo na̱ veʼena. 31 Ta saátu chi̱kaa̱ na̱yóʼo suerte nda̱a̱ táki̱ʼva ke̱ʼé na̱ ñanina na̱ se̱ʼe ta̱ Aarón, ta xi̱ni ta̱ rey David, ta̱ Sadoc, ta̱ Ahimélec xíʼin na̱ xi̱niʼi yichi̱ nu̱ú na̱ veʼe na̱ su̱tu̱ xíʼin na̱ levita tá ke̱ʼéna ña̱yóʼo. Nda̱a̱ táki̱ʼva ke̱ʼéna xíʼin na̱ veʼe ta̱ káʼnuka saá ke̱ʼéna xíʼin na̱ veʼe ta̱ loʼoka.